D WILG TƖ D YAA KIRIS-NEB HAKƖƖKA
D wilg t’a Zeova noyã la a saglsã yaa sõma
Wẽnnaam a Zeova lugla noy ninsaalbã sẽn segd n tũ. Wala makre, a yeelame tɩ yaa rao ne pag bal n tõe n kẽ kãadem, la tɩ b kãadmã poore, b segd n zĩnda ne taab b yõor tɛka. (Mat. 19:4-6, 9) A gɩdga yoob la rẽgd buud fãa. (1 Kor. 6:9, 10) A pʋd n kõo a nin-buiidã sagls futã la mengã manegr wɛɛngẽ, tɩ kɩt tɩ b yaa toor ne neb a taabã.—Tõo. 22:5; 1 Tɩm. 2:9, 10.
Rũndã-rũndã, neb wʋsg pa tũud a Zeova noyã ye. (Rom. 1:18-32) B rɩkda neb kẽer togs-n-taar n yelgd b futã, n manegd b mens la b zãad b mense. Neb wʋsg gomda b tʋʋm-dẽgd yell n pa zoet yãnde, la b ningd sẽn pa maand-b wa bãmbã taale.—1 Pɩy. 4:3, 4.
D sẽn yaa a Zeova Kaset rãmbã, d segd n wilgda ne raood t’a noyã la a saglsã yaa sõma. (Rom. 12:9) Wãn to? D segd n wilgda nebã bũmb nins sẽn noom Wẽnnaamã ne yam. La d segd n ket n wɩngda ne Wẽnnaam noyã tũub me. Wala makre, d sã n na n da futu, pa rẽ bɩ n maneg d menga, d tõe n soka d meng yaa: ‘Mam sẽn yãk fut ninsã, pa rẽ bɩ m sẽn maneg m meng to-to wã wilgdame tɩ m tũuda a Zeova noyã bɩ, bɩ wilgdame tɩ m dɩkda dũniyã neb togs-n-taare? Mam fu-yerdɩ wã la m sẽn manegd m meng to-to wã wilgdame tɩ m yaa kiris-ned hakɩɩk bɩ?’ Pa rẽ bɩ d sã n wa na n yãk filim wall bũmb d sẽn dat n ges tele wã pʋgẽ, d tõe n soka d menga: ‘Mam sẽn dat n ges bũmb ningã taa a Zeova yam bɩ? Yaa ãnda noy la a sagls la b pẽgd be? Mam sẽn na n ges bũmb ningã pa na n boog m sẽn nong a Zeova noyã to-to wã sɩda? (Yɩɩn. 101:3) Pa na n yɩ kug-lakdg n kõ m zakã neb wall neb a taab sɩda?’—1 Kor. 10:31-33.
Bõe yĩng tɩ d segd n tũud a Zeova noyã la a saglsã? Ka la bilfu, a Zeezi Kirist na n sãama dũniyã soolem toɛy-toɛyã ne nin-wẽnsã fãa. (Eze. 9:4-7) Yaa neb nins sẽn maand Wẽnnaam daabã bal n na n põse. (1 Zã 2:15-17) Rẽ yĩngã, bɩ d ket n wilgdẽ t’a Zeova noyã la a saglsã yaa sõma, tɩ nebã yãt d tʋʋm-sõma wã n waoogd Wẽnnaam.—1 Pɩy. 2:11, 12.
Mam futã la m sẽn manegd m meng to-to wã wilgdame tɩ ãnd raab m la m tũuda?
GES-Y VIDEO KÃNGÃ: LEBG A ZEOVA ZOA—RAO A YE, PAG A YE. RẼ POOR BƖ Y SOK SOGS-KÃENSÃ:
Bõe yĩng t’a Zeova noyã la a saglsã tũub yaa yam bũmbu?
Bõe yĩng tɩ roagdbã segd n zãms b kambã a Zeova noyã la a saglsã hal b yãadmẽ?
Wãn to la kom-bɩɩsã la sẽn kʋʋlbã tõe n sõng nebã, tɩ b paam Wẽnnaam zoodo?