Kiris-nebã vɩɩm la b tʋʋma tigissã na-kẽndr sebr not-rãmbã
© 2024 Watch Tower Bible and Tract Society of Pennsylvania
YƲƲM-VẼKR RASEM A 6-12
D SẼN BÃNG BIIBLÃ KARENG PƲGẼ YƖƖN-SÕAMYÃ 127–134
Roagdba, kell-y n ges-y y kambã sẽn yaa kũun sẽn tar yõodã yelle
Wilg-y tɩ y sũur nooma y sẽn paam n yaa a Zeova zakã nedã
9 A Zeova naana ninsaalbã tɩ b tõe n dog kamba, la b zãms b kambã tɩ b wa nong-a la b tũud-a. Y sã n yaa roagda, y sũur nooma ne a Zeova sẽn kɩt tɩ y tõe n maan woto wã bɩ? A Zeova kõo malɛgsã tõog tɩ b tõe n maan bũmb toor-toore, la a pa kõ-b tõog tɩ b tõe n dog kamb ye. Woto wã, y sã n yaa roagda, bɩ y wilg tɩ y sũur nooma ne y sẽn paam n tõe n dog kamb la y wub-bã. Wẽnnaam kõo roagdbã tʋʋm-kãseng sẽn yaa wub b kambã a ‘Zeova kiblgã la a saglsã pʋsẽ.’ (Efɛ. 6:4; Tõo. 6:5-7; Yɩɩn. 127:3) A Zeova siglgã yiisda bũmb wʋsg sẽn tik Biiblã zugu, n na n sõng roagdbã. Wala makre, sɛba, video-rãmba, yɩɩla, la bũmb a taab sẽn be tõnd sɩtã pʋgẽ. Yaa vẽeneg tɩ d saasẽ Ba wã ne a Bi-riblã nonga kom-bɩɩsã wʋsgo. (Luk 18:15-17) Roagdbã sã n teeg a Zeova la b maand b sẽn tõe fãa n na n ges b kambã b sẽn nongã yelle, noom-a lame. Roagdb nins sẽn maand woto wã sõngda b kambã tɩ b tõe n wa lebg a Zeova zakã neb wakat sẽn kõn sa yĩnga.
Roagdba, sõng-y y kambã tɩ b wa nong a Zeova
20 Bao-y n bãng-y biig fãa sõma. Yɩɩn-sõamyã 127 wã pʋgẽ, b maka kambã ne pɛɛma. (Karm-y Yɩɩn-sõamyã 127:4.) B tõe n maana pɛɛm ne kãnkãre, raoogo, kutu, la teed a taaba. B woglmã bɩ b bedrmã me tõe n yɩɩda taaba. Woto me, biig fãa yaa toor ne a to. Dẽnd roagdbã segd n bao n bãnga b sẽn na n wub biig fãa to-to. Pag a ye ne a sɩd sẽn be Israyɛll togsa bũmb ning sẽn sõng-b tɩ b tõog n wub b kambã sõma, tɩ b tũud a Zeova. Yaa kamb a yiibu. B yeelame: “Ned fãa ra zãmsda Biiblã ne biig a ye.” Zak soab fãa segd n bao n bãnga sã n yaa tɩlɛ tɩ b zãms Biiblã ne b kambã yembr-yembre, la sã n tõeeme.
D bʋgs Wẽnnaam Gomdã zug neere
Maan-y sũ-noog ne y sẽn tõe n maan bũmb ning a Zeova tũudmã pʋgẽ wã
6 Saglg sẽn tõe n sõng roagdbã n be Yɩɩn-sõamyã 131:1, 2 pʋgẽ. (Karm-y.) Rĩm a Davɩɩd yeelame tɩ yẽ pa ‘baood bõn-kãsems sẽn yɩɩd-a,’ bɩ n maand bũmb sẽn yɩɩd a pãng ye. A sẽn da yaa sik-m-meng soabã yĩnga, a ra ‘gãnega a yam n zĩ sɩɩ.’ Yam-bʋg la roagdbã tõe n dɩk a Davɩɩd goamã pʋgẽ? Roagdb sã n dat n wilg tɩ b yaa sik-m-mens rãmba, b pa segd n baood n maan bũmb sẽn yɩɩd b meng pãnga, wall n dat tɩ b kambã me maan bũmb sẽn yɩɩd b pãng ye. Biig sã n wa yãk yam n na n maan bũmbu, a roagdbã tõe n sõng-a lame t’a bãng a sẽn tõe la a sẽn pa tõe, tɩ sõng-a t’a ra wa getẽ t’a ka võor ye. Ad saam-bi-poak a ye yʋʋr sẽn boond t’a Marina sẽn yeele: “M ma zɩ n dɩk maam n mak ne m kẽemã wall m yaopã, bɩ ne kamb a taab ye. A wilg-m lame tɩ biig fãa yaa toor ne a to, la tɩ ned kam fãa tara yõod a Zeova nifẽ. Woto kɩtame tɩ m pa wae n makd m meng ne m taabã ye.”
YƲƲM-VẼKR RASEM A 13-19
D SẼN BÃNG BIIBLÃ KARENG PƲGẼ YƖƖN-SÕAMYÃ 135–137
“Tõnd Zu-soabã yaa kãseng n yɩɩd wẽnnaam-dãmb a taabã fãa”
Kirist yaa Wẽnnaam pãnga
15 Tõog ning a Zezi sẽn tarã yaa a Zeova n kõ-a. Rẽnd d tõe n kɩsa sɩd tɩ Wẽnnaam Sẽn-tõe-a-fãa wã tõe n kɩtame tɩ koomã, sobgã la tẽngã bũmb a taabã tũ a raabã. Ad makr a wãn sẽn wilgd rẽ. Sẽn deng a Nowe wakatẽ sa-kãsengã, a Zeova yeela woto: “Keta rasem a yopoe tɩ mam kɩt tɩ saag ni dũniyã zug rasem pis-naas wĩntoog ne yʋngo.” (Sɩng. 7:4) Yikr 14:21 me yeelame tɩ “Zu-soabã kɩtame tɩ sob-kãseng yi yaang n pãrg koomã.” Sẽn paase, Zonas 1:4 yeelame: “Zu-soabã kɩtame tɩ sob-kẽeng yik koomã zug hal tɩ koglgã rat n sãame.” D sẽn mi t’a Zeova tõe n kɩtame tɩ koomã, sobgã la tẽngã bũmb a taabã tũ a raabã kengda d raoodo. Wilgdame tɩ dũni-paalgã pʋgẽ, sabab-wẽng pa na n tol n zĩnd ye.
Wãn to la a Zeova nonglem-kãsengã nafd yãmba?
16 A Zeova sã n yaa tõnd zĩ-soalgdga, d yam gãee bãane. La wakat ninga d tõe n komsa raoodo, n tagsdẽ t’a Zeova pa tõe n yɩ d zĩ-soalgdg ye. Sã n wa yaa woto, bõe la a Zeova na n maan n sõng tõndo? (Karm-y Yɩɩn-sõamyã 136:23.) A na n tẽega a nugu, n bels-d tɩ d le paam raoodo. (Yɩɩn. 28:9; 94:18) Wãn to la rẽ nafd tõndo? D miime tɩ d tõe n teega Wẽnnaam wakat fãa. Woto sõngda tõnd tɩ d bãng bũmb a yiib sẽn tar yõod wʋsgo. Pipi, yaa tɩ sẽn yaa zĩig ning fãa la d be, d tõe n paamame t’a kogl-do. Yiibu, yaa tɩ tõnd yell paka d saasẽ Ba wã sẽn nong-dã wʋsgo.
D bʋgs Wẽnnaam Gomdã zug neere
it-2 1175
A Zah
Naoor wʋsgo, b nong n pʋta a Zeova yʋʋrã bool-koɛɛgã sẽn yaa Zah wã pẽgr yɩɩl pʋsẽ, la pʋʋsg ne se-yõkr pʋsẽ. Sẽn paase, a Zeova sã n da sõng a nin-buiidã tɩ b tõog b bɛɛb wall a fãag-ba, pa rẽ bɩ n maan bũmb ne a pãn-kãsengã n sõng-ba, b ra mi n kɩdemda sũ-noogo, n pʋt a Zeova yʋʋrã sẽn yaa Zah wã. Woto buud bee Biiblã zĩis wʋsgo. Wala makre, gomd ning sẽn yaa “Pẽg-y-yã a Zah!” wã (“Aleluya!”) yaa gomd b sẽn yet n pẽgd a Zeova Yɩɩn-sõamyã sebrã pʋgẽ. B sẽn yeel rẽ pipi yaa Yɩɩn-sõamyã 104:35 wã pʋgẽ. Yɩɩl kẽer pʋsẽ, yaa sɩngrẽ wã bal la b pʋd Zah wã (Yɩɩn. 111, 112), a taab pʋsẽ yaa kar-kare (135:3), wakat ninga yaa baasgẽ wã la a be-yã (Yɩɩn. 104, 105, 115-117), la zĩis nins yʋʋrã sẽn be sɩngrẽ wã la baasgẽ wã n yɩɩda (Yɩɩn. 106, 113, 135, 146-150). Vẽnegr sebrã pʋgẽ, d yãta malɛgs sẽn pẽgd a Zeova, n togsd gom-kãng n yɩlemdẽ.—Vẽn. 19:1-6.
Biiblã zĩis a taabã “Zah” wã sẽn be wã yaa yɩɩl sẽn kilsd a Zeova yʋʋrã, la se-yõkr pʋsẽ. Wala makre, tõogr yɩɩll ning a Moyiiz sẽn yɩɩlã. (Yik. 15:1) A Ezayi goamã pʋgẽ, a pʋda Wẽnnaam yʋʋrã la a bool-koɛɛgã fãa, n yeel tɩ “Zah, a Zeova.” (Eza. 12:2; 26:4) A Ezekɩyaas sẽn wa n lʋɩ bãag n dat n ki tɩ Wẽnnaam maan yel-solemd t’a paam laafɩ wã, a pʋda yɩɩlle, n na n pʋʋs Wẽnnaam barka. A yɩɩllã pʋgẽ, a pʋda yʋʋr ning sẽn yaa Zah wã n yɩlme. (Eza. 38:9, 11) Biiblã gomda sẽn ki-bã sẽn pa tõe n le pẽg a Zah wã yelle, la neb sẽn yãk yam n na n pẽg a Zah b vɩɩmã pʋgẽ me yelle. (Yɩɩn. 115:17, 18; 118:17-19) Yɩɩn-gʋlsdb a taab me pʋʋsa a Zah barka, a sẽn fãag-bã, bɩ n kogl-b wall n rems-bã yĩnga.—Yɩɩn. 94:12; 118:5, 14.
YƲƲM-VẼKR RASEM 20-26
D SẼN BÃNG BIIBLÃ KARENG PƲGẼ YƖƖN-SÕAMYÃ 138–139
Ra bas-y tɩ rabeemã kɩt tɩ y pa kẽes y toog tigissã sasa ye
D pẽg a Zeova tigissã sasa
10 Y sã n wa rat n zẽk y nug n leok gomd tigissã sasa fãa, y sũurã kiuusda wʋsg bɩ? Sã n yaa rẽ bɩ y bãng tɩ y pa y yembr ye. Togs sɩdã, d fãa la bal sã n mi n dat n leoke, rabeem tar-d-la baa yaa bilfu. Yɩl n tõog rabeemã, yaa tɩlɛ tɩ y reng n bao n bãng bũmb ning sẽn wat ne-a wã. Y yɛɛsda y na n wa yĩm y sẽn dat n yeelã bɩ, bɩ y zoeta y na n wa leok tɩ pa zemse? Tõe tɩ y tagsdame tɩ y leoorã pa na n yɩ sõma wa neb a taabã rẽnd ye. La bãng-y tɩ rabeem a woto tõeeme n pa wẽng ye. Wilgdame tɩ y yaa sik-m-meng soaba, la tɩ y getame tɩ y taabã yɩɩda yãmba. A Zeova nonga sik-m-mens rãmbã. (Yɩɩn. 138:6; Fili. 2:3) La a ratame me tɩ tigissã sasa bɩ y naagd n leokdẽ, n pẽgd yẽ la y kengd y tẽed-n-taasã raoodo. (1 Tes. 5:11) A sẽn nong yãmbã, a na n kõ-y-la raood tɩ y tõog n maan woto.
D kengd taab raood tigissã sasa
7 Y tõe n lebg n gesa sagls kẽer b sẽn togs Gũusg Gasgã pʋgẽ tɩ tõe n sõng-yã. Wala makre, reng-y n segl-y tigsg fãa sõma. (Yel. 21:5) Tigsgã sasa, y sã n mi bũmb ning yell b sẽn gomdã sõma, na n yɩɩ nana tɩ y zẽk y nugã n leoke. Sẽn paase, leokd-y koɛɛg-koɛɛga. (Yel. 15:23; 17:27) Rẽ na n kɩtame tɩ y ra yɛɛsd wʋsg ye. Y sã n leok koɛɛg-koɛɛga, tõe n yɩɩ nana tɩ y tẽed-n-taasã wʋm bũmb ning y sẽn yeelã võor sõma, n yɩɩd y sẽn na n gom bũmb wʋsg yelle. Y sã n leok koɛɛg-koɛɛg ne y meng goama, wilgdame tɩ y segla y meng sõma, la tɩ y wʋmda bũmb ning yell b sẽn gomdã võor sõma.
D bʋgs Wẽnnaam Gomdã zug neere
it-2 490 s. a 9
Sugr kũuni
Sẽn paase, Biiblã yetame tɩ kiris-nebã segd n kõta sẽn beegd-bã sugri, baa b sã n beeg-b naoor wʋsgo. (Luk 17:3, 4; Efɛɛ. 4:32; Kolo. 3:13) Ned sã n pa kõt a taabã sugri, Wẽnnaam me pa na n kõ a soab sugr ye. (Mat. 6:14, 15) La baa b sã n yiis “nin-wẽngã” tigingã pʋgẽ a sẽn maan yel-wẽn-kãseng yĩnga, t’a wa sɩd tek yam n kos sugri, a tõe n paamame t’a Zeova kõ-a sugri. Wakat kãnga, tigingã neb fãa tõe n wilg-a lame tɩ b nong-a lame. (1 Kor. 5:13; 2 Kor. 2:6-11) La kiris-nebã pa segd n kõ neb nins sẽn maand yel-wẽnã ne yamleoog n pa rat n tek yam n kos sugrã sugr ye. Neb a woto lebga Wẽnnaam bɛɛba.—Ebre. 10:26-31; Yɩɩn. 139:21, 22.
YƲƲM-VẼKR RASEM 27–WAO-FUGDG RASEM A 2
D SẼN BÃNG BIIBLÃ KARENG PƲGẼ YƖƖN-SÕAMYÃ 140–143
Y sã n pʋʋs a Zeova n kos sõngr bɩ y tʋm tɩ zems ne y sẽn kosã
“Kelg yam dãmb goamã”
13 D get saglsã wa bũmb sẽn wilgd tɩ Wẽnnaam nong-d lame. A Zeova rata tõnd neere. (Yel. 4:20-22) A sã n wa tũnug ne a Gomdã wall siglgã sɛba, pa rẽ bɩ d saam-biig tẽeb sẽn bɩ n sagl-do, wilgdame t’a nong-d lame. Ebre-rãmb 12:9, 10 yetame tɩ Wẽnnaam maanda woto tõnd nafr yĩnga.
14 D ges saglgã n tɩ yɩɩda, la d da ges b sẽn sagl-d to-to wã ye. Wakat kẽere, d tõe n getame tɩ b sẽn sagl-d to-to wã pa yɩ sõma ye. Yaa vẽeneg tɩ d sã n na n wa sagl neda, d segd n maana d sẽn tõe tɩ saglgã reegr yɩ nana. (Gal. 6:1) La sã n wa yaa tõnd la b sagle, d segd n kelga saglgã neere, baa b sẽn sagl-d to-to wã pa noom-do. D tõe n soka d meng yaa: “Baa m sũur sã n pa noom ne b sẽn sagl-m to-to wã, b sẽn yeel-m bũmb ningã pa gõaag zug sɩda? Rẽ yĩnga, m pa tõe n zʋʋg a soabã pãn-komsmã la m dɩk yam a saglgã pʋgẽ sɩda?” D sã n modg n get saglg fãa sẽn tõe n naf-d to-to wã, yaa yam tʋʋmde.—Yel. 15:31.
w10 15/3 32 s. a 4
Kell-y n tall-y “sũur sẽn yaa yɩlemde,” wakat kãensã sẽn yaa toog wakatã
Namsg d tẽebã yĩngã, ligdã zu-loeesã, la bãasã mi n namsda neb wʋsg sẽn tũud a Zeova. Wakat ninga, rẽ mi n kɩtame tɩ b sũurã sãam wʋsgo. A buud paama rĩm a Davɩɩde. A yeelame yaa: “Mam komsa raoodo. Mam pa le tar pãng baa bilf ye.” (Yɩɩn. 143:4) Bõe n sõng a Davɩɩd t’a tõog n mao ne a zu-loɛɛgã? A Davɩɩd tẽega Wẽnnaam sẽn da sõng a nin-buiidã to-to wã, la a sẽn da fãag yẽ mengã to-to wã yelle. A bʋgsa a Zeova sẽn maan bũmb ning a yʋ-kãsengã yĩngã zugu. A Davɩɩd ra ket n tagsda Wẽnnaam tʋʋm-kãsemsã yelle. (Yɩɩn. 143:5) Woto me, d sã n ket n bʋgsd a Zeova sẽn zoe n maan bũmb nins n sõng tõnd la a sẽn ket n maandẽ wã zugu, na n sõng-d lame, baa d sã n wa maood ne zu-loe-kɛgemse.
w15 15/3 32 s. a 2
Kẽ kãadem ‘Zu-soabã pʋgẽ bal’ ket n tara yõod bɩ?
Wakat ninga, d tõe n tagsda wa yɩɩn-gʋlsd a Davɩɩd. A yeelame yaa: “Zeova, leok-y maam tao-tao. Mam pãngã taa a tɛka. Ra solg-y maam y nengã ye.” (Yɩɩn. 143:5-7, 10) Sã n wa yaa woto, bɩ y tall sũ-mar n gũ hal t’a Zeova wa wilg yãmb a raabã ne yãmb sẽn yaa a soaba. Sẽn na yɩl n maan woto, y tõe n yãka wakat n karemd Wẽnnaam Gomdã la y bʋgsd y sẽn karemdã zugu. Woto, y na n bãnga a noyã sõma, la a sẽn sõng a nin-buiidã to-to pĩnd wẽndẽ wã. Y sã n kelg-a, y na n tõog n basa y yam zãng-zãng tɩ Wẽnnaam sakrã n nafd n tɩ yɩɩda.
D bʋgs Wẽnnaam Gomdã zug neere
Wilg-y tɩ y sũur nooma y sẽn paam n tõe n pʋʋs a Zeova wã
2 Rĩm a Davɩɩd sũur da nooma ne a sẽn paam n tõe n pʋʋs a Zeova wã. A yɩɩll a ye pʋgẽ, a yeela a Zeova yaa: “Bɩ mam pʋʋsgã zẽk wa wisd n ta y nengẽ.” (Yɩɩn. 141:1, 2) A Davɩɩd wakatẽ wã, maan-kʋʋdbã ra maagda b yĩng n maand wisdã, tũudum hakɩɩkã yĩnga. (Yik. 30:34, 35) A Davɩɩd sẽn gom wisdã yellã, wilgdame t’a ra rat n maaga a yĩng n tags a sẽn na n yeel a saasẽ Ba wã bũmb ning a pʋʋsg pʋgẽ. Tõnd me rata ne d sũur fãa, tɩ d pʋʋsgã ta a Zeova yam.
WAO-FUGDG RASEM 3-9
D SẼN BÃNG BIIBLÃ KARENG PƲGẼ YƖƖN-SÕAMYÃ 144–146
“Sũ-noog rãmb la neb nins Wẽnnaam sẽn yaa a Zeova wã!”
Karemdbã sogsgo
2. B sẽn lebg-a to-to wã zemsa ne yɩɩn-sõamyã a taabã fãa goamã. B sẽn yeel tɩ “dẽ” vɛrse 12 sɩngrẽ wã wilgdame tɩ bark nins yell b sẽn gom vɛrse 12 n tãag 14 pʋgẽ wã yaa bark toor-toor nin-tɩrsã, rat n yeel tɩ neb nins sẽn kot a Zeova t’a fãag-b la a yiis-b nin-wẽnsã nusẽ wã (vɛrse 11). B sẽn maan woto wã zemsa ne vɛrse 15 wã sẽn yet bũmb ningã. B yeela be naoor a yiib fãa tɩ “sũ-noog rãmba.” Gom-bi-kãensa a yiibã fãa tũuda taaba, la lokd taab me. Woto kɩtame tɩ yaa vẽeneg tɩ b sẽn bool-b rãmb tɩ sũ-noog rãmbã pa neb sull toor-toor ye. Yaa “neb nins Wẽnnaam sẽn yaa a Zeova wã!” Tẽeg-y me tɩ Ebre buud-gomdã pa tar gʋlsg bãnd ye. Woto wã, yaa sẽn lebgdb sɛbã n segd n ges goamã sẽn wʋgd to-to Ebre buud-gomdã pʋgẽ wã, b sẽn gomd bũmb ning yellã, la b sẽn togs bũmb ning Biiblã zĩis a taabã, n bãng b sẽn na n lebg-a to-to tɩ zemse.
3. B sẽn lebg-a to-to wã zemsa ne Biiblã vɛrse a taab sẽn gomd Wẽnnaam sẽn pʋlem t’a na n ningã a nin-buiidã sẽn maand sɩd ne-a wã barkã. B sẽn lebg gom-bil ning sẽn yaa asɛɛrã to-to masã wã kɩtame tɩ zems ne a Davɩɩd yɩɩll ning sẽn wilgd t’a ra saagdame tɩ Wẽnnaam sã n fãag Israyɛll b bɛɛbã nugẽ, a na n ning-b-la bark tɩ b paam sũ-noog la paoong wʋsgã. (Maan. 26:9, 10; Tõo. 7:13; Yɩɩn. 128:1-6) Wala makre, Tõodo 28:4 yetame yaa: “Yãmb kambã na n paama barka. Y tẽngã bõn-koaadlã biisi, n paas y rũmsã kamba, y nag-bi wã la y pe-bi wã na n paama barka.” Sɩd me, a Davɩɩd biig a Salomo naamã sasa, nin-buiidã fãa ra vɩɩ ne bãan la b tar paoong wʋsgo, hal t’a buud ra zɩ n zĩnd ye. Bũmb nins sẽn zĩnd a Salomo naamã sasa wã ra wilgda yɛlã sẽn na n yɩ to-to Mesi wã naamã sasa.—1 Rĩm. 4:20, 21; Yɩɩn. 72:1-20.
Ket-y n saagd-y tɩ manegr n wate
16 D sẽn saagd n na n wa vɩɩmd wakat sẽn kõn sa wã yaa kũun-kãseng Wẽnnaam sẽn kõ-do. D gũuda beoog daar sẽn yaa sõma wʋsg ne d sũur fãa. D kɩsa sɩd tɩ na n yɩɩ woto. D sẽn saagd n na n wa vɩɩmd wakat sẽn kõn sa wã yaa wa baar sẽn sõngd tõnd tɩ d yalsd kãn-kãe la d tõogd toog zu-loees taoore, namsg taoore, la baa kũum taoore. A leb n yaa wa kut pugl sẽn kogend d tagsa wã, la sõngd tõnd tɩ d tõe n zãag d mens ne sẽn yaa wẽnga, la d maand sẽn yaa sõma. Biiblã sẽn yet bũmb ning beoog daarã wɛɛngẽ wã sõngda tõnd tɩ d bãngd a Zeova sõma n paasdẽ, la wilgd tõnd t’a nong-d-la wʋsgo. D sã n modg tɩ d sẽn saagd tɩ manegr n watã ket n tar pãnga, na n naf-d-la wʋsgo
17 beoog daarã.” (Rom. 12:12) A Poll ra tõe n kɩdma sũ-noogo, bala a ra kɩsa sɩd t’a sã n kell n maan sɩd ne a Zeova, a na n wa paam n vɩɩmda wakat sẽn kõn sa saasẽ. Tõnd me tõe n maana sũ-noog ne bũmb ning d sẽn saagd n na n wa paam beoog daarã, bala d kɩsa sɩd t’a Zeova na n pidsa a pʋlemsã. Yɩɩn gʋlsdã yeelame yaa: “Sũ-noog soab la ned ning . . . sẽn teeg a Wẽnnaam a Zeova wã. . . . Soab ning sẽn yaa sɩd soab wakat fãa wã.”—Yɩɩn. 146:5, 6. MN.
Nonglem bʋg buud n wat ne sũ-noog hakɩɩka?
19 Na maan yʋʋm tus a yoob la woto ãdem-biisã sẽn namsde, dũniyã sẽn be a Sʋɩtãan nugẽ wã yĩnga. La keta bilf tɩ dũni-kãnga sa. Rũndã-rũndã, neb wʋsg nonga b mens tɩ looge, n nong ligdã, la b nong sũ-noogã. B vɩɩ b mensã raab yĩnga. Sẽn pak-b yaa b sẽn na n paam yõod ningã. Neb a woto pa tol n tõe n paam sũ-noog hakɩɩk ye. Yɩɩn-gʋlsdã wilga sẽn tõe n paam-a bark bɩ sũ-noog hakɩɩkã. A yeelame: “Bark bee ned ning sẽn paamd t’a Zakoob Wẽnnaamã yaa a sõangdã zugu. Sẽn teeg-a Sẽn-Ka-Saab tɩ b yaa a Wẽnnaamã tara barka.”—Yɩɩn. 146:5.
20 A Zeova nin-buiidã sẽn nong-a to-to wã tara paasgo, tɩ b sõorã me paasd yʋʋmd fãa. Woto yaa kaset tɩ Wẽnnaam Rĩungã Rĩm rɩta naam, la tɩ ka la bilfu, a na n kɩtame tɩ wẽn-sakdbã paam bark sẽn pa tõe n bãng n bilgi. Yaa d sã n maand Wẽnnaam daabã, n miẽ tɩ noogda a sũur la d tõe n paam sũ-noog wakat fãa. Hakɩɩka, sẽn nong-b a Zeova wã na n paama sũ-noog wakat sẽn kõn sa. Sõsg ning sẽn pʋgdã pʋgẽ, d na n yãa zʋg-wẽns neb nins sẽn nong b mens tɩ loogã sẽn tare, la d ges zʋg-sõma nins sẽn tũud-b a Zeova wã sẽn bɩɩsdã.
D bʋgs Wẽnnaam Gomdã zug neere
Yɩ-y kõatb tɩ rẽ la y na n paam sũ-noogo
6 Koɛɛg-koɛɛga, a Zeova kõt-d-la bũmb nins sẽn yaa tɩlɛ ne-dã a sẽn nong-dã yĩnga. Tẽeg-y bũmb ning a Zeezi sẽn yeel tɩ be Matiye 6:25, 26. (Karm-y-yã.) A Zeezi goma bõn-naandsã yelle. Wala makre, a goma bõn-yɩgdɩ wã yell n yeel tɩ “bãmb pa bʋte, b pa kẽebde, la b pa tigsd bao pʋsẽ me” ye. La ges-y bũmb ning a sẽn paasã: “Yãmb Ba sẽn be saasẽ wã rɩlgd-b lame.” Rẽ poore a sokame yaa: “Yãmb yõod pa yɩɩd bõn-yɩgdɩ wã sɩda?” Bõe la a Zeezi rat tɩ d bãnge? A Zeova nifẽ neb nins sẽn tũud-a wã yõod yɩɩda bõn-yɩgdɩ wã la rũmsã hal zĩig sẽn zãre! A Zeova sã n geta bõn-yɩgdɩ wã la rũmsã yelle, d tõe n kɩsa sɩd t’a na n gesa tõnd yell n yɩɩda. A Zeova geta a zakã rãmb yell ne nonglem wa rao sẽn nong a zak rãmb sẽn get-b yell sõma to-to wã.—Yɩɩn. 145:16; Mat. 6:32.
WAO-FUGDG RASEM 10-16
D SẼN BÃNG BIIBLÃ KARENG PƲGẼ YƖƖN-SÕAMYÃ 147–150
D tara bʋʋm wʋsg n na n pẽg a Zah
Bõe yĩng tɩ d segd n pẽg a Zeova?
5 A Zeova belsa Israyɛll nin-buiidã gilli, n keng b raoodo. La b ned kam fãa yembr-yembr me paamame t’a bels-a. Rũndã-rũndã me, a Zeova sõngda a nin-buiidã woto. Yɩɩn-gʋlsdã ra yeelame tɩ Wẽnnaam “belsda sũ-sãang rãmbã, la b tɩpd b poglgã.” (Yɩɩn. 147:3) Rẽnd d tõe n kɩsa sɩd tɩ d sã n pa keeme, wall yaa d sũurã n sãame, a Zeova na n gesa d yell sõma. A rata ne a sũur fãa n bels tõnd la a sigs d sũyã. (Yɩɩn. 34:19; Eza. 57:15) A kõta tõnd yam la pãng sẽn na yɩl tɩ d tõog n mao ne zu-loɛɛg buuda fãa.—Zak 1:5.
6 Yɩɩn-gʋlsdã sẽn yeel t’a Zeova belsda sũ-sãang rãmbã poore, a yeelame: “Sẽn-Ka-Saab tara ãdsã sõore, la b mii ãdg fãa ne a yʋʋre.” (Yɩɩn. 147:4) D miime tɩ yɩɩn-gʋlsdã ra nee ãdsã, la a ra pa tõe n bãng b sõorã ye. Rũndã-rũndã, bãngdbã wilgame tɩ ãd-sulã b sẽn boond tɩ galagsi-rãmbã yaa milyaar ka tɛka, la tɩ ãd-sull ning b sẽn boond tɩ Voalakte wã ãdsã taa milyaar koabga. Ninsaal pa tõe n bãng ãdsã sõor gilli, la d Naandã mii b sõorã. A mii ãdg fãa sõma, hal n pʋd-b yʋya. Woto wilgdame t’a mii ãdg fãa n bake. (1 Kor. 15:41) Wẽnnaam sã n mi ãdg fãa, rẽnd a mii tõnd ned kam fãa me sõma. A mii ned fãa sẽn beẽ, a tagsgo, la a bõn-daabo.
Bõe yĩng tɩ d segd n pẽg a Zeova?
7 A Zeova pa wʋmd tõnd toogã bal ye. A tara tõog n na n sõng-do, la a ratame me n sɩd sõng-do. (Karm-y Yɩɩn-sõamyã 147:5.) Tõe tɩ y tagsdame tɩ y zu-loeesã yaa wʋsgo, la tɩ yɩɩda y pãnga. La Wẽnnaam mii tõnd pãngã tɛka. A tẽegdame tɩ “tõnd yaa tẽng tom.” (Yɩɩn. 103:14) Tõnd sẽn pa zems zãngã, d kongda wʋsgo, n mi n yɩlem d kongr kẽer menga, tɩ sãamd d sũuri. D gomda gomd ning n wa maand d bãngẽ, d mi n tara tʋls-wẽnse, wall d maan sũ-kiir ne d to bũmbu. A Zeova yẽ pa kongd ye. La a mii d kongr sẽn sãamd d sũur to-to wã, bala a yamã ka tɛk ye.—Eza. 40:28
Bõe yĩng tɩ d segd n pẽg a Zeova?
18 Yɩɩn-gʋlsdã ra miime tɩ buudã fãa sʋka, yaa Israyɛll buudã la a Zeova yãk tɩ b yaa a nin-buiidu. Yaa bãmb bal la Wẽnnaam vẽneg a “goamã” la a “noyã.” (Karm-y Yɩɩn-sõamyã 147:19, 20.) Rũndã-rũndã, tõnd me paamame n yaa a Zeova nin-buiidu, t’a boond tõnd t’a Kaset rãmba. Woto yaa zu-zẽkr tɛkẽ! D sũy yaa noog d sẽn paam n bãng Wẽnnaam, n paam me t’a wilgd-d sor ne a Gomdã maasem, tɩ rẽ fãa kɩt tɩ d paam n yaa a zo-rãmbã. Bʋʋm waoog sẽn kɩt tɩ y segd n dɩk Yɩɩn-sõamyã 147 gʋlsdã togs-n-taare, n pẽg a Zeova la y sagl y taabã tɩ bãmb me pẽg-a.
D bʋgs Wẽnnaam Gomdã zug neere
Naanegã wilgda Wẽnnaam ziiri!
22 Yɩɩl Sõamyã 148:10 gomda ‘we-rũms ne yir dũms fãa, bõn-vuudsi ne bõn-yɩgds’ yelle. Rũms wʋsg sẽn saagd tẽngã zug la bõn-yɩgdɩ wilgdame tɩ b tara tõod sẽn lingdi. Liuul buud a yembr b sẽn boond tɩ albatros de Laysan tõe n yɩk n zãaga zĩig wʋsgo, (vugri, a yembr n yɩk n maan kɩlometr 40 000 rasem 90 pʋgẽ bala). Liuul buud a to n yit Amerikdinoor n kẽng Amerikdisiidi, n maand sẽn yɩɩd lɛɛr 80 n pa yaas ye. Yʋgemd pa bĩngd koomã a kũndẽ wã wa neb wʋsg sẽn tagsdã ye, la ya a pʋ-roogẽ wã, tɩ rẽ kɩt t’a tõe n kaoos wʋsg n pa yũ koom tɩ koomã yaool n pa sa a yĩngẽ wã ye. Rẽnd pa lingri, te-maandbã sẽn maagd b yĩng n ges rũmsã, b sã n wa rat n maan masĩn dãmb la te-paalã ye. Gʋlsd a Gail Cleere yeelame: “F sã n dat n maan bũmb sẽn marsd sõma . . . t’a ra sãam zĩigã, sẽn são n yɩɩd yaa f sẽn na n ges bõn-naandsã sʋk n dɩk makre.”
WAO-FUGDG RASEM 17-23
D SẼN BÃNG BIIBLÃ KARENG PƲGẼ YEL-BŨNÃ 1
Kom-bɩɩse, ãnda la yãmb na n kelge?
Ra sak-y tɩ baa fʋɩ kɩt tɩ y kong keoorã ye
16 La yãmb sã n yaa bi-bɩɩga, n tagsdẽ tɩ y roagdbã pa wʋmd yãmb yɛlã võore, wall y getẽ tɩ b yaa dem-dem wʋsgo, y maanda wãna? Tõe tɩ sãamda y sũur wʋsgo, hal tɩ y sokd y meng a Zeova tũudmã sã n tõe n kõ-y-la sũ-noogo. La y sã n bas tɩ sũ-sãangã kɩt tɩ y bas a Zeova tũubu, pa na n yã n kaoos la y bãng tɩ ned pa be n nong yãmb la a rat y neere, n ta y roagdbã la y tẽed-n-taasã ye.
17 Rẽ yĩnga, y roagdbã sã n pa mi n kibl-yã, y kõn sok y meng b sã n sɩd nonga yãmb la b rat y neer sɩda? (Ebre. 12:8) La tõe tɩ yaa b sẽn kibind yãmb to-to wã n sãamd y sũuri. Ra n ges-y b sẽn kibind-y to-to wã ye. Sak-y n deeg-y tɩ b sẽn maandã tara võore. B sã n wa gomd yãmba, maan-y y sẽn tõe fãa tɩ y sũur da yik ye. Ad Biiblã sẽn yeele: “Ned sẽn tõe a noor tara yam. Ned sẽn tõe a meng tara bãngre.” (Yel. 17:27) Yãk-y yam n na n mao n yɩ ned sẽn bɩ, ned sẽn maagd a yĩng n kelgd saglse, la sẽn maood n dɩkd yam saglg fãa pʋgẽ, n pa get b sẽn kõ saglgã to-to wã ye. (Yel. 1:8) Ra yĩm-y tɩ y sẽn paam tɩ y roagdbã nong a Zeova n tũud-a wã yaa bark tɛkẽ ye! B rata ne b sũur fãa n sõng-y tɩ y wa paam keoorã.
D kell n yɩ kiris-neb hakɩka
11 Bao-y n ta Wẽnnaam yam, pa ninsaal yam ye. Zemsame me tɩ d bao n tɩ naag neb sull n wilg d sẽn yaa a soabã. Ned fãa rata zo-rãmba, la b sã n sak-fo, kõt-f-la sũ-noog la bas-m-yam. Bi-bɩɩlmã wakat la a poor me, d reem-n-taasã yel-manesem tõe n talla pãng wʋsg d vɩɩmã zugu, tɩ rẽ tõe n kɩt tɩ d rat n dɩk b togs-n-taar bɩ n ta b yam. La pa wakat fãa la d zo-rãmbã la d reem-n-taasã sɩd rat tõnd neer ye. Wakat ninga b rata neb bal sẽn na n naag-b n maan wẽnga. (Yelbũna 1:11-19) Kiris-ned sã n wa bas tɩ neb a taab tus-a n kẽes wẽng pʋgẽ, naoor wʋsgo a pa rat tɩ nebã bãng t’a yaa kiris-ned ye. (Yɩɩl Sõamyã 26:4) Tʋm-tʋmd a Poll keooga woto: “Bɩ y ra yɩ wa dũniyã rãmb ye.” (Rom dãmba 12:2) A Zeova kõta tõnd tẽeb pãng ning d sẽn datã sẽn na yɩl n zãgs dũniyã neb sẽn dat tɩ d maan wa bãmba wã.—Hebre dãmba 13:6.
12 Dũniyã rãmb sã n dat n kɩt tɩ d ra wilg tɩ d yaa kiris-neb hakɩka, yaa sõma tɩ d tẽeg tɩ tõnd burkĩndã Wẽnnaam taoorã tara yõod wʋsg n yɩɩd zãma wã tagsg bɩ b manesem zĩig sẽn zãre. Yikri 23:2 goamã yaa sor-wilgr sẽn yaa sõma: “Da lagem neb n maan wẽnga b sẽn yaa wʋsga yĩng ye.” Israɛll neb wʋsg sẽn da pa tẽ t’a Zeova na n tõog n pidsa a kãabsã sasa, a Kalɛɛb zãgsa ne raood t’a kõn maan wa zãma wã ye. A ra kɩsa sɩd tɩ Wẽnnaam kãabsã na n pidsame, la a paama keoob wʋsg a sẽn tall yam-yãkr kãngã wã yĩnga. (Sõdbo 13:30; Zozue 14:6-11) Yãmb me sakame n na n zãgs zãma wã sẽn pẽdgd-y tɩ y maan wẽngã, sẽn na yɩl n kogl zems-n-taarã y sẽn tar ne Wẽnnaamã bɩ?
D bʋgs Wẽnnaam Gomdã zug neere
Yam hakɩɩkã kelemdame
7 “Zɩtba” yaa neb nins sẽn tẽed bũmb nins fãa b sẽn wʋme, la neb b sẽn tõe n belg nana-nana. (Yel. 14:15) D mi n sega nin-kãensã buud koɛɛgã mooneg sasa. Wala makre, tũudmã taoor dãmb la politikã taoor dãmb belgda neb milyõ-rãmba. Neb kẽer sũy sãamame, b sẽn wa n bãng tɩ nin-kãensã belg-b lame wã. La neb nins yell b sẽn gomd Yel-bũn 1:22 pʋgẽ wã yãka yam n na n pa zɩɩlmã pʋgẽ, rẽ sẽn noom-bã yĩnga. (Zer. 5:31) B maanda b sẽn date, n pa baood n bãng Biiblã sẽn yet bũmb ningã, la b tũ a noyã ye. Neb wʋsg manesem yaa wa pag a ye sẽn yet t’a yaa wẽn-tũud n be Kebɛk sẽn be Kanada wã. Daar a ye, a Zeova Kaset soab n wa n kaag-a t’a yeel-a yaa: “Tõnd prɛtrã sã n belg tõndo, taalã bee yẽ zugu, la pa tõnd zug ye!” Yaa vẽeneg tɩ d pa rat n dɩk neb nins sẽn yãk yam n na n pa zɩɩlem pʋgẽ wã togs-n-taar ye!—Yel. 1:32; 27:12.
WAO-FUGDG RASEM 24–TƲƲLG RASEM A 2
D SẼN BÃNG BIIBLÃ KARENG PƲGẼ YEL-BŨNÃ 2
Bõe yĩng tɩ y segd n tʋll n zãmsd Biiblã?
“Ket-y n kẽnd-y sɩdã pʋgẽ”
16 Pa nebã fãa n nong sebr kareng la a zãmsg ye. A Zeova yet-d lame tɩ d kell n ‘maag d yĩng n bao n wʋm’ Biiblã goamã võor sõma n paase. (Karm-y Yel-bũn 2:4-6.) D sã n modgd n maand woto, na n naf-d-la wakat fãa. Saam-biig a ye yʋʋr sẽn boond t’a Koore yeelame t’a sã n wa karemd Biiblã, a yalsd n tagsa vɛrse fãa zugu. Ad a sẽn yeele: “M karemda vɛrse fãa tẽngr not-rãmba, vɛrse-rãmb a taab sẽn tõe n sõng tɩ b wʋm vɛrse wã võor sõma, la m maan vaeesg a taab n paase. . . . Woto sõngda maam tɩ m paam n bãng bũmb wʋsgo.” Yaa woto la d maand n zãmsd Biiblã tɩ pa woto me, d sã n baood sẽk n modgd n zãmsd Biiblã, d wilgdame tɩ d sũur nooma ne d sẽn bãng sɩdã.—Yɩɩn. 1:1-3.
Yam hakɩɩkã kelemdame
3 Ned sẽn tar yam tũnugda ne bãngr ning a sẽn tarã n tʋmd tʋʋm-sõma. La yam hakɩɩkã baoodame tɩ d maan sẽn yɩɩd rẽ. Biiblã yetame: “A Zeova zoees n yaa yam sɩngre. F sã n bãng Sẽn yaa-a sõng n yɩɩdã, rẽ n yaa bãngre.” (Yel. 9:10, MN) D sã n wa segd n yãk yam n maan bũmb sẽn tar yõod wʋsgo, d segd n bao n bãnga a Zeova tagsgo. D maanda woto, d sã n bao n bãng Biiblã la d sɛbã sẽn yet bũmb ning d yam-yakrã wɛɛngẽ wã. D sã n maan woto, wilgdame tɩ d tara yam hakɩɩka.—Yel. 2:5-7.
4 Yaa a Zeova a ye bal n tõe n kõ-d yam hakɩɩka. (Rom. 16:27) Bõe yĩng tɩ d tõe n yeel tɩ yam hakɩɩkã yita a Zeova nengẽ? Pipi, a sẽn yaa bũmb fãa Naandã, a mii a bõn-naandsã fãa sõma. (Yɩɩn. 104:24) Yiibu, bũmb nins fãa a Zeova sẽn naanã wilgda a yamã. (Rom. 11:33) Tãabo, a Zeova saglsã nafda neb nins sẽn tũud-bã wakat fãa. (Yel. 2:10-12) D sã n dat n paam yam hakɩɩka, d segd n saka bõn-kãensã a tãabã la d tũ rẽ, d sã n wa rat n yãk yam n maan bũmbu.
Kom-bɩɩse, paas-y y tẽebã pãnga
2 Neb wʋsg pa tẽed tɩ yaa Wẽnnaam n naan ninsaal ye. B tẽedame tɩ bũmb fãa wa n bee woto bala. B boonda rẽ tɩ evolisĩo. Fo sã n yaa bi-bɩɩg n tũud a Zeova, wall f nan zãmsda Biiblã, tõe tɩ f mi n soka f meng yaa: ‘Wãn to la m tõe n sõng ned t’a bãng tɩ yaa a Zeova n naan bũmba fãa?’ Biiblã sagenda tõnd tɩ d bʋgs bũmb nins d sẽn wʋmdã zug neere. A yetame: “Tagsgã na n kogla foom.” F sã n tagsd neere, wãn to la kogend-fo? Na n sõng-f lame tɩ f kɩs sɩd t’a Zeova beeme, la f ra tẽ goam sẽn yaa ziri ye.—Karm-y Yel-bũn 2:10-12.
3 Yɩl n kɩs a Zeova sɩda, rẽnda d bãng-a sõma. (1 Tɩm. 2:4) Woto yĩnga, f sã n karemd Biiblã la siglgã sɛbã, yɩta sõma tɩ f mi n yals n bʋgse. Modg n wʋm goamã võore. (Mat. 13:23) Rẽ, f na n yãa kaset wʋsg sẽn wilgd tɩ yaa a Zeova n naan bũmb fãa, la tɩ Biiblã yaa yẽ Gomde.—Ebre. 11:1.
D bʋgs Wẽnnaam Gomdã zug neere
Ket-y n kẽnd-y sɩdã pʋgẽ
16 Pa nebã fãa n nong sebr kareng la a zãmsg ye. A Zeova yet-d lame tɩ d kell n ‘maag d yĩng n bao n wʋm’ Biiblã goamã võor sõma n paase. (Karm-y Yel-bũn 2:4-6.) D sã n modgd n maand woto, na n naf-d-la wakat fãa. Saam-biig a ye yʋʋr sẽn boond t’a Koore yeelame t’a sã n wa karemd Biiblã, a yalsd n tagsa vɛrse fãa zugu. Ad a sẽn yeele: “M karemda vɛrse fãa tẽngr not-rãmba, vɛrse-rãmb a taab sẽn tõe n sõng tɩ b wʋm vɛrse wã võor sõma, la m maan vaeesg a taab n paase. . . . Woto sõngda maam tɩ m paam n bãng bũmb wʋsgo.” Yaa woto la d maand n zãmsd Biiblã tɩ pa woto me, d sã n baood sẽk n modgd n zãmsd Biiblã, d wilgdame tɩ d sũur nooma ne d sẽn bãng sɩdã.—Yɩɩn. 1:1-3.