Y SẼN TÕE N SƖNG SÕSG TO-TO
SAK A 3
Maand-y nebã neere
Biiblã sẽn yete: “Nonglem maanda . . . neere.”—1 Kor. 13:4.
A Zeezi sẽn maan to-to
1. Ges-y VIDEO wã, wall y karem Zã 9:1-7. Rẽ poor bɩ y leok sogsgã:
A Zeezi reng n sãooga raoã sẽn da yaa zoangã bɩ, bɩ yaa koe-noogã la a reng n taas-a?—Ges-y Zã 9:35-38.
Yãmb tagsdame tɩ yaa bõe n kɩt tɩ raoã sak n kelg a Zeezi?
A Zeezi sẽn maan to-to wã wilgda tõnd bõe?
2. Ned sã n neẽ t’a yell pak-d lame, kɩtdame t’a rat n kelg koɛɛg ning d sẽn tar n na n taas-a wã.
Maan-y wa a Zeezi
3. Kʋm-y-yã a soabã nimbãanega. Ning-y y meng a zĩigẽ.
Sok-y y meng yaa: ‘Bũmb n kɩt t’a maand yɩɩr bɩ? Bõe la m tõe n maan tɩ sõng-a, la yɩ-a noogo?’ Y sã n maand woto, na n sõng-y lame tɩ y tõog n maan a soabã neer ne y sũur fãa, tɩ pa yɩ wa b modgd-y lame ye.
Y sã n kelgd a soabã neere, y wilgdame tɩ bũmb nins sẽn pak-a wã paka yãmb me. A sã n wa togsd yãmb a tagsgo, pa rẽ bɩ a zu-loɛɛga, ra toeem-y sõsgã ye.
4. Gomd-y ne bʋgsem la ne waoogre. Yãmb sã n kʋmd ned nimbãanega, la y rat ne y sũur fãa n sõng-a, y koe-zomã na n wilga rẽ vẽenega. Maan-y gũusg ne bũmb ning y sẽn na n yeelã, la y sẽn na n yeel rẽ to-to wã. Zãag-y y mens ne goam sẽn sãamd sũuri.
5. Sõngd-y-yã a soabã. Tũnug-y ne segb buud toor-toor n maan bũmb takɩ n sõng a soabã. Y sã n maand ned neere, tõe n kɩtame t’a sak n sõs ne yãmba.