D modg tɩ zems-n-taar kell n zĩnd tigingã pʋgẽ, t’a kell n yɩ yɩlemd me

YƲƲMD fãa, neb tusa n kaoogd n wat a Zeova tũudum hakɩɩkã pʋgẽ, tɩ pidsd gomd Biiblã sẽn togse. (Mii. 4:1, 2) D reegda nin-kãens ne sũ-noog “Wẽnnaam tigingã” pʋgẽ! (Tʋʋ. 20:28) Bãmb me sũy nooma b sẽn paam n naag tõnd n tũud a Zeova, n be neb sẽn yaa yɩlem la sẽn zemsd taab sʋka, tɩ yaa wa b zoe n bee arzãnã pʋgẽ wã. Wẽnnaam vʋʋsem sõngã, n paas a saglsã sẽn be a Gomdã pʋgẽ wã sõngda tõnd tɩ zems-n-taar be d sʋka, la kɩtdẽ me tɩ tigingã yaa yɩlemde.—Yɩɩn. 119:105; Zaka. 4:6.

² D sẽn tũud Biiblã saglsã, d yeelga “nin-paalgã.” (Kolo. 3:10) D basda zab-bõonesã la mo-yõsã tɩ sa. D sẽn dɩkd a Zeova togs-n-taarã, d tõogd n maooda ne bũmb toor-toor sẽn tõe n wa ne welgr d sʋka, n naagd taab n tʋmd dũniyã gill zug wa zag-yɛng neba.—Tʋʋ. 10:34, 35.

³ Baasgo, wakat-wakate, zu-loees n mi n wa, tɩ tõe n sãam laafɩ la zems-n-taar ning sẽn be tigingã pʋgẽ wã. Bõe n wat ne zu-loe-kãense? Naoor wʋsgo, yaa d sã n pa tũ Biiblã saglsã. Sẽn paase, d segd n ket n maooda ne d pãn-komsmã. Ned kae tõnd sʋkã n pa maand yel-wẽnd ye. (1 Zã 1:10) Tigingã ned tõe n wa maana bũmb n dẽgem a menga, vɩɩm manesmã wall tẽebã wɛɛngẽ. D tõe n wa maana bũmb wall d gom gomd tɩ sãam ned sũuri. Ninã gomd wall bũmb a sẽn maan me tõe n sãama d sũuri. (Rom. 3:23) Sã n wa yaa woto, bõe la d tõe n maan n welg yellã?

⁴ A Zeova sẽn nong tõndã yĩnga, a maana bũmb toor-toor sẽn tõe n sõng tõnd yell a woto taoore. Sagls n be a Gomdã pʋgẽ, n wilgd d sẽn tõe n maan to-to zu-loees sasa. D tõe n paama sõngr kãsem-dãmbã sẽn yaa pe-kɩɩmb sẽn nong tõndã me nengẽ. D sã n tũ b saglsã, d na n tõog n le zemsa taaba, la d kell n tall zood sõma ne a Zeova. D sã n wa maan yel-wẽnd tɩ b rems-d bɩ n kibl-du, d tõe n kɩsa sɩd tɩ rẽ yaa kaset tɩ d saasẽ Ba wã nong-d lame.—Yel. 3:11, 12; Ebre. 12:6.

D SẼN TÕE N WELG MO-YÕS TO-TO

⁵ Mo-yõs wall yel-bõones tõe n wa zĩnda tigingã neb ne taab sʋka. Sã n wa yaa woto, b segd n welga yellã tao-tao la ne nonglem. (Efɛɛ. 4:26; Fili. 2:2-4; Kolo. 3:12-14) Y sã n wa paam yell ne y tẽed-n-taag tɩ tõe n sãam y zems-n-taarã, y sã n tũ tẽn-tʋmd a Pɩyɛɛr saglgã, yaa vẽeneg tɩ y na n tõog n welg-a lame. A yeelame: “Bɩ y nong taab wʋsgo, bala nonglem luta yel-wẽn wʋsgo.” (1 Pɩy. 4:8) Biiblã paasame: “Tõnd fãa tudgda naoor wʋsgo.” (Zak 3:2) D sã n tũud a Zeezi sẽn sagl-d tɩ d maan d taabã bũmb nins d sẽn dat tɩ b maan tõndã, d na n tõogd n kõta taab sugr la d yĩmd kong-bõonesã.—Mat. 6:14, 15; 7:12.

⁶ Yãmb sã n wa mik tɩ y goma gomd wall y maana bũmb tɩ ned sũur yiki, y segd n bao n manega yellã tao-tao la y ra bas tɩ kaoos ye. Tẽeg-y tɩ tõe n sãama yãmb ne a Zeova zoodã me. A Zeezi sagla a karen-biisã yaa: “Woto yĩnga, fo sã n tall f kũun n ta tẽn-kugrã taoore, n tẽeg tɩ f saam-biig sũur n sãam ne foo, bɩ f bas kũunã tẽn-kugrã taoore, la f reng n kẽng n tɩ maneg f yellã ne f saam-biigã, n yaool n wa kõ f kũunã.” (Mat. 5:23, 24) Tõe tɩ yaa y sẽn pa wʋm taab yĩnga. Sã n wa yaa woto, bɩ y sõs ne taab n bao n welg yellã. Tigingã neb fãa sã n minim n sõsd ne taab sõma, tõe n gɩdga mo-yõsa, tɩ zu-loɛɛg sã n wa d sẽn yaa neb sẽn pa zems zãngã yĩng bɩ b tõog n welge.

SÃ N WA YAA TƖLƐ TƖ B TIK BIIBLÃ N SAGL NEDA

⁷ Wakat ninga, tõe n yɩɩ tɩlɛ tɩ yel-gɛtbã kõ ninã sagls sẽn na yɩl t’a rems a tagsgo. Pa wakat fãa la woto maaneg yaa nana ye. Tẽn-tʋmd a Poll gʋlsa Galasɩ kiris-nebã n yeel-b yaa: “M saam-biisi, baa ned sã n wa rɩk so-wẽng n pa miẽ, bɩ yãmb a neb nins tẽeb sẽn bɩ wã bao n dems-a ne bʋgsem.”—Gal. 6:1.

⁸ Yel-gɛtbã sẽn kɩɩmd Wẽnnaam piisã sõma wã, kogenda tigingã neb ne bũmb wʋsg sẽn tõe n sãam b tẽebã, la kɩtdẽ tɩ b tõe n gil zu-loe-kɛgemse. Kãsem-dãmbã maoodame tɩ b sẽn get tigingã neb yell to-to wã zems ne bũmb ning a Zeova sẽn tũnug ne a Ezayi n pʋlmã. A yeelame: “Bãmb ned kam fãa na n yɩɩ wa zĩ-soalgdg sebg wakate, wa soondg zĩig sa-kẽeng wakate, wa kʋɩlg koom zĩ-koɛɛngẽ, la wa pĩ-kẽeng maasem zĩ-koɛɛngẽ.”—Eza. 32:2.

NING NED SẼN VƖ YAAR BÃNDE

⁹ Tẽn-tʋmd a Poll yeelame tɩ d gũus ne neb nins sẽn tõe n wã tigingã. A yeelame: “M saam-biisi, tõnd yeta yãmb . . . tɩ y zãag y mens ne saam-biig ning fãa sẽn vɩ yaare, n pa vɩ wa sẽn zems noy nins yãmb sẽn deeg tõnd nengẽ wã.” A paasame yaa: “Ned sã n pa rat n sak tõnd sẽn yet bũmb nins seb-kãngã pʋgẽ wã, bɩ y gũus y meng ne yẽ soabã, [“ning a soabã bãnde,” notã] la y ra le maan lagem-n-taar ne-a, tɩ yãnd yõk-a. La baasgo, ra ges-yã-a wa bɛ ye. Ket-y n sagend-y-yã-a a sẽn yaa y saam-biigã yĩnga.”—2 Tes. 3:6, 14, 15.

¹⁰ Nina tõeeme n pa maand yel-wẽn-kãseng sẽn sek b na yiis-a tigingã pʋgẽ, n yaool n pa vɩ wa sẽn zems noy nins Wẽnnaam sẽn lugl tɩ kiris-nebã segd n tũ wã ye. Wala makre, tõe t’a yaa kʋɩɩm tɩ loog noore, bɩ n nong wɩdga, wall a yaa rẽgdo. A tõe n yaa ned sẽn ‘lʋɩɩsd a toog yɛl sẽn pa pak-a pʋsẽ.’ (2 Tes. 3:11) Leb n tõe n yaa ned sẽn maand sɩlem n dɩt a taaba, wall ned sẽn nong reem sẽn pa sõma. Manesem a woto yaa wẽng n sek na sãam tigingã yʋʋre, wall mad kiris-neb a taabã.

¹¹ Kãsem-dãmbã na n deng n tika Biiblã saglsã n bao n sõng ned ning sẽn vɩ yaarã. La kãsem-dãmbã sã n sagl-a naoor wʋsg t’a baas n ket n maand a toog kae ne Biiblã sẽn yetã, b tõe n yãka yam n maan diskuur n keoog tigingã. Kãsem-dãmbã segd n tagsa neere, n bao n bãng yellã sã n yaa wẽng wʋsg la sãamd sũuri, n sek b na maan diskuur a woto. Sõsdã na n kõo sagls yellã wɛɛngẽ, la a pa na n pʋd a soabã yʋʋr ye. Dẽ, neb nins sẽn mi sõsdã sẽn gomd bũmb ning yellã na n gũusa ne ned a woto tũud-n-taare, baa b sẽn na n ket n tʋmd tũudmã tʋʋm ne taaba, la b ‘sagend-a a sẽn yaa b saam-biigã yĩngã.’

¹² D saagdame tɩ kiris-neb nins sẽn maand sɩdã sã n kell n tũ saglsã neere, yãnd na n yõka sẽn vɩ-a yaarã, tɩ kɩt t’a toeeme. Sã n wa lebg vẽeneg tɩ nedã toeema manesem, pa le yaa tɩlɛ tɩ b ges-a wa ned b sẽn ning bãnd ye.

D SẼN TÕE N WELG ZU-LOE-KÃSEMS KẼER TO-TO

¹³ Ned sã n beeg-d tɩ d bas tɩ sa wall d kõ sugri, pa rat n yeel tɩ d toog kae ne wẽngã b sẽn maan tõndã, wall tɩ rẽ tata d yam ye. Pa yel-wẽnã fãa la d tõe n yeel tɩ yaa d sẽn pa zems zãngã yĩng la d maan-b ye. Sẽn paase, pa zems tɩ d mum d nin n get yel-wẽn nins sẽn yaa kãsemsã ye. (Maan. 19:17; Yɩɩn. 141:5) Tõogã kaool tũub wakate, b ra getame tɩ yel-wẽnã wẽnem yɩɩda taaba. Yaa woto me kiris-neb hakɩɩkã tiging pʋgẽ.—1 Zã 5:16, 17.

¹⁴ A Zeezi wilga b sẽn tõe n maan to-to n welg zu-loe-kãsems sẽn be kiris-neb ne taab sʋka. Ad bũmb ning a sẽn yeelã pʋgdg-pʋgdga: “Fo saam-biig sã n maan yel-wẽnde, [1] kẽng n tɩ togs-a a kongrã foo ne yẽ sʋk bala. A sã n kelg foom, fo le paama f saam-biigã. La a sã n pa kelge, [2] bɩ f kẽng n tɩ bao nin-yɛng wall neb a yiib tɩ b yãag-fo, sẽn na yɩl tɩ bũmb fãa yɩ vẽeneg ne neb a yiib bɩ a tãab kaseto. La a sã n pa kelg bãmba, [3] bɩ f togs tigingã. La a sã n baas n pa kelg tigingã, bɩ f ges-a wa bu-zẽng neda, la wa yõor-yaood dɛɛgda.”—Mat. 18:15-17.

¹⁵ Yel-bũnd ning a Zeezi sẽn wẽ rẽ poor tɩ be Matiye 18:23-35 wã yĩnga, d tõe n yeelame tɩ Matiye 18:15-17 wã gomda ligd poorẽ mo-yõs, pa rẽ bɩ zĩig poorẽ mo-yõs yelle. Wala makre, ned sẽn deeg samd n pa rat n yao, wall ned sẽn wẽg a to. Leb n tõe n yɩɩ ned sẽn kãneg a to n sãam a yʋʋr wʋsgo.

¹⁶ Sã n yaa vẽeneg tɩ tigingã ned n maan yãmb a buudu, bɩ y ra yɩ tao-tao n tɩ togs kãsem-dãmbã, n kos-b tɩ b sõng-y ye. Tũ-y-yã a Zeezi saglgã, n deng n tɩ gom ne ned ning sẽn beegã. Bao-y n welg-y yellã yãmb y yiibã bal sʋka, tɩ ned a to ra naag ye. Tẽeg-y t’a Zeezi pa yeel tɩ y ‘kẽng vugr bal n tɩ togs-a a kongrã ye.’ Dẽnd a soabã sã n pa sak n deeg t’a kongame n kos sugri, yɩta sõma tɩ y le bao daar n kẽng n tɩ yã-a. Y sã n maan woto n tõog n welg yellã, yaa vẽeneg tɩ ned ning sẽn beeg yãmbã sũur na n yɩɩ noog y sẽn pa togs neb a taaba, wall y sẽn pa sãam a yʋʋrã tigingã pʋgẽ wã yĩnga. Woto, ‘y le paama y saam-biigã.’

¹⁷ Ned ning sẽn beeg yãmbã sã n sak n deeg t’a kongame n kos sugri, la a yãk yam n na n maan bũmb takɩ n welg yellã, y pa segd n dɩk yellã n tɩ togs neb a taab ye. Baa a sẽn maanã sẽn yaa wẽng wʋsgã, neb a yiibã bal tõe n welga yell a woto buud tɩ kell n pa bãmb sʋka.

¹⁸ Yãmb sã n tɩ togs y saam-biigã a kongrã yãmb ne yẽ sʋk bal n pa tõog n welg yellã, y tõe n maana wa a Zeezi sẽn yeelã, n ‘kẽng n tɩ bao nin-yend wall neb a yiib tɩ b yãag-yã,’ tɩ y tɩ gom ne y saam-biigã yɛsa. Neb nins sẽn na n yãag yãmbã me raab segd n yɩɩ le paam y saam-biigã. Yɩta sõma tɩ yɩ neb sẽn maan kaset ne yellã. La kaset rãmb sã n kae, y tõe n yãka yam n kos nin-yend wall neb a yiib tɩ b zĩnd ne yãmb sõsgã wakate. Segd n yɩɩ neb sẽn tõe n wʋm yellã võore, n tõe n bãng sã n sɩd yaa beegre. B sã n kos kãsem-soab t’a na n yɩ kaset soaba, a pa gomd tigingã yʋʋr yĩng ye. Bala, pa kãsem-dãmbã sull n yãk-a t’a maan rẽ ye.

¹⁹ Yãmb sã n mao naoor wʋsg n na n welg yellã tɩ ket n pa yãkd nenga, (yãmb goma ne-a yãmb ne taab sʋk bala, la y kẽng ne nin-yend wall neb a yiib n tɩ gom ne-a) la y tagsdẽ tɩ y pa tõe n bas tɩ sa, y segd n dɩka yellã n togs tigingã kãsem-dãmbã. Tẽeg-y tɩ kãsem-dãmbã raab yaa tɩ zems-n-taar kell n zĩnd tigingã pʋgẽ, la t’a kell n yɩ yɩlemde. Y sã n togs kãsem-dãmbã, y segd n basa yellã b nugẽ, la y teeg a Zeova. Ra tol-y n bas-y tɩ ned a to manesem kɩt tɩ y bas a Zeova, wall kɩt tɩ y pa le tar sũ-noog a Zeova tũubã pʋgẽ ye.—Yɩɩn. 119:165.

²⁰ Kãsem-dãmbã sẽn yaa pe-kɩɩmbã na n vaeesa yellã n gese. Sã n yaa vẽeneg tɩ nedã sɩd maana bũmb sẽn yaa wẽng wʋsg n beeg yãmba, t’a pa rat n tek yam n kos sugri, la t’a pa rat n maan a sẽn tõe fãa sẽn na yɩl n maneg yellã, tõe n yɩɩ tɩlɛ tɩ b lugl bʋ-kaoor sull n yiis-a tigingã pʋgẽ. Woto, b kogenda Wẽnnaam piisã, la b kɩtdẽ tɩ tigingã me ket n yaa yɩlemde.—Mat. 18:17.

NED SÃ N WA MAAN YEL-WẼN-KÃSENGA

²¹ Ned sã n maan yel-wẽn-kãsems kẽere, a sã n kos ned ning a sẽn beeg-a bal sugri, pa sek ye. Yel-wẽn-kãens tõe n yɩɩ raglem tʋʋma, yoobo, rap sẽn gãe rap wall pagb sẽn gãe pagba, wẽn-tʋʋre, sɩdã kɩɩsgo, bõn-naands pʋʋsg la yel-wẽn-kãsems a taab sẽn wõnd woto. (1 Kor. 6:9, 10; Gal. 5:19-21) Yel-wẽn-kãsems a woto sẽn tõe n dẽgem tigingã neb tẽebã wɛɛngẽ la vɩɩm manesmã wɛɛngẽ wã yĩnga, b segd n togsa kãsem-dãmbã, tɩ bãmb welg-ba. (1 Kor. 5:6; Zak 5:14, 15) Ninã tõe n wa togsa kãsem-dãmbã yel-wẽnd a sẽn maane, wall ned a to sẽn maan t’a bãnge. (Maan. 5:1; Zak 5:16) Sẽn yaa a soab fãa, kãsem-dãmbã sã n wa wʋm tɩ ned sẽn deeg lisg n maan yel-wẽn-kãsenga, b segd n yãka kãsem-dãmb a yiib tɩ b reng n vaees yellã. Sã n lebg vẽeneg tɩ bũmb ning b sẽn wʋmã yaa sɩda, la tɩ kaset beeme t’a soabã maana yel-wẽn-kãsenga, kãsem-dãmbã sull segd n yãka kãsem-dãmb a tãab bɩ sẽn yɩɩd woto, n lugl bʋ-kaoor sull n welg yellã.

²² Kãsem-dãmbã geta Wẽnnaam piisã yell neere, n maand b sẽn tõe fãa sẽn na yɩl n kogl-b ne bũmb ning fãa sẽn tõe n wa sãam b tẽebã. Sẽn paase, ned sã n wa tudgi, b tũnugda ne Wẽnnaam Gomdã n wilg-a a kongrã, la b sõng-a t’a tẽebã le paam pãnga. (Ziid 21-23) Woto zemsa ne saglg ning tẽn-tʋmd a Poll sẽn kõ a Tɩmote wã. A yeelame: “Mam yeta foom Wẽnnaam taoore, la Kirist Zeezi sẽn segd n kao nin-vɩɩs la kũ-rãmb bʋʋdã . . . taoor yaa: . . . wilg nebã b kongre, keoog-b neere, la f sagl-b ne sũ-mar wʋsg la ne zãmsg minim.” (2 Tɩm. 4:1, 2) Woto maaneg tõe n dɩɩ sẽk wʋsgo, la naaga tʋʋm nins kãsem-dãmbã sẽn segd n tʋmã. Tigingã neb sũur nooma ne b modgrã, la b getẽ tɩ b “segda ne waoogr wʋsgo.”—1 Tɩm. 5:17.

²³ Sã n wa lebg vẽeneg tɩ ned tara taale, kãsem-dãmbã sẽn dat n tɩ yɩɩd yaa sõng-a t’a tẽebã le paam pãnga. A sã n sɩd teka yam n kot sugr tɩ kãsem-dãmbã tõe n sõng-a, b na n kibl-a lame. Tõe n yɩɩ yẽ a ye bal la b na n togs kiblgã, wall neb nins sẽn kõ kaset bʋʋdã kaoob wakatã taoore. Rẽ na n dems-a lame, la kɩt tɩ neb a taabã maneg n zoe Wẽnnaam. (2 Sãm. 12:13; 1 Tɩm. 5:20) B sã n lugl bʋ-kaoor sull n kibl ned fãa, b segd n gɩdg-a lame t’a pa le tõe n maan bũmb kẽer ye. Woto, b na n sõnga sẽn beeg-a wã t’a kɩt t’a naoã kẽn “so-tɩrs zut” wakat kãng tɛka. (Ebre. 12:13) Sã n wa lebg vẽeneg tɩ sẽn beeg-a wã tẽebã le paamda pãnga, b tõe n bas-a lame t’a le sɩng bũmb kẽer maanego.

TOGS TƖ B KIBLA NEDA

²⁴ Bʋ-kaoor sullã sã n ges tɩ ned ning sẽn beegã sɩd teka yam n kos sugri, la tɩ tigingã neb wall sakã neb yaool n tõe n wa bãnga yellã, pa rẽ bɩ tigingã neb segd n gũusa b mens ne sẽn maanã yel-wẽndã, b segd n togsa Kiris-nebã vɩɩm la b tʋʋmã tigsg sasa n wilg rẽ. B segd n yeelame yaa: “B kibla a [a soabã yʋʋre.]”

B SÃ N YÃK YAM N NA N YIIS NED TIGINGÃ PƲGẼ

²⁵ Wakat ninga, sẽn beeg-a wã tõe n fõr n kẽe yel-wẽndã pʋgẽ, tɩ baa b sẽn maood n na n sõng-a wã, bɩ a pa toeemdẽ ye. Bʋʋdã kaoob sasa, tõe n yɩɩ toog tɩ b yã tʋʋm sẽn sek na ‘wilg t’a teka yam.’ (Tʋʋ. 26:20) Sã n wa yaa woto b maanda wãna? Yaa tɩlɛ tɩ b yiis yel-wẽn-maandã sẽn pa rat n tek yam n kos sugrã tigingã pʋgẽ, tɩ kɩt t’a pa le tõe n maan tũud-n-taar ne a Zeova nin-buiidã sẽn yaa yɩlmã ye. Woto, a manesem-wẽngã pa tõe n mad tigingã neb ye. Rẽ kogenda tigingã neb tẽebã wɛɛngẽ la vɩɩm manesmã wɛɛngẽ, la kɩtdẽ me tɩ tigingã ket n tar yʋ-noogo. (Tõo. 21:20, 21; 22:23, 24) A Poll sẽn wa n wʋm tɩ ned n be Korẽnt tigingã pʋgẽ n tʋmd yãn-tʋʋmã, a sagla kãsem-dãmbã tɩ b “ning ned a woto a Sʋɩtãan nugẽ . . . , sẽn na yɩl tɩ tigingã yam-sõngã paam koglgo.” (1 Kor. 5:5, 11-13) A Poll goma neb a taab sẽn da kɩɩsd sɩdã tɩ b yiis-b tigingã pʋgẽ yelle.—1 Tɩm. 1:20.

²⁶ Sã n wa lebg vẽeneg tɩ b segd n yiisa yel-wẽn-maand tigingã pʋgẽ, bʋ-kaoorã sull segd n togsa nedã b yam-yãkrã, la b tik Biiblã n wilg-a bũmb ning sẽn kɩt tɩ b segd n yiis-a tigingã pʋgẽ wã vẽenega. Bʋ-kaoorã sull sã n togs yel-wẽn-maandã yam ning b sẽn yãkã poore, b segd n wilg-a lame t’a sã n tagsdẽ tɩ b kaoo a bʋʋdã kɛgre, t’a rat tɩ b maneg n bʋ, a segd n gʋlsa lɛtr n wilg bũmb ning sẽn kɩt t’a rat tɩ b maneg n bʋ-a wã. A tõe n maana rẽ daar ning b sẽn togs-a wã tɛk n tãag rasem a yopoe. A sã n tool bʋ-kaoor sullã lɛtr n wilg t’a pa sak a yiisgã, kãsem-dãmbã sull segd n togsa tigims sull yel-gɛtã. A na n yãka kãsem-dãmb sẽn tar minim, n lugl bʋ-kaoor sull a to tɩ b lebs n bʋ yellã. B na n modgame n lebs n kao bʋʋdã tɩ pa zʋʋg rasem a yopoe lɛtrã reegr poor ye. Yel-wẽn-maandã sã n gʋls lɛtre, b pa na n yãg n togs tigingã pʋgẽ tɩ b yiis-a lame ye. La b pa segd n le sak t’a leok wall a pʋʋs tigissã sasa, bɩ n tʋm tigingã tʋʋm kẽer ye.

²⁷ B sẽn kõ sor tɩ yel-wẽn-maand tõe n kos tɩ b lebs n bʋ a yellã yaa a sõngr yĩnga, sẽn na yɩl t’a tõe n le paam n togs bũmb ning sẽn be a sũurẽ wã. Dẽnd yel-wẽn-maandã sã n pa sak bʋ-kaoor sull a to wã boollã, tɩ b modg sẽn na yɩl n paam-a tɩ pa yãkd nenga, b na n togsa tigingã pʋgẽ tɩ b yiis-a lame.

²⁸ Yel-wẽn-maandã sã n yãk yam n pa na n gʋlse, bʋ-kaoor sullã na n wilg-a-la a sẽn segd n tek yam n kos sugrã võore, la b togs-a bũmb nins a sẽn tõe n maan tɩ b wa lebs n deeg-a tigingã pʋgẽ. Rẽ na n sõng-a lame la wilg me tɩ b rata a neere, n saagdẽ t’a na n wa toeemame n lebg n wa a Zeova siglgã pʋgẽ.—2 Kor. 2:6, 7.

TOGS TƖ B YIISA NED TIGINGÃ PƲGẼ

²⁹ Sã n wa yaa tɩlɛ tɩ b yiis yel-wẽn-maand a sẽn pa rat n tek yam n kos sugr yĩnga, b segd n togsa koɛɛg-koɛɛg yaa: “[A soabã yʋʋre] pa le yaa a Zeova Kaset soab ye.” Rẽ na n kɩtame tɩ tigingã neb nins sẽn maand sɩdã bãng tɩ b pa segd n le maan tũud-n-taar ne nin-kãng ye.—1 Kor. 5:11.

NED SÃ N YIIS A MENGA

³⁰ “Ned sẽn yiis a meng” yaa ned sẽn deeg lisg n yaa a Zeova Kaset soaba, n wa yãk yam n pa le rat n yɩ kiris-neda, n yeel t’a pa le rat tɩ b bool-a t’a Zeova Kaset soab ye. Leb n tõe n yɩɩ ned manesem sẽn wilgd t’a pa le yaa tigingã ned ye. Wala makre, a sã n tɩ kẽ siglg sẽn maand yɛl sẽn kɩɩsd Biiblã noya, tɩ kɩt tɩ Wẽnnaam a Zeova zoe n ning-a taale.—Eza. 2:4; Vẽn. 19:17-21.

³¹ Tẽn-tʋmd a Zã goma a wakatẽ neb nins sẽn bas tẽebã yelle, n yeel yaa “B yii tõnd nengẽ, la b ra pa tõnd neb ye. Bala b sã n da yaẽ-la tõnd neba, b ra na n paẽ-la ne tõndo. La b yii tõnd nengẽ sẽn na yɩl tɩ yɩ vẽeneg tɩ pa nebã fãa n yaa tõnd neb ye.”—1 Zã 2:19.

³² Ned sã n yiis a meng tigingã pʋgẽ, a Zeova taoore, a yaa toor fasɩ ne kiris-ned sẽn bas koɛɛgã moonego. Nina tõe n basa koɛɛgã moonego, a sẽn pa le zãmsd Wẽnnaam Gomdã wakat fãa wã yĩnga. Pa rẽ bɩ yaa zu-loees la a tar-yã, wall b namsd-a-la a tũudmã yĩnga, tɩ kɩt t’a pa le tar yẽesem a Zeova tũubã pʋgẽ ye. Kãsem-dãmbã la tigingã neb a taabã tõe n ket n sõngda ned a woto sẽn na yɩl t’a tẽebã le paam pãnga.—Rom. 15:1; 1 Tes. 5:14; Ebre. 12:12.

³³ La kiris-ned sã n yãk yam n yiis a menga, b segd n togsa tigingã taoore. B yetame: “[A soabã yʋʋre] pa le yaa a Zeova Kaset soab ye.” Manesem ning b sẽn segd n tall ne ned a woto, la ne ned b sẽn yiis tigingã pʋgẽ yaa yembre.

LEBS N DEEG NED B SẼN DA YIISI

³⁴ B tõe n lebs n deega ned b sẽn da yiis tigingã pʋgẽ wall ned sẽn da yiis a menga. La yaa a soabã manesmã sẽn na n wilg vẽeneg t’a teka yam n kos sugri, n bas yel-wẽnd ning a sẽn da maandã tɩ kaoose. A wilgdame t’a rat n le paama zood sõma ne a Zeova. Kãsem-dãmbã segd n maaga b yĩng n bas weer tɩ sek a soabã na wilg t’a sɩd teka yam n kos sugri. Tõe n yɩɩ kiis wʋsgo, yʋʋmde, wall sẽn yɩɩd rẽ, la bee ne yɛlã sẽn yaa to-to wã. Ned sã n gʋls lɛtr n kos kãsem-dãmbã tɩ b lebs n deeg-a tigingã pʋgẽ, b segd n lugla bʋ-kaoor sull sẽn na n sõs ne-a. Sullã nebã na n bao n bãnga a sã n tʋmda ‘tʋʋm sẽn wilgd t’a teka yam,’ la b tags n ges b sã n tõe n lebs n deeg-a lame, wall b nan pa tõe.—Tʋʋ. 26:20.

³⁵ Ned ning sẽn kot tɩ b lebs n deeg-a wã sã n da bee tiging a to pʋgẽ a yiisgã wakate, tiging ning pʋgẽ a sẽn be masã wã kãsem-dãmbã na n lugla bʋ-kaoor sull tɩ b sõs ne-a. Bʋ-kaoor sul-kãng sã n tagsdẽ tɩ b segd n lebs n deeg-a lame, b segd n gʋlsa tiging ning pʋgẽ b sẽn kao a bʋʋdã pipi wã kãsem-dãmb n wilg bãmb sẽn tagsd bũmb ninga. Bʋ-kaoor sul a yiibã segd n yẽsa ne taab n bãng yellã vɩʋʋgo, sẽn na yɩl tɩ sard ning b sẽn na n dɩkã yɩ tɩrga. Baasgo, yaa tiging ning pʋgẽ b sẽn kao a bʋʋdã pipi wã bʋ-kaoor sullã n yãkd b sã n tõe n lebs n deega a soabã tigingã pʋgẽ.

TOGS TƖ B LEBS N DEEGA NED B SẼN DA YIISI

³⁶ Bʋ-kaoor sullã sã n kɩs sɩd tɩ ned ning b sẽn da yiisã, wall ned ning sẽn da yiis a mengã sɩd teka yam n kos sugr tɩ b segd n lebs n deeg-a, b togsda tiging ning pʋgẽ b sẽn kao a soabã bʋʋdã taoor tɩ b lebs n deeg-a-la tigingã pʋgẽ. Sã n mik t’a tɩ bee tiging a to pʋgẽ, b segd n togsa tiging-kãng me pʋgẽ. B segd n yeelame yaa: “B lebs n deega [a soabã yʋʋre] a Zeova Kaset rãmbã sʋka.”

SÃ N YAA BIIG SẼN DEEG LISG N MAAN YEL-WẼN-KÃSENGA

³⁷ Bi-bilf sẽn deeg lisg sã n maan yel-wẽn-kãsenga, b segd n togsa kãsem-dãmbã. Kãsem-dãmbã sã n wa kaood biig bʋʋd a sẽn maan yel-wẽn-kãseng yĩnga, a roagdbã sã n deega lisgu, yɩta sõma tɩ bãmb me zĩnd be. B segd n sõnga bʋ-kaoor sullã, n da baood n na n gɩdg tɩ b pa kibl-a wa sẽn segdã ye. Bʋ-kaoor sullã na n kibla biigã la b sõng-a t’a tẽebã lebs n paam pãnga, wa b sẽn na n maan to-to ne kãsem sẽn maan yel-wẽndã. La biigã sã n pa rat n tek yam n kos sugri, b yiisd-a-la tigingã pʋgẽ.

KOE-MOOND SẼN NAN PA REEG LISG SÃ N MAAN YEL-WẼN-KÃSENGA

³⁸ Koe-moond sẽn nan pa reeg lisg sã n maan yel-wẽn-kãsenga, bõe la b segd n maane? Sẽn mik t’a nan pa reeg lisgã, b pa tõe n yiis-a tigingã pʋgẽ ye. Tõe tɩ yaa a sẽn pa wʋmd Biiblã noy kẽer võor sõma yĩnga. Dẽnd b sã n sagl-a ne bʋgsem, tõe n sõng-a lame t’a kɩt t’a naoã kẽn “so-tɩrs zutu.”—Ebre. 12:13.

³⁹ Kãsem-dãmb a yiib sã n sõs ne koe-moond sẽn nan pa reeg lisg sẽn maan yel-wẽnde, n bao n na n sõng-a t’a pa rat n tek yam n kos sugri, yaa tɩlɛ tɩ b togs tigingã. B segd n togsa koɛɛg-koɛɛg yaa: “[A soabã yʋʋre] pa le yaa koe-moond sẽn nan pa reeg lisg ye.” Woto, a lebgda wa dũniyã ned tigingã neb nifẽ. Baa b sẽn pa yiis-a tigingã pʋgẽ wã, kiris-nebã na n gũusa ne a tũud-n-taare. (1 Kor. 15:33) B pa na n le sak t’a kõ rapoor ye.

⁴⁰ Kaoosg zugẽ, a tõe n le wa rat n lebga koe-moond sẽn nan pa reeg lisgu. Sã n wa yaa woto, kãsem-dãmb a yiib n na n sõs ne-a n bãng a sã n bɩɩsa a tẽebã. Sã n zemsame tɩ b le kɩt t’a yɩ koe-moonda, b segd n togsa koɛɛg-koɛɛg yaa: “[A soabã yʋʋre] le lebga koe-moond sẽn nan pa reeg lisgu.”

A ZEOVA NINGDA SẼN TŨUD-B YẼ NE ZEMS-N-TAAR LA B YAA YƖLMÃ BARKA

⁴¹ Neb nins fãa sẽn wat a Zeova tigingã pʋgẽ rũndã-rũndã wã tõe n maana sũ-noog ne bõn-sõma nins fãa a sẽn kõt a nin-buiidã tɩ paasd b tẽebã pãngã. Sɩd me, d paamda bũmb ka tɛk sẽn paasd d tẽebã pãnga, la d wʋmd sɩdã võor tɩ kengd d raoodo. Sẽn paase, a Zeova sẽn sigl tigingã tɩ Kiristã yaa a Zu-soabã, kogenda tõndo. (Yɩɩn. 23; Eza. 32:1, 2) Yɛlã sẽn yaa toog yaoolem wakatã, tɩ tõnd yɛlã yaool n yaa sõma wa d zoe n bee arzãnã pʋgẽ wã kɩtame tɩ d yam gãe bãane.

⁴² D sã n modgd sẽn na yɩl tɩ zems-n-taar ket n be tigingã pʋgẽ, la a ket n yaa yɩlemde, d kɩtdame tɩ sɩdã d sẽn bãng Rĩungã wɛɛngẽ wã vẽenem yãgda. (Mat. 5:16; Zak 3:18) Ne a Zeova sõngre, neb wʋsg na n bãnga sɩdã, la b wa naag tõnd n maand a raabã tɩ noom-do.