D WILG TƖ D YAA KIRIS-NEB HAKƖƖKA
D maneg n kɩs sɩd ne Wẽnnaam Gomdã
Wẽnnaam Gomdã tõe n toeema d vɩɩmã. (Ebre. 4:12) La d sã n dat n paam tɩ Wẽnnaam wilg-d sor la a kõ-d sagls ne Biiblã maasem, tɩ d rɩ rẽ fãa yõodo, yaa tɩlɛ tɩ d kɩs sɩd tɩ Biiblã sɩd yaa “Wẽnnaam Gomde.” (1 Tes. 2:13) Bõe la d tõe n maan n maneg n kɩs sɩd ne Biiblã sẽn yetã?
Karm-y Biiblã daar fãa. Y sã n wa karemd-a, bao-y n bãng-y kaset buud toor-toor sẽn wilgd tɩ yaa a Zeova n kɩt tɩ b gʋls Biiblã. Wala makre, ges-y saglg ning sẽn be Yel-bũn sebrã pʋgẽ wã, la saglgã tũub sẽn tõe n naf tõnd to-to rũndã-rũndã.—Yel. 13:20; 14:30.
Zãmsd-y Biiblã. Bao-y n bãng-y kaset buud toor- toor sẽn wilgd tɩ yaa Wẽnnaam n vẽneg neb tɩ b gʋls Biiblã sõma. Vaeesg sebre, a Zeova Kaset rãmbã yĩnga pʋgẽ, ges-y zĩig ning b sẽn gʋls tɩ “Biiblã” la sẽn be tẽngrã, “Wẽnnaam n vẽneg tɩ b gʋlse.” Sẽn paase, y sã n ges bũmb ning b sẽn yeel Traduction du monde nouveau wã pʋgẽ, appendice A3 wã zĩigẽ, y tõe n maneg n kɩsa sɩd tɩ Biiblã koɛɛgã pa toeem ye.
GES-Y VIDEO WÃ: BŨMB NING SẼN KƖT TƖ D TẼED . . . WẼNNAAM GOMDÃ. RẼ POOR BƖ Y LEOK SOGSGÃ:
Wãn to la bũmb ning b sẽn yã Ezɩpt wẽnd-doog lagl zug Karnak soolmẽ wã wilgd tɩ d tõe n kɩsa sɩd ne Wẽnnaam Gomdã?
Bõe n kɩt tɩ d miẽ tɩ Biiblã koɛɛgã pa toeeme?
Bõe yĩng tɩ y tõe n yeel tɩ Biiblã sẽn ket n be rũndã-rũndã wã yaa kaset t’a sɩd yaa Wẽnnaam Gomde?—Karm-y Ezayi 40:8