Y SẼN TÕE N SƖNG SÕSG TO-TO
SAK A 2
Sõsd-y ne nebã noog-noogo
Biiblã sẽn yete: “B sã n togs gomd a wakate, ad sɩd yaa sõma!”—Yel. 15:23.
A Filip sẽn maan to-to
1. Ges-y VIDEO wã, wall y karem Tʋʋm 8:30, 31. Rẽ poor bɩ y leok sogsgã:
Wãn to la a Filip sɩng sõsgã?
Bõe yĩng t’a Filip sẽn maan to-to wã yaa mak-sõngo, sõs noog-noog ne nedã wɛɛngẽ, la sõng-a t’a bãng bũmb a sẽn da pa mi wã wɛɛngẽ?
A Filip sẽn maan to-to wã wilgda tõnd bõe?
2. D sã n sõsd ne ned noog-noogo, rẽ na n sõnga a soabã t’a yamã gãande, la kɩt t’a rat n kelg koe-noogã.
Maan-y wa a Filip
3. Yɩ-y ned sẽn gũusd n getẽ. Ned nen-wamd la a manesem sẽn yaa to-to wã tõe n sõngame tɩ d bãng bũmb wʋsg a zugu. Bũmb n wilgd t’a soabã rat n kelgame bɩ? Yãmb tõe n soka sokr n paam n gom bũmb sẽn be Biiblã pʋgẽ yell ne-a. Y tõe n sok-a lame yaa: “Yãmb miime tɩ . . . ?” A soabã sã n pa rat n sõs ne yãmba, bɩ y ra modg-a ye.
4. Tall-y sũ-mare. Ra tags-y tɩ yaa tɩlɛ tɩ y gom bũmb sẽn be Biiblã pʋgẽ yell ne-a zĩig pʋgẽ ye. Gũ-y wakat sẽn zemse, n gom rẽ yelle. Sasa ninga, tõe tɩ yaa y sẽn na n le wa sõs ne-a nindaar la y na n yaool n gom rẽ yelle.
5. Toeemd-y y sõsgã tɩ zemsd ne kɛlgdbã. Kɛlgdã tõe n wẽnemda sõsgã n tees zĩig a to. Rẽ wã, bɩ y modg n gom bũmb sẽn na n naf kɛlgdã yell n tɩ yɩɩda, baa rẽ sã n baoodame tɩ y bas bũmb ning yell y sẽn da rat n gom sɩngrẽ wã, n gom bũmb a to sẽn be Biiblã pʋgẽ yell ne-a.