D na n pʋɩya seb-vãad dũniyã gill zug n bool nebã tɩ b wa Tẽegrã
1. Nand tɩ Tẽegrã daar ta, bõe la d na n maan dũniyã gill zugu?
1 A Zezi yeela woto: ‘Bɩ y maand bõn-kãngã n tẽegd mam yelle.’ (Luk 22:19) Yʋʋmd 2010, tʋʋlg kiuugã rasem 30, a Zeova Kaset rãmbã na n tigma taab n maan a Zezi kũumã tẽegr wa a sẽn yeelã. Sẽn sɩngd ne tʋʋlg kiuugã rasem 13 n tãag a rasem 30 wã, d na n pʋɩya seb-vãad dũniyã gill zug n bool nebã.
2. Bõe la d tõe n yeel n kõ ned seb-vãoogã?
2 D sẽn na n pʋɩ seb-vãadã to-to: Y tõe n kõo y kɛlgdã seb-vãoogã la y wilg-a foto wã sẽn be a zugã. Rẽ poor bɩ y yeel woto: “Tʋʋlg kiuugã rasem 30 wã zaabre, dũniyã gill zugu, neb milyõ rãmb na n sega taab n tẽeg a Zezi kũumã yelle. Yãmb booll sebr la woto. Y tõe n boola y zo-rãmbã me tɩ b wa. Wakatã la zĩig ning d sẽn na n maan Tẽegrã bee seb-vãoogã zugu.” Sã n tõeyã, bɩ y karem Luk 22:19 n wilg-a tɩ yaa Biiblã n kõ noor tɩ b maand Tẽegrã. D tẽeg tɩ sẽn mik tɩ yaa wakat bilf bal la d rɩk n na n pʋɩ seb-vãadã, yɩta sõma tɩ d gomd koɛɛg-koɛɛg bala.
3. Ãnd dãmb la d tõe n boole?
3 Yãmb tigingã mooneg zĩig sã n yalma wʋsgo, kãsem dãmbã tõe n kɩtame tɩ koe-moondbã basd seb-vãadã neb nins b sẽn pa mikã zagsẽ. Sã n tõeyã, bɩ y naag seb-vãadã ne periodik rãmbã n kõ nebã. Modg-y n bool-y neb nins y sẽn kẽnd n kaagdẽ wã, y Biibl karen-biisã, y tʋmd-n-taasã, y karen-bi-taasã, y roagdbã, y yagsã la y mitinsã.
4. Bõe la d segd n maan n wilg tɩ d nanda rondã a Zeova sẽn kõ tɩ wilgdẽ t’a nonga tõndã?
4 D segl d mens sõma n pʋɩ seb-vãadã wʋsgo: Tẽegrã wakat yaa sasa tõnd sẽn paam n tõe n moon koɛɛgã wʋsg n paase. Y tõe n manega y sẽkã sẽn na yɩl n tõog n yɩ sõngr so-pakda. Yãmb tara kamb bɩ Biibl karen-biis sẽn maand modgr wʋsg bɩ? Sã n yaa woto, bɩ y togs kãsem dãmbã tɩ b ges nin-kãensã sã n tõe n yɩɩ koe-moondb sẽn pa reeg lisgu, n lagem yãmb n pʋɩ seb-vãadã. Sẽn na yɩl n wilg tɩ d nanda rondã a Zeova sẽn kõ tɩ wilgdẽ t’a nonga tõndã, d segd n segla d mens n zĩnd Tẽegrã sasa, la d modg n bool neb wʋsg tɩ b wa.—Zã 3:16.