Reng n kẽng n tɩ maneg f yellã ne f saam-biigã: Wãn to?

Mams wa fo sẽn da na n be Galɩle a Zeezi wakatẽ wã, n tog sor n kẽng Zerizalɛm n na n tɩ maan zãn kibsã. Tẽngã pida ne wẽn-tũudb sẽn yi zĩ-zãrsẽ n wa. Fo rat n kõo a Zeova maoongo, n tar pesg n wẽdgd kʋʋngã n debd wẽnd-doogẽ wã. Fo sẽn ta wã, f mikame tɩ wẽnd-doogã pida ne neb me sẽn wa n na n kõ a Zeova maando. Fo sẽn wa n na n kõ maan-kʋʋdbã f pesgã, f tẽegame tɩ f tara yell ne f saam-biiga, tɩ tõe meng t’a bee tẽngã pʋg wall nebã sʋka. A Zeezi wilga f sẽn segd n maanega. (Karem Matye 5:24.) Wãn to la foo ne f saam-biigã fãa tõe n wilg tɩ y baooda laafɩ? Ges leoor toor-toorã sẽn be rɩtgã la goabgã, n ning leoor ning sẽn yaa sõma wã bãnde.

FO SEGD N . . .

• sõsa ne f saam-biigã, f sã n tagsdame tɩ f sɩd beeg-a lame.

• bao n sõnga f saam-biigã t’a toeem tagsgo, f sã n tagsdame t’a yaa sũ-tʋʋlem soaba, wall tɩ yẽ me tara taal yellã pʋgẽ.

• kelga f saam-biigã neere, tɩ baa f pa wʋm a sẽn yeelã võor sõma, bɩ f kos-a sugr f sẽn sãam a sũuri, wall f manesmã sẽn wa ne yɛl ninsã yĩnga.

F SAAM-BIIGÃ SEGD N . . .

• togsa tigingã neb kẽer fo sẽn maan-a bũmb ningã, n bao b sõngre.

• zab-f lame, n tẽeg foo f manesem sẽn yɩ to-to wã fãa, la a tʋlg tɩ f sak n deeg tɩ f kongame.

• tẽegame tɩ yɩl tɩ f tõog n wa yã-a, f sika f meng la f tall raoodo, la t’a segd n sak n kõ-f-la sugr ne a sũur fãa.

D pa kõt a Zeova rũms maand rũndã-rũndã ye. La d sã n dat n ta a yam, bõe yĩng tɩ d segd n tũ a Zeezi sẽn sagl tɩ yell sã n be tõnd ne d saam-biig sʋk bɩ d reng n manegã?