SOGSG KOM-BƖƖSÃ SẼN SOKDE
Bõe la m tõe n maan n paas m minimã sõs ne nebã wɛɛngẽ?
Ad bũmb kẽer yell d sẽn na n gom sõs-kãngã pʋgẽ:
Bõe yĩng tɩ f segd n gomd ne nebã neng ne nenga?
Neb kẽer yetame tɩ sõs ne ned neng ne neng yaa toog n yɩɩd f sẽn na n gʋls mesaaz n tool-a.
“Sõs ne ned neng ne neng yaa toog wʋsgo, bala f sã n togs gomde, f pa tõe n lebs n maneg-a bɩ n yẽes-a ye.”—A Anna.
“Gʋls mesaaz n tool ned yaa wa f sẽn na n maan bũmb tɩ b rɩk ne aparɛy, tɩ gom neng ne nengã yaa wa f sẽn na n maand bũmb zãma taoore. M sã n wa gomd ne neda, m yeta m meng wakat fãa tɩ m segd n maana gũusg n da wa gom n tudg ye.”—A Jean.
Baasgo, na n wa yɩɩ tɩlɛ tɩ f bãng f sẽn segd n sõs ne ned neng ne neng to-to. Wala makre, f sã n wa baood zo-rãmba, f sã n wa baood tʋʋm bɩ sẽn na yɩl n da wa bõn f tʋʋmã, wall f sã n wa baood ned n na n kẽ kãadem, sã n mik tɩ f taa kãadem kõom.
F pa segd n yɛɛs ne sõs ne ned neng ne neng ye. F tõe n zãmsa f sẽn tõe n maan rẽ to-to baa f sã n yaa yãn-zoɛta.
“Tõnd fãa mi n wa togsa bũmb sẽn pa zems tɩ sãam d sũuri. Ra yɩ dem-dem ne f meng ye.”—A Neal.
F sẽn tõe n sɩng sõsg to-to
Sok sogsgo. Tags bũmb sẽn tõe n yɩ ned noog yelle, n tik rẽ n sɩng sõsga. Wala makre, f tõe n sokame yaa:
“Fo toga sor kiis nins sẽn loogã bɩ?”
“Ad sɩt wɛɛb-kãngã yaa sõma koe! Fo zoe n kẽe a pʋgẽ bɩ?”
“Fo wʋma b sẽn gomd . . . ?”
Ad bũmb a to f sẽn tõe n maane: Tags n ges bõe wɛɛngẽ la foo ne f kɛlgdã yɛl wõnd taaba. Wala makre, yãmb bee lekoll a ye bɩ? Yãmb tʋmda zĩ-yɛng bɩ? Tik zĩig ning yãmb yɛlã sẽn wõnd taabã n sok sokre.
“Tags sogsg sẽn noom foo tɩ f rat n bãng neb a taabã tagsg b zug yelle.”—A Maritza.
F sẽn segd n gũus ne bũmb ninga: Ra sok sogsg wʋsg sẽn tõe n kɩt tɩ f to wã wa baood a meng ye. Sẽn paase, ra sok sogsg sẽn tõe n ning-a yãnd ye. Wala makre: “Bõe la fo yɛɛsd n tɩ yɩɩda?” bɩ “bõe yĩng tɩ f ningd fut sẽn yaa kẽeg haoo wakat fãa?” Sogsg a woto tõe n ninga ned yãnde. Sokr a yiib-n-soabã tõe n yɩɩ wa f sãbsd-a lame.
F sã n sok ned sokr la f togs f tagsg nand t’a leok wall a leoorã poore, a pa na n getẽ tɩ f sokd-a-la sogsg wʋsg ye. F sã n maan woto, y na n tõog n sõsa ne taaba, tɩ pa yɩ wa sogsg f sẽn sokd ye.
Sogsg nins fo sẽn sokdã kɩtame tɩ b getẽ tɩ fo yaa ned sẽn nong feesg bɩ?
Biiblã saglga: “Ninsaal sũur tagsa yaa wa koom sẽn be zĩ-zulumsẽ, la sẽn tar-a yam-vẽenem yiisd-b lame.”—Yel-bũnã 20:5.
Yɩ ned sẽn mi kelgre. F sã n dat tɩ foo ne ned sõsg kẽng taoore, sẽn tar yõod yaa f sẽn na n mi kelgr n yɩɩd f sẽn na n nong goama.
“M modgdame n na n bãng bũmb m sẽn da pa mi ned ning m sẽn sõsd ne wã zugu. Rẽ poore, m tagsda bũmb ning a sẽn yeelã yelle, sẽn na yɩl n wa tõog n tik rẽ n sok-a sokr nindaar tɩ d le paam n sõse.”—A Tamara.
F sẽn segd n gũus ne bũmb ninga: Ra maan yɩɩr ne bũmb ning f sẽn na n le yeel ye. F sã n kelgd neere, f na n tõog n tika bũmb f sõsd-n-taagã sẽn yeel zug n gome.
Biiblã saglga: “Ned buud fãa segd n wɩnga ne kelgre, la a maag ne goama.”—Zak 1:19.
Wilg tɩ f to wã yell sɩd pak-f lame. F sã n wilg tɩ f sõsd-n-taagã yell pak-f lame, sõsgã na n yɩ-f-la noogo.
“F sã n wilg tɩ f to wã sẽn yetã sɩd pak-f lame, sõsgã na n talla yamleoogo, baa wakat kẽer f sã n pa mi f sẽn na n yɛɛlga.”—A Marie.
F sẽn segd n gũus ne bũmb ninga: Ra sok sokr sẽn pa pak-f ye. Wala makre f sã n yeel yaa: “Ad f fuugã yaa neere! Fo ra-a-la wãna?” Tõe n yɩɩ wa f paooga a soabã.
Biiblã saglga: “Ra bao-y y mens nafr bal ye. Bao-y y taabã nafr me.”—Filip rãmbã 2:4.
F maanda wãn n kʋ sõsga? Bi-bɩɩg a ye yʋʋr sẽn boond t’a Jordan yeelame: “Modg n kʋ sõsgã ne goam sẽn kengd raoodo. Wala makre f sã n yeel ned tɩ f sũur nooma f sẽn sõs ne-a wã, pa rẽ bɩ Wẽnd na sõsg-a laafɩ, tõe n paka sor tɩ f le paam n sõs ne-a nindaare.”