Kiris-nebã vɩɩm la b tʋʋma tigissã na-kẽndr sebr not-rãmbã
© 2024 Watch Tower Bible and Tract Society of Pennsylvania
SIG-NOY RASEM A 6-12
D SẼN BÃNG BIIBLÃ KARENG PƲGẼ YƖƖN-SÕAMYÃ 36–37
‘Ra yik f sũur nin-wẽnsã yĩng ye’
Wẽnnaam Rĩungã sã n wa, bõe n pa na n le zĩndi?
4 Nin-wẽnsã sẽn be rũndã-rũndã wã, wãn to la namsd tõndo? Tʋm-tʋmd a Poll da yeelame tɩ “yaoolem wakate, tood na n zĩndame,” la a paas tɩ “nin-wẽnsã ne bɛlgdbã na n kell n kẽeda wẽngã pʋgẽ n paasdẽ.” (2 Tɩm. 3:1-5, 13) Yãmb gũus n gesame tɩ sɩd yaa woto bɩ? Nin-wẽns zoe n namsa tõnd sʋkã neb kẽere. Sãnda pʋd n pa solgd n tʋmd b tʋʋm-wẽnsã ye. La kẽer yẽ maanda wa b rat n sõnga nebã, la b yaool n yaa nin-wẽnse. Baa nin-wẽns sã n nan pa maan-d wẽng vẽeneg-vẽenega, b tʋʋm-wẽnsã namsd-d lame. Sɩd me, d sã n mi n wʋm b sẽn namsd kambã, sẽn kʋʋl-bã la sẽn ka tar-b pãngã, d sũur sãamda hal wʋsgo. Nin-wẽnsã tʋʋm-beedã kɩtame tɩ b yaa wa we-rũms wall zĩn-dãmb menga. (Zak 3:15) La a Zeova Gomdã kɩtame tɩ d miẽ tɩ manegr n wate, tɩ kengd d raood wʋsgo.
A Zeova ningda sẽn kõt-b b taabã sugrã barka
10 D sã n tar sũ-kẽka, d wãada d menga. D sã n tar sũ-kẽka, yaa wa d sẽn tʋk zɩɩb sẽn zɩs wʋsgo. A Zeova ratame tɩ d bas sũ-kẽka, n paam laafɩ. (Karm-y Efɛɛz rãmb 4:31, 32.) A yeta tõnd tɩ d ‘zãgs sũ-yikri, la d bas sũ-puugri.’ (Yɩɩn. 37:8) D sã n tũ sagl-kãnga, nafd-d lame. D sã n tar sũ-kẽka, tõe n booga d yĩisã laafi wã. (Yel. 14:30) D sã n tar sũ-kẽk ne neda, yaa tõnd mengã la namsd n yɩɩda, la pa sẽn beeg-a tõndã ye. Yaa wa f sẽn na n yũ pozõno, n dat tɩ kʋ sẽn beeg-a foo wã. Woto wã, d sã n kõt d taabã sugri, yaa tõnd mengã la d maand neer n yɩɩda. (Yel. 11:17) D paamdame tɩ d yamã gãe bãane, n tõe n ket n tʋmd a Zeova tʋʋmã.
‘Maan-y sũ-noog a Zeova yĩnga’
20 Rẽ, “sũ-maasem dãmba na n sooga dũniyã.” (Yɩɩl Sõamyã 37:11a) La “sũ-maasem dãmba” yaa ãnd dãmba? Gom-biig ning b sẽn lebg tɩ ‘sũ-maasmã’ yita gom-bi-yẽgrẽ sẽn dat n yeel tɩ “namse, sik f mengã, paooge.” N-ye, “sũ-maasem dãmba” yaa neb nins sẽn sikd b mens n gũudẽ t’a Zeova wa rems yɛlã n yiis kɛgr buud fãa sẽn namsd-bã. B na n ‘maana sũ-noog laafɩ wʋsg yĩnga.’ (Yɩɩl Sõamyã 37:11b) Masã menga, d paamda bãan wʋsg tẽeb arzãn ning pʋgẽ kiris-neb tiging hakɩkã sẽn be wã pʋgẽ.
D bʋgs Wẽnnaam Gomdã zug neere
it-2 341
Tãnga
Sẽn pa vigsdi, sẽn be wakat fãa, bɩ sẽn yaa lug-lugi. Tãensã bee wakat fãa n pa tol n yẽrgd b zĩigẽ wã ye. (Eza. 54:10; Hab. 3:6; ges-y Yɩɩn. 46:2.) Dẽnd yɩɩn-gʋlsdã sẽn gom a Zeova tɩrlmã yell n yeel tɩ yaa wa ‘Wẽnnaam tãensã,’ (Yɩɩn. 36:6) tõe t’a rat n yeelame t’a Zeova tɩrlmã paada wakat fãa. Sẽn paase, sẽn mik tɩ tãensã lugame wã, tõe n dat n wilgame me tɩ Wẽnnaam tɩrlmã yɩɩda ninsaalbã tɩrlmã hal zĩig sẽn zãre. (Ges-y Eza. 55:8, 9.) Vẽnegr 16:20 wã pʋgẽ, b yeelame tɩ malɛkã sẽn wa n kiig bũmb ning sẽn be Wẽnnaam sũ-puugr laag a yopoe-n-soabã pʋgẽ tẽngã zugã, ‘tãensã menemame.’ Woto wilgdame tɩ baa bũmb nins sẽn lug n yɩɩd tãensã pa na n tõog n põs Wẽnnaam sũ-puugrã daar ye.—Ges-y Zer. 4:23-26.
SIG-NOY RASEM 13-19
D SẼN BÃNG BIIBLÃ KARENG PƲGẼ YƖƖN-SÕAMYÃ 38–39
Ra ning-y y meng taal tɩ loog noor ye
D kell n ges d taoore, n tagsd beoogã yelle
12 Karm-y 1 Zã 3:19, 20. D fãa mi n ningda d meng taal wakat ninga. Wala makre, neb kẽer ningda b mens taal bũmb nins b sẽn maan nand tɩ b bãng a Zeova wã yĩnga. Neb a taab ningda b mens taale, b sẽn tudg n maan yɛl kẽer b lisgã poor yĩnga. (Rom. 3:23) Sãmbg kae tɩ d rat n maana sẽn yaa tɩrga. La “tõnd fãa tudgda naoor wʋsgo.” (Zak 3:2; Rom. 7:21-23) Yaa sɩd tɩ d pa rat n ningd d meng taal ye. La yaool n tõe n naf-d lame. Wãn to? Bala, d sã n ningd d meng taale, tõe n kɩtame tɩ d toeem yam, la d yãk yam n da le yɩlem d kongrã ye.—Ebre. 12:12, 13.
13 La wakat ninga, d tõe n wa ningda d meng taal tɩ loog nugu, rat n yeel tɩ n ket n ningd d meng taale, baa d sẽn tek yam n kos sugri, t’a Zeova wilg t’a kõ-d-la sugrã. Taal a woto tõe n wã-d lame. (Yɩɩn. 31:11; 38:4, 5) Wãn to? D gom saam-bi-poak a ye yelle. A ra ket n ningda a meng taale, tʋʋm-wẽns nins a sẽn da tʋm pĩndã yĩnga. A yeelame: “M da tagsdame tɩ pa tar yõod tɩ m wɩsg m meng n tʋm a Zeova tʋʋmdã ye. Bala, sẽn yaa soab fãa a pa na n fãag-m ye.” Tõe tɩ tõnd sʋkã, neb wʋsg tagsda woto. La d pa segd n ningd d meng taal tɩ loog nug ye. Tags-y n ges-y a Sʋɩtãan sũur sẽn na n yɩ noog to-to, d sã n bas a Zeova tũubu, t’a Zeova yaool n pa bas-d ye.—Ges-y 2 Korẽnt rãmb 2:5-7, 11.
w02 15/11 20 s. a 1-2
Bõe la d tõe n maan tɩ d sẽn vɩ to-to wã tat a Zeova yam?
VƖƖMÃ pa kaoosd ye. A loogda tao-tao. Yɩɩn-gʋlsd a Davɩɩd tagsa ninsaal yõorã sẽn yaa koɛɛgã yelle, n pʋʋs a Zeova n yeel-a yaa: “Zeova, sõng-y maam tɩ m bãng m baasg sẽn na n yɩ a soaba, la mam rayã sõore,tɩ m tõog n bãng tɩ m yõorã sɩd yaa koɛɛga. Sɩd-sɩda, yãmb maana mam rayã tɩ b sõorã yaa bilfu. Mam yõorã woglem pa baa fʋɩ yãmb taoor ye.” A Davɩɩd da ratame t’a sẽn vɩ to-to wã, n paas a no-goamã la a tʋʋm-tʋmdɩ wã fãa ta Wẽnnaam yam. A wilgame t’a pa tõe n maan baa fʋɩ tɩ pa tũ ne Wẽnnaam sõngr ye. A yeelame yaa: “Yaa yãmb bal la mam teeg-yã.” (Yɩɩn-sõamyã 39:4, 5, 7) A Zeova reega a pʋʋsgã. A sɩd gesa a Davɩɩd tʋʋmã, n keo-a tɩ zems ne rẽ.
D sã n pa gũusi, d tõe n wa tʋmda wʋsg n pa le tar sẽk baa bilf ye. Woto tõe n wa kɩtame tɩ d maand yɩɩre, sẽn yɩɩd fãa d tʋʋmã sẽn yaa wʋsg yĩnga, tɩ d sẽkã yaool n paoodẽ wã. Tõnd me tagsda wa a Davɩɩd bɩ? Rat n yeel tɩ d modgdame tɩ d sẽn vɩ to-to wã tat Wẽnnaam yam bɩ? Vẽenega, a Zeova getame la a maagd a yĩng n feesd tõnd ned kam fãa. Na maan yʋʋm 3600 woto, a Zoob sẽn yɩ wẽn-zoɛtã wilgame t’a Zeova nee a soayã la a sõt a nao-yakmã fãa. A yeelame yaa: “A sã n wa sok-ma, m na n leok-a lame tɩ bõe?” (Zoob 31:4-6, 14) D sã n dat tɩ d sẽn vɩ to-to wã tat Wẽnnaam yam, d segd n lʋɩɩsda a Zeova tũudmã yɛl taoore, n sakd a noyã, la d ra sãamd d sẽkã ye. Bɩ d gom bõn-kãensã yelle.
Y sẽn tõe n maan n le paam zood sõma ne a Zeova
Nong-y pʋʋsd-y-yã a Zeova: Y Ba a Zeova miime tɩ y sã n ket n ningd y meng taal bũmb ning y sẽn maan tɩ pa sõma wã yĩnga, tõe n yɩɩ toog ne-y tɩ y pʋʋs-a. (Rom. 8:26) La “wɩng-y ne pʋʋsgo,” n togs a Zeova tɩ y rata ne y sũur fãa n le paam a zoodo. (Rom. 12:12) A Ãndere tẽega b sẽn wa n lebs n deeg-a tigingã pʋgẽ wã, n yeel yaa: “M da ningda n meng taal wʋsgo, tɩ yãnd me ra tar-ma. La m sã n d pʋʋs n sa fãa, m yamã gãandedame.” Y sã n pa mi y sẽn na n pʋʋs a Zeova n yeel bũmb ninga, bɩ y ges rĩm a Davɩɩd sẽn pʋʋs a Zeova to-to, a sẽn wa n tek yam n kos sugrã. Pʋʋs-kãng bee Yɩɩn-sõamyã 51 ne 65 wã pʋgẽ.
D bʋgs Wẽnnaam Gomdã zug neere
Wilg-y tɩ y yaa ned b sẽn tõe n kɩs sɩda
16 Yaa tɩlɛ tɩ d tall yõk-m-menga, d sã n dat tɩ nebã kɩs-d sɩda. Yõk-m-mengã sõng-d lame tɩ d gũusd ne d goamã, n da wa yelg gomd ned sẽn togs tõnd n pa rat tɩ neb a taab wʋm ye. (Karm-y Yel-bũn 10:19.) D sã n wa tʋmd ne rezo sosiyo, tõe n yɩɩ toog tɩ d tall yõk-m-menga. D sã n pa gũusi, d tõe n wa maaname tɩ neb ka tɛk bãng yell neb a taab sẽn pa segd n bãng ye. D sã n paam n ning bũmb ẽntɛrnetã pʋgẽ n sa, d pa tõe n bãng nebã sẽn na n maan bũmb ning ne rẽ, wall a sẽn tõe n wa ne zu-loees ninsã ye. Yõk-m-mengã leb n tõe n sõng-d lame tɩ d kell n sĩndi, neb sã n wa pirsd tõnd n dat tɩ d taas-b kibay sẽn tõe n kɩt tɩ d tẽed-n-taasã paam yelle. D segd n maana woto, d sã n bee tẽng b sẽn gɩdg d tũudmã wall d tʋʋm kẽere, tɩ polɩɩs-rãmbã wa na n sokd-d sogsgo. Yel-kãensã buud la yɛl a taab wɛɛngẽ, d segd n ‘ninga d noorã salbr’ wa Biiblã sẽn sagend tõndã. (Yɩɩn. 39:2) D sã n wa be ne d zakã neba, d zo-rãmba, d tẽed-n-taas wall sẽn yaa ned ning fãa, d segd n modgame n wilg tɩ d yaa ned b sẽn tõe n kɩs sɩda. La sẽn na yɩl n yɩ ned a woto, d segd n talla yõk-m-menga.
SIG-NOY RASEM 20-26
D SẼN BÃNG BIIBLÃ KARENG PƲGẼ YƖƖN-SÕAMYÃ 40–41
Bõe yĩng tɩ d segd n sõngd d taabã?
Neb nins sẽn nong n kõtẽ wã tara sũ-noogo
16 Sẽn yaa-b kõatb meng-mengã pa maand b taabã neere, n dat tɩ b maan-b n lebs ye. Yaa rẽ yĩng la a Zeezi sẽn yeel yaa: “Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense, la fo na n paama sũ-noogo, b sẽn ka tar n na n kõ foom n lebsã yĩnga.” (Luk 14:13, 14) Biiblã pʋgẽ me, b yeelame: “Maan-neer soab na n paama barka.” Ad b sẽn yeel me: “Bark bee sẽn tagsd-a pãn-komsem soab yell zugu!” (Yel. 22:9; Yɩɩn. 41:2) D segd n yɩɩ kõatba, d sẽn dat ne d sũur fãa n sõng d taabã yĩnga.
17 A Poll sẽn wa n lebg n tẽeg a Zeezi sẽn yeel tɩ ‘kũun bee bark n yɩɩd reegrã,’ pa bũmb nins d sẽn tõe n dɩk n kõ wã yell bal la a ra gomd ye. D sã n keng ned raoodo, wall d tẽeg-a Biiblã saglg ninga, pa rẽ bɩ n maan bũmb a to n sõng-a, rẽ me yaa kũuni. (Tʋʋ. 20:31-35) Ne a no-goamã la a tʋʋm-tʋmdɩ wã, a Poll wilgame tɩ tara yõod tɩ d sakd n kẽesd d sẽkã la d pãngã n sõngd d taabã, la d tagsd b yelle, n wilgd-b tɩ d nong-b lame.
18 Bãngdb nins sẽn maand vaeesg ninsaalbã yel-manesem wɛɛngẽ wã mikame me tɩ ned sã n yaa kõata, a tara sũ-noogo. Sebr a ye wilgame tɩ nebã yetame tɩ b sã n maan b to neere, b sũ-noogã paasdame. Bãngdb n yeel tɩ ned sã n nong n sõngd a taabã, a mengã na n maneg n neeme t’a vɩɩmã tara barka. Rẽ n so tɩ bãngdb kẽer wae n sagend nebã tɩ b kẽes b mens tʋʋm nins sẽn yaa b taabã neer yĩngã pʋgẽ, tɩ rẽ na n paasa b keelmã la b sũ-noogã. La pa lingd tõnd ye. Bala, d Naandã sẽn nong-dã ra sɩng n yeelame tɩ d sã n yaa kõatba, d paamda sũ-noogo.—2 Tɩm. 3:16, 17.
A Zeova na n sõng-y lame
7 La y sã n wa lʋɩ bãaga, y tõe n kɩsa sɩd t’a Zeova na n sõng-y lame, la a bels-y-yã, wa a sẽn sõng pĩnd wẽndẽ wẽn-tũudbã to-to wã. Rĩm a Davɩɩd yeela woto: “Bark bee sẽn tagsd-a pãn-komsem soab yell zugu! Bala, toog wakate, Sẽn-Ka-Saab fãagda yẽnda. Sẽn-Ka-Saab na n gũu yẽnda, n kɩt t’a vɩɩmde.” (Yɩɩn. 41:2, 3) Yaa vẽeneg t’a Davɩɩd ra pa rat n yeel t’a wakatẽ wã neb nins sẽn da sõngd pãn-komsem dãmbã pa na n tol n ki ye. La wãn to la a Zeova sõng nin-kãense? A Davɩɩd paasame: “Yẽnda sã n wa gãe ne toogo, Sẽn-Ka-Saab tebended-a lame. A sã n wa gãe ne bãaga, Sẽn-Ka-Saab sõngd-a lame.” (Yɩɩn. 41:4) Ned sẽn tũud a Zeova sã n wa lʋɩ bãaga, a Zeova mi a bãagã sẽn namsd-a to-to wã, n pa na n tol n yĩm a yell ye. A na n kõ-a-la raood la yam t’a bãng a sẽn na n maanega. Sẽn paase, a Zeova sẽn naan ninsaal yĩng to-to wã kɩtame t’a sã n lʋɩ bãag bɩ a tõe n zab ne bãagã n tõoge.
D rɩk a Zeova togs-n-taare, n yɩ nimbãan-zoɛtba
17 Yaa sɩd tɩ d sã n yaa nimbãan-zoɛta, nafda tõnd mengã, la pa rẽ yĩng la d sẽn dat n bɩɩs nimbãan-zoeerã ye. Yaa d sẽn dat n dɩk a Zeova togs-n-taare, t’a yʋʋrã paam waoogrã yĩnga. A nonglmã la a nimbãan-zoeerã ka tar mak-n-taar ye. (Yel. 14:31) Yẽ togs-n-taar la d fãa segd n dɩke. Bɩ d maan d sẽn tõe fãa, n yɩ nimbãan-zoɛtb wa a Zeova. Rẽ, tõnd ne d tẽed-n-taasã zems-n-taar na n paasame, tɩ laafɩ be tõnd ne neb a taabã me sʋka.—Gal. 6:10; 1 Zã 4:16.
D bʋgs Wẽnnaam Gomdã zug neere
it-1 1261
A Zeova
Biiblã kibayã fãa gomda a Zeova sẽn tar sor n yɩ yĩngr la tẽng naabã yell n tɩ yɩɩda, la sõngd tõnd tɩ d bãng tɩ sẽn tɩ yɩɩd fãa, a Zeova raabã yaa a yʋʋrã na paam waoogre. Rẽ baoodame tɩ b ra le sãam Wẽnnaam yʋʋrã baa bilf ye. La sẽn tar yõod n yɩɩda, yaa tɩ ninsaalbã la malɛgsã segd n waooga yʋ-kãng sẽn yaa sõngã. B leb n segd n sak n deegame t’a Zeova n segd ne waoogre, la tɩ yaa yẽ n tar sor n na n yɩ yĩngr la tẽng naaba, n maand a raabã, n yãk yam n tũud-a ne sũ-noogo, b sẽn nong-a wã yĩnga. A Davɩɩd pʋʋsg ning sẽn be Yɩɩn-sõamyã 40:5-10 wilgda d sẽn segd n tall manesem ninga, n wilg tɩ d sɩd ratame t’a Zeova yʋʋrã paam waoogre. (Bãng-y tɩ tẽn-tʋmd a Poll lebg n togsa yɩɩn-kãngã goamã Ebre. 10:5-10 pʋgẽ, n wilg tɩ pidsa a Zeezi Kirist zugu.)
SIG-NOY RASEM 27–SIGR RASEM A 2
D SẼN BÃNG BIIBLÃ KARENG PƲGẼ YƖƖN-SÕAMYÃ 42–44
Rɩ-y zãmsg ning d sẽn paamd a Zeova nengẽ wã yõodo
Yɩɩl Sõamyã sebrã babg a yiib-n-soabã tags-kãsemse
42:4, 5, 11; 43:3-5. Bũmb sẽn yɩɩd tõnd pãng sã n kɩt tɩ d zãag ne kiris-neb tigingã wakat bilfu, d sã n tẽeg sũ-noog ning d sẽn da tar ne d tẽed-n-taasã d sẽn da wa n be ne-bã, tõe n sõng-d lame tɩ d yals kãn-kãe. La sɩngrẽ wã d sẽn yaa d yembrã yĩnga d sũur tõe n sãama wʋsgo, rẽ tẽegr me segd n kɩtame tɩ d bãng tɩ Wẽnnaam yaa d fãagda, la tɩ d segd n gẽeg-a lame t’a wa yiis-d d sẽn beẽ zĩig ningã.
w12 15/1 15 s. a 2
D sẽn tõe n maan tɩ d Biiblã zãmsg tall yamleoog la naf-do
1 PƲƲS-Y: D segd n deng n pʋʋsame. (Yɩɩn. 42:8) Bõe yĩnga? Bala Wẽnnaam Gomdã zãmsgã naaga bũmb nins d sẽn maand n waoogd a Zeova wã. Rẽ n so tɩ d segd n bõos a Zeova t’a sõng-d tɩ d yamã ra yuusi, la a kõ-d a vʋʋsem sõngã. (Luk 11:13) A Barbara sẽn yaa misioneer hal yʋʋm wʋsgã yeelame yaa: “Wakat fãa, nand tɩ m karem wall m zãms Biiblã, m dengd n pʋʋsame. Rẽ poore, yaa wa a Zeova bee ne-ma, t’a sũur noom ne bũmb ning m sẽn maandã.” D sã n pʋʋs n yaool n zãms Biiblã, pakda d yamã la d sũurã tɩ d sẽn na n zãms bũmb ninsã naf-d sõma.
“Ra bas-y tɩ y nus pãng sɛ ye”
11 A Zeova tũnugda ne d tigissã, tigis-kãsemsã, la siglgã lekoll-dãmbã n kõt tõnd pãng la raoodo. Bãngr ning d sẽn paamdã sõngda tõnd tɩ d tõe n tũ Wẽnnaam ne yam-sõngo, la d bãng n yãk d sẽn na n maan n teel Rĩungã, la d tõog n tʋm tʋʋm nins fãa a Zeova sẽn bobl tõndã. (Yɩɩn. 119:33) Yãmb baooda pãng ning d sẽn paamd a Zeova zãmsgã maasem yĩngã ne y sũur fãa bɩ?
12 A Zeova sõnga Israyɛll nebã tɩ b zab ne Amalɛk rãmbã la Etiopi rãmbã n tõoge. A leb n sõnga a Neemi ne a zʋɩf-taasã tɩ b tõog n baas Zerizalɛm lalgã meebo. Dẽnd a na n kõo tõnd me pãng tɩ d kell n moon koɛɛgã, baa zu-loeesã sã n kɩt tɩ d maand yɩɩre, baa nebã sẽn mi n pa rat n kelg koɛɛgã, la baa b sã n gɩdg tʋʋmdã. (1 Pɩy. 5:10) D miime t’a Zeova pa na n maan yel-solemd tɩ d zu-loeesã tiig n sa ye. A wilga ned kam fãa sẽn segd n maane, t’a tũ ne rẽ n sõng-a. Wala makre, d segd n karemda Biiblã daar fãa, n segend tigissã semen fãa la d kẽnd-b n pa vaandẽ, n zãmsd Biiblã, n maand zak pʋgẽ Biibl zãmsgã n pa vaandẽ, la d wɩngd ne pʋʋsgo. D ra tol n bas tɩ baa fʋɩ tiis-du, tɩ d pa maan bũmb nins a Zeova sẽn dat tɩ d maan t’a tũnug ne rẽ n kõ-d pãng la raoodã ye. Y sã n wa mik tɩ baa yaa bõn-kãensã a ye la y pa le maand ne yẽesem, bɩ y pʋʋs a Zeova n kos sõngre. Rẽ, y na n yãame t’a vʋʋsem sõngã na n ‘kõo yãmb ratem la pãng tɩ y maan wa sẽn zemsã.’ (Fili. 2:13) La bõe la y tõe n maan n keng y taabã raoodo?
D bʋgs Wẽnnaam Gomdã zug neere
it-1 417
We-baaga
Gʋls-sõamyã pʋgẽ, b maka we-baasã ne bũmb toor-toore. A Zoob sẽn wa n bilgd a namsgã toolem sẽn ta zĩig ningã, a yeelame tɩ yẽ lebga “we-baas ba-biiga.” (Zoob 30:29) Tõe tɩ yɩɩn-gʋlsdã tẽega Wẽnnaam nin-buiidã bɛɛb sẽn mi n zab ne-b n varg-ba, tɩ we-baasã wa sũ taab zabrã zĩigẽ n wãb nins b sẽn vargã (ges-y Yɩɩn. 68:23), t’a sũur sãame, t’a yeele: “Yãmb bedsa tõnd zĩig ning we-baasã sẽn be wã.” (Yɩɩn. 44:19) Babilon nebã sẽn wa n tilg b sikã yʋʋmd 607 sẽn deng a Zeezi rogmã n gũbg Zerizalɛm tẽngã, waa ne yɩɩr la kom hal tɩ pagb kẽer lebg nintoos ne b kambã. Rẽ wɛɛngẽ, a Zeremi bee bʋʋm la a sẽn yeel tɩ we-baasã meng geta b kambã yell sõma n yɩɩd Wẽnnaam “nin-buiida” sẽn yaa wẽnem-dãmbã.—Wiis. 4:3, 10.
SIGR RASEM A 3-9
D SẼN BÃNG BIIBLÃ KARENG PƲGẼ YƖƖN-SÕAMYÃ 45–47
Yɩɩll sẽn gomd Rĩm yi-kãadem yelle
Maan-y sũ-noog tɩ Pe-bilã yi-kãadmã daar taame!
8 Karm-y Yɩɩl Sõamyã 45:14, 15. Pʋg-paalã manega a meng sõma, n ‘tar ziir wʋsgo,’ n na n tɩ kẽ kãadem ne Rĩmã. Wilgr 21:2 wã pʋgẽ, b maka pʋg-paalã ne tẽnga. Tẽn-kãng sẽn yaa Zerizalɛm-paalgã bee saasẽ, n tar Wẽnnaam ziiri, t’a vẽenemã yaa “wa kugr sẽn yaa sõma wʋsgo, wa kugr sẽn boond tɩ zasp sẽn pɩnd wa vɛɛre.” (Wil. 21:10, 11) Wilgr 21:18-21 wã me bilga Zerizalɛm-paalgã neermã sẽn yaa to-to wã. Rẽnd yɩɩl-gʋlsdã bee bʋʋm a sẽn yeel tɩ pʋg-paalã ‘tara ziir wʋsgã.’ Rĩmã kãadem sẽn na n zĩnd saasẽ wã, pa zems tɩ pʋg-paalã maneg a meng woto sɩda?
9 B talla pʋg-paalã n kẽng a sɩdã sẽn yaa Rĩungã Rĩmã nengẽ. Rĩmã tũnuga ne Wẽnnaam Gomdã, n maneg pʋg-paalã t’a yaa sõma la pʋ-peelem soaba, n yaa yɩlemd wa b sẽn pek bũmb ne koom. (Ef. 5:26, 27) Pʋg-paalã segd n ninga fut sẽn zems kãadmã yĩng me. A sɩd maana woto, bala, a “futã wʋga ne sãnem.” Sẽn paase, b na n kuils-a-la Rĩmã yir ne “fut sẽn gʋl n maneg tɩ yaa neere.” Pʋg-paalã sẽn na n kẽ kãadem ne Pe-bilã yĩnga, b kõ-a-la “fu-peels sẽn yaa sõma t’a yeelge. Tɩ bõe, fu-peels yaa Wẽnnaam nebã tʋʋm-sõma.”—Wil. 19:8.
Vẽnegr sebrã: A sẽn yet bũmb ning beoog-daarã wɛɛngẽ
10 A Zeova manesem na n yɩɩ wãna, bɛɛbã sã n wa bao n na n zab ne a nin-buiidã? A yeelame: “Badaare, mam sũurã na n puuga wʋsgo.” (Eze. 38:18, 21-23) Vẽnegr sak 19 wã wilgda bũmb ning sẽn na n maan rẽ poorã. A Zeova na n tʋma a Bi-riblã t’a wa kogl a nin-buiidã, la a zab ne a bɛɛbã n tõoge. “Saasẽ tãb-biisã,” rat n yeel tɩ malɛgsã n paas neb tus-koabg la tus pis-naas la a naasã na n naaga a Zeezi zabrã pʋgẽ. (Vẽn. 17:14; 19:11-15) Zabrã na n baasa wãna? B na n sãama neb la sigls nins fãa sẽn kɩɩsd a Zeova wã fasɩ.—Karm-y Vẽnegr 19:19-21.
11 Tags-y n ges-y wẽn-sakdbã manesem sẽn na n yɩ to-to, b sã n wa sãam Wẽnnaam bɛɛbã fãa. Na n yɩɩ sũ-noog wakat meng-menga! Baa ne Babilon-kãsengã sãoong sẽn na n wa ne kɩdeng saasẽ wã, bũmb a to n na n kõ-b sũ-noog n tɩ yɩɩda. (Vẽn. 19:1-3) Yaa bũmb sẽn tar yõod hal wʋsgo, tɩ b gomd rẽ yell Vẽnegr sebrã pʋgẽ. Yaa “Pe-bilã yi-kãadmã.”—Vẽn. 19:6-9.
12 Yi-kãadmã sɩngda wakat bʋgo? Armagedõ zabrã sã n wa sɩnge, rẽ tɩ neb tus-koabg la tus pis-naas la a naasã fãa zoe n bee saasẽ. La Pe-bilã yi-kãadmã pa na n yɩ wakat-kãng ye. (Karm-y Vẽnegr 21:1, 2.) Pe-bilã yi-kãadmã na n yɩɩ Armagedõ zabrã poore, rẽ tɩ b sãama Wẽnnaam bɛɛbã fãa gilli.—Yɩɩn. 45:4, 5, 14-18.
it-1 1041
Zabre
Zab-kãngã poore, tẽngã na n zĩnda bãan n kaoos yʋʋm tusri. Yɩɩll a ye sẽn be Yɩɩn-sõamyã sebrã pʋgẽ yetame yaa: “A [Zeova] kɩtdame tɩ zab sa dũniyã gill fãa. A kaooda tãbdo, la a kʋʋsd kãna. A yõogda zabr saar-dãmb bugum.” Yɩɩn-kãng goamã paama pidsg pĩnd wẽndã wã, a Zeova sẽn wa n sãam bɛɛbã zab-teedã tɩ kɩt laafɩ zĩnd Israyɛllã. Kiristã sã n wa sãam neb nins sẽn nong zabã Armagedõ zabrã sasa, bãan hakɩɩk na n zĩnda dũniyã gill zugu. (Yɩɩn. 46:8-10) Neb nins sẽn na n paam n vɩɩmd wakat sẽn kõn sa wã yaa neb nins sẽn ‘dɩk b sʋʋsã n kud wãgse, la b rɩk b kãnã n kud goeto,’ la b pa ‘le zãmsd zabr me’ wã. “Bala yaa a Zeova sẽn yaa tãb-biis naabã n gome.”—Eza. 2:4; Mis. 4:3, 4.
D bʋgs Wẽnnaam Gomdã zug neere
Wẽnnaam Rĩungã sã n wa, bõe n pa na n le zĩndi?
9 Sigls nins sẽn maand zãmb wall n wẽgd nebã sã n wa pa le beẽ, bõe n na n zĩndi? Armagedõ poore, siglg na n le bee dũniyã zug bɩ? Ad Biiblã sẽn yeele: “Tõnd gũuda Wẽnnaam sẽn pʋlem saasẽ paalg la dũni paalgã, tɩ tɩrlem na n zĩnd a pʋgã.” (2 Pɩy. 3:13) Pĩnd saasã makda goosneema-rãmb sẽn maand zãmb wall n wẽgd nebã, tɩ pĩnd dũniyã makd neb nins goosneema-kãens sẽn so wã. B sã n wa pa le beẽ, bõe n na n led b zĩigẽ? Yaa “saasẽ paalg la dũni paalgã.” Saasẽ paalgã makda Wẽnnaam Rĩungã. Yaa goosneema sẽn be saasẽ, t’a Zeezi la Rĩmã, n tar na-rɩt-n-taas 144000. Dũni-paalgã makda neb nins Wẽnnaam Rĩungã sẽn na n soogã. A Zeezi ne a na-rɩt-n-taasã na n dɩka a Zeova sẽn yaa Wẽnnaam sẽn pa zũnd-zãnd soabã togs-n-taare. (1 Kor. 14:40) Rẽnd ‘dũni-paalgã’ pʋgẽ, bũmba fãa na n siglame. B na n yãka rap tɩ b get bũmb kẽer yelle. (Yɩɩn. 45:17) A Zeezi ne a na-rɩt-n-taas 144000 n na n wilgd-b sore. Mams-y n ges-y vɩɩmã sẽn na n yɩ noog to-to, sigls nins sẽn maand zãmb wall n wẽgd nebã sã n wa pa le beẽ, tɩ yaa siglg a ye tãa sẽn pa na n tol n zãmb nebã n be!
SIGR RASEM 10-16
D SẼN BÃNG BIIBLÃ KARENG PƲGẼ YƖƖN-SÕAMYÃ 48–50
Roagdba, sõng-y y zakã rãmb tɩ b maneg n kɩs a Zeova siglgã sɩda
Y sã n tũud a Zeova wa a sẽn dat to-to wã, paasda y sũ-noogã
11 D sã n wa zãmsd Biiblã, la d gomd a Zeova yell ne d kambã. Vʋʋsg raarã ra yaa segb Israyɛll nebã sẽn da paam n tõe n bas b daar fãa tʋʋmã, la b bao n paas bãmb ne a Zeova zoodã pãnga. (Yik. 31:16, 17) B sʋkã neb nins sẽn da maand sɩd ne a Zeova wã ra sõngda b kãmbã tɩ b bãng bũmb wʋsg a Zeova zugu, la a maan-neerã sẽn ta zĩig ningã. Tõnd me tõe n yãka wakat takɩ n karemd Wẽnnaam Gomdã la d zãmsd-a. Woto naaga bũmb nins d sẽn maand n tũud a Zeova wã. Leb n paasda tõnd ne yẽ zoodã pãnga. (Yɩɩn. 73:28) D sã n wa zãmsd Biiblã ne d zakã rãmba, d tõe n sõnga d kambã tɩ b bɩɩs b zoodã sõma ne d saasẽ Ba wã sẽn nong-dã.—Karm-y Yɩɩn-sõamyã 48:14.
w11 15/3 19 s. a 5-7
Y tara bʋʋm n na n maan sũ-noogo
“Kẽn-y n gilg-y Siyõ. Gilg-y-yã a tõrã. Sõd-y-yã a gasdã. Ges-y-yã a lalsã sẽn tar pãngã sõma. Maag-y y yĩng n ges a gasdã sẽn tar pãngã,n wa tõog n gom rẽ yell ne zãmaan nins sẽn watã.” (Yɩɩn. 48:12, 13) Yɩɩn-gʋlsdã ra yeta Israyɛll nebã tɩ b maag b yĩng n ges Zerizalɛm tẽngã. Mams-y y yamẽ Israyɛll nebã zags rãmb sẽn da tẽr bũmb ninsã, b sẽn da togd sor yʋʋmd fãa n kẽnd tẽn-sõngẽ wã n maand kibs-rãmbã, la b get wẽnd-doogã sẽn yaa neerã. Tõe tɩ rẽ kɩtame tɩ b ra rat n “gom rẽ yell ne zãmaan nins sẽn watã.”
Tags-y Seba rĩm-poakã yelle. Sɩngrẽ wã, a ra pa tẽed b sẽn togs-a bũmb ning a Salomo naamã sẽn da ka to wã la a yam-kãsengã wɛɛngẽ wã ye. Bõe n kɩt t’a wa sak n tẽ t’a sẽn wʋm bũmb ningã yaa sɩda? A yeelame: “Sã n pa mam sẽn wa tɩ m nif yã wã, mam da pa tẽed ye.” (2 Kib. 9:6) Sɩd-sɩda, bũmb nins d “ninã” sẽn yãtã tõe n talla pãng wʋsg d zugu.
Bõe la y tõe n maan n sõng y kambã tɩ b yã bõn-kãsems nins a Zeova sẽn maandã b toore? A Zeova kaset rãmbã filiyall sã n pẽe yãmb sẽn beẽ wã, bɩ y modg n tall-b tɩ b tɩ gilg n gese. Wala makre, a Mandy ne a Bethany sẽn wa n yaa kamba, b ra bee sẽn ta kilo 1500 zĩigẽ ne b tẽngã Betɛllã. Baa ne rẽ, b roagdbã modgame n tall-b naoor wʋsg tɩ b tɩ gilg n ges Betɛllã. Ad b sẽn yeele: “Nand kẽng Betɛllẽ wã, d ra tagsdame tɩ yaa zĩig sẽn yaa sẽka, la tɩ yaa neb yʋʋm sẽn vẽsg bal n be be. La d sẽn wa n kẽngã, d yãa kom-bɩɩs sẽn tʋmd wʋsg a Zeova yĩnga, hal tɩ b sũy noome. D yãame t’a Zeova siglgã pa zĩig sẽn yaa bilf wa d sẽn beẽ wã ye. D sã n da tɩ gilg n ges Betɛllã, paasda d tẽebã pãnga.” A Mandy ne a Bethany sẽn maag b yĩng n ges Wẽnnaam siglgã sõma wã, sõng-b lame tɩ b lebg so-pakdba. B pʋd n paamame tɩ b bool-b tɩ b kẽnd n tʋmd Betɛllẽ wã wakat-wakate.
Wilgd-y tɩ y yaa Rĩungã neba!
5 Tẽngã kʋdemd yɛl bãngre: Ninsaalbã goosneema-rãmb kẽer baoodame tɩ neb nins sẽn dat n lebg b tẽngã tẽng-n-biisã bãng b tẽngã kʋdemd yɛla. Neb nins sẽn dat n yɩ Wẽnnaam Rĩungã nebã me segd n mao n bãnga Rĩungã sõma. Rẽ wɛɛngẽ, Israyɛll ned a Koore kom-dibli wã sẽn da tʋmd wẽnd-doogẽ wã kõo tõnd mak-sõngo. B ra nonga Zerizalɛm ne wẽnd-doogã, n da wae n wilgd nebã b tẽngã kʋdemd yɛla. Pa b tẽngã sẽn da yaa neerã yĩng ye. Yaa a sẽn da yaa “rĩm-kãseng” a Zeova tẽngã yĩnga. Yaa be la b ra waoogd a Zeova la b zãmsd a noyã. Neb nins sẽn da sakd Zerizalɛm rĩmã ra tara a Zeova lohorem t’a nong-ba. (Karm-y Yɩɩl Sõamyã 48:2, 3, 10, 13, 14.) Rẽ yĩnga yãmb tʋll n bãnga a Zeova siglgã babg ning sẽn be tẽngã zugã kʋdemd yɛla, la y gomd rẽ yell ne nebã bɩ? Y sã n baood n bãngd Wẽnnaam siglgã n paasdẽ la y bãngd a Zeova sẽn sõngd a nin-buiidã to-to wã, y na n maneg n kɩsa sɩd tɩ Rĩungã rɩta naam. Rẽ na n kɩtame me tɩ y nong koɛɛgã mooneg n yɩɩd pĩndã.—Zer. 9:23; Luk 4:43.
D bʋgs Wẽnnaam Gomdã zug neere
it-2 799
Arzɛgse
Israyɛll nebã ra yaa buud sẽn tar arzɛka. B ra tara rɩɩb la bõn-yũudl hal tɩ seke (1 Rĩm. 4:20; Koɛ. 5:18, 19), n da pa tar zu-loees nins talemdã sẽn wat ne wã ye. (Yel. 10:15; Koɛ. 7:12) La baa ne sẽn da zems ne a Zeova raab tɩ Israyɛll nebã maan sũ-noog b tʋʋm-toogã yĩnga, (ges-y Yel. 6:6-11; 20:13; 24:33, 34), a Zeova keoog-b lame sẽn na yɩl tɩ b bãng tɩ b sã n yĩm yẽ sẽn yaa soab ning sẽn kõ-b arzɛgsã yelle, la b teeg arzɛgsã, na n waa ne yelle. (Tõo. 8:7-17; Yɩɩn. 49:6-9; Yel. 11:4; 18:10, 11; Zer. 9:23, 24) A tẽeg-b lame tɩ arzɛgsã yaa bũmb sẽn tõe n wa sa (Yel. 23:4, 5), tɩ pa bũmb ned sẽn tõe n kõ Wẽnnaam n fãag a to (Yɩɩn. 49:6, 7), la tɩ pa tõe n naf sẽn ki-bã me ye. (Yɩɩn 49: 16, 17; Koɛ. 5:15) A wilg-b lame tɩ b sã n nong arzɛgsã tɩ loog noore, tõe n kɩtame tɩ b tʋm pʋ-lik la zãmb tʋʋma, la kɩt me tɩ b pa le tat a Zeova yam ye. (Yel. 28:20; ges-y Zer. 5:26-28; 17:9-11) A sagl-b lame me tɩ b ‘waoog a Zeova ne b bõn-sõma wã.’—Yel. 3:9.
SIGR RASEM 17-23
D SẼN BÃNG BIIBLÃ KARENG PƲGẼ YƖƖN-SÕAMYÃ 51–53
Y sẽn tõe n maan n da wa maan yel-wẽn-kãsems ye
D gũusd ne d sũurã tagsgo
4 Yel-bũn 4:23 pʋgẽ, b sẽn gomd “sũur” yellã, makda ned sẽn sɩd yaa a soabã. (Karm-y Yɩɩn-sõamyã 51:8.) Rat n yeelame tɩ yaa a tagsa wã, a tʋlsmã, a bõn-datɩ wã, la a zʋgã. Yaa ned sẽn yaa a soab tɩ neb a taabã pa neẽ wã, pa nebã sẽn tagsd t’a yaa a soabã ye.
5 D rɩk makr ne d yĩnsã laafɩ wã, tɩ rẽ na n sõng-d lame tɩ d bãng tɩ tara yõod wʋsg tɩ d gũusd n get d sẽn sɩd yaa a soab d sũurã pʋgẽ wã. Pipi, sẽn na yɩl tɩ d yĩnsã taar laafɩ sõma, d segd n dɩta rɩ-sõma la d wae n wɩsgd d yĩnsã. Woto me, sẽn na yɩl tɩ d tẽebã kell n tall pãnga, d segd n dɩlgda d yamã sõma ne Wẽnnaam goamã, la d wɩngd ne bũmb nins sẽn wilgd tɩ d tẽeda Wẽnnaamã. Sẽn na yɩl n tõog n maand woto, yaa tɩlɛ tɩ d tũud d sẽn zãmsdã, la d gomd d sẽn tẽed bũmb ninsã yelle. (Rom. 10:8-10; Zak 2:26) Yiib-n-soaba, d tõe n tagsdame tɩ d tara laafɩ, mik bãag n be d yĩnsã pʋgẽ tɩ d pa miẽ ye. Woto me, d tõe n geta d sẽn minim n maand tũudmã pʋgẽ wã, n tagsdẽ tɩ d tẽebã tara pãnga, mik tʋls-wẽns n paamd pãng d sũurã pʋgẽ. (1 Kor. 10:12; Zak 1:14, 15) Segdame tɩ d tẽegdẽ t’a Sʋɩtãan raabã yaa a na tõog tɩ d tagsd wa yẽnda. Woto wã, wãn to la a maanda? Bõe n na n sõng-d tɩ d gũus ne d sũurã?
D tõe n zãaga d mens ne yoobo
5 Bũmb d sẽn tõe n maan n wilg tɩ d teega a Zeova yaa d sẽn na n pʋʋsd-a, n kotẽ t’a sõng-d tɩ d ra tall tags-yood ye. D sã n kos-a, a na n kõ-d-la a vʋʋsem sõngã, tɩ sõng-d tɩ d yiis tags-wẽns d yamẽ wã, n zãag d meng ne yoobo. Bɩ d pelgd d pʋs n kot Wẽnnaam t’a sõng-d tɩ d modg tɩ d sũurã tagsg ta a yam. (Yɩɩl 19:15) Bɩ d sik d meng n kos-a t’a sõng-d tɩ d bãng d sã n pa “tũuda so-wẽnga,” rat n yeel tɩ d sã n tara tʋls-wẽns sẽn tõe n wa kɩt tɩ d maan yel-wẽnde. (Yɩɩl 139:23, 24) Bɩ d sok d meng woto: ‘Mam pʋʋsda Wẽnnaam wakat fãa t’a sõng-m tɩ m kell n sak-a, baa m sã n wa be makr taoor bɩ?’—Mat. 6:13.
6 Nand tɩ d bãng a Zeova, tõe tɩ d ra nong n maanda bũmb kẽer sẽn pa tat a yam. Tõe tɩ d yam mi n ket n bee bõn-kãens maanego. Baa sã n yaa woto, a Zeova tõe n sõng-d lame tɩ d toeeme, n tõog n tũ-a wa a sẽn datã. Rĩm a Davɩɩd ra mii rẽ. A sẽn yo ne a Batseba wã poore, a pʋʋsa a Zeova n kos woto: “Bɩ y maan sũur sẽn tar pʋ-peelem n kõ maam, la y leb n kõ maam yam sõma sẽn ka yuusd ye.” (Yɩɩl 51:12, 14) Rẽnd d sã n da yaa ned sẽn nong yoobo, tɩ d yamã mi n ket n be yoobã, d tõe n kosa a Zeova t’a sõng-d tɩ d maan sẽn yaa tɩrga. A tõe n kɩtame tɩ d rat n sak a noyã ne d sũur fãa. A tõe n sõng-d lame tɩ d ra bas tɩ wẽng soog-d ye.—Yɩɩl 119:133.
D bʋgs Wẽnnaam Gomdã zug neere
it-1 663
A Doɛɛg
A ra yaa Edom neda, n yaa Rĩm a Sayull pe-kɩɩmbã naaba, tɩ rẽ kɩt tɩ t’a ra tar ziiri. (1 Sãm. 21:7; 22:9) Yaa vẽeneg t’a Doɛɛg ra yaa ned sẽn tuub n sak Zʋɩf-rãmbã tũudum. A Doɛɛg sẽn “pa a Zeova taoor tɩlɛ” Noob tẽngẽ wã yĩnga, a maana kaset ne maan-kʋʋdb kãsem a Ahimelɛk sẽn kõ a Davɩɩd bur b sẽn kõ Wẽnnaamã, la a Goliyat sʋʋgã. Tõe tɩ yaa pʋlenga, bũmb sẽn yaa rẽgd wall wãood yĩng la a Doɛɛg sẽn da pa a Zeova taoor tɩlɛ wã. Kaoosg zugẽ a Sayull sẽn wa n gomd ne a tʋm-tʋmdbã n na n wilg tɩ b rat n zãmb-a lame wã, a Doɛɛg togsa a sẽn yã bũmb ning Noob tẽngẽ wã. A Sayull sẽn bool Noob maan-kʋʋdb kãsmã ne maan-kʋʋdb a taabã n tigim la a sok a Ahimelɛk sogsgã poore, a kõo sor tɩ gũudbã kũ maan-kʋʋdbã. B sẽn zãgsã, a Sayull sẽn kõ a Doɛɛg sorã, a kʋʋ maan-kʋʋdb bãmb 85 n pa yɛɛs ye. Rẽ poore, a Doɛɛg kʋʋ Noob tẽngã neb ne sʋʋga, kambã la kãsembã, n paas rũmsã fãa.—1 Sãm. 22:6-20.
Wa Yɩɩn-sõamyã 52 soabã sɩngr goamã sẽn wilgdã, a Davɩɩd goma a Doɛɛg yelle, n yeel yaa: “Fo zɩlemdã sẽn dɩt wa bargã magda mag-wẽnse, la a tʋmd zãmb tʋʋma. Fo nonga wẽng n yɩɩd sẽn yaa sõma. Fo nonga ziri yagb n yɩɩd f sẽn na n gomd sẽn yaa tɩrg yelle. Foom a zɩlemd sẽn yaa zãmb soaba, fo nonga gom-wẽng buud fãa.”—Yɩɩn. 52:2-4.
SIGR RASEM 24-30
D SẼN BÃNG BIIBLÃ KARENG PƲGẼ YƖƖN-SÕAMYÃ 54–56
Wẽnnaam bee ne-yã
Tall-y yam, zoe-y Wẽnnaam!
10 Vugri, a Davɩɩd baoome n na n kẽng Gat sẽn da yaa a Goliat tẽngã n tɩ solg a Akɩs sẽn yaa Filisti rãmbã rĩmã nengẽ. (1 Sãmwɛll 21:11-16) Rĩmã sõgen dãmb vẽnegame n togs t’a Davɩɩd yaa b buudã bɛ. A Davɩɩd manesem yɩɩ wãn to ne yel-kãngã sẽn da tõe n yãk a yõorã? A pʋʋsa a Zeova ne a sũur fãa. (Yɩɩl Sõamyã 56:2-5, 12-14) Baa ne sẽn yɩ tɩlae t’a Davɩɩd maan a meng wa gãeeng sẽn na yɩl n põsã, a ra miime tɩ sɩd-sɩda, ra yaa a Zeova n fãag-a, bala yaa yẽ n ning a modgrã barka. A Davɩɩd sẽn teeg a Zeova ne a sũur fãa la a kɩs sɩd ne-a wã wilgame t’a sɩd ra zoeta Wẽnnaam.—Yɩɩl Sõamyã 34:5-7, 10-12.
11 Wala a Davɩɩde, d tõe n wilgame tɩ d zoeta Wẽnnaam, d sẽn na n sɩd kɩs sɩd ne kãabg ning a sẽn kãab n yeel t’a na n sõng-d lame tɩ d tõog n mao ne d zu-loeesã. A Davɩɩd yeelame: “Bas f yell ne Zusoabã n dell bãmba, la bãmb na manege.” (Yɩɩl Sõamyã 37:5) Rẽ pa rat n yeel tɩ d rɩkda d zu-loeesã n daag n bas ne a Zeova n pa maand d sẽn tõe tɛk n na n welg-ba, n tẽed bal t’a na n welg-b lame ye. A Davɩɩd pa pʋʋs Wẽnnaam n kos sõngr bala, la a bas n kalem a nus n zĩẽ ye. A tũnuga ne a pãngã la a yamã a Zeova sẽn kõ-a wã, n mao ne yellã. La a Davɩɩd ra miime me tɩ ninsaal modgrã yĩng bal da pa tõe n kɩt t’a tõog ye. Tõnd me segd n sakame tɩ sɩd yaa woto. D sã n wa maan d sẽn tõe tɛk bɩ d bas sẽn ketã ne a Zeova. Sɩda, naoor wʋsgo, d sẽn tõe n maan a soab bal yaa d teeg a Zeova. Yaa wakat kãng la tõnd ned kam fãa wilgd t’a zoeta Wẽnnaam. A Davɩɩd sẽn yeel woto ne a sũur fãa wã tõe n kenga d pɛlga: “Zusoaba zood yaa neb nins sẽn zoet bãmba yĩnga, la bãmb kãabg zãmsda bãmb bãngre.”—Yɩɩl Sõamyã 25:14.
cl 243 s. a 9
Baa fʋɩ pa tõe n “welg tõnd ne Wẽnnaam nonglmã” ye
9 A Zeova sũur nooma ne d sẽn tõogd toogã. (Matiye 24:13) Tẽeg-y t’a Sʋɩtãan ratame tɩ y bas a Zeova tũubu. Y sã n maand sɩd ne a Zeova daar fãa, y sõngdame t’a Zeova tõog n leok a Sʋɩtãan no-baoodmã. (Yel-bũnã 27:11) Wakat ninga, yɩl n tõog toog pa nana ye. Bala bãasã, ligdã zu-loeese, sũ-sãams la yɛl a taab tõe n kɩtame tɩ yaa toogo. Sẽn paase, d sã n gũud bũmb tɩ kaoosdẽ n pa watẽ, sãamda sũuri. (Yel-bũnã 13:12) D sã n tõog toog yel-kãensã fãa pʋgẽ, nooma a Zeova wʋsgo. Rẽ n kɩt Rĩm a Davɩɩd kos a Zeova t’a kok a nintãmã n sui “ko-waoogẽ,” la a paas ne bas-m-yam yaa: “Rẽ pa gʋls yãmb sebrã pʋgẽ sɩda?” (Yɩɩn-sõamyã 56:8) Sɩd-sɩdã, a Zeova tẽra nintãm nins fãa d sẽn daage, la namsg nins fãa d sẽn paame, d sẽn maood n na n kell n maan sɩd ne-a wã yĩnga. Bõn-kãensã me tara yõod wʋsg a nifẽ.
A Zeova sẽn nong-dã sõng-d lame tɩ d tõogd d rabeemã
16 A Sʋɩtãan miime tɩ d nonga d vɩɩmã. A yeelame tɩ d na n sak n bõna bũmb nins fãa d sẽn tare, baa d zoodã ne a Zeova, sẽn na yɩl n da ki ye. (Zoob 2:4, 5) Ad a Sʋɩtãan yaa ziri yagda! Sẽn mik tɩ yẽ la “soab ning sẽn tar tõog n wat ne kũumã,” a tũnugda ne d sẽn zoet kũumã n na n kɩt tɩ d bas a Zeova tũubu. (Ebre. 2:14, 15) Wakat ninga, a Sʋɩtãan poorẽ dãmbã yeta a Zeova Kaset rãmbã tɩ b sã n pa bas a Zeova tũubu b na n kʋ-b lame. Wakat kẽer me, d sã n ka laafɩ hal tɩ tõe n wa tũ ne d yõore, a Sʋɩtãan tũnugda ne rẽ n dat tɩ d maan bũmb n kɩɩs a Zeova. Logtoɛɛmbã wall d zakã neb nins sẽn pa tũud a Zeova wã tõe n pẽdgd-d lame n dat tɩ d sak tɩ b ning-d zɩɩm, tɩ yaool n yaa bũmb sẽn kɩɩsd a Zeova noyã. Neb a taab me tõe n baoome n na n modg-d tɩ d sak tɩbsg Biiblã sẽn gɩdge.
17 Baa ne d sẽn pa rat n ki wã, d miime tɩ d sã n ki, a Zeova na n ket n nong-d lame. (Karm-y Rom dãmb 8:37-39.) A Zeova zoa sã n maan kaalem, a ket n tẽra a yelle, tɩ yaa wa nin-kãng ket n vɩɩme. (Luk 20:37, 38) A Zeova yãgdame n dat n vʋʋg a zo-rãmb nins sẽn maan kaalmã. (Zoob 14:15) A kõo yaood-kãsenga, sẽn na yɩl tɩ d tõe n wa “paam vɩɩm sẽn ka sɛtã.” (Zã 3:16) D miime t’a Zeova nong-d-la wʋsgo, la tɩ d yell pak-a lame. Rẽ n so tɩ d pa basd a tũubu, d sã n wa bẽed bã-kɛgenga, wall d vɩɩmã sã n wa be yell pʋgẽ. D pʋd n teegd-a lame, sẽn na yɩl n paam raood kengre, yam la pãnga. Yaa woto bal kɛpɩ la a Valeeri ne a sɩdã maan-yã.—Yɩɩn. 41:4.
D bʋgs Wẽnnaam Gomdã zug neere
it-2 646
Wẽnd pʋlengo
A Zida Iskariot sẽn zãmb a Zeezi wã pidsa Biiblã bãngr-gomde, la wilg t’a Zeova ne a Bi-riblã tara tõog n tõe n zoe n bãng bũmb ning sẽn na n maane. (Yɩɩn. 41:9; 55:12, 13; 109:8; Tʋʋ. 1:16-20) Baa ne rẽ, d pa tõe n yeel t’a Zida sẽn maan bũmb ningã yaa Wẽnd pʋleng ye. Bãngr-goamã pʋgẽ, b wilgame t’a Zeezi zo-rãmbã sʋk nin-yend n na n zãmb-a, la b pa togs sẽn da na n yɩ ned ning takɩ ye. Sẽn paase, Biiblã saglsã la a noyã pa wilgd t’a Zida sẽn maan bũmb ningã yaa Wẽnd pʋleng ye. Ad Wẽnnaam sẽn da kɩt tɩ tẽn-tʋmdã yeele. “Ra yɩ yãg-yãg n tik ned baa a ye ne f nus ye. Ra naag neb a taabã b yel-wẽn pʋgẽ ye. Kell n yɩ yɩlemde.” (1 Tɩm. 5:22; ges-y 3:6.) A Zeezi sẽn da rat n bãng n yãk a tẽn-tʋmdb 12 tɩ zemsã yĩnga, a pʋʋsa a Ba wã yʋng tõr n yaool n na n yãk-ba. (Luk 6:12-16) Sã n da mikame tɩ Wẽnnaam ra zoe n yãka a Zida t’a na n zãmb a Zeezi, dẽnd a sẽn kõ-b noy la sagls n na n wilg-b sorã ra pa tar yõod ye. Leb n da na n kɩtame tɩ Wẽnnaam naag-a a yel-wẽndã pʋgẽ.
Dẽnd wõnda a Zeezi sẽn wa n yãk a Zida t’a na n naag a tẽn-tʋmdbã, zãmb baa bilf ra pa be a sũurẽ wã ye. A basame tɩ ‘yẽgr sẽn tar zẽnem tob’ a sũurẽ wã, n dẽgem-a t’a bas Wẽnnaam noyã sakre, n sak a Sʋɩtãan tɩ kɩt t’a lebg wagdr la zãmb soaba. (Ebre. 12:14, 15; Zã 13:2; Tʋʋ. 1:24, 25; Zak 1:14, 15; ges-y ZIDA No. 4.) Sẽn wa n lebg vẽeneg t’a Zida sɩd basa Wẽnnaam noyã sakrã, a Zeezi bãnga sẽn be a sũurẽ wã, n togs t’a na n wa zãmb-a lame.—Zã 13:10, 11.