Kiris-nebã vɩɩm la b tʋʋma tigissã na-kẽndr not-rãmbã
TƲƲLG RASEM A 4-10
D SẼN BÃNG BIIBLÃ KARENG PƲGẼ | ROM DÃMBÃ 12-14
“Kiris-ned sẽn tõe n wilg to-to t’a nonga a taabã”
Rom. 12:10, it-1 53
Nong wʋsgo
Saam-biir nonglem (Gɛrk, filadɛlfiya, rat n yeel tɩ “nong f saam-biig wʋsgo”) n segd n zĩnd tigingã neb sʋka. (Rom. 12:10; Ebre. 13:1; ges-y 1 Pɩy. 3:8 me.) Rẽnd tigingã neb segd n zemsda taaba, la b nong taab wʋsg wa zag-yɛng neba. Baa tigingã neb sẽn zoe n nong taabã, b sagl-b lame tɩ b kell n maan dẽ n paase.—1 Tes. 4:9, 10.
Gɛrk gom-bil ning sẽn yaa filostorgosã rat n yeelame tɩ “nong f to wʋsgo.” B wae n pʋt-a lame n na n bilg neb sẽn noom ne taab wʋsgo. Gom-bilã babg a yiib-n-soabã yaa ɛstɛrgo. B wae n pʋt-a lame n bilgd nonglem ning sẽn be zak neb ne taab sʋkã. Tʋm-tʋmd a Poll sagla kiris-nebã tɩ b bɩɩs nonglem kãnga. (Rom. 12:10) A Poll wilgame me tɩ yaoolem wakatã, neb wʋsg pa na n tall nonglem kãnga, (Gɛrk, astorgoi) la tɩ neb a woto segda ne kũum.—2 Tɩm. 3:3; Rom. 1:31, 32.
Rom. 12:17-19, w09-MM 1/10 16 s. a 3
“Bɩ laafɩ zĩnd yãmb ne nebã fãa sʋka”
3 Karm-y Rom dãmb 12:17. A Poll yeelame tɩ ned sã n maan-d wẽnga, d pa segd n lebs a soab wẽng ye. Sagl-kãngã tũub tara yõod wʋsgo. Sẽn yɩɩd fãa, y zakã neb kẽer sã n pa a Zeova Kaset rãmba. Kiris-ned pag bɩ a sɩd sẽn pa kiris-ned sã n maan-a bũmb wall a gom-a põosa, a modgdame n da maan n lebs ye. F sã n ‘lebs wẽng wẽng yĩnga,’ pa manegd yell ye. Woto pʋd n tõe n kenga yellã.
w07-MM 1/7 26-27 s. 12-13
‘Da lebs-y ned wẽng wẽng yĩng ye’
12 Sẽn na yɩl n wilg manesem ning d sẽn segd n tall ne d tẽed-n-taasã la neb nins sẽn pa tõnd tẽed-n-taasã, a Poll yeela woto: ‘Da lebs-y ned wẽng wẽng yĩng ye.’ Yaa a sẽn da zoe n yeel tɩ b ‘kisg wẽngã’ n kɩt t’a yet woto masã wã. Sɩd me, ned sã n lebsd wẽng wẽng yĩnga, wãn to la a tõe n yeel t’a kisa wẽnem bɩ wẽnga? A soab sã n maand woto, a pa wilgd t’a nonglmã pa naag ne zãmb ye. Rẽ n so t’a Poll yeel woto: “Bɩ y maan sẽn zems pẽgr neba fãa nifẽ.” (Rom dãmba 12:9, 17) Wãn to la d tũud gom-kãensã?
13 A Poll da reng n goma b sẽn nams tʋm-tʋmdbã yell a lɛtr ning a sẽn tool Korẽnt kiris-nebã pʋgẽ. A yeela woto: “Tõnd yaa bõn-gets ne dũniyã la ne malɛk rãmba la ne ninsaalba me. . . . B sẽn gomd tõnd wẽngã, tõnd ningda barka; tõnd sẽn paamd namsgã, tõnd sakdame; b sẽn kãnegd tõndã, tõnd sagenda ne belsg goama.” (1 Korẽnt dãmba 4:9-13) Rũndã-rũndã, kiris-neb hakɩɩkã me yaa wa bõn-gets dũni-kãngã nebã nifẽ. B sã n ne b sẽn namsd tõnd tɩ d baas n ket n tʋmd tʋʋm-sõma wã, tõe n kɩtame tɩ b sak Kirist koɛɛgã.—1 Pɩyɛɛr 2:12.
Rom. 12:20, 21, w12-MM 1/11 31 s. 13
Kõt-y taab sugri
13 Ned sẽn pa d tẽed-n-taag tõe n wa beeg-d lame, tɩ d getẽ tɩ d tõe n tũnuga ne rẽ n sõng-a t’a tʋlg n bãng Biiblã sẽn yetã. Tʋm-tʋmd a Poll yeela woto: “Kom sã n tar f bɛ, bɩ f kõ-a t’a rɩ. Ko-yũud sã n tar-a bɩ f kõ-a t’a yũ. Tɩ bõe, fo sã n maan woto, fo rʋʋgda bug-saal a zugu. Da sak tɩ wẽng tõog foom ye, maan sõma n tõog wẽnga.” (Rom. 12:20, 21) Ned sã n maan-y wẽng tɩ y tõog y meng n pa lebs-a wẽnga, tõe n kɩtame t’a bʋke. Y sã n wilg sẽn beeg-a yãmbã tɩ y yaa wʋmd la y zoe a nimbãanega, tõe n kɩtame t’a tʋlg n zãms Biiblã. Baa a sã n pa bao n na n zãms Biiblã, y sũ-marã la y maan-neerã tõe n kɩtame t’a rat n bãng bũmb ning sẽn kɩt tɩ y yaa toorã.—1 Pɩy. 2:12; 3:16.
D bʋgs Wẽnnaam Gomdã zug neere
D sẽn tõe n yãk reem sẽn yaa sõma to-to
5 Bũmb ning fãa tõnd sẽn maandã tara loees ne a Zeova tũubã. A Poll sẽn yeelã wilgda rẽ. A yeelame: ‘Kõ-y y yĩnsã tɩ yɩ maoong sẽn vɩ, sẽn yaa sõma, sẽn noom Wẽnnaam.’ (Rom dãmbã 12:1, MN) A Zeezi yeelame: “Fo tog n nonga a Zeova sẽn yaa fo Wẽnnaamã ne f sũurã fãa, ne f sɩɩgã fãa, ne f yamã fãa, la ne f pãngã fãa.” (Mark 12:30, MN) D ratame n tũ a Zeova ne d sũurã fãa. Pĩnd wẽndẽ wã, Israyɛll nebã sã n da rat n kʋ rũng n maan maoong n kõ a Zeova, rũngã ra pa tog n tar zang ye. Maoongã sã n da pa ta a Zeova yam, a pa reegd ye. Woto me, tõnd sẽn tũud a Zeova to-to wã tõeeme n pa ta a yam ye. Wãn to?
6 A Zeova yeela a nebã yaa: “Yãmb segd n yɩɩ sõamyã, bala mam yaa sõngo.” (1 Pɩyɛɛr 1:14-16, MN; 2 Pɩyɛɛr 3:11) Dẽnd tõnd sẽn tũud a Zeova to-to wã segd n yɩɩ sõma. La ned sã n maand bũmb a Zeova sẽn kisi, wala makre, yoobo, nen-kɛglem bɩ zĩn-dãmb yɛla, a sẽn tũud-a to-to wã pa tõe n ta a yam ye. (Rom dãmbã 6:12-14; 8:13) Yɛl a woto sã n naaga reem nins tõnd sẽn nongã me, pa na n yɩ a Zeova noog ye. Tõe n kɩtame tɩ d sẽn tũud-a to-to wã pa ta a yam, tɩ sãam tõnd ne yẽ zoodã.
Rom. 13:1, w08-MM 1/6 13 s. a 4
Rom dãmb sebrã vaeesgo
13:1—B sẽn yeel tɩ “yaa Wẽnnaam n zĩnig pãn-soaadb nins sẽn be wã” võor yaa bõe? Yaa Wẽnnaam sẽn bas pãn-soaadbã tɩ b rɩt naamã la b sẽn yet tɩ yaa yẽ n zĩnig-bã. Wakat ninga Wẽnnaam rengd n wilga b sẽn na n dɩ naamã to-to. Biiblã sẽn deng n wilg nanambs kẽer sẽn na n dɩ b naamã to-to wã sõngda tõnd tɩ d wʋmd rẽ võore.
TƲƲLG RASEM 11-17
D SẼN BÃNG BIIBLÃ KARENG PƲGẼ | ROM DÃMBÃ 15-16
“Teeg-y-yã a Zeova n paam sũ-mar la belsgo”
Rom. 15:4, w17.07-MM 14 s. 11
Yãb-y ne neb nins sẽn yãbdã
11 A Lazaar kũumã kibar sɩd wilgdame t’a Zeezi ra kʋmda nebã. La Biiblã tara kibay wʋsg sẽn belsd sũ-sãang rãmbã. Rẽ pa bũmb sẽn lingd tõnd ye. Bala, Biiblã meng yetame tɩ “bũmb nins b sẽn pĩnd n gʋlsã gʋlsa tõnd zãmsg yĩnga, tɩ tõnd tõe n paam saag-sõngo, sũ-mare la belsg ning Wẽnnaam gʋls-sõamyã sẽn kõtã yĩnga.” (Rom. 15:4) Y sã n wa be sũ-sãang pʋgẽ, bɩ y bas y yam tɩ y tõe n paama belsg Biiblã pʋgẽ. Ad vɛrse-rãmb kẽer sẽn belsd neda:
▪ “Sẽn-Ka-Saab pẽe sũ-sãang rãmbã, la b fãagda sũ-pa-noaang rãmbã.”—Yɩɩn. 34:19, 20.
▪ “Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.”—Yɩɩn. 94:19.
▪ “Bɩ tõnd Zu-soab a Zeezi Kiris mengã, la tõnd ba a Wẽnnaam sẽn nong tõndo, n bels tõnd ne belsg sẽn kõn sa, bãmb nimbãan-zoeerã yĩnga, la b kõ tõnd saag-sõngã bels yãmb sũyã, la b kɩt tɩ y pɛlg yɩ kãenkãe.”—2 Tes. 2:16, 17.
Rom. 15:5, w16.04-MM 14 s. a 5
Bɩ d bas tɩ “sũ-mar maan a tʋʋmd n baase”
5 Kos-y-yã a Zeova t’a kõ-y pãnga. A Zeova yaa ‘Wẽnnaam sẽn pid ne sũ-mar la belsgo.’ (Rom. 15:5) Yẽ bal n mi tõnd sõma, la a mi d zu-loeesã sẽn namsd tõnd to-to wã me. Rẽnd d sã n wa tar zu-loɛɛga, a mi a sẽn na n sõng tõnd to-to tɩ d tõog toogo. Biiblã yeela woto: “Sẽn-Ka-Saab pidsda sẽn zoet-b bãmbã ratem. B sã n bool-b n kos sõngre, bãmb wʋmdame n wa sõng-ba.” (Yɩɩn. 145:19) La d sã n pʋʋs Wẽnnaam n kos t’a sõng-d tɩ d bɩɩs sũ-mare, wãn to la a na n sõng-do?
Rom. 15:13, w14-MM 1/6 9 s. 11
“Nong Zu-soabã fo Wẽnnaam”
11 A Zeova pʋlma tõnd vɩɩm sẽn kõn sa. (Rom. 15:13) D sẽn tẽed tɩ manegr n watã kõt-d-la raood makr taoore. Sẽn paam-b vʋʋsem sõng zaeebã sã n kell n “maan neer hal tɩ ta kũum,” b na n paama ‘vɩɩm maanf’ saasẽ. (Vẽn. 2:10) Wẽn-sakdb a taabã na n vɩɩmda arzãnã pʋgẽ tẽngã zugu. (Luk 23:43, MN) D sẽn mi tɩ manegr n watã kõt-d-la sũ-noogo. Kɩtame tɩ d yamã gãe bãane, la kɩt me tɩ d nong Wẽnnaam sẽn yaa “bark sõma fãa la kũun-sõma fãa” kõtã.—Zak 1:17.
D bʋgs Wẽnnaam Gomdã zug neere
Rom dãmbã 15:27, MN: “Yaa sɩd tɩ b maana rẽ ne sũ-noogo, la sɩd-sɩda, b ra tara nin-sõamyã wã samde. Bala bu-zẽmsã sã n paama pʋɩɩr bũmb nins nin-sõamyã wã sẽn deeg Wẽnnaam nengẽ wã pʋgẽ, bãmb me segd n sõng-b-la ne b paoongã.”
Rom. 15:27, w89 1/12 24 s. a 3
“Yãmb nonglmã yaa nonglem hakɩɩk bɩ?”
Sɩd-sɩda, b tẽed-n-taas nins sẽn yaa bu-zẽmsã ra segd n sak n kʋm-b-la b toogã pʋgẽ. D pʋd n tõe n yeelame tɩ b ra tara kiris-neb nins sẽn be Zerizalɛmmã “samde.” Bala, yaa Zerizalɛm kiris-nebã n moon koe-noogã tɩ ta bu-zẽmsã. Sɩd me, a Poll yeelame: “Bu-zẽmsã sã n paama pʋɩɩr bũmb nins nin-sõamyã wã sẽn deeg Wẽnnaam nengẽ wã pʋgẽ, bãmb me segd n sõng-b-la ne b paoongã.”—Rom dãmbã 15:27, MN.
Rom. 16:25, it-2 647 s. a 2
Reng n bãnge, Pʋlengo
Yaa Mesi wã bɩ Kiristã n da segd n yɩ yageng ning b sẽn pʋlme, n yeel tɩ na n tũu ne yẽ tɩ dũniyã buud fãa nin-tɩrsã paam barkã. (Gal. 3:8, 14) Pipi b sẽn gom ‘yageng-kãng’ yeel yɩɩ a Ãdem ne a Awa sẽn kɩɩs Wẽnnaam Edɛnnã poore, la yaa sẽn deng a Abɛll rogmã. (Sɩng. 3:15) Yɩɩ na maan yʋʋm 4000 nand tɩ b wilg vẽeneg tɩ yaa Mesi wã la yageng ning yell b sẽn da gomã, n vẽneg yel-soalgdgã sẽn yaa sõngã. Rẽnd yel-soalgdgã sɩd ra “solga hal sɩngr wẽndẽ.”—Rom. 16:25-27; Efɛ. 1:8-10; 3:4-11.
TƲƲLG RASEM 18-24
D SẼN BÃNG BIIBLÃ KARENG PƲGẼ | 1 KORẼNT RÃMBÃ 1-3
“Yãmb vɩɩ y mengã ratem yĩng bɩ, bɩ y basdame tɩ vʋʋsem sõngã wilgd-y sore?”
1 Kor. 2:14, w18.02-MM 19 s. a 4-5
Bõe n wilgd tɩ ned sakdame tɩ vʋʋsem sõngã wilgd-a sore?
4 Ned sẽn vɩ a mengã yĩng manesem yaa wãn-wãna? A rɩkda dũniyã nebã togs-n-taare, tɩ yaa a mengã ratem bal n pak-a n yɩɩda. A Poll wilgame tɩ ned a woto sakda “sɩɩg ning sẽn tʋmd wẽn-kɩɩsdbã pʋgẽ moasã wã.” (Efɛ. 2:2) Kɩtame tɩ yaa nebã sẽn wae n maandẽ wã la a maanda. Ned sẽn vɩ a mengã yĩng maanda a sẽn tagsd tɩ segdame, n pa baood n na n tũ Wẽnnaam noyã ye. Naoor wʋsgo, sẽn pak-a yaa arzɛkã la yʋʋrã baoobo. Sẽn paase, a sã n tagsd t’a tara sor n maan bũmbu, a gãta rẽ dem-deme.
5 Sẽn vɩ-b b mens yĩngã nong n maanda bũmb nins Biiblã sẽn boond tɩ ‘yĩngã tʋʋmã.’ (Gal. 5:19-21) Pipi lɛtr ning a Poll sẽn gʋls n tool Korẽnt kiris-nebã pʋgẽ, a wilga bũmb a taab neb a woto buudã sẽn maande. Wala makre, b wata ne welsg nebã sʋka, b nonga no-koɛɛma, b pirsda b taabã tɩ b yɩ kɩɩsdba, b boonda taab bʋʋdo, b pa sakd taoor dãmbã, yaa rɩ la yũ wã n pak-ba. Ned sẽn vɩ a mengã yĩng pa tõogd a meng makr wakat ye. (Yel. 7:21, 22) A Zʋʋd wilgame tɩ kẽer meng na n basame tɩ b yĩngã ratmã soog-ba, hal n pa tõe n paam Wẽnnaam vʋʋsem sõngã ye.—Zʋʋd 18, 19.
1 Kor. 2:15, 16, w18.02-MM 19 s. a 6
Bõe n wilgd tɩ ned sakdame tɩ vʋʋsem sõngã wilgd-a sore?
6 Sẽn sakd-a tɩ vʋʋsem sõngã wilgd-a sor pa vɩ a mengã yĩng ye. Yaa yẽ ne Wẽnnaam zoodã n pak-a n yɩɩda. A maoodame n dɩkd Wẽnnaam togs-n-taare. (Efɛ. 5:1) Bũmb fãa pʋgẽ, a maanda a sẽn tõe fãa n na n bãng a Zeova raabo. Yaa vẽeneg a yamẽ tɩ Wẽnnaam sɩd beeme. A pa maand a toog kae ne Wẽnnaam noyã wa sẽn vɩ-b b mens yĩngã ye. A maoodame n tũud a Zeova noyã la a saglsã a sẽn maand fãa pʋgẽ. (Yɩɩn. 119:33; 143:10) A pa tʋmd “yĩngã tʋʋm” ye. A maanda a sẽn tõe fãa n bɩɩsd zʋg-sõma nins vʋʋsem sõngã sẽn sõngd ned t’a bɩɩsã. (Gal. 5:22, 23) A nonga tũudmã yɛl ne a sũur fãa.
w18.02-MM 22 s. 15
Bõe n wilgd tɩ ned sakdame tɩ vʋʋsem sõngã wilgd-a sore?
15 Bõe la d tõe n maan n dɩk Kiristã togs-n-taare? Biiblã wilgdame tɩ yaa tɩlɛ tɩ d mao n tall ‘Kirist tagsgo.’ (1 Kor. 2:16) Biiblã yeelame me tɩ d mao n tall “yam ning Kirist Zeezi sẽn da tarã.” (Rom. 15:5, MN) Dẽnd yaa tɩlɛ tɩ d reng n bao n bãng Kiristã tagsgo, a yel-manesem la a tʋʋm-tʋmdɩ, n tõog n dɩk a togs-n-taare. Sẽn da pak a Zeezi n tɩ yɩɩd yaa yẽ ne a Zeova zoodã. Dẽnd d sã n dɩkd a togs-n-taare, paasda tõnd ne a Zeova zoodã pãnga. Yaa rẽ yĩng la d sẽn segd n mao tɩ bũmb fãa pʋgẽ bɩ d tagsgã yɩ wa Kiristã.
D bʋgs Wẽnnaam Gomdã zug neere
1 Kor. 1:20, it-2 854 s. a 5
Yam
Woto, dũniyã ne a yamã geelga bũmb ning Wẽnnaam sẽn tũnug ne Kiristã n maanã wa yalemdo. Baa b nanambsã sẽn da tar tõog la b mi naam dɩɩb sõma wã, b ‘kaa Zu-soabã sẽn so ziirã.’ (1 Kor. 1:18; 2:7, 8) La Wẽnnaam tũnugda ne bũmb ning dũniyã yam dãmbã sẽn get tɩ yaa “yalemdã,” n paas neb nins b sẽn get wa ‘yalemba, pãn-komsem dãmba, la neb sẽn ka yõodã,’ n pidsd a raabã sẽn pa tõe n vaalã, n wilgdẽ tɩ dũniyã yamã yaa yalemdo, la a ningd dũniyã yam dãmbã yãnde. (1 Kor. 1:19-28) A Poll tẽega Korẽnt kiris-nebã tɩ “dũni-kãngã yam, wall dũni-kãngã nanambs” na n lebga zaalem. Dẽnd ra pa yam-kãng la tʋm-tʋmd a Poll sẽn da moondã ye. (1 Kor. 2:6, 13) A keooga Kolos kiris-nebã tɩ b ra bas tɩ b belg-b ne “zãmsg buudu, [Gɛrk, filozofiyas, sẽn dat n yeel tɩ yamã nonglem] la ninsaalb minind ye.”—Kol. 2:8, ges-y vɛrse 20-23.
1 Kor. 2:3-5, w08-MM 1/7 31 s. a 4
Pipi Korẽnt dãmb ne 2 Korẽnt dãmb sɛbã vaeesgo
2:3-5. A Poll sẽn wa n moond Korẽnt sẽn da yaa filozofi la Gɛrk rãmb zãmsg a taab zĩigã, tõe tɩ sẽn da pak-a yaa a tõog tɩ nebã sak n deeg a sẽn yetã. La a pa bas tɩ pãn-komsem bɩ ninsaalb zoees gɩdg-a t’a pa moon koɛɛgã Wẽnnaam sẽn bobl-a wã ye. Tõnd me pa segd n bas tɩ yell d sẽn pa mi tiir gɩdg-d tɩ d pa moond Wẽnnaam Rĩungã koe-noog ye. D tõe n teega a Zeova n paam sõngr wala a Poll sẽn da maandã.
TƲƲLG RASEM 25-31
D SẼN BÃNG BIIBLÃ KARENG PƲGẼ | 1 KORẼNT RÃMBÃ 4-6
“Rã-bɩll bilf wukda zom-nagdg zãnga”
1 Kor. 5:1, 2, 5-8, 13, it-2 130
Rã-bɩlle
Tʋm-tʋmd a Poll me goma rã-bɩll sẽn makd bũmb ningã yelle. Yɩɩ a sẽn wa n na n yeel Korẽnt tigingã neb tɩ b yiis yoaadã tigingã pʋgẽ wã. A yeelame yaa: “Yãmb ka mi tɩ rã-bɩll bilf kɩtdame tɩ zom-nagdg tõr wuk la? Yiis-y rã-bɩl-kʋdgã n bas y mens n lebg yɩlma, tɩ y tõe n yɩ zom-nagd-paalga, rã-bɩll sẽn ka be yãmb pʋgẽ wã yĩnga. Bala, b kʋʋ Kiris sẽn yaa tõnd Pakã maoongo.” Rẽ poore, a wilga “rã-bɩllã” sẽn makd bũmb ningã vẽenega, n yeele: “Woto yĩnga, bɩ d maan tigrã, la ra yɩ ne rã-bɩl-kʋdgo, la ra yɩ ne zãmb la pʋ-toog rã-bɩll ye. Bɩ yɩ ne pʋ-peelem la sɩd bur sẽn ka rã-bɩlle.” (1 Kor. 5:6-8 ) A Poll rɩka makr ne Zʋɩf-rãmbã Bur sẽn ka rã-bɩll kibsã b sẽn da maand Pakã poorã sẽn makd bũmb ningã. F sã n yãk zom-miisg bilf n ning zom f sẽn nag n na n maan bur pʋgẽ, pa yãt n kaoos la a wuk ye. Woto me, b sã n pa yiis yoaadã sẽn tõe n sãam tigingã neb a taabã, tigingã tõr na n lebga rẽgd Wẽnnaam nifẽ. B ra segd n yiisa “rã-bɩllã” b sʋka, wa Israyɛll nebã sẽn da pa segd n bĩng rã-bɩll b rotẽ wã kibsã sasa wã.
it-2 903-904
A Sʋɩtãan
‘Bas ned a Sʋɩtãan nugẽ t’a yĩngã sãamã’ rat n yeelame tɩ bõe?
Tʋm-tʋmd a Poll sẽn wa n na n yeel Korẽnt tigingã tɩ b segd n yiisa rao a ye sẽn da be b sʋkã n tʋmd wɩɩbd ne a ba pagã, a paasame: “Bɩ b bas ned a woto a Sʋɩtãan nugẽ, t’a yĩngã na sãame.” (1 Kor. 5:5) Woto rat n yeelame tɩ b yiis raoã tigingã pʋgẽ, la b ra le maan tũud-n-taar ne-a baa bilf ye. (1 Kor. 5:13) Bas-a a Sʋɩtãan nugẽ wã rat n yeelame tɩ b yiis-a tigingã pʋgẽ, t’a le lebg dũniyã neda, tɩ yaool n yaa a Sʋɩtãan la dũniyã wẽnnaam la a naaba. Nin-kãngã ra yaa wa “rã-bɩll bilf” sẽn be “zom-nagdg tõr” pʋgẽ. Yẽ n da yaa “yĩngã,” rat n yeel tɩ tigingã ned ning sẽn sakd yĩngã tʋls-wẽnsã. B sã n yiis sẽn tʋmd-a wɩɩbdã, tigingã neb sẽn sakd tɩ vʋʋsem sõngã wilgd-b sorã na n sãama “yĩngã” sẽn be b sʋkã. (1 Kor. 5:6, 7) A Poll me basa a Imene ne a Alɛgsãndr a Sʋɩtãan nugẽ, bala b basa tẽeb la sũur kaset sõma, tɩ b tẽebã sãame.—1 Tɩm. 1:20.
1 Kor. 5:9-11, lvs 241, vẽnegre
Yiis ned tigingã pʋgẽ wã
Ned sã n maan yel-wẽn-kãseng n pa rat n tek yam n kos sugri, la a pa rat n tũ a Zeova noyã, a pa le tõe n naag tigingã neb ye. B yiisd-a-la tigingã pʋgẽ. B sã n yiis ned tigingã pʋgẽ, d pa le gomd ne-a, d pa le naagd-a n maan bũmb me ye. (1 Korẽnt rãmbã 5:11; 2 Zã 9-11) A Zeova sẽn kɩt tɩ b yiisd neb nins sẽn pa tekd yamã yaa sẽn na yɩl t’a yʋʋrã ra sãame, la ra wã tigingã neb a taabã ye. (1 Korẽnt rãmbã 5:6) Leb n tõe n sõnga sẽn maan-a yel-wẽn-kãsengã t’a bãng t’a tog n teka yam n kos sugri, n lebg n wa a Zeova nengẽ.—Luk 15:17.
▸ Sak a 3, sull 19
D bʋgs Wẽnnaam Gomdã zug neere
1 Kor. 4:9, w09-MM 1/5 25 s. 16
Malɛgsã “yaa tʋm-tʋmdb Wẽnnaam sẽn tʋm”
16 Kiris-neb nins sẽn paamd namsgã yaa ‘bõn-gets ne malɛk rãmbã.’ (1 Kor. 4:9) Tõnd sã n sakd Wẽnnaam, malɛgsã getame tɩ b sũy noomẽ. La yel-wẽn-maand me sã n tek yam n kos sugri, b sũy noomame. (Luk 15:10) Malɛgsã nee pagb nins sẽn yaa kiris-nebã manesem-sõngã me. Biiblã wilgdame tɩ “pag tog n ninga a zug bãnde, malɛk rãmbã yĩnga, tɩ wilg a sẽn teegd-a soabã noore.” (1 Kor. 11:3, 10) Vẽenega, malɛgsã sũy yaa noogo, pagbã la rapã fãa sã n sakd neb nins Wẽnnaam sẽn kõ zu-sobend a siglgã pʋgẽ wã. B sã n maand woto, b kõta malɛgsã me mak-sõngo.
1 Kor. 6:3, it-2 151
Tõogo
Tõog malɛgsã sẽn segd n sake. Malɛgsã ziir sẽn yɩɩd ninsaalbã sakda Wẽnnaam tõodã la a noyã. (Ebre. 1:7, 14; Yɩɩn. 104:4) A Zeova yeela a Sʋɩtãan sẽn yaa a bɛ wã meng tɩ bũmb kẽer la a pa segd n maane. (Zoob 1:12; 2:6) Malɛgsã naab a Mikayɛll sẽn wa n wẽed no-koeemd ne a Sʋɩtãana, a wilgame t’a sak n deegame t’a Zeova n yaa Bʋ-kaood sẽn ka to wã, n yeel-a yaa: “Bɩ Zu-soabã sɩbg-fo.” (Ziid 9; ges-y Zaka. 3:2.) A Zeezi Kirist sẽn leb saasẽ wã poore, Wẽnnaam a Zeova kɩtame tɩ malɛgsã fãa sakd-a. (Ebre. 1:6; 1 Pɩy. 3:22; Mat. 13:41; 25:31; Fili. 2:9-11) Rẽ n so t’a Zeezi tõog n tʋm malɛk t’a wa a Zã nengẽ. (Vẽn. 1:1) La 1 Korẽnt rãmb 6:3 pʋgẽ, tʋm-tʋmd a Poll sẽn gom Kirist ba-biisã yell n yeel tɩ b yãk-b lame tɩ b na n kao malɛgs bʋʋdã, sãmbg sẽn kae, yaa b sẽn na n wa naag n sãam malɛg-wẽnsã yell la a sẽn da gomdã.