D yɩ maan-tɩ-zems rãmb d futã ningrẽ la d mengã manegr wɛɛngẽ
1 “Rapa fãa, baa kom-bõonegã menga, ra ninga karvat rãmba. Pagbã la kompugli wã fãa, kom-bɩɩs la kom-bõonego, b fãa ra yeelga roob bɩ b ninga zipi. Ned ka be be sẽn tão gĩn bɩ sẽn ka ning karvat ye. Neba fãa ra tara sũ-noogo.” Yaa woto la kɩba-kɩt a yembr yeel-yã. Kʋʋn-bʋg buud la a sẽn da bilgdã? Yaa neb sẽn gũm taab naam yɛl yĩng bɩ? Yaa neb sẽn da tigim taab ɛspoor bɩ kõnsɛɛr yĩng bɩ? Zãr ne rẽ! A ra bilgda saam-biis la saam-bi-pogs sẽn da be tigims gĩn sull tigis-kãsengẽ rɩẽ.
2 Tigis-kãseng galʋ-tẽng a toẽ, kɩba-gʋlsd n bilg Kaset rãmb kʋʋng woto: “Rapa fãa ra yaa yɩlma, n ning vɛsd la karvat rãmba. Pagbã talla maan-tɩ-zems b futã ningrẽ, la ra bee rasãnde.” Ned a to, sẽn yaa zĩigã gard a yembr yeelame: “Yãmb yaa neb sẽn mi moore, sẽn waoogd neba, la sẽn yaa yɩlma. M sẽn ne bũmb ningã sɩd bee yamleoog wʋsgo. Dũni kãngã sẽn yaa rẽgdã pʋgẽ, yãmb modgame n lebs a rẽgdã kɛɛnga!” Ad wã yaa kaset sõng tɛkẽ tõnd wɛɛngẽ! Rẽ yĩnga tõnd sũur ka noom b sẽn pẽgd tõnd saam-biisã wʋsg woto wã? Yaa sɩd tɩ ned kam fãa sẽn zĩnd kʋʋngã pʋgẽ sõngame n wa ne pẽgr goam a woto ne a sẽn maneg a meng sõma to-to wã.
3 Dũniyã gill zugu, b mii tõnd wa neb sẽn yaa toor ne neb a taabã d yalẽ wã wɛɛngẽ. (Mal. 3:18) Bõe yĩnga? Yaa d sẽn tũud sagl-kãngã sẽn be Biiblã pʋgẽ wã, sẽn yet tɩ d “maneg [d] mens n pil futu sẽn zems ne yõk-m-menga la gũus-m-menga, . . . wa [neb] sẽn sakd Wẽnnaam.”—1 Tɩm. 2:9, 10.
4 Yãmb sẽn ning y futã la y sẽn maneg y mengã to-to wã wilgda bõe yãmb wɛɛngẽ? Tõnd futã, la d sẽn yer-b to-to wã wilgda tõnd sẽn ya a soaba, tõnd tẽebã, tõnd manesmã la d tʋlsmã wɛɛngẽ. Fut modɛll nins d sẽn yãkda wilgda d sẽn yaa ned ning buudu. D ka tog abada n wilg tɩ d saka dũniyã tagsg la a manesem yoodã a nebã sẽn nong n tarẽ wã ye. Bũmb ning sẽn segd n pak tõndã ka wala modɛll ning sã n yaa modɛll sẽn wɛ n yɩɩd neba sʋk masã ye, la yaa wala a sã n zemsa ne ned sẽn yet t’a yaa Wẽnnaam sõgena. (Rom 12:2) Walla tɩ d bao n na n tall yalẽ sẽn wilgd soog-m-meng yam bɩ yoob tʋlsmã, d ratame n sɩd wilg tɩ d ‘waoogda Wẽnnaam.’—1 Pɩɛ. 2:12.
5 Wakat ninga, nin-paalg bɩ ned sẽn ka tar minim sɩdã pʋgẽ, bɩ ned tẽeb sẽn ka tar pãng tõeeme n wa sak bũmb ning fãa dũniyã sẽn moond futã la mengã manegr wɛɛngẽ n ka reng n tags manesem a woto sẽn na n mad a Zeova la a siglgã to-to ye. Tõnd fãa tog n feesa d mengã n ges dũniyã tagsg sã n talla pãn-tusdg tõnd zugu. D tõeeme n kos saam-biig bɩ saam-bi-poak neb sẽn waoogd la sẽn bɩ tẽebã pʋgẽ, t’a pelg a pʋg n togs-d yẽ tagsg sẽn ya a soab tõnd futã modɛll la d mengã manegr zugu, tɩ rẽ poor bɩ d tags d sẽn tõe n tũ a saglsã to-to.
6 Neb kẽer sakdame tɩ ka be goama, tɩ b sã n be tigis-kãsengã zĩigẽ b segd n maana gũusg ne b sẽn yer b futã to-to wã. La raarã sõss sã n sa tɩ b yi tigis-kãsengã zĩigẽ n tɩ be pemsem kokr zĩigẽ, b basda b mense. Kell-y n tũ-y no-sõms nins sẽn zems tɩ kiris-nebã tũ wã. (2 Kor. 6:3, 4) Zĩig ning fãa d sẽn kẽngẽ, tõnd tigis-kãsengã badz rãmb sẽn naag ne tõnd futã ningr la d mengã manegr sẽn zemsã wilgdame tɩ tõnd ya a Zeova Kaset rãmba. Woto yĩnga, tõnd futã segd n manega sõma la zemse, dẽ d wilgdame tɩ d “ka dũniyã rẽnd ye.”—Zã 15:19.
7 Bɩ d fãa maan d sẽn tõe fãa rõandã “Rĩungã koe-moondb sẽn tar yẽesem” tigims gĩn sull tigis-kãsengẽ wã, n wilg tɩ d yaa “neb sẽn welg toor Wẽnnaam [a Zeova, NW ] yĩng[a].” Rẽ sẽn na n wa ne ziir ningã na n paasa a Zeova ‘waoogr la kɩt t’a yʋʋr yi.’—Tõo. 26:19.
[Zĩ-gũbri, seb-neng a 6]
D sẽn tõe n kɩt t’a Zeova paam ziir to-to:
■ Ning-y fut sẽn zems ne Wẽnnaam sõgena.
■ Lak-y y meng ne modɛll dãmb sẽn tũud dũniyã yam.
■ Yɩ-y maan-tɩ-zems soaba, n wilg tɩ y yaa tags-tɩ-zems soaba.