Wilg-y nebã tɩ b yell pak-y lame

A Zeezi sẽn maan to-to

VIDEO: A Zeezi sõsa ne pagã bulgẽ wã

1. Ges-y VIDEO wã, wall y karem Zã 4:​6-9. Rẽ poor bɩ y leok sogsgã:

1. Bõe la a Zeezi gũus n gese, n yaool n na n sɩng sõsg ne pagã?

2. A Zeezi yeelame yaa: “M bõos koom n yũ.” Bõe yĩng tɩ woto yaa mak-sõngo, sɩng sõsg ne nedã wɛɛngẽ?

A Zeezi sẽn maan to-to wã wilgda tõnd bõe?

2. D sã n sɩngd sõsg ne bũmb sẽn pak d sõsd-n-taagã, tõe n sõngame tɩ d tõog n sõs ne-a sõma.

Maan-y wa a Zeezi

3. Sakd-y n toeemd-y-yã. Baa yãmb sã n zoe n segla bũmb yãmb sẽn dat n yeel n sɩng sõsga, n wa mik tɩ rẽ pa zems ne kɛlgdã yɛl sẽn yaa to-to wã, bɩ y sak n toeeme. Sɩngd-y sõsg ne bũmb sẽn pak nebã. Sok-y y meng yaa:

1. ‘Bõe yell la b gomd kibayã pʋgẽ?’

2. ‘M yagsã, m tʋmd-n-taasã, wall m karen-bi-taasã gomda bõe yelle?’

4. Yɩ-y ned sẽn gũusd n getẽ. Sok-y y meng yaa:

1. a. ‘Bõe la a soabã maanda? Tõe tɩ yaa bõe yell la a tagsda?’

2. b. ‘A soabã fu-yerdɩ wã, a sẽn maneg a meng to-to wã, wall bũmb kẽer sẽn be a zakã pʋgẽ wilgda a sẽn yaa tũudum ning ned wall buud ning ned bɩ?’

3. d. ‘Yaa wakat sẽn zems tɩ m tõe n sõs ne a soabã bɩ?’

5. Kelgd-y neere.

1. Ra gomd-y wʋsg ye.

2. Basd-y tɩ neb a taabã togsd b tagsgo. Sã n mik tɩ zemsame, bɩ y sokd sogsgo.