Yãmb sogsgã leoore
◼ D sã n wa rabd Betɛllẽ wã bɩ tʋʋmdã will biru zĩigẽ wall Rĩungã roogẽ, fu-bʋs buud la d segd n yeelge?
Dũniyã gill zugu, Rĩungã roto, tigis-kãsemsã roto, Betɛll dãmbã la tʋʋmdã biru rãmbã yaa zĩis b sẽn yãk a Zeova tʋʋmdã yĩnga. Yaa zĩis sẽn zemse, sẽn yaa yɩlemde, la sẽn maneg tɩ yaa neer n sakd gesgo. D pa tõe n dɩk zĩ-kãens n mak ne zĩis nins sẽn be a Sʋɩtãan dũni-wẽng kãnga pʋgẽ wã ye. D sã n kẽng n na n tɩ ges zĩ-kãensã b sẽn yãk a Zeova tʋʋmdã yĩnga, neb nins sẽn get tõndã segd n bãngame tɩ tõnd yaa a Zeova nin-buiid sẽn maand a raabo.
Tõnd sẽn yaa kiris-nebã, bũmb fãa pʋga, d “wilgdame tɩ tõnd yaa Wẽnnaam tʋm-tʋmdba,” baa d fu-yerdi wã la d sẽn manegd d mensã to-to wã wɛɛngẽ. (2 Kor. 6:3, 4, Kãab-paalgã Koe-noogo) D segd n talla manesem sẽn yaa sõma me. Sẽn yaa wakat ning fãa, d fu-yerdi wã, la d sẽn manegd d mensã to-to wã segd n zemsa ne a Zeova Kaset soab sẽn tog n maan to-to. Woto sɩd tara yõod wʋsgo, sẽn yɩɩd fãa d sã n na n tɩ ges tʋʋmdã yẽgr sẽn be Niu Yorkã, la a wilã sẽn be dũniyã gill zugã.
Organisés pour faire la volonté de Jéhovah sebrã goma fu-yerdi wã la mengã manegr yõod yelle. Sebrã wilgame tɩ tara yõod wʋsg tɩ d yɩ yɩlma, n yeelg fut sẽn zemse, la d manegd d mengã sõma koɛɛgã mooneg la tigissã sasa. Seb-kãng neng 138 sull a 3 wã pʋgẽ, b yeta woto: “Tẽeg-y-yã, yʋʋr ning sẽn yaa Betɛllã rat n yeelame tɩ ‘Wẽnnaam zaka.’ Rẽ n so tɩ d futã, d sẽn manegd d mensã to-to wã, la d manesmã segd n yɩ wa d sẽn be tigissã sasa wã.” Koe-moondb nins sẽn pẽ Betɛllã, la sẽn yit-b zĩ-zãrgẽ wã fãa segd n tũu no-kãnga. B sã n maand woto, b wilgda b mi-beoogo, la tɩ b nanda Betɛllã.—Yɩɩl 29:2.
Tõnd fu-yerdi wã segd n wilgdame tɩ d yaa wẽn-sakdba. (1 Tɩm. 2:10) D sã yeelgd fu-sõma la d manegd d mensã sõma, na n kɩtame tɩ nebã ra sãbs tũudum hakɩkã ye. La saam-biis kẽer sẽn wat n get tʋʋmdã will biru rãmb pa gũusd ne b fu-yerdi wã ye. B yeelgda b futã yaar bala, pa rẽ bɩ n yeelg fuug tɩ nebã nee b yĩngã. Sẽn yaa sasa ning fãa, pa zems tɩ Kiris-ned yelg fuug a woto buud ye. Rẽ n so tɩ d sẽn maandã fãa pʋgẽ d segd n tũ Biiblã noyã, tɩ nebã bãng Wẽnnaam nin-buiidã ne dũniyã neb n bake, tɩ rẽ fãa yɩ Wẽnnaam waoogr yĩnga.—Rom 12:2; 1 Kor. 10:31.
Dẽnd d sã n na n tɩ ges tʋʋmdã biru kãseng sẽn be Niu Yorkã wall a wilã sẽn be dũniyã gill zugã, baa sã n mikame tɩ d ra kẽnga zĩig a to n tek n na n tũ be, d segd n soka d mens woto: ‘Mam sẽn yeelg fuug ningã la m sẽn maneg m meng to-to wã zemsame n yaa yɩlemd la wilgd tɩ m waoogda zĩig ning m sẽn dabdã bɩ? Woto waoogda Wẽnnaam ning m sẽn tũudã bɩ? Mam sẽn maneg m mengã to-to wã tõe n tiisa neb a taab bɩ n sãam b sũy bɩ?’ Bɩ d modg wakat fãa tɩ d fu-yerdi wã la d sẽn manegd d mensã to-to wã kɩt tɩ “Wẽnnaam sẽn yaa tõnd Fãagdã koɛɛgã paam waoogr bũmb fãa pʋgẽ.”—Tɩt 2:10, Kãab-paalgã Koe-noogo.