Kiris-nebã vɩɩm la b tʋʋma tigissã na-kẽndr sebr not-rãmbã
© 2024 Watch Tower Bible and Tract Society of Pennsylvania
BÕN-BƖƲƲNG RASEM A 2-8
D SẼN BÃNG BIIBLÃ KARENG PƲGẼ YƖƖN-SÕAMYÃ 79–81
Wilg-y tɩ y nonga a Zeova yʋʋrã sẽn tar ziirã
A Zeezi maoongã yaa “kũun sẽn zems zãng” sẽn yit Ba wã nengẽ
5 Bõe la tõnd tõe n maan n wilg tɩ d nonga a Zeova yʋʋrã? Tõnd tʋm-tʋmdɩ wã tõe n wilga rẽ. A Zeova ratame tɩ d modg n yɩ pʋ-peelem dãmba, n zãag d mens ne wẽnga. (Karm-y 1 Pɩyɛɛr 1:15, 16.) Woto rat n yeelame tɩ d tũ a Zeova a ye tãa, n sakd a noyã ne d sũur fãa. Baa nebã sã n wa namsd tõndo, d maanda d sẽn tõe fãa n ket n tũud a Zeova noyã la a saglsã. D sã n tũud a Zeova noyã, a yʋʋrã paamda waoogre. (Mat. 5:14-16) Wilgdame me tɩ d sakame t’a noyã yaa sõma, la t’a Sʋɩtãan yaa ziri yagda. La ned buud fãa mi n tudgame. Y sã n wa tudg bɩ y tek yam n kos sugri, la y ra le maan bũmb ning y sẽn maan tɩ paoog a Zeova wã ye.—Yɩɩn. 79:9.
Rom dãmb 10:13—‘Pʋʋsd-y ne a Zeova yʋʋrã’
Biiblã pʋgẽ, b sẽn yeel tɩ d “pʋʋsd ne a Zeova yʋʋrã” rat n yeelame tɩ d bao n bãng Wẽnnaam yʋʋrã, la d pʋt-a bũmb nins fãa d sẽn maand n waoogd-a wã pʋgẽ. La pa rẽ bal ye. (Yɩɩn. 116:12-14) Baoodame me tɩ d teeg Wẽnnaam, la d kot a sõngre.—Yɩɩn. 20:7; 99:6.
Wẽnnaam yʋʋrã ra tara yõod a Zeezi nifẽ. A sẽn wa n na n wilg a karen-biisã b sẽn segd n pʋʋs to-to wã, ad a sɩngr goamã sẽn yɩ to-to: “Tõnd Ba sẽn be saasẽ, bɩ yãmb yʋʋr paam waoogre,” pa rẽ bɩ yɩ sõngo. (Matiye 6:9) A Zeezi wilgame me tɩ d sã n dat n wa paam vɩɩm sẽn kõn sa wã, d segd n bao n bãnga Wẽnnaam, n nong-a, la d sakd-a.—Zã 17:3, 6, 26.
D bʋgs Wẽnnaam Gomdã zug neere
it-2 53
A Zozɛf
A Zozɛf yʋʋrã waa ne ziiri. Sẽn mik t’a Zozɛf ra tara ziir a Zakoob kom-dibli wã sʋkã yĩnga, b sẽn mi n pʋd a Zozɛf yʋʋrã n na n gom Israyɛll buudã fãa yellã (Yɩɩn. 80:1), pa rẽ bɩ soolem nins sẽn da be rɩtg sẽnesã yellã sɩd zemsame. (Yɩɩn. 78:67; Amos 5:6, 15; 6:6) A Zozɛf yʋʋrã me bee Biiblã bãngr-goamã pʋgẽ. Wẽnnaam sẽn vẽneg a Ezekɩyɛll t’a yã bũmb ningã pʋgẽ, a Zozɛf paama pʋɩ a yiib tɩ yɩ a rogem-pʋɩɩre. (Eze. 47:13) Galʋ-tẽng ning yʋʋr sẽn yaa “a Zeova bee ka” wã rignoor a yembr yʋʋr ra yaa Zozɛf. (Eze. 48:32, 35) B sẽn wa n gomd a Zeova nin-buiidã sẽn lebg n naag taabã yelle, b yeelame tɩ soolmã babg a ye wã taoor soab yaa a Zozɛfe, tɩ soolmã babg a to wã taoor soab yaa a Zida. (Eze. 37:15-26) A Abdiyaas bãngr-gomdã pʋgẽ, b wilgame t’a “Zozɛf buudã neb” ra na n naagame n sãam ‘a Ezayu buudã nebã.’ (Abdi. 18) La a Zakari bãngr-goamã pʋgẽ, b wilgame t’a Zeova na n fãaga “a Zozɛf buudã.” (Zaka. 10:6) B sẽn wa n gomd Israyɛll sẽn yaa Wẽnnaam dẽndã buud toɛy-toɛyã yellã, yaa a Zozɛf buudã la b sõdg n naage, pa a Efrayim buudã ye.—Vẽn. 7:8.
B sẽn gom a Zozɛf yell Vẽnegr 7:8 pʋgẽ wã wilgdame tɩ bãngr-gomd ning a Zakoob sẽn togs a gãagã zug bilf nand t’a ki wã ra na n wa pidsa Israyɛll sẽn yaa Wẽnnaam dẽndã zugu. Dẽnd bee bʋʋm la soab ning sẽn yaa a Zakoob Pãn-kãsengã, rat n yeel tɩ Wẽnnaam a Zeova yãk a Zeezi Kirist t’a yaa Pe-kɩɩm-sõngo, n kõ a vɩɩmã “piisã yĩnga.” (Zã 10:11-16) Sẽn paase, yaa a Zeezi Kirist la Wẽnnaam doogã, Israyɛll sẽn yaa Wẽnnaam dẽndã sẽn naagã yẽbgrã pãng kugri. (Efɛɛ. 2:20-22; 1 Pɩy. 2:4-6) La a Zeezi b sẽn mak ne Pe-kɩɩmã la Kugrã bee ne Wẽnnaam Sẽn-tõe-a-fãa wã.—Zã 1:1-3; Tʋʋ. 7:56; Ebre. 10:12; ges-y Sɩng. 49:24, 25.
BÕN-BƖƲƲNG RASEM A 9-15
D SẼN BÃNG BIIBLÃ KARENG PƲGẼ YƖƖN-SÕAMYÃ 82–84
Wilg-y tɩ y sũur nooma ne y sẽn paam n maand bũmb nins a Zeova yĩngã
wp16.6 8 s. a 2-3
Yam ning d sẽn tõe n dɩk bõn-yɩgdɩ wã sẽn yɩgd yĩngrã nengẽ
Neb nins sẽn da be Zerizalɛmmã ra mii sɩlaalã sõma. Sɩlaalã ra wae n maanda b tʋgdã rotã pẽgsẽ. Bãmb kẽer da maanda b tʋgdã a Salomo wẽnd-doogã pʋgẽ. Yaa vẽeneg tɩ sɩlaalã sẽn da maand b tʋgdã wẽnd-doogã pʋgẽ yʋʋmd fãa wã ra miime tɩ b ra tõe n paama koglg beenẽ, bala b tõe n gesa b kambã yell tɩ bũmb pa tiis-b ye.
Yɩɩn-sõamyã 84 soabã gʋlsdã gũus n gesa sɩlaalã tʋgdã sẽn da be wẽnd-doogã pʋgẽ wã. Ra yaa a Koore yagenga, n da tʋmd wẽnd-doogẽ wã semenne, kiis a yoob-yoob fãa. A ra nongẽ lame n yɩ wa sɩlaalã sẽn tar zĩig a Zeova roogã pʋgẽ n be be wakat fãa wã. Kɩtame t’a yeel yaa: “Tãb-biis naab a Zeova, ad yãmb sɛk-roogã sẽn yaa kãsengã sɩd bee rasãnde! Mam mengã tõr data a Zeova samanã. Mam pãngã saame, mam sẽn dat-b ne m sũur fãa wã yĩnga . . . Tãb-biis naab a Zeova sẽn yaa mam Rĩm la m Wẽnnaam, baa bõn-yɩgdg paamda roog yãmb tẽn-kug-kãsengã sɛɛga! Sɩlaallã me tɩʋta tʋk a meng yĩnga, n get a kambã yell be.” (Yɩɩn. 84:1-3) Wa sɩlaalã, rẽ yĩnga, yãmb ne y kom-bõonesã wilgdame tɩ y rata ne y sũur fãa n be ne y tẽed-n-taasã, la tɩ y sũur yaa noog ne rẽ bɩ?—Yɩɩn. 26:8, 12.
w08 15/7 30 s. a 3-4
Ra yɩ-y dem-dem bũmb nins y sẽn dat n maanã wɛɛngẽ, n paam sũ-noogo
Kʋʋlmã la laafɩ wã kaalem tõe n kɩtame tɩ d pa le tõe n maan bũmb kẽer a Zeova tũudmã pʋgẽ ye. Y sã n yaa roagda, tõe n wõnda y meng Biibl zãmsgã bɩ tigissã pa nafd yãmb wʋsgo, bala y kom-bõonesã yell gesg rɩta y sẽkã la y pãngã fãa. La y sã n tagsd bũmb nins y sẽn pa le tõe n maanã yell n yɩɩda, rẽ yĩnga, pa tõe n kɩt tɩ sasa ning bɩ y pa le tagsd bũmb nins y sẽn ket n tõe n maanã yell sɩda?
Yʋʋm tusa la woto Levi buudã ned sẽn togs a sũur gomde, n yaool n da pa tar a sẽn tõe n maan n pids a raabã ye. Yʋʋmd fãa, a ra tɩ tʋmda wẽnd-doogẽ wã semen a yiibu, tɩ yaa zu-zẽkre. La a wilgame t’a ra rata ne a sũur fãa n pa tẽn-kugrã sɛɛg wakat fãa. A raabã sɩd yaa sõma wʋsgo. (Yɩɩn. 84:1-3) Bõe n sõng nin-kãngã sẽn da maand sɩd ne a Zeova wã t’a pa yɩ dem-dem ne a menga? A bãngame tɩ zĩnd wẽnd-doogã samanẽ baa yaa daar-n-yɛng yaa zu-zẽkr meng-menga. (Yɩɩn. 84:4, 5, 10) Woto me, d segd n bao n bãnga bũmb nins d sẽn tõe n maane, n maan sũ-noog ne rẽ. D pa segd n tagsd bũmb nins d sẽn pa tõe n maanã yell n tɩ yɩɩd ye.
Yãmb Wẽnnaam a Zeova nand-y lame!
12 Bãag sã n tar-y n namsdẽ, bɩ y bas y yam t’a Zeova mii yãmb toogã fãa. Yõk-y-yã a sɛɛg n kos a sõngr sẽn na yɩl n tall tagsg sẽn zems y yellã zugu. Gẽes-y Biiblã pʋgẽ, tɩ y na n yãa a Zeova goam sẽn belsde. Bʋgsd-y vɛrse kẽer zugu, vɛrse-rãmb sẽn wilgd t’a Zeova sɩd nanda sẽn tũud-b yẽ wã. Woto, y na n yãame t’a Zeova sõngda neb nins fãa sẽn maand sɩd ne-a wã.—Yɩɩn. 84:12.
D bʋgs Wẽnnaam Gomdã zug neere
it-2 459
Kɩɩbse
Sẽn mik tɩ nebã tõe n wa yĩma nin-kãensã sẽn namsd la b pa tar sõangdã yell faag-faagã, a Zeova tũnuga ne gom-bil ning sẽn yaa “kɩɩbse,” n wilg Israyɛll nebã tɩ b manesem sẽn yaa to-to ne nin-kãensã wã n na n wilg b sã n yaa nin-tɩrs bɩ b ka nin-tɩrs ye. Israyɛll nebã sã n da wa tũud a Zeova noyã sõma, b ra geta kɩɩbsã yell neere. La b sã n da wa pa le tũud a Zeova noyã, b ra pa get kɩɩbsã yell ye. Woto ra wilgdame tɩ nin-buiidã sɩd basa a Zeova noyã tũubu. (Yɩɩn. 82:3; 94:6; Eza. 1:17, 23; Zer. 7:5-7; 22:3; Eze. 22:7; Zaka. 7:9-11; Mal. 3:5) Kãab-wẽng ra bee neb nins sẽn namsd kɩɩbsã zutu. (Tõo. 27:19; Eza. 10:1, 2) A Zeova wilgame tɩ yaa yẽ la nin-kãensã fãagda, (Yel. 23:10, 11), b sõangda (Yɩɩn. 10:14), la b Ba (Yɩɩn. 68:5). Yẽ n kaood bʋʋd nin-kãensã yĩnga, (Tõo. 10:17, 18), n zoet-b nimbãanega, (Ooze 14:3), n kõt-b yolsgo (Yɩɩn. 146:9), la a kogend b vɩɩmã.—Zer. 49:11.
Bũmb a ye d sẽn maand tɩ wilgdẽ tɩ d yaa kiris-neb hakɩɩk yaa d sẽn get pʋg-kõap la kɩɩbsã yellã. Karen-biig a Zak yeela kiris-nebã yaa: “Ad wẽn-tũudum ning sẽn yaa yɩlemde, la sẽn pa tar rẽok tõnd Wẽnnaamã sẽn yaa d Ba me wã nifẽ: Yaa f ges kɩɩbsã la pʋg-kõapã yell b toogã pʋgẽ, la f kell n da bas tɩ dũniyã rẽgm-f ye.”—Zak 1:27.
BÕN-BƖƲƲNG RASEM 16-22
D SẼN BÃNG BIIBLÃ KARENG PƲGẼ YƖƖN-SÕAMYÃ 85–87
Pʋʋsgã sõngda tõnd tɩ d tõogd toogo
Yãmb sõngdame tɩ nebã yãt a Zeova ziirã bɩ?
10 D sã n dat n sõng nebã tɩ b yã Wẽnnaam ziirã, d segd n ‘pʋʋsdame n da basdẽ ye.’ (Rom 12:12) D segd n pʋʋsda a Zeova n kotẽ t’a sõng-d tɩ d tõog n tũ-a sõma. D tõe n kos-a-la a vʋʋsem sõngã tɩ sõng-d tɩ d paam tẽebã sẽn tar pãnga, n tõe n mao ne kʋɩɩbg buud fãa, la d “togsd sɩd koɛɛgã tɩrga.” (2 Tɩm. 2:15; Mat. 6:13; Luk 11:13; 17:5) D segd n teega d saasẽ Ba a Zeova, wa biig sẽn teeg a ba to-to wã. D sã n kos-a t’a sõng-d tɩ d tõog n tũ-a sõma, d tõe n kɩsa sɩd t’a na n sõng-d lame. D ra tol n tags t’a yam na n wa yii ne d pʋʋsgã ye! Bɩ d pʋʋsd-a n pẽgd-a la d wilgd-a d mi-beoogo, n kot-a sor-wilgri, sẽn yɩɩd fãa d sã n wa tar zu-loeese. D kot-a me t’a sõng-d tɩ d tõe n maan a raabã a yʋʋrã waoogr yĩnga.—Yɩɩl 86:12; Zak 1:5-7.
A Zeova sẽn leokd d pʋʋsgã to-to
17 Karm-y Yɩɩn-sõamyã 86:6, 7. Yɩɩn-gʋlsd a Davɩɩd ra kɩsa sɩd t’a Zeova kelgda a pʋʋsgo, la a leokdẽ. Yãmb me tõe n kɩsa sɩd woto. Kibay nins yell d sẽn gom sõs-kãngã pʋgẽ wã, wilgdame tɩ d tõe n kɩsa sɩda, t’a Zeova tõe n kõ-d-la yam la pãng sẽn sek d na tõog toog zu-loees sasa. A tõe n tũnuga ne d tẽed-n-taasã, wall neb sẽn nan pa tũud-a, tɩ b maan bũmb ning n sõng tõndo.
18 Baa sẽn pa wakat fãa la a Zeova leokd d pʋʋsg tɩ yɩ wa d sẽn tẽedã, d kɩsa sɩd t’a leokdame. A na n kõ-d-la bũmb nins sẽn yaa tɩlɛ ne-dã, la tɩ zems a wakat me. Rẽ wã, bɩ y ket n pʋʋsdẽ, n tall tẽebo, la y kɩs sɩd t’a Zeova na n gesa y yell rũndã-rũndã, la t’a na n ‘kõo bõn-vɩɩg buudã fãa a sẽn dat tɩ seke,’ dũni-paalgã sẽn watã pʋgẽ.—Yɩɩn. 145:16.
D bʋgs Wẽnnaam Gomdã zug neere
it-1 492 s. a 2
Sũuri
Tũ a Zeova ne f “sũur fãa.” Sẽn na yɩl tɩ ninsaal sũurã tʋmd sõma, a bũmba fãa segd n zemsame. La sũurã sẽn makd d sẽn sɩd yaa ned ningã tõe n wa welga zĩis a yiibu. Rẽ n so t’a Davɩɩd pʋʋs a Zeova n kos-a yaa: “Kõ-y maam sũur sẽn pa pʋɩ ye.” (Yɩɩn. 86:11, notã) Rẽ wilgdame tɩ bũmb toor-toor n tõe n kɩt tɩ ned sũur wa welge. Yaa a yĩn-sidsã, la bũmb nins sẽn kẽesd-a rabeemã. Ned a woto tõe n wa lebga yam a yiib soaba. Rat n yeel tɩ n lebg zal-zal a Zeova tũubã wɛɛngẽ. (Yɩɩn. 119:113; Vẽn. 3:16) Ned tõe n wa tara sũy a yiib me. Rat n yeel t’a tũuda zu-soben-dãmb a yiibu, bɩ a yeta bũmb n yaool n tagsd bũmb a to yelle. (1 Kib. 12:33; Yɩɩn. 12:2) A Zeezi ninga nin-kãensã taale, n yeel tɩ b yaa pʋ-lik rãmba.—Mat. 15:7, 8.
BÕN-BƖƲƲNG RASEM 23-29
D SẼN BÃNG BIIBLÃ KARENG PƲGẼ YƖƖN-SÕAMYÃ 88–89
A Zeova naamã la sõma n yɩɩda
D teel a Zeova naamã sẽn ka to wã
5 Bũmb a to me n kɩt tɩ yaa a Zeova n segd n yɩ yĩngr la tẽng naaba. A rɩta a naamã ne tɩrlem wakat fãa. A yeelame tɩ yẽ ‘tʋmda ne nonglem la tɩrlem ne zemsg dũniyã zugu,’ la tɩ ‘yaa bõn-kãens n noom yẽ.’ (Zer. 9:23) A Zeova pa teeg ninsaalbã sẽn yiis noy ninsã n na n bãng sẽn segd la sẽn pa segd n bak ye. A tɩrlmã sẽn ka to wã yĩnga, yẽ mengã n yiis noy sẽn segd la sẽn pa segdã wɛɛngẽ, tɩ ninsaalbã tog n tũ. Yɩɩn-gʋlsdã ra yeelame: “Yãmb naam geerã tilga tɩrlem ne zemsg zugu.” Rẽnd a Zeova noyã, a saglsã, la a yam-yãkr fãa yaa tɩrga. (Yɩɩn. 89:15; 119:128) A Sʋɩtãan yeelame t’a Zeova pa rɩt a naamã ne tɩrlem ye. La hal ne masã, yẽ mengã pa tõog tɩ tɩrlem zĩnd dũniyã zug ye.
D teel a Zeova naamã sẽn ka to wã
10 A Zeova pa na-toaaga, a pa wẽgd neba. Neb nins sẽn sakd-a wã tara lohorem la sũ-noogo. (2 Kor. 3:17) Sɩd me, a Davɩɩd yeelame t’a Zeova “sẽn beẽ wã pida ne pãng la sũ-noogo.” (1 Kib. 16:7, 27) Yɩɩn-gʋlsd a Etan me yeelame: “Bark bee neb nins sẽn mi tɩ kaas n waoog yãmb a Sẽn-Ka-Saab zutu! Bãmb kẽnda yãmb a Sẽn-Ka-Saab vẽenemẽ wã. Bãmb tara sũ-noog daar fãa yãmb yʋʋrã yĩnga. Bãmb tõe n dooga b zug yãmb tɩrlmã yĩnga.”—Yɩɩn. 89:16, 17.
11 D sã n wae n bʋgsd a Zeova sẽn maand ninsaalbã neer to-to wã zugu, d na n maneg n kɩsa sɩd t’a naamã sõmblem ka to ye. D na n wa tagsda wa yɩɩn-gʋlsdã. A ra yeela a Zeova yaa: “Daar a yembr yãmb samandẽ wã, n são rasem tusr zĩig a to.” (Yɩɩn. 84:11) Woto pa lingd tõnd ye. Sẽn yaa a Zeova n naan tõndã, a mii sẽn yaa tɩlɛ ne-d sẽn na yɩl tɩ d paam sũ-noog hakɩɩka. A pa kõt tõnd sẽn yaa tɩlɛ wã bal ye. A kõtame tɩ zʋʋg rẽ. Bũmb nins fãa a sẽn yet tõnd tɩ d maanã yaa d neer yĩnga. Baa sã n wa yaa tɩlɛ tɩ d wõr d meng n tũ a sẽn yeele, d sã n tũ, d na n paama sũ-noogo.—Karm-y Ezayi 48:17.
Y tẽeda Wẽnnaam Rĩungã ne y sũy fãa bɩ?
13 A Zeova pʋlma Israyɛll rĩm a Davɩɩd bũmbu. Yaa rẽ la b sẽn boond tɩ kaool ning Wẽnnaam sẽn maan ne a Davɩɩdã. (Karm-y 2 Sãmwɛll 7:12, 16.) Yɩ a Davɩɩd sẽn wa n be Zerizalɛm n dɩt naamã la a Zeova pʋlm-a tɩ Mesi wã na n yi a pendẽ wã. (Luk 1:30-33) A sẽn maan woto wã, a vẽnega kibay a taaba, n wilg Mesi wã yaab-rãmbã roog n paase. A yeelame me t’a Davɩɩd yagen-kãng sẽn yaa “ned ning sẽn so noorã” n na n lebg Wẽnnaam Rĩungã Rĩma. (Eze. 21:30-32) A Davɩɩd naamã na n kaoosa “wakat fãa yĩnga,” bala a Zezi sẽn yaa a Davɩɩd yagengã “na n zĩnda wakat fãa la yẽ naamã geer na n kaoosa . . . wa wĩndga.” (Yɩɩl 89:35-38) D tõe n kɩsa sɩd t’a Zezi naamã pa na n tol n lebg yooko, la tɩ bark nins a naamã sẽn na n wa ne wã na n paa wakat fãa.
D bʋgs Wẽnnaam Gomdã zug neere
w07 15/7 32
“Kaset soab sẽn maand sɩd sa-gãnẽ wã”
Rasem 27 la lɛɛr a 7 la minit 43 fãa, kiuugã gilgda tẽngã n tɩ soge. A sẽn maand woto n pa vaandẽ wã kɩtame tɩ b sẽn yeel t’a maanda sɩdã yaa bũmb sẽn zemse. La tõe tɩ yɩɩn-gʋlsdã sẽn gom maan-sɩdã yellã, a ra tagsda bũmb võor sẽn yɩɩd rẽ yelle. A yɩɩll a ye pʋgẽ, a boola kiuugã tɩ “kaset soab sẽn maand sɩda.” Yɩɩn-kãng ra yaa bãngr-gomd sẽn da pĩnd n gomd Rĩung ning a Zeezi sẽn yeel a karen-biisã tɩ b pʋʋsã yelle.—Matiye 6:9, 10.
Sẽn yɩɩd yʋʋm 3000 la woto, Wẽnnaam a Zeova ra maana kaool ne pĩnd wẽndẽ Israyɛll rĩm a Davɩɩde, Rĩung yĩnga. (2 Sãmwɛll 7:12-16) Kaoolã bõn-daab ra yaa a Davɩɩd yageng a Zeezi Kirist wa rɩ naam wakat fãa yĩnga. (Ezayi 9:7; Luk 1:32, 33) Yɩɩn-gʋlsdã goma a Davɩɩd yagengã yell a yɩɩllã pʋgẽ, n yeel yaa: “A geerã na n lugla kãn-kãe wakat fãa yĩng wa kiuugã sẽn yaa kaset soab sẽn maand sɩd sa-gãnẽ wã.”—Yɩɩn-sõamyã 89:36, 37.
Kiuugã Wẽnnaam sẽn naan ‘sẽn na yɩl t’a soog yʋngã’ sẽn tẽegd tõnd tɩ Kiristã Rĩungã paada wakat fãa wã yaa bũmb sẽn zemse. (Sɩngre 1:16) Dãniyɛll 7:14 pʋgẽ, b goma a Rĩungã yell n yeel yaa: “A naamã yaa naam sẽn paad wakat fãa n pa na n tol n loog ye. A rĩungã pa na n tol n sãam ye.” Kiuugã yaa kaset soab sẽn tẽegd tõnd Rĩungã, la bark nins a sẽn na n kɩt tɩ ãdem-biisã paamã yelle.
BÕN-BƖƲƲNG RASEM 30–ZĨ-LIKR RASEM A 6
D SẼN BÃNG BIIBLÃ KARENG PƲGẼ YƖƖN-SÕAMYÃ 90–91
Teeg-y-yã a Zeova n paam n vɩɩmd n kaoose
Nebã baooda yõ-woko
Siãnsã bãngdb wʋsg pa tẽed tɩ kʋʋlmã tɩt tõe n kɩtame tɩ ninsaalbã vɩɩmd n kaoos n yɩɩd rũndã-rũndã wã ye. Yaa sɩd tɩ yʋʋmd 2000 wã tɛka, ninsaalbã vɩɩme n kaoosdẽ. La yaa b sẽn modgd n yaa yɩlem n paasdẽ, la b tar bãas wʋsg tɩɩmã. Bãngdb kẽer tagsdame tɩ ninsaalbã pa le tõe n vɩɩmd n kaoos n yɩɩd woto ye.
Na maan yʋʋm 3500, Biibl-gʋlsd a Moyiiz yeelame: “Tõnd yʋʋmã sõor ka yɩɩd pis-yopoe ye. La yĩns kelem sã n beẽ, a tata pis-nii. La ne rẽ fãa, ket n yaa namsg la nimbãaneg bala. Bala, vɩɩmã loogda tao-tao. La tõnd na n loogame.” (Yɩɩn-sõamyã 90:10) Baa ninsaalbã sẽn modgd n na n wogl b yõorã, naoor wʋsgo, b pa kaoosd n yɩɩg a Moyiiz sẽn yeelã ye.
Bõn-vɩɩlɩ n yaool n be, n kaoosd n yɩɩd ninsaalbã. Wala makre, “oursin” wã la “mollusque.” B bee ko-kãsengã pʋgẽ, la b tõe n kaoosa yʋʋm 200 la zaka. Tɩɩg ning me b sẽn boond tɩ “séquoia géant” wã tõe n vɩɩmda yʋʋm tusa. D sã n ges bõn-naands kãensã la bõn-vɩɩlɩ a taab sẽn kaoosd to-to wã, d sokda d mens yaa: ‘Bõe yĩng tɩ ninsaal yẽ vɩɩmã tɛk yaa yʋʋm 70 bɩ 80 bala?’
wp19.1 5, zĩ-gũbrã
Wẽnnaam tara yʋʋr bɩ?
Neb wʋsg tʋll n bãnga sokrã leoore. Tõe tɩ yãmb mengã rat n bãngame. Sã n mikame tɩ bũmba fãa talla sɩngre, Wẽnnaam talla sɩngr bɩ?
Bãngdbã sak n deegame tɩ ãndũniyã talla sɩngre. Rẽ kell n zemsa ne Biiblã pipi vɛrse wã sẽn yet bũmb ningã. A yetame yaa: ‘Sɩngr wẽndẽ, Wẽnnaam naana yĩngr la tẽnga.’—Sɩngre 1:1.
Bũmb fãa pa tiig n be woto bal ye. Sã n mikame tɩ sɩngrẽ wã naand ra kae, maana wãn tɩ ãndũniyã wa beẽ? Yaa Wẽnnaam a Zeova sẽn yaa Sɩɩga, la pãn-kãseng soaba, t’a yamã me ka to wã n naan bũmb fãa.—Zã 4:24.
Biiblã yetame yaa: ‘Sẽn deng tãmsã sẽn na n zĩndi, la sẽn deng yãmb sẽn na n naan tẽn-gãongã ne dũniyã, yãmb dag n sɩng n yaa Wẽnnaam zamaan woo zamaane.’ (Yɩɩn-sõamyã 90:2) Dẽnd Wẽnnaam pa tall sɩngr ye. ‘Sɩngr wẽndẽ,’ a naana ãndũniyã.—Vẽnegre 4:11.
A Zeova sẽn nong-dã sõng-d lame tɩ d tõogd d rabeemã
16 A Sʋɩtãan miime tɩ d nonga d vɩɩmã. A yeelame tɩ d na n sak n bõna bũmb nins fãa d sẽn tare, baa d zoodã ne a Zeova, sẽn na yɩl n da ki ye. (Zoob 2:4, 5) Ad a Sʋɩtãan yaa ziri yagda! Sẽn mik tɩ yẽ la “soab ning sẽn tar tõog n wat ne kũumã,” a tũnugda ne d sẽn zoet kũumã n na n kɩt tɩ d bas a Zeova tũubu. (Ebre. 2:14, 15) Wakat ninga, a Sʋɩtãan poorẽ dãmbã yeta a Zeova Kaset rãmbã tɩ b sã n pa bas a Zeova tũubu b na n kʋ-b lame. Wakat kẽer me, d sã n ka laafɩ hal tɩ tõe n wa tũ ne d yõore, a Sʋɩtãan tũnugda ne rẽ n dat tɩ d maan bũmb n kɩɩs a Zeova. Logtoɛɛmbã wall d zakã neb nins sẽn pa tũud a Zeova wã tõe n pẽdgd-d lame n dat tɩ d sak tɩ b ning-d zɩɩm, tɩ yaool n yaa bũmb sẽn kɩɩsd a Zeova noyã. Neb a taab me tõe n baoome n na n modg-d tɩ d sak tɩbsg Biiblã sẽn gɩdge.
17 Baa ne d sẽn pa rat n ki wã, d miime tɩ d sã n ki, a Zeova na n ket n nong-d lame. (Karm-y Rom dãmb 8:37-39.) A Zeova zoa sã n maan kaalem, a ket n tẽra a yelle, tɩ yaa wa nin-kãng ket n vɩɩme. (Luk 20:37, 38) A Zeova yãgdame n dat n vʋʋg a zo-rãmb nins sẽn maan kaalmã. (Zoob 14:15) A kõo yaood-kãsenga, sẽn na yɩl tɩ d tõe n wa “paam vɩɩm sẽn ka sɛtã.” (Zã 3:16) D miime t’a Zeova nong-d-la wʋsgo, la tɩ d yell pak-a lame. Rẽ n so tɩ d pa basd a tũubu, d sã n wa bẽed bã-kɛgenga, wall d vɩɩmã sã n wa be yell pʋgẽ. D pʋd n teegd-a lame, sẽn na yɩl n paam raood kengre, yam la pãnga. Yaa woto bal kɛpɩ la a Valeeri ne a sɩdã maan-yã.—Yɩɩn. 41:4.
D bʋgs Wẽnnaam Gomdã zug neere
Ned fãa tara a malɛk t’a kogend-a bɩ?
Biiblã pa yet tɩ ned fãa tara malɛk t’a kogend-a ye. Yaa sɩd tɩ daar a ye, a Zeezi togsa gomd sẽn wõnd rat n yeela woto. A yeelame: “Gũus-y n da paoog-y kom-kãensã [Kirist karen-biisã] ned ba a yembr ye. Bala, mam yeta yãmb tɩ bãmb malegsã sẽn be arzãnã geta mam ba sẽn be arzãnã neng daar fãa.” (Matye 18:10) A Zeezi gomdã rat n yeelame bal tɩ yẽ karen-biig fãa yell paka malɛgsã, hal tɩ b tʋmd n sõngd-ba. La pa segd n kɩt tɩ kiris-ned maand a toog kae, n pa gũusd ne yelle, n tagsdẽ tɩ malɛgsã na n kogl-a lame ye.
La rat n yeelame tɩ malɛgsã pa sõngd ninsaalbã bɩ? Ayo! (Yɩɩn-sõamyã 91:11) Neb kẽer mi n yeelame tɩ Wẽnnaam tũnuga ne malɛk n kogl-b yell ning pʋgẽ, wall a wilg-b b sẽn tog n maanega. Wala makre, a Kenet, rao ning yell d sẽn zoe n gomã. D pa tõe n yeel tɩ yaa Wẽnnaam n sɩd sõng-a ye. La tõe t’a bee bʋʋm. A Zeova Kaset rãmbã koe-moonegã pʋgẽ, b wae n maanda kaset ne bũmb wʋsg sẽn wilgd tɩ malɛgsã sõngd-b-la tʋʋmdã pʋgẽ. La d sẽn pa tõe n yã malɛgsã, d pa tõe n togs bũmb nins fãa Wẽnnaam sẽn kɩt tɩ b maand n sõngd ned fãa wã, la b sõngrã sẽn ta zĩig ningã ye. La sẽn wa n yaa sõngr ning fãa la d paam-yã, n pʋʋs Wẽnnaam bark d sẽn tagsd tɩ yaa yẽ n sõng-d yĩnga, pa wẽng ye.—Koloos-rãmbã 3:15; Zak 1:17, 18.
ZĨ-LIKR RASEM A 7-13
D SẼN BÃNG BIIBLÃ KARENG PƲGẼ YƖƖN-SÕAMYÃ 92–95
D sã n tũud a Zeova la d vɩɩmã na n tall bark n yɩɩda
Kom-bɩɩse, y yãka y sẽn dat n maan a Zeova tũudmã pʋgẽ, la y wɩngd ne rẽ bɩ?
5 Pipi, d sã n yãk d sẽn dat n maan a Zeova tũudmã pʋgẽ, wilgdame tɩ d sũur nooma a sẽn nong tõndã, la tɩ d pʋʋsda bark a sẽn maan bũmb nins fãa n kõ-dã yĩnga. Yɩɩn-gʋlsdã ra yeelame: “Yaa sõama tɩ d pʋʋs Sẽn-Ka-Saab barka. . . . Sẽn-Ka-Saabo, yãmb sẽn maandã kõta maam sũ-noogo! Mam kaasda ne sũ-noog yãmb nus tʋʋmã yĩnga.” (Yɩɩn. 92:2, 5) Kom-bɩɩse, tags-y bũmb nins fãa a Zeova sẽn kõ yãmbã yelle. Yẽ n kõ-y vɩɩmã, n kõ-y Biiblã, n sõng-y tɩ y bãng-a la y tẽed-a, n kõ-y tẽed-n-taase, la a sõng-y tɩ y saagd tɩ y na n vɩɩmda arzãnã pʋgẽ wakat sẽn kõn sa. Y sã n yãk bũmb n dat n wa maan a Zeova tũudmã pʋgẽ, wilgdame tɩ y sũur nooma a sẽn kõ-y woto fãa wã. Rẽ me yaa bũmb sẽn na n paas yãmb ne yẽ zoodã.
Yãmb tagsa wã yaa Wẽnnaam dẽndã bɩ?
8 Tõnd me yaa a Zeova kamba, t’a rat tɩ d vɩɩmã tall barka. (Eza. 48:17, 18) Rẽ n so t’a kõt-d noy la sagls sẽn wilgd d sẽn tog n vɩɩmd to-to, la d manesem sẽn tog n yɩ to-to ne d taabã. Bũmb fãa pʋgẽ, a ratame tɩ tõnd bao n bãng yẽ tagsg sẽn yaa a soaba, la d vɩɩmd tɩ zems ne rẽ. Pa sẽn na n weoog-d ye. Pʋd n yaa sẽn na n sõng-do, tɩ bũmb fãa pʋgẽ bɩ d tõogd n tagsd neere, n bãngd sẽn segde. (Yɩɩn. 92:6; Yel. 2:1-5; Eza. 55:9) Woto, d sẽn na n yãk yam ninsã na n tata Wẽnnaam yam, la noom tõnd me, tɩ kõt-d sũ-noogo. (Yɩɩn. 1:2, 3) Hakɩɩka, d tagsa wã sã n yaa a Zeova rẽndã, nafa wã waoogame!
Yãmb Wẽnnaam a Zeova nand-y lame!
18 Baa d yʋʋmã sã n wa vẽsgdẽ, d kell n bas d yam tɩ tʋʋm bee a Zeova sẽn dat tɩ d tʋme. (Yɩɩn. 92:13-16) A Zeezi yeelame tɩ baa d minimã bɩ d tõogã sẽn paood to-to, d sã n maand a Zeova raabã wa d sẽn tõe fãa, a Zeova sũur noomame. (Luk 21:2-4) Rẽ wã, wɩng-y ne y sẽn tõe wã maanego! Wala makre, y tõe n gomda a Zeova yell ne nebã, y tõe n pʋʋsda y tẽed-n-taasã yĩnga, y tõe n kengda y taabã raood sẽn na yɩl tɩ b kell n maan sɩd ne a Zeova. A Zeova nifẽ, y yaa a tʋmd-n-taaga. La pa y sẽn tõog n maan bũmb ninsã yĩng ye. Yaa y sẽn sakd-a ne yamleoogã yĩnga.—1 Kor. 3:5-9.
D bʋgs Wẽnnaam Gomdã zug neere
cl 176 s. 18
“Ad Wẽnnaam . . . yamã . . . waooga!”
18 Gũus-y n ges-y tẽn-tʋmd a Poll sẽn gom a Zeova yamã sẽn ka to wã yell to-to. A yeelame yaa: “Ad Wẽnnaam sɩd yaa kõata! Ad a yamã la a bãngrã waooga! Ned pa tõe n wʋm a bʋ-kaoor toor-toorã võore, la ned pa tõe n bãng a soayã ye!” (Rom dãmbã 11:33) Vɛrse wã pʋgẽ, a Poll sẽn sɩng a goamã to-to wã wilgdame t’a ra waoogda Wẽnnaam ne a sũur fãa. Gɛrk gom-bil ning a sẽn pʋd ka tɩ ‘waoogã’ tara loees ne gom-bil ning sẽn yaa ‘bog-zulunga.’ Goam nins a sẽn togsã sõngda tõnd tɩ d tõe n mams rẽ d yamẽ vẽenega. D sã n tags a Zeova yamã yelle, yaa wa d sẽn na n get bok zulum sẽn pa tar tɛka, sẽn tolg n yaa zulung tɩ d pa tol n tõe n bãng a zulmã sẽn taẽ, tɩ pa sokd d tõog n mag a zulmã la a yalmã ye. (Yɩɩn. 92:5) Rẽ pa kɩtd tɩ d segd n yɩ sik-m-mens rãmb sɩda?
ZĨ-LIKR RASEM 14-20
D SẼN BÃNG BIIBLÃ KARENG PƲGẼ YƖƖN-SÕAMYÃ 96–99
‘Moon-y koe-noogã’!
Koe-noogã yaa bõe?
KIRIS-NEBÃ segd n moona Wẽnnaam Rĩungã koe-noogã n wilg nebã tɩ Rĩungã yaa goosneem sẽn na n soog dũniyã tɩ tɩrlem zĩnd a zugu. B gomda koe-noog yell Biiblã zĩis a taaba. Wala makre, Ezai 52:7 pʋgẽ b gomda “koe-noog” yelle. Rom dãmb 15:16 pʋgẽ, b gomda “Wẽnd koe-noog” yelle. Vɛrse a to me gomda “koe-noog ning sẽn togsd a Zezi Kirist yɛlã” yelle.—Mark 1:1.
Koɛɛg-koɛɛga, koe-noogã yaa koɛɛg ning a Zezi sẽn moon t’a karen-biisã gʋls Biiblã pʋgẽ wã. Nand t’a Zezi rʋ saasẽ, a yeela a karen-biisã woto: “Bɩ y kẽng n maan nebã buud fãa tɩ b yɩ mam karen-biisi n lis bãmb ne Ba la Biigã la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Dẽnd kiris-neb hakɩkã tʋʋmdã pa gom Rĩungã yell ne nebã bal ye. B segd n modgame me n maan karen-biisi.
Bõe n na n maan bʋ-kaoorã daare?
Wʋsg tagsdame tɩ bʋ-kaoorã daare, neb milyaar-dãmb n na n kolg Wẽnnaam geerã, t’a tik ned kam fãa tʋʋm n kao a bʋʋdo, tɩ kẽer paam n vɩɩmd saasẽ, tɩ sãnda sɩbgr yɩ namsg sẽn pa sate, wa nug rɩtg fotã sẽn wilgdã. La Biiblã yaool n wilgame tɩ bʋ-kaoorã yõod yaa sõng nebã tɩ b paam b mens ne wẽgbã. (Yɩɩl Sõamyã 96:13b) Wẽnnaam yãka a Zezi t’a na n kao ãdem-biisã bʋʋdo.—Karm-y Ezai 11:1-5; Tʋʋm 17:31.
Laafɩ sẽn na n zĩnd yʋʋm tusr la wakat fãa yĩnga
18 Yaa a Sʋɩtãan sẽn wa n belg ninsaalbã tɩ b kɩɩs a Zeova wã la yɛlã toeem-yã. La yʋʋmd 1914 tɛkã, Mesi wã Rĩung maanda bũmb toor-toor n na n kɩt tɩ yɛlã lebs n yɩ wa sɩngrẽ wã. (Ef. 1:9, 10) Kiristã naam sẽn na n kaoos yʋʋm tusrã sasa, bõn-sõma ‘nin sẽn nan ka ne’ la d na n yã. Dẽ poor la “baasgã,” rat n yeel tɩ Kiristã naamã baasgo. La bõe n na n maane? Baa b sẽn kõ a Zezi “pãng fãa” bɩ tõog fãa saasẽ la tẽngã zugã, a pa nong naam ye. A pa baood n na n deeg a Zeova zĩig ye. A na n sika a meng n ‘lebs soolmã Wẽnnaam sẽn yaa a Ba wã nugẽ.’ Rẽnd a na n tʋma ne pãng ning b sẽn kõ-a wã “Wẽnnaam waoogr” yĩnga.—Mat. 28:18; Fil. 2:9-11.
19 Wakat kãng tɩ neb nins sẽn vɩ tẽngã zugã zemsa zãnga. B na n dɩka a Zezi togs-n-taare, n sik b mens n sak a Zeova. Yaoolem makr n na n zĩndi, tɩ b paam n wilg b sã n sɩd ratame t’a Zeova yɩ b naaba. (Wil. 20:7-10) Rẽ poore, b na n sãama malɛgs nins la ninsaalb nins sẽn na n yɩ tõatbã fãa. Ad sɩd na n yɩɩ sũ-noog wakate! A Zeova zakã rãmb fãa, sẽn be-b saasẽ la sẽn be-b tẽngã zugã na n pẽgd-a lame, t’a yɩ fãa ned kam fãa yĩnga.—Karm-y Yɩɩl Sõamyã 99:1-3.
D bʋgs Wẽnnaam Gomdã zug neere
it-1 425
Yɩɩlle
Gom-bil ning sẽn yaa ‘yɩɩn-paallã’ bee Yɩɩn-sõamyã sebrã, Ezayi sebrã, la tẽn-tʋmd a Zã sebrã pʋgẽ. (Yɩɩn. 33:3; 40:3; 96:1; 98:1; 144:9; 149:1; Eza. 42:10; Vẽn. 5:9; 14:3) D sã n ges goam nins b sẽn deng n togs n yaool n na n gom ‘yɩɩn-paallã’ yellã, la goam nins b sẽn togs rẽ poorã wilgdame tɩ b yɩɩla yɩɩllã bũmb a Zeova sẽn maan yĩnga, a naam sẽn ka to wã wɛɛngẽ. Yaa rẽ yell la b gomd Yɩɩn-sõamyã 96:10 pʋgẽ. B yeelame yaa: “A Zeova lebga Rĩma.” ‘Yɩɩn-paallã’ pʋgẽ, b gomda bũmb nins a Zeova sẽn maan a naamã na paam pãngã wɛɛngẽ, la rẽ sẽn nafd saasã la tẽngã to-to.—Yɩɩn. 96:11-13; 98:9; Eza. 42:10, 13.
ZĨ-LIKR RASEM 21-27
D SẼN BÃNG BIIBLÃ KARENG PƲGẼ YƖƖN-SÕAMYÃ 100–102
Wilg-y tɩ y sũur nooma ne a Zeova nonglem-kãsengã
Y sẽn tõe n segl y meng to-to n wa tõog n deeg lisgu
18 Y sẽn nong a Zeova wã yaa bũmb sẽn tar yõod hal wʋsgo. (Karm-y Yel-bũn 3:3-6.) Y sã n nong Wẽnnaam wʋsgo, na n sõng-y lame tɩ y tõog n mao ne vɩɩmã zu-loeesã. Biiblã gomda a Zeova sẽn nong a nin-buiidã to-to wã yelle, n yetẽ tɩ yaa ne nonglem-kãsenga. Rat n yeelame t’a na n kell n nong-b-la wakat fãa, n pa tol n daag-b n bas ye. (Yɩɩn. 100:5) Wẽnnaam naana yãmb n wõneg a menga. (Sɩng. 1:26) Wãn to la yãmb me tõe n wilg tɩ y nonga a Zeova a woto?
19 Wilg-y Wẽnnaam tɩ y yaa sõm-mita. (1 Tes. 5:18) Daar fãa bɩ y sok y meng yaa: ‘Bõe la a Zeova maan n wilg t’a nonga maam?’ Rẽ poore, y sã n wa pʋʋsdẽ bɩ y tẽeg n togs-a bũmb takɩ a sẽn maan n kõ yãmba, n pʋʋs-a bark rẽ yĩnga. Wa tẽn-tʋmd a Polle, bɩ yãmb me bãng tɩ bũmb nins fãa a Zeova sẽn maand n kõt yãmbã wilgdame t’a sɩd nong-y lame. (Karm-y Galat-rãmb 2:20.) Sok-y y meng yaa: ‘Ma-me maanda bũmb n wilgd a Zeova tɩ m nong-a lame bɩ?’ Y sã n nong a Zeova, y na n kell n yalsa kãn-kãe n da wa maan bũmb n kɩɩs-a, baa y sã n wa maood ne zu-loeese. Na n sõng-y lame tɩ y ket n maand bũmb nins sẽn paasd yãmb ne a zoodã pãngã, la y ket n wilgd daar ne a to fãa tɩ y sɩd nonga y saasẽ Ba wã.
“Modg-y tɩ y yamã ket n vẽenẽ, la y yɩ gũusdba!”
10 Bũmb kẽer sẽn pa sõma d sẽn segd n zãag d mens ne yaa rolsem manesem, rã-tɩgre, yão-beedo, gom-põaasa, nen-kɛglem, yoob yɛl gesgo, la bũmb a taab sẽn wõnd woto. (Yɩɩn. 101:3) A Sʋɩtãan sẽn yaa d bɛyã baooda segb buud fãa n na n sãam tõnd ne a Zeova zoodã. (1 Pɩy. 5:8) D sã n pa maan gũusgu, a Sʋɩtãan tõe n bʋda sũ-kiiri, zãmbo, rat-tɩ-looge, kisgri, wuk-m-meng la sũ-kẽk bõn-buud d yamẽ wã la d sũurẽ wã. (Gal. 5:19-21) Sɩngrẽ wã, d tõe n tagsdame tɩ d pa na n tol n wa maan yel-kãensã ye. La d sã n pa yɩ tao-tao n yiis rẽ d yamẽ wã la d sũurẽ wã, b na n wa bɩɩme n lebg wa tɩɩg sẽn tar zẽnem, tɩ wa wa ne yelle.—Zak 1:14, 15.
Yãmb na n tũu a Zeova saglsã sẽn yaa vẽenesã bɩ?
7 Zãmb karen-saam dãmbã gilbã baooda bõe maanego? D pa segd n deeg-b d zagsẽ wall d pʋʋs-b ye. Sẽn paase, d pa segd n karemd b sɛbã wall d kelgd b sõssã televiziõ wã pʋgẽ, radio rãmbẽ wã, pa rẽ bɩ ẽntɛrnetã zug ye. Bõe yĩng tɩ d segd n gũus d mens woto fãa? Yaa d sẽn nong “Wẽnnaam sẽn so sɩdã” yĩnga. Woto kɩtame tɩ d toog kae ne zãmsg buud fãa sẽn kɩɩsd a Gomdã sẽn yaa sɩdã ye. (Yɩɩl 31:6; Zã 17:17) Sẽn paase, d nonga a Zeova siglgã sẽn sõng-d tɩ d bãng yɛl wʋsg Biiblã sẽn yet tɩ be yamleoogã. Wala makre, d bãnga Wẽnnaam a Zeova yʋʋrã la a võorã, a sẽn sɩng n dat tɩ tẽngã zug vɩɩm yɩ to-to wã. D bãnga Biiblã sẽn yet bũmb ning kũ-rãmbã wɛɛngẽ wã, la kũum vʋʋgr saagrã. Tẽeg-y sũ-noog ning y sẽn paame, y sẽn wa n bãng bõn-kãensã la a taab paalmã. Bõe yĩng masã tɩ y na n bas tɩ y sũur sãam ne siglg ning sẽn sõng-y woto fãa wã, ned sẽn wɩt-a yĩnga?—Zã 6:66-69.
8 Baa zãmb karen-saam dãmbã sẽn yɛtg fãa, d pa na n sak n tũ-b ye! Bõe yĩng tɩ d na n kẽng nin-kãensã sẽn yaa wa bul-koeemsã nengẽ tɩ b tudg-d la b sãam d sũy zaalem? Bɩ d kell n sak a Zeova ne a siglgã ne d sũur fãa, bala, hal n tãag masã, yaa bãmb n sõngd tõnd tɩ d bãngd bũmb nins Wẽnnaam Gomdã sẽn yet tɩ kengd raoodã.—Ezai 55:1-3; Mat. 24:45-47.
D bʋgs Wẽnnaam Gomdã zug neere
Wãn to la d tõe n kell n tũ a Zeova ne sũ-noogo?
20 La yɩɩl-gʋlsdã ra ket n tõe n pẽga a Zeova. (Karm-y Yɩɩl Sõamyã 102:20-22.) Wa Yɩɩl Sõamyã 102 soabã sẽn wilgdã, baa neb nins sẽn be tẽeb pʋgẽ wã tõe n paama toogo, tɩ wʋm-b hal tɩ b pa le tõe n tags bũmb a to yell ye. Yɩɩl-gʋlsdã ra tagsdame tɩ yẽ “yaa wa liuul sẽn zao roog zug a ye bala,” rat n yeel t’a ra tagsdame t’a yaa a ye ne a zu-loeesã. (Yɩɩl 102:8) Y sã n wa tagsd woto bɩ y pelg y pʋg n pʋʋs a Zeova wa yɩɩl-gʋlsdã sẽn maanã. Y pʋʋsgã tõe n sõng-y lame tɩ y ra le tags tɩ y pa tar yõod ye. A Zeova yeelame t’a kelgda “namsdbã kosgo,” n pa paoogd-b ye. (Yɩɩl 102:18) Kɩs-y sɩd ne rẽ.
ZĨ-LIKR RASEM 28–SƖPAOLG RASEM A 3
D SẼN BÃNG BIIBLÃ KARENG PƲGẼ YƖƖN-SÕAMYÃ 103–104
“A tẽrame tɩ tõnd yaa tom”
D rɩk a Zeova togs- n-taare, n da yɩ neb sẽn yaa dem-dem ye
5 A Zeova sik-m-mengã la a nimbãan-zoeerã kɩtame t’a yaa wʋmda. Wala makre, a Zeova wilgame t’a yaa sik-m-meng soaba, a sẽn wa n dat n sãam Sodom nebã sẽn da yaa nin-wẽnsã. A Zeova kɩtame t’a malɛkã yeel nin-tɩrg a Lot t’a zoe n tees tãensẽ wã. A Lot ra yɛɛsdame n pa rat n kẽng be ye. Rẽ kɩtame t’a kos tɩ b kõ yẽ ne a zakã rãmb sor tɩ b zoe n tɩ soond Zowaar sẽn da yaa tẽn-bilã. Zowaar yaool n da naaga tẽns nins a Zeova sẽn da rat n sãamã. A Zeova ra tõe n yeelame tɩ yaa tɩlɛ t’a Lot tũ noy nins yẽ sẽn kõ wã zãnga. La a saka a Lot kosgã, baa sẽn da na n kɩt t’a pa sãam Zowaarã. (Sɩng. 19:18-22) Yʋʋm kobs poore a Zeova zoee Niniiv nebã nimbãanega. A tʋma no-rɛɛs a Zonas t’a tɩ togs Niniiv nebã tɩ ra pa na n kaoos la a sãam tẽngã ne a nebã sẽn yaa nin-wẽnsã ye. La Niniiv nebã teka yam n kos sugri, t’a Zeova zoe-b nimbãaneg n pa saam tẽngã ye.—Zon. 3:1, 10; 4:10, 11.
Teeg-y-yã a Zeova wa a Sãmsõ
16 Baa a Sãmsõ kongrã sẽn kɩt t’a paam zu-loe-kɛgemsã, a pa bas a Zeova raabã maaneg ye. Baa d sã n wa tudg tɩ yaa tɩlɛ tɩ b kibl-du, wall kɩt tɩ d bõn tʋʋmd d sẽn da tar siglgã pʋgẽ, d pa segd n bas a Zeova raabã maaneg ye. D tẽeg t’a Zeova kõta sugri. (Yɩɩn. 103:8-10) Baa ne d sẽn kongã, a Zeova ket n tõe n kõ-d-la pãng tɩ d maan a raabã, wa sẽn yɩ to-to ne a Sãmsõ wã.
17 D gom saam-biig a ye sẽn yaa bi-bɩɩg t’a yʋʋr boondẽ t’a Mikayɛll yelle. A ra tʋmda tʋʋm wʋsg a Zeova tũubã pʋgẽ, n da yaa kãsem-sõangd la wakat fãa so-pakda. A wa n maana yel-wẽnde, tɩ kɩt tɩ b reeg tʋʋm nins a sẽn da tar tigingã pʋgẽ wã n bas-a. A yeelame: “Hal n tãag wakat kãnga, m da tara tʋʋm wʋsg a Zeova tũubã pʋgẽ. Zĩig pʋgẽ, lebga wa m pa le tõe n maan baa fʋɩ a Zeova yĩng ye. M zɩ n tags t’a Zeova raag-m lame n bas ye. La m da sokda m meng maam ne a zoodã sã n na n le talla pãnga, wall m sã n na n le tõog n tʋma tʋʋm wʋsg tigingã pʋgẽ wa pĩndã.”
18 La a Mikayɛll pa bas a Zeova tũub ye. A yeelame: “M da modgdame n na n maneg maam ne a Zeova zoodã, n pʋʋsd-a wakat fãa n togsd-a sẽn be m sũurẽ, n zãmsd a Gomdã la m bʋgsdẽ.” A Mikayɛll le wa n paama tʋʋm tigingã pʋgẽ. Rũndã-rũndã a yaa kãsem-soaba, la wakat fãa so-pakda. A paasame: “Sẽn yɩɩd fãa, kãsem-dãmbã sẽn teel-m la b keng m daoodã sõng-m lame tɩ m bãng t’a Zeova ket n nong-m lame. M le paam n tõe n tʋma tʋʋm tigingã pʋgẽ, tɩ m sũur-kasetã pa ningd-m taal ye. Yel-kãngã sõnga maam tɩ m bãng tɩ ned sã n sɩd tek yam, a Zeova kõt-a-la sugri.” D tõe n basa d yam tɩ baa d sã n tudgi, a Zeova na n sakame tɩ d ket n tʋmd a tʋʋmã, la a ning-d barka. La rẽ yaa d sẽn na n maan d sẽn tõe fãa n dems yɛlã la d kell n teeg-a.—Yɩɩn. 86:5; Yel. 28:13.
Y sã n yãka bũmb n na n maan a Zeova tũudmã yĩnga, y tõe n tõogame
2 Y sã n yãka bũmb n na n maan a Zeova tũudmã pʋgẽ, n ket n nan pa tõoge, bɩ y ra tags tɩ y ka võor ye. Baa yaa bũmb bilf la y yãk yam n na n maane, baooda sẽk la modgr wʋsgo. Y sẽn modgd n na n pids bũmb ning y sẽn yãk n na n maanã, wilgdame tɩ y sũur nooma ne y sẽn paam n yaa a Zeova zoa wã, la tɩ y tʋll n tũ-a-la wa y sẽn tõe tɛka. A Zeova sũur nooma ne y modgrã. Sɩd me, a pa baood tɩ y maan sẽn yɩɩd y pãng ye. (Yɩɩn. 103:14; Mis. 6:8) Dẽnd y segd n yãka yam n na n maan bũmb sẽn pa yɩɩd y pãnga, n zems ne y yɛlã sẽn yaa to-to wã. Y sã n yãk bũmb ning y sẽn dat n wa maanã, bõe n tõe n sõng-y tɩ y wa tõog n pids-a? Bɩ d gom bũmb a wãn yelle.
D bʋgs Wẽnnaam Gomdã zug neere
cl 55 s. 18
“Soab ning sẽn maan saasã ne tẽngã”
18 A Zeova sẽn tall a pãngã n naan bũmb fãa wã sõngda tõnd tɩ d bãngd bõe a zugu? Bũmb toor-toorã a sẽn naanã sɩd bee rasãnde. Yɩɩn-gʋlsd a ye yeelame yaa: “Zeova, yãmb tʋʋmã sɩd yaa wʋsgo! . . . Tẽngã pida ne bũmb nins yãmb sẽn maanã.” (Yɩɩn. 104:24) Yɩɩn-gʋlsdã goamã yaa sɩda! Bãngdbã wilgame tɩ yaa sẽn yɩɩd bõn-vɩɩs buud toor-toor bãmb milyõ n be tẽngã zugu. La nebã tagsdame tɩ bõn-vɩɩsã sõorã yɩɩda woto hal zĩig sẽn zãre. Sasa ninga, ned sẽn maand desẽ-rãmb tõeeme n pa le tar a sẽn na n tik n maan desẽ ye. La a Zeova nengẽ pa woto ye. A sẽn tar tõog n tõe n naan bõn-paalã la bũmb toor-toorã pa tar koak ye.