D na n pʋɩya Tẽegrã seb-vãad tʋʋl-nif rasem a 2 wã tɛka
1. D na n pʋɩya Tẽegrã boolg seb-vãad wakat bʋgo, la bõe yĩng tɩ d maand woto yʋʋmd fãa?
1 Tʋʋl-nif kiuugã rasem a 2 n tãag a rasem 17 wã, d na n pʋɩya seb-vãad n bool nebã tɩ b wa tɩ d maan a Zezi kũumã tẽegre, sẽn yaa bũmb sẽn tar yõod n yɩɩd yʋʋmdã pʋgẽ wã. Yʋʋm nins sẽn loogã, neb wʋsg saka boollã n wa. Wala makre, pag n bool filiyallã a Zezi kũumã tẽegr daar n yeel woto: “Mam taa yir mas-masã, n mik boolg sebr m doogã noore. Mam dat n kẽngame, la m pa mi sẽn yaa lɛɛr ningã ye.” Saam-biig ning sẽn dɩk telefõnnã wilg-a lame t’a ges seb-vãoogã zugu. La pagã yeelame t’a na n sɩd kẽngame.
2. D sã n na n kõ ned boolgã seb-vãoogo d tõe n yeelame tɩ bõe?
2 D sẽn tõe n bool nebã to-to: Sẽn mik tɩ yaa rasem 15 bal la d tar n na n bool nebã, yɩta sõma tɩ d gomd koɛɛg-koɛɛga. D tõe n yeela woto: “Ne-y yibeoogo, bɩ ne-y zaabre. Mam waame n na n kõ yãmb ne y zakã rãmb seb-vã-kãngã, n boond yãmb tɩ y wa tɩ d naag taab n maan a Zezi kũumã tẽegre. Yaa tʋʋl-nif kiuug rasem 17, hatã daare. [Kõ-y a soabã seb-vãoogã.] B na n wilga a Zezi kũumã sẽn tõe n naf tõnd to-to. Wakatã ne zĩig ning d sẽn na n maanã bee seb-vãoogã zugu.”
3. D na n maana wãn n tõog n bool neb wʋsgo?
3 Tigingã moonegã zĩig sã n yalma wʋsgo, kãsem dãmbã tõe n kõo koe-moondbã sor tɩ b basd seb-vãadã sẽn ka-b yirã yĩnga, la y segd n ninga zĩ-lillẽ. Modg-y me n bool neb nins y sẽn kẽnd n sõsd ne Biiblã zugã, y roagdbã, y tʋmd-n-taasã, y karen-bi-taasã, la y mitinsã fãa. Y sã n wa pʋɩt seb-vãadã wɩkɛnnã, y sã n get tɩ sakdame fãa bɩ y kãab nebã periodik rãmbã me. Y tõeeme me n yɩ sõngd so-pakd tʋʋl-nif kiuugã, n tõog n bool neb wʋsgo.
4. Bõe yĩng tɩ d rat tɩ neb wʋsg sak boollã n wa Tẽegrã?
4 Neb nins sẽn na n wa wã na n sɩd bãnga yɛl wʋsgo. B na n bãngame tɩ yaa a Zeova sẽn nong ãdem-biisã wʋsgã yĩng n kɩt t’a kõ rondã. (Zã 3:16) B na n bãnga Wẽnnaam Rĩungã sẽn na n wa ne nafa nins n kõ ninsaalbã. (Ezai 65:21-23) B na n wilg-b lame tɩ b tõe n tɩ yãa sẽn deegd-b sãambã n kos Biibl zãmsgo. D kota a Zeova t’a kɩt tɩ pʋ-peelem dãmb wʋsg sak n wa naag tõnd n maan a Zezi kũumã tẽegre!