Y Tõe N Paama Y Saam-biigã
“Kẽng n togs-a a kongra foo ne yẽ sʋk bala. La a sã n kelg fo goama, fo paama f ba-biiga.”—MATƖE 18:15.
1, 2. A Zezi kõo sagl-bʋs sẽn zemse, kongr sã n wa zĩndi?
NE A ministɛɛrã saab sẽn ket sẽn pa ta yʋʋmdã, a Zezi ra tara zãmsg sẽn tar yõod wʋsg n na n taas a karen-biisã. Y tõe n karem-b-la Matɩe sak 18 wã pʋgẽ. A yembr da wilgdame tɩ tara yõod tɩ d yɩ sik-m-mens rãmb wa kamba. Rẽ poore, a gom n tadgame n wilg tɩ d segd n gũusame n da kɩt tɩ “kom-bõoneg kãensa ned a yembr” lake, la tɩ d segdame n modg n paam “kom-bõoneg kãensa” tɩ b ra sãam ye. Rẽ poore, a Zezi paasa sagls sẽn tar yõod la sẽn sɩd zems zu-loeesã welgr kiris-nebã sʋk wɛɛngẽ.
2 Tõe tɩ y tẽra a goamã: “Fo ba-biig sã n maan yel-wẽna, kẽng n togs-a a kongra foo ne yẽ sʋk bala. La a sã n kelg fo goama, fo paama f ba-biiga. La a sã n ka kelg foom, bɩ f bao ned a ye bɩ a yiib n paas f meng tɩ yella fãa paam manegre ne kaset dãmb a yiibu wala a tãab kaseto. Yẽ sã n kɩɩs n ka kelg bãmba, bɩ f wilg Wẽnnaam tẽedbã, la yẽ sã n ka kelg Wẽnnaam tẽedbã, bɩ f ges-a wa ned sẽn ka pʋʋsd Wẽnnaam la a wa yõor yaood deegda.” (Matɩe 18:15-17) Wakat bʋg la d segd n tũ sagl-kãngã, la d sã n wa tũud-a d manesem segd n yɩɩ wãn-wãna?
3. Naoor wʋsgo, d manesem segd n yɩɩ wãn-wãn ne neb a taabã kongre?
3 Pĩnd sõsgã wilga vẽeneg tɩ d fãa sẽn pa zems zãng n nong n kongdẽ wã yĩnga, d segd n modgame n yɩ sugr kõtba. Sẽn yɩɩd fãa yaa woto, kiris-nin-taag sẽn yeel bɩ a sẽn maan bũmb ning sã n waa ne toogo. (1 Pɩɛɛr 4:8) Naoor wʋsgo, sẽn são yaa d sẽn na n bas beegrã taale, n kõ sugr n yĩm tɩ sa. D tõe n gesa rẽ wa sõngr tõnd me sẽn maand tɩ laafɩ zĩnd kiris-neb tigingã pʋgẽ. (Yɩɩl Sõamyã 133:1; Yelbũna 19:11) La, tõe n wa zĩndame tɩ y tags tɩ y segd n welga yell ne y saam-biig bɩ y saam-bi-poak sẽn maan tɩ zab-yã. Sã n yaa woto, a Zezi goam nins sẽn be yĩngrã kõta sagls sõma.
4. Wãn-wãn la d tõe n tũ Matɩe 18:15, neb a taabã sã n wa konge?
4 A Zezi saglame tɩ y ‘kẽng n togs-a a kongra foo ne yẽ sʋk bala.’ Rẽ yaa yam tʋʋmde. Alemayn lebgr kẽer ningd-a-la woto: “nin a naas taoore,” sẽn dat n yeel tɩ yãmb ninã la yẽ ninã taoore. Yãmb sã n gom yellã zug yãmb y yiib sʋk bal ne sõmblem, naoor wʋsgo, yaa nana n yɩɩd tɩ y welg yellã. Saam-biig sẽn maan bɩ sẽn yeel bũmb sẽn beeg yãmb bɩ sẽn pa pukd sõmblem tõe n saka vẽeneg n deeg a kongrã yãmb y yembr taoore. Neb a taab sã n kelgdẽ, ninsaal sẽn pa zems zãngã tõe n kɩtame t’a kɩɩs t’a pa konge, bɩ a mak n bao bʋʋm n kõ a meng ne a sẽn maana. La y sã n sõs yellã zug “nin a naas taoore,” y tõe n mikame tɩ y ra pa wʋma taab moor lakae, pa yel-wẽnd bɩ wẽng b sẽn maan ne yamleoog ye. Yãmb y yiibã sã n wa bãng tɩ yaa y pa wʋma taab moor bala, y tõe n welga yellã, n pa bas tɩ yel-kɩdg wa lebg kãseng n sãam y zems-n-taarã ye. Woto yĩnga, noor ning sẽn be Matɩe 18:15 pʋgẽ wã tõe n tɩ loee ne beeg-kɩds meng daar fãa vɩɩmã pʋgẽ.
Bõe la a ra rat n yeele?
5, 6. D sã n ges goamã sẽn togs yɛl nins pʋsẽ wã, yaa yel-wẽn bʋs buud yell la Matɩe 18:15 sẽn da gomdã, la bõe n wilgd rẽnda?
5 D sã n na n togs vẽenega, a Zezi sẽn sagl bũmb ningã tɩ loee ne yɛl sẽn pa reem yell baa bilfu. A Zezi yeelame: “Fo ba-biig sã n maan yel-wẽna.” Naoor wʋsgo, “yel-wẽn” tõe n yɩɩ kongr bɩ beegr buud fãa. (Zoob 2:10; Yelbũna 21:4; Zak 4:17) La, yɛlã sẽn be zĩig ningã wilgdame t’a Zezi sẽn gomd yel-wẽnd ning yellã segd n yɩɩ yel-wẽnd sẽn yaa kãsenga. Yaa yel-wẽnd sẽn yaa kãseng sẽn da tõe n kɩt tɩ b ges wẽng maandã wa “ned sẽn ka pʋʋsd Wẽnnaam la a wa yõor yaood deegda.” Bõe la gom-kãngã rat n wilgi?
6 A Zezi karen-biis nins sẽn da kelgd gom-kãensa wã ra miimi tɩ b tẽngã neb ra pa tar lagem-n-taar ne Buzẽmsã neb ye. (Zã 4:9; 18:28; Tʋʋma 10:28) La b ra ginda yõor yaood deegdbã fasɩ. Yõor yaood deegdb kãens ra yaa Zʋɩf rãmba buud neba, sẽn waa n wẽgd nin-buiidã. Woto, d sã n na n togs vẽenega, Matɩe 18:15-17 ra gomda yel-wẽn-kãsems yelle, pa neb sẽn beeg taab bɩ sẽn wa ne toog taab zut tɩ y tõe n kõ sugr n yĩm ye.—Matɩe 18:21, 22.a
7, 8. a) Yaa yel-wẽn bʋs buud yell la kẽem dãmbã segd n gese? b) Yaa yel-wẽn bʋs buud tɩɩm la kiris-neb a yiib ra tõe n yã bãmb ne taab sʋka, wa sẽn zems ne Matɩe 18:15-17?
7 Tõogã b sẽn da tũudã sasa, yel-wẽn kẽer b sẽn maan taoore, b ra baoodame tɩ ned ning b sẽn beegã maan tɩ yɩɩg sugr kũuni. Wẽn-tʋʋsgo, sɩdã kɩɩsgo, bõn-naands pʋʋsgo, yoobã, kãadmẽ yoob la roap sẽn gãe ne taabã ra yaa yel-wẽn b sẽn segd n togs kãsem dãmbã (bɩ maan-kʋʋdbã) tɩ b bao yellã nenga. Yaa woto me kiris-neb tigingã pʋgẽ. (Maankʋʋre 5:1, NW; 20:10-13; Sõdbo 5:30; 35:12; Tõodo 17:9; 19:16-19; Yelbũna 29:24) La bãng-y tɩ yel-wẽn buud nins yell a Zezi sẽn gom ka wã b ra tõe n welg-b-la neb a yiib sʋka. Ad makre: Sũ-yikr bɩ sũ-kiir sã n tus ned t’a kãneg a to. Kiris-ned sã n sar n na n maan tʋʋmd ne meeb tʋʋm-teed n na n baas tʋʋmdã wakat b sẽn yãk pʋgẽ. Kiris-ned sã n sak n deeg t’a na n lebs n yaoo ligd n yãk a yaoobã sore, bɩ a yãk wakat sẽn yaa takɩ. Kiris-ned kãabame n wilg t’a tʋʋmdã taoor soab sã n kõ-a zãmsg tʋʋmã wɛɛngẽ, (ba a sã n toeem tʋʋma) a pa na n mak n deeg a tʋʋmdã taoor soab raadens ye, n yãk wakat rẽ yĩnga, bɩ t’a pa na n deeg zĩis nins a sẽn zoe n so wã ye.b Saam-biig sã n pa pids a pʋlengã la a pa tek yam n kos sugr ne beegr a woto, beeg-kãngã sɩd pa reem yell ye. (Wilgri 21:8) La beegrã sẽn pak neb a yiibã tõe n yãa tɩɩm bãmb b yiibã sʋka.
8 La wãn-wãn la y na n maan n welg yellã? B nong n tagsame tɩ zĩ-longds a tãab n be a Zezi goamã pʋgẽ. Bɩ d ges zĩ-longds kãens ball-balle. Wall tɩ y ges-b ne pa-vigsdi, wala bʋ-kaoor manesem tũubã, bɩ y bao n bãng b võorã, n da tol n yĩm y bõn-datlã sẽn be nonglmã ye.
Modg-y n paam y saam-biigã
9. Bõe la d segd n ning d yamẽ, d sã n wa tũud Matɩe 18:15?
9 A Zezi sɩnga woto: “Fo ba-biig sã n maan yel-wẽna, kẽng n togs-a a kongra foo ne yẽ sʋk bala. La a sã n kelg fo goama, fo paama f ba-biiga.” Yaa vẽeneg tɩ y pa segd n tik sãmbs zut bal n maan woto ye. Y segd n paama kaset vẽenega, bɩ kɩbar takɩ y sẽn tõe n tũnug ne n sõng y saam-biigã t’a yã t’a maana wẽnga, la a segd n demsa yɛlã. Yaa sõma tɩ y maan tao-tao, n da bas tɩ yellã zẽn n paase, bɩ n bas t’a manesmã paam pãng ye. La ra yĩm-y me tɩ sidgr yell yĩng tõe n yɩɩ yook ne yãmb me ye. Sẽn mik tɩ yẽsgã yaa yãmb ne yẽ sʋk balã, bɩ y ra yãg n gom yellã yell ne neb a taab sẽn na yɩl tɩ b kʋm y ninbãanega, bɩ n kõ y meng bʋʋm n paas ye. (Yelbũna 12:25; 17:9) Bõe yĩng tɩ y segd n maan woto? Yaa y bõn-datlã yĩnga.
10. Bõe n na n sõng tõnd tɩ d paam d saam-biigã?
10 Yãmb bõn-datl segd n yɩɩ y paam y saam-biigã, pa y sɩbg-a, n paoog-a bɩ y wã-a ye. A sã n sɩd maana wẽnga, a zems-n-taarã ne a Zeova bee yell pʋgẽ. Sɩd-sɩda, y ratame t’a ket n yaa y saam-biig kiris-nedemdã pʋgẽ. Na n sõng-y-la wʋsg tɩ y tõoge, y sã n kell n maag y yĩng yãmb y yiibã bal yẽsg sasa, n da tũnug ne gom-toos bɩ taal ningr koe-zom ye. Seg-taab kãngã sẽn be nonglmã pʋgẽ, tẽeg-y tɩ yãmb y yiibã fãa pa zems zãnga, tɩ y yaa ninsaalb sẽn yaa yel-wẽn-maandba. (Rom dãmba 3:23, 24) A sã n mik tɩ y pa maan gom-toog n wɩd-a la a bãng tɩ y rat n sõng-a-la ne pʋ-peelem, yellã tõe n yãa tɩɩm nana-nana. Sẽn yɩɩd fãa, manesem kãngã sẽn yaa vẽeneg la sẽn pukd nonglmã na n sɩd puka yam, sã n wa mik tɩ yãmb y yiibã tara taal bɩ tɩ yaa y sẽn pa wʋm taab moorã yĩng n sɩd wa ne yellã.—Yelbũna 25:9, 10; 26:20; Zak 3:5, 6.
11. Baa bɛɛgd sã n pa kelg tõndo, bõe la d tõe n maane?
11 Y sã n sõng-a t’a bãng tɩ beegr n zĩndi, la tɩ beeg-kãng pa reem yelle, tõe n tus-a lame t’a tek yam n kos sugri. La sɩda, wuk-m-mengã tõe n yɩɩ gɩdgre. (Yelbũna 16:18; 17:19) La ba a sã n pa reng n sak n deeg t’a kongame n tek yam n kos sugri, y tõe n gũu poorẽ n wa kẽng taoor ne yellã manegre. A Zezi pa yeel tɩ ‘kẽng n togs-a a kongra foo ne yẽ vugr bal’ ye. Sẽn yaa yel-wẽnd tɩɩm y sẽn tõe n yã wã yĩnga, bao-y n yã-a yɛs ne yam ning sẽn be Galat dãmba 6:1 pʋgẽ wã “nin a naas taoore.” Tõe tɩ y tõoge. (Mak-y ne Ziid 22, 23.) La yaa wãn to masã, y sã n sɩd tagsdẽ tɩ yel-wẽnd n maane, t’a pa rat n sak n deege?
D paam sagls neb sẽn bɩ nengẽ
12, 13. a) A Zezi wilga zĩ-loangdg a yiib-n-soab bʋg sẽn tɩ loe ne kongrã manegre? b) D sã n wa maand woto yaa gũusg bʋg sẽn zems la d segd n talle?
12 Yãmb ratame tɩ neb a taabã bas yãmb tao-tao, y sã n tar taal ne kongr sẽn yaa kãseng bɩ? Ayo. Woto yĩnga, a Zezi wilgame tɩ pipi zĩ-loangdgã poore, d pa segd n bas tɩ lʋɩ, sã n yaa ne ket n paamdẽ t’a lagemd ne yãmb la ne neb a taabã n sõgen Wẽnnaam t’a sak n deegã wɛɛngẽ ye. A Zezi wilga zĩ-loangdg a yiib-n-soaba: “A sã n ka kelg foom, bɩ f bao ned a ye bɩ a yiib n paas f meng tɩ yella fãa paam manegre ne kaset dãmb a yiibu wala a tãab kaseto.”
13 A yeelame tɩ “bɩ f bao ned a ye bɩ a yiib[u].” A pa yeel tɩ pipi zĩ-loangdgã poore, sor beeme tɩ y tõe n gom yellã yell ne neb wʋsg a taaba, n tɩ yã so-toak yel-gɛta, bɩ n gʋls saam-biisã yellã zug ye. Baa yãmb sẽn sõs n tagsd to-to tɩ wẽng n sɩd maana, bũmb pa wilgd sɩd-sɩd tɩ yaa woto ye. Y pa rat n yelg kɩbay sẽn pa sɩda, sẽn tõe n wa baas n lebg tẽn-kãneb yãmb sabab yĩng ye. (Yelbũna 16:28; 18:8) La a Zezi sɩd yeelame tɩ b rɩk ned a yembr bɩ a yiib n paase. Bõe yĩnga? La nin-kãens tõe n yɩɩ ãnd dãmba?
14. Ãnd la d segd n tall n kẽng zĩ-loangdg a yiib-n-soabã yĩnga?
14 Yãmb makdame n na n paam y saam-biigã n kɩt t’a sak n deeg t’a maana yel-wẽnde, la y tus-a t’a tek yam n kos sugri, sẽn na yɩl n paam laafɩ ne yãmb la ne Wẽnnaam. Sẽn na yɩl n tõog n maan woto, sẽn são n yɩɩd yaa ‘ned a ye bɩ a yiibã’ sã n da maana kaset ne wẽngã sẽn maana wɛɛngẽ. Tõe tɩ wẽngã maaneg yɩɩ b nifẽ, bɩ b tara kɩbay sẽn yaa sɩd sẽn wilgd bũmb ning sẽn maana (bɩ sẽn pa maana) leebg yell pʋgẽ. Sã n mik tɩ kaset rãmb a woto ka be, neb nins y sẽn na n yãk tɩ yɩ kaset dãmbã tõe n tara minim ne yel-kãngã buudã, tɩ woto yĩng bɩ b yɩ neb sẽn tõe n wilgi, bũmb ning sẽn zĩndã sã n sɩd yaa wẽnga. Sẽn paase, sã n wa yaa tɩlae, b tõe n yɩɩ neb sẽn maan kaset ne b sẽn togs bũmb ninsã, n sɩd wilg tɩ yɛlã b sẽn togsã la modgr ning y sẽn maana yɩɩ woto. (Sõdbo 35:30; Tõodo 17:6) Woto, b pa neb sẽn pa bak-n-sõng rãmb bala, neb b sẽn sʋkd n na n bãng yell bal ye, la b belmã meng yaa sẽn na yɩl n sõng tɩ y paam y saam-biigã sẽn yaa bãmb me saam-biigã.
15. Bõe yĩng tɩ kiris-neb kẽem dãmbã tar yõodo, d sã n segd n ta zĩ-loangdg a yiib-n-soabã zĩigẽ?
15 Pa tɩlae tɩ y tags tɩ neb nins y sẽn yãkdã segd n yɩɩ roap sẽn yaa kẽem dãmb tigingã pʋgẽ ye. Baasg zãnga, roap sẽn bɩ sẽn yaa kẽem dãmb tõe n sõnga ne b tẽebã zʋg-sõma. Kẽem dãmb kãensã yaa “wa zĩ-lilldga sobg wakate la a wa zĩ-soalgdg sa-kẽeng wakate. Bãmb na n yɩɩ wa kʋɩls tẽn-koɛɛng pʋgẽ, la a wa kug-kãseng maasem tẽng sẽn ka pãng pʋgẽ.” (Ezai 32:1, 2) B tara minim sã n yaa ne sõng saam-biisã la saam-bi-pogsã tɩ b tags yell zug la b paam remsgo. La wẽng maandã tara bʋʋm sõma n na n tall bas-yard ne ‘kũun sẽn yaa roap’ a woto.c (Efɛɛz rãmba 4:8, 11, 12) D sã n gom yellã yell neb sẽn bɩ woto taoore, n lagem n pʋʋs ne-ba, tõe n kɩtame tɩ manesmã toeeme, tɩ yell ning sẽn da wõnd a ka tɩɩmã paam tɩɩm masã.—Mak-y ne Zak 5:14, 15.
Yaoolem modgr sẽn na yɩl n paam-a
16. zĩ-loangdg a tãab-n-soab bʋg la a Zezi wilg-yã?
16 Zĩ-longds a yiibã sã n pa tõog n maneg yellã, yaa tigingã yel-gɛtb n kẽesd b toog zĩ-loangdg a tãab-n-soabã pʋgẽ. “Yẽ sã n kɩɩs n ka kelg bãmba, [ned a ye bɩ a yiibã] bɩ f wilg Wẽnnaam tẽedbã, la yẽ sã n ka kelg Wẽnnaam tẽedbã, bɩ f ges-a wa ned sẽn ka pʋʋsd Wẽnnaam la a wa yõor yaood deegda.” Rẽ baooda bõe maanego?
17, 18. a) Mak-bʋs n sõngd tõnd tɩ d wʋm “wilg Wẽnnaam tẽedbã” võore? b) Wãn-wãn la d tat zĩ-loangdg kãngã zĩigẽ rũndã-rũndã?
17 D pa segd n ges tɩ woto yaa noor b sẽn kõ tɩ b togs nedã yel-wẽnd tigingã tõr tigis-zaalg bɩ tigis-zall sasa ye. D tõe n bãnga yɛlã sẽn segd n kẽng neng ning ne Wẽnnaam Gomdã maasem. Ges-y b sẽn da segd n maan bũmb ning pĩnd Israɛllẽ wã, tõdgre, yão-beed la rã-tɩgr sã n wa zĩndi: ‘Ned sã n tar bi-tõatg sẽn ka kelgd a ba ne a ma goama, tɩ b sagl-a n mak n konge, bɩ b tall-a n kẽng bãmb tẽnga kãsem dãmb nengẽ bãmb na-yiri. Bɩ b yeel tẽnga kãsem dãmba yaa: Tõnd bi-kãngã yaa tõtre. Yẽ ka sakd tõnd noor ye. Yẽ yaa tʋʋm beed soaba la rã-yũuda. La bɩ tẽnga roapa fãa lob-a ne kug[a].’—Tõodo 21:18-21.
18 Pa rao wã tẽng tõr bɩ a mengã buud fãa n kelgd a yel-wẽnã la b kao a bʋʋd ye. Sẽn yaa lebende, yaa “kãsem dãmba” b sẽn sak n deegã n tʋmd tigingã yʋʋr yĩng n maneg yellã. (Mak-y ne Tõodo 19:16, 17 sẽn tɩ loe ne yell ‘maan-kʋʋdba la bʋ-kaoodb nins sẽn kaood bʋʋd wakat kãnga taoorã’ sẽn da gese.) Woto me, rũndã-rũndã, sã n yaa tɩlae tɩ b ta zĩ-loangdg a tãab-n-soabã zĩigẽ, kẽem dãmbã sẽn gomd tigingã yʋʋr yĩngã geta yellã yelle. B bõnd-datlã yaa yembre: yaa b paam b saam-biigã sẽn yaa kiris-nedã, sã n tõeeme. B pukda rẽ n wilgd zemsgo, n pa yãgd n kao bʋʋd tɩ b nan pa wʋm yellã võor bɩ n yɩ bak-n-sõng rãmb ye.
19. Bõe la kẽem dãmb nins b sẽn yãk tɩ b kelg yellã na n modg n maane?
19 B na n modgame n ges yɛlã neere la b kelg kaset rãmb nins sẽn yaa tɩlaeyã sẽn na yɩl n bãng yel-wẽnd sã n sɩd maaname (bɩ sã n ket n maandame). B rat n kogla tigingã ne sãoong la b gɩdg dũniyã vʋʋsem t’a ra kẽ a pʋgẽ ye. (1 Korẽnt dãmba 2:12, NW; 5:7) Sẽn tɩ zems ne zʋg-sõma nins Gʋlsg Sõamyã sẽn baood tɩ b paama, b na n modgame n ‘zãms neb a taab sɩda la b tõog nin-kɩɩsdba.’ (Tɩt 1:9) D saagdame tɩ wẽng maandã pa na n yɩ wa Israɛll nebã a Zeova no-rɛɛsã sẽn yeel woto b wɛɛngẽ wã ye: “Mam boola yãmba, la yãmb ka sak ye. Mam goma ne yãmba, la yãmb ka kelg ye. La yãmb maana bũmb nins fãa sẽn ka noom maama. La yãmb yãka bũmb ninga sẽn sãamd mam sũurã.”—Ezai 65:12.
20. Yel-wẽn-maandã sã n zãgs t’a kõn kelg la t’a kõn tek yam n kos sugri, a Zezi yeelame tɩ bõe la b segd n maan wakat kãnga?
20 Baasg zãnga yaa kar-kar bal la yel-wẽn-maand pukd manesem kãngã buudu. A sã n wa tall manesem a woto, a Zezi noorã yaa vẽenega: “Bɩ f ges-a wa ned sẽn ka pʋʋsd Wẽnnaam la a wa yõor yaood deegda.” Soaalã pa sagend tɩ d tall toom manesem ne-a bɩ d bao n maan-a wẽng buud ba a yembr ye. La sãmbg ka be ne tʋm-tʋmd a Poll sẽn kõ noor tɩ b yiis yel-wẽn-maandb nins sẽn pa tekd yam n kos sugrã tigingã pʋgẽ wã ye. (1 Korẽnt dãmba 5:11-13) Baa woto tõe n wa baas n yɩɩ sabab tɩ b paam yel-wẽn-maandã.
21. Bõe la ned b sẽn yiis tigingẽ wã ket n tõe n maane?
21 D tõe n yãame tɩ woto yaa bũmb sẽn tõe n wa, d sã n ges a Zezi yel-bũnd ning sẽn tɩ loe ne biriblã sẽn yaa laog sãamdã. Wala bilgrã sẽn wilgã, a sẽn yi a ba wã zakẽ sẽn tar tũud-n-taar sẽn be nonglmã n tɩ vɩɩmd kɛɛng tɩ kaoos bilf poore, yel-wẽn-maandã “yam wa-a lame.” (Luk 15:11-16, 17, NW, 18) A Poll wilga a Tɩmote tɩ wẽng maandb sãnda ra na n wa teka yam n kos sugri tɩ “bãmb yam sã n vẽnege bãmb na tõog n fãag b mens ne Sʋɩtãana kũusri.” (2 Tɩmote 2:24-26) D sɩd saagdame tɩ neb nins fãa sẽn maand yel-wẽnd n pa tekd yam n kos sugr tɩ b segd n yiis-b tigingẽ wã na n bãngame tɩ b konga bũmbu, sẽn dat n yeel tɩ paam n ta Wẽnnaam yamã la lagem-n-taar sẽn be nonglem ne kiris-nebã sẽn yaa kɩs-sɩd dãmbã, la tɩ rẽ poore b yam na wa.
22. Wãn-wãn yɛs la d tõe n paam d saam-biigã?
22 A Zezi pa ges tɩ bu-zẽmsã neb la yõor yaood dɛɛgdbã pa tõe n paam fãagr ye. Bãmb sʋkã, yõor yaood dɛɛgd a yembre, a Matɩe Levi teka yam n kos sugri, n ‘tũ a Zezi’ ne pʋ-peelem, la a yãk-a lame meng t’a yɩ tʋm-tʋmda. (Mark 2:15; Luk 15:1) Woto yĩnga, rũndã-rũndã yel-wẽn-maand sã n “ka kelg Wẽnnaam tẽedbã” tɩ b yiis-a tigingã pʋgẽ, d tõe n gũume n gese, a sã n na n wa teka yam n kos sugr n dems a sorã. A sã n maan woto n lebg tigingã ned yɛsa, rẽ, d sũur na n yɩɩ noogo, d sẽn paam d saam-biigã t’a lebg n wa sɩd balengẽ wã.
[Footnotes]
a A McClintock la a Strong Ãnsikolopedi wã yetame: “B ra geta Kãab Paalgã Zʋɩf rãmb sẽn tʋmd Rom lampo reegr yĩnga [yõor yaood deegdbã] wa zãmb rãmb la sɩdã kɩɩsdba, wa neb sẽn sãam ne b lagem-n-ta-wẽng ning b sẽn da tar naoor wʋsg ne kɩfen dãmbã, wala wẽgdã tʋʋm teedo. B ra naagd-b-la ne yel-wẽn-maandbã . . . B ra bak-b lame n base, tɩ neb nins sẽn tar vɩ-tɩrgã ra pa lagemd ne-b ye. B zo-rãmb bɩ b tũud-n-taas ra yaa neb nins bal b sẽn pa nand wa bãmbã.”
b Ned sẽn maan belgre, zãmb bɩ liib-liib leebg bɩ ligd yɛl pʋgẽ tõe n kẽe yel-wẽn nins sʋk a Zezi sẽn gom b yellã. Wala makre, a sẽn kõ sor-wilgr ning sẽn be Matɩe 18:15-17 pʋgẽ wã poore, a Zezi kõo bilgr sẽn gomd yembs (tʋm-tʋmdba) sẽn tar ned ligd n pa tõog n lebs yelle.
c Biibl mit a yembr yeelame: “Wakat ninga tõe n zĩndame tɩ wẽng maand reeg sagls sẽn yit kaset rãmb a yiib bɩ a tãab nengẽ, (sẽn yɩɩd fãa b sã n yaa neb sẽn zems waoogre) n yɩɩd nin-yende, sẽn yɩɩd fãa nin-yend kãngã sã n tar tagsg sẽn pa yembr ne-a.”
Y tẽrame bɩ?
◻ Reng n yaa yel-wẽn bʋg buud yell la Matɩe 18:15-17 sẽn gomdã?
◻ Bõe la d segd n tẽege, d sã n tog n ta pipi zĩ-loangdgã zĩigẽ?
◻ Ãnd n tõe n kõ sõngre, d sã n segd n ta zĩ-loangdg a yiib-n-soabã zĩigẽ?
◻ Ãnd dãmb n kẽesd b toog zĩ-loangdg a tãab-n-soabã zĩigẽ, la ne rẽ fãa, wãn-wãn la d tõe n paam d saam-biigã?
[Picture on page 16]
Zʋɩf rãmbã ra lakda b mens ne yõor yaood reegdbã. A Matɩe remsa a sorã n tũ a Zezi
[Picture on page 18]
Naoor wʋsgo, d tõe n manega yell “nin a naas taoore”