D paas d koe-moonegã minim: D sẽn tõe n tũnug ne ẽntɛrfon n taas ned koɛɛgã to-to

Bũmb ning sẽn kɩt tɩ tar yõodo: Tõe n yaa toog ne koe-moondb kẽer tɩ b tũnug ne ẽntɛrfon n taas koɛɛgã. La bõe n tõe n sõng-d tɩ zu-loe-kãngã ra boog d yẽesmã? D tẽeg tɩ tõe tɩ yaa ne manesem-kãngã bal la d na n paam tɩ koe-noogã ta neb kẽere. (Rom 10:14) Kibay toor-toor n wilgd tɩ d tõe n sɩd tũnuga ne ẽntɛrfon n moon koɛɛgã tɩ wom biisi. (Ges-y yʋʋmd 2011 aniyɛɛrã neng 65-66 la yʋʋmd 2000 aniyɛɛrã neng 54, s a 3.) Ad sagls a wãn sẽn tõe n sõng-do.

Ad y sẽn tõe n maan dẽ to-to:

Nand tɩ y yi koe-moonegã, bɩ y gʋls y sẽn na n togs bũmb ningã sebr zug koɛɛg-koɛɛga, tɩ y sã n ta zak sẽn tar ẽntɛrfon noor bɩ y karem tɩ y kɛlgdã kelge. Woto tõe n booga y rabeemã. Y sã n ta zak noor bɩ y reng n wilg y waoongã võore. Y sã n yã zĩig b sẽn gʋls kɛlgdã yʋʋr bɩ y pʋt-a y sõsgã sasa. Sõsgã baasgẽ, bɩ y wilg-a tɩ y na n dɩgla seb-vãoog wall periodik a rig-noorẽ wã, sẽn na n sõng-a t’a paam kibay a taab n paase.
Tall-y yam-sõngo. Sõsgã sasa, bɩ y ra gãnem y neng ye. Gomd-y tɩ yaa wa a yasa y taoorã tɩ y sõsd ne taaba.
Bas-y y yam n gomd wa raasenkamã. Modg-y n zẽk y koɛɛgã n zems tɩ y goamã yɩ vẽenega. Y sã n wa sõsda, sã n pa tɩlae bɩ y ra kʋʋgd y goamã, la y ra gomd tʋʋll-tʋʋll me ye.
Yɩ-y gũusdba. Bala, sã n yaa zak sẽn tar rot wʋsgo, roog fãa tõe n tara a ẽntɛrfonne. Sã n wa yaa woto, y tõe n yãka yam n kaag baa yaa rot a tãabo, la y gʋls zĩig ning y sẽn tekã. Y sã n bao n na n bool rotã fãa pʋsẽ baraare, na n kaoosame tɩ zĩigã rãmb yam wa yooda.

Mak-y woto ki-kãngã:

Zak pʋgẽ Biibl zãmsgã sasa, bɩ y maan mak-n-wilgi, tɩ yaa wa koe-moond sẽn tũnug ne ẽntɛrfon n taasd ned koɛɛgã.