Sõng-y neb nins sẽn dat sõngrã

Dũniyã gill zugu, yaa toog ne neb wʋsg tɩ b paam rɩɩb la ro-gãaga. Kẽer sẽn dat bal yaa b sõng-b tɩ b bãng tɩ manegr n wate. D sã n modg n sõng neb nins sẽn dat sõngr a woto wã, wãn to la Wẽnnaam na n ning-d barka?

WẼNNAAM SEBRÃ SẼN YETE

“Sẽn sõngd-a nimbãan-ned pengda Sẽn-Ka-Saabo, la bãmb na n dola yẽnda.”—YEL-BŨNÃ 19:17.

SÕNG NED SẼN DAT N YƐƐLGA

A Zeezi wẽe yel-bũnd n gom rao bi-bees sẽn fã yelle. B pãba raoã hal t’a rat n ki, la b bas-a n looge. (Luk 10:29-37) Sãan n da loogdẽ, n yã raoã b sẽn pogl wʋsgã. A gesa raoã yelle, baa ne a sẽn da pa buud a ye ne-a wã.

Sãan-kãngã sẽn yaa nin-sõngã pa tɩp raoã la a kõ-a bũmb a taab bal ye. A belsa raoã sẽn na yɩl t’a sũ-sãamsã booge.

Kiba-kãngã wilgda tõnd bõe? A Zeezi wẽe yel-bũndã n na n wilg tɩ d segd n sõnga neb nins sẽn dat sõngrã, wa d sẽn tõe tɛka. (Yel-bũnã 14:31) Wẽnnaam sebrã yetame tɩ ka la bilfu, Wẽnnaam na n kɩtame tɩ naongã la namsgã sa. Tõe tɩ d sokda d meng wãn to la Wẽnnaam na n maan rẽ, la na n yɩɩ wakat bʋgo. Sõsg ning sẽn pʋgdã pʋgẽ, d na n goma d Naandã sẽn nong-dã sẽn na n wa maan bũmb ning n kõ-yã yelle.