D na n pʋɩya seb-vãad n bool nebã tɩ b wa a Zezi kũumã tẽegre

D na n pʋɩya seb-vãad n bool nebã tɩ b wa a Zezi kũumã tẽegre

1. Wakat bʋg la d na n sɩng seb-vãadã pʋɩɩbo, la bõe yĩng tɩ na n kaoos n yɩɩg yʋʋm nins sẽn loogã?

¹ Arzũma, tʋʋlg kiuugã pipi daarã tɛka, d na n sɩnga seb-vãadã pʋɩɩb n bool nebã tɩ b wa a Zezi kũuma tẽegre. Tẽegrã na n yɩɩ tʋʋlg kiuugã rasem 26 daare. Woto rat n yeelame tɩ d na n pʋɩya seb-vãadã n kaoos n yɩɩg yʋʋm nins sẽn loogã. Rẽ na n kɩtame tɩ d paam neb wʋsg n kõ-b seb-vãadã, sẽn yɩɩd fãa d tigingã mooneg zĩig sã n yalmame.

2. Bõe la b maan tɩ y tõe n paam seb-vãadã, la y tõog n pʋɩ-b y moonegã zĩig fãa?

² Segend-y y mense: Kãsem-dãmbã na n wilga d sẽn na n maan to-to n tõog n pʋɩ seb-vãadã d moonegã zĩig fãa, la b wilg d sã n na n bas-b-la neb nins sẽn pa be b zagsẽ wã yĩnga. Y sã n pʋɩ seb-vãadã zak-zak tɩ moonegã zĩig sa tɩ sebã ketẽ, y tõe n kell n pʋɩya soayã noy la zĩis a taab neb sẽn beẽ. Tʋʋmdã yel-gɛt na n gesame tɩ b rʋʋg seb-vãadã zĩig ning b sẽn bĩngdẽ periodik rãmbã, tɩ koe-moondbã tõe n tɩ yãke. La b pa na n yiis seb-vãadã fãa vugr n dʋʋg ye. B na n yiisda bilf-bilf hal tɩ wa sa. Dẽnd d segd n yãka sẽn na n sek tõnd semennã pʋgẽ wã bala.

3. D sã n wa pʋɩt seb-vãadã, bõe la d segd n ning d yamẽ?

³ Bõe la d na n yeele? Yɩta sõma tɩ y gom koɛɛg-koɛɛga, n tõog n pʋɩ seb-vãadã wʋsgo. Y tõe n tũnuga ne sagls nins sẽn be seb-kãngã neng a 4 zĩigẽ wã n pʋɩ seb-vãadã. La bãng-y tɩ pa tɩlae tɩ y tũ goamã kɛpɩ ye. Ned sã n wilg t’a nonga koɛɛgã, bɩ a sã n tara sokre, d tõe n yals n sõsa ne-a la d ra yɩ yãg-yãg n loog ye. Wɩkɛn dãmbã, d tõe n naagda seb-vãadã ne periodik rãmbã n pʋɩta. Tʋʋlg rasem a 2 daare, d pa na n kãab nebã Biibl zãmsg ye. Yaa seb-vãadã la d na n wɩsg d meng n pʋɩ.

4. Bõe yĩng tɩ d segd n pʋɩ seb-vãad ne yẽesem?

⁴ D gũudame tɩ neb wʋsg wa naag-d n maan Tẽegrã. Sõsgã na n sõng-d lame tɩ d bãng a Zezi sẽn yaa ned ninga. (1 Kor. 11:26) Leb n na n sõng-d lame tɩ d bãng a kũuma sẽn nafd tõnd to-to. (Rom 6:23) Sẽn na n baase, na n wilga bũmb ning sẽn kɩt tɩ d segd n tẽegd a Zezi yellã. (Zã 17:3) Bɩ d modg n naag n pʋɩ seb-vãadã ne yẽesem!