D na n pʋɩya seb-vãad n bool nebã tɩ b wa a Zezi kũuma tẽegre!
1. Yʋʋmd 2009, tʋʋlg kiuugã rasem 21 wã tɛka, bõe la d na n maan dũniyã gill zugu, la bõe yĩnga?
1 Yʋʋmd 2009, lamusã daar tʋʋl-nif kiuug rasem a 9, a Zeova Kaset rãmbã na n tigma taab dũniyã gill zug n tẽeg a Zezi sẽn maan bũmb ning n wilg t’a nonga ãdem-biisã yelle. (Rom 5:6-8) D ratame tɩ neb milyõ rãmb wa naag tõnd n tẽeg a Zezi kũuma yelle. Tʋʋlg kiuugã rasem 21 wã tɛka, d na n pʋɩya seb-vãad dũniyã gill zug n bool nebã tɩ b wa Tẽegrã.
2. Bõe la d segd n ning d yamẽ, d sã n wa pʋɩt nebã seb-vãadã?
2 Bũmb nins d sẽn segd n ning d yamẽ: Tʋm-y ne foto rãmbã, sogsgã la verse rãmbã sẽn be seb-vãoogã zugã sõma. Wala makre, y tõe n wilga ned foto wã sẽn be pipi seb-nengã pʋgẽ wã, la y yeel-a woto: “M dat n boola yãmb tɩ y wa naag tõnd n tẽeg a Zezi kũuma yʋʋmd 2009, lamusã daare, tʋʋl-nif kiuugã rasem a 9.” Rẽ poor bɩ y wilg-a seb-vãoogã gom-zugu, la sogsgã. Wilg-y-yã t’a tõe n waa ne a zak rãmba, n paas ne neb a taaba.
3. D sã n kõ ned seb-vãoogã pĩnda, bõe la d segd n maane?
3 Sã n mik tɩ yãmb moonegã zĩig yalma wʋsgo, kãsem dãmbã tõe n gesa sã n yaa sõma tɩ y maan yam ne yam n basd seb-vãadã neb nins y sẽn pa mikd yirã rignoyẽ. Wɩkɛn dãmbã, d na n naagã zʋrno rãmbã ne seb-vãadã n pʋɩta. Tẽeg-y n bool-y neb nins sẽn zãmsd Biiblã ne yãmbã, y lebg-n-ti-ges rãmbã, y roagdbã, y karen-bi-taasã, y tʋmd-n-taasã, y yagsã, la neb a taaba. Rɩẽ, saam-bi-poak a ye pʋɩya a roagdb 30 seb-vãadã, la a tẽegd-b wakat fãa tɩ b modg n wa tɩ Tẽegrã tara yõodo. A sũur yɩɩ noog wʋsgo, a sẽn paam t’a roagdb 25 wa Tẽegrã tɩ b sʋkã neb a 4 me sak n na n zãms Biiblã kaoosg zugẽ wã.
4. Bõe la d segd n maan masã, la bõe yĩnga?
4 D segl d mens masã: Koe-moondba fãa la bal tõe n moona tʋʋlg ne tʋʋl-nif kiisã wʋsg n paase. Y sã n tar kamb wall Biibl karen-biis sẽn bɩt tẽebã wɛɛngẽ, tõe tɩ sasa kãngã b tõe n lebga koe-moondb sẽn pa reeg lisgu. Yaa masã la d segd n sɩng d mens seglgo, sẽn na yɩl n tõog n pʋɩ seb-vãadã wʋsg n bool nebã tɩ b wa naag-d n tẽeg bũmb nins a Zeova ne a Zezi sẽn maane, tɩ wilgdẽ tɩ b sẽn nong ãdem-biisã to-to wã pa tar to ye.—Zã 3:16; 15:13.