Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • w22 Sigr kiuugu s.n. 14-19
  • A Zeova sẽn nong-dã sõng-d lame tɩ d tõogd d rabeemã

Video pa be zĩ-kãngã ye.

Video wã pa tõog n yi ye.

  • A Zeova sẽn nong-dã sõng-d lame tɩ d tõogd d rabeemã
  • Gũusg Gasgã moonda a Zeova Rĩungã (Zãmsgã rẽnda)—2022
  • Gom-zu-bõonesã
  • Bũmb sẽn wõnd woto
  • D SÃ N YƐƐSDA D PA NA N TÕOG N GES D ZAKÃ RÃMB YELLE
  • NINSAAL ZOEESE
  • KŨUMÃ RABEEM
  • D TÕOGDA D RABEEMÃ
  • Toeem-y y sũurã sẽn na yɩl n zoe a Zeova
    Gũusg Gasgã moonda a Zeova Rĩungã​—⁠2001
  • Zoe-y a Zeova la y tũ a noyã
    Gũusg Gasgã moonda a Zeova Rĩungã​—⁠2001
  • Tall-y yam, zoe-y Wẽnnaam!
    Gũusg Gasgã moonda a Zeova Rĩungã​—⁠2006
  • Bõe la y tõe n maan n lebg Wẽnnaam zoa?
    Bõe la d tõe n bãng Biiblã pʋgẽ?
Gũusg Gasgã moonda a Zeova Rĩungã (Zãmsgã rẽnda)—2022
w22 Sigr kiuugu s.n. 14-19

ZÃMSGÃ YĨNGA 26

A Zeova sẽn nong-dã sõng-d lame tɩ d tõogd d rabeemã

“Sẽn-Ka-Saab bee ne maam, dẽ, dabeem ka tar maam ye.”—YƖƖN. 118:6.

YƖƖLL 105 “Wẽnnaam yaa nonglem”

D SẼN NA N YÃ WÃa

1. Bõe n kẽesd neb wʋsg rabeem?

D GOM a Zeova Kaset rãmb kẽer yelle. B sega zu-loees sẽn kẽes-b rabeem. Wala makre, a Nɛstoor ne a pag a Mariya ra rat n tɩ moona koɛɛgã zĩig koe-moondbã raab sẽn yaẽ kãsenga.b Sẽn na yɩl n tõog n maan rẽ, b ra segd n basa teed kẽer raabo. La b ra yɛɛsdame tɩ b sã n maan woto, b sũ-noogã na n boogame. A Biniyam me sẽn wa n lebg a Zeova Kaset soabã, rẽ tɩ b gɩdga a Zeova Kaset rãmbã tũudmã a tẽngẽ wã. A bãngame tɩ b tõe n wa namsa yẽ me a tũudmã yĩnga. Woto kɩtame t’a ra yɛɛsdẽ. La a sẽn da yɛɛsd n tɩ yɩɩd yaa a zakã rãmb manesem sẽn na n yɩ to-to ne-a, b sã n bãng t’a lebga a Zeova Kaset soaba. D gom a Valeeri me yelle. Daar a ye, logtoɛɛmbã yeel-a lame t’a bẽeda kãnsɛɛr buud sẽn yaa kɛgeng wʋsgo. La a modgame sẽn na yɩl n paam logtor sẽn na n wopeer-a n pa ning-a zɩɩm, wa Biiblã sẽn wilgdã. A Valeeri ra yɛɛsda a na n wa maan kaalem, la a ra bee bʋʋm.

2. Bõe yĩng tɩ d segd n modg n tõog d rabeemã?

2 Rabeem a woto buud zoe n yõka yãmb bɩ? Zoe n yõka tõnd sʋkã neb wʋsgo. D sã n pa modg n tõog d rabeemã, tõe n wa kɩtame tɩ d yãk yam n maan bũmb sẽn na n sãam d zoodã ne a Zeova wã. Yaa woto la a Sʋɩtãan rata. A modgdame me n na n tũnug ne d rabeemã n kɩt tɩ d kɩɩs a Zeova noyã. Wala makre, a sẽn kõ noor tɩ d moon koe-noogã. (Vẽn. 12:17) A Sʋɩtãan yaa wẽnem soaba, n tar pãng wʋsgo, la a pa zoet ned nimbãaneg me ye. La d tõe n kogla d meng ne a Sʋɩtãana. Wãn to?

3. Bõe n na n sõng-d tɩ d tõog d rabeemã?

3 D sã n kɩs sɩd t’a Zeova nong-d lame la t’a bee ne-do, a Sʋɩtãan pa na n tõog n kẽes d rabeem ye. (Yɩɩn. 118:6) Wala makre, sẽn gʋls-a Yɩɩll 118 soabã sega zu-loees sẽn kɩt tɩ ra pa nana ne-a baa bilfu. A bɛɛbã ra yaa wʋsgo, tɩ b sʋkã kẽer da yaa nin-kãsemse. (Vɛrse a 9, 10) Wakat kẽere, ra yaa toog wʋsg ne-a. (Vɛrse 13) Sẽn paase, a Zeova ra kibl-a-la sõma. (Vɛrse 18) Baa ne rẽ, a yeelame: “Dabeem pa tar maam ye.” Bõe n kɩt t’a ra bas a yam? A ra miime tɩ baa ne a saasẽ Ba a Zeova sẽn kibl-a wã, a Zeova nong-a-la hal wʋsgo. Yɩɩn-gʋlsdã ra kɩsa sɩd tɩ sẽn wa n yaa yell ning fãa n paam-a, a Wẽnnaamã sẽn nong-a wã na n sõng-a-la wakat fãa.—Yɩɩn. 118:29.

4. D sã n kɩs sɩd tɩ Wẽnnaam nong-d lame, rabeem-bʋs buud la na n sõng-d tɩ d tõoge?

4 D segd n kɩsa sɩd t’a Zeova nonga tõnd ned kam fãa. Woto na n sõng-d lame tɩ d tõog d rabeemã. D na n goma bãmb b tãab yelle: 1) D sã n yɛɛsda d pa na n tõog n ges d zakã rãmb yelle, 2) ninsaal zoeese, 3) kũumã rabeem. Neb nins yell d sẽn gom sõsgã sɩngrẽ wã tõoga b rabeemã, b sẽn da kɩs sɩd tɩ Wẽnnaam nong-b lame wã yĩnga.

D SÃ N YƐƐSDA D PA NA N TÕOG N GES D ZAKÃ RÃMB YELLE

Saam-biig ne a bi-ribl sẽn yas raad b sẽn ka koom zug n yõgd zĩm.

Saam-biig ne a bi-ribl sẽn yẽed zĩm, sẽn na yɩl n ges b zakã rãmb yelle. (Ges-y sull a 5)

5. Y sã n yaa zak soaba, bõe n tõe n wa kɩt tɩ y maand yɩɩre? (Ges-y sebrã pipi neng fotã.)

5 Kiris-ned sẽn yaa zak soab pa reemd ne a zakã rãmb yell gesg ye. (1 Tɩm. 5:8) Y sã n yaa zak soaba, tõe tɩ koronaviriisã bã-longdgã sasa y ra maanda yɩɩre, y tʋʋmã sẽn tõe n sãam yĩnga. Tõe tɩ yɩl n paamd rɩɩb n kõt y zakã rãmba, la y paamd n yaood y roogã ligd ra yaa yɩɩr ne-yã. Tõe me tɩ y ra yɛɛsdame tɩ y tʋʋmdã sã n sãame, y pa na n le paam tʋʋmd a to ye. Wala a Mariya ne a Nɛstoor yell d sẽn gom sõsgã sɩngrẽ wã, tõe me tɩ y tagsdame tɩ yɩl n boog y teed kẽer raab yaa toogo. A Sʋɩtãan tõog n kɩtame tɩ neb wʋsg bas a Zeova tũubu, b sẽn da zoet rabeem woto wã yĩnga.

6. Bõe la a Sʋɩtãan modgd n dat tɩ d tẽ?

6 A Sʋɩtãan ratame tɩ d tẽ t’a Zeova pa nong-do, la t’a pa na n sõng-d tɩ d tõog n ges d zakã rãmb yell ye. Woto yĩnga, d tõe n wa tagsdame tɩ d segd n maana d sẽn tõe fãa, sẽn na yɩl tɩ d tʋʋmã ra sãame, baa d na kɩɩs Biiblã saglsã.

7. Bõe la a Zeezi yeel-yã, tɩ kɩt tɩ d tõe n bas d yam?

7 A Zeezi sẽn mi a Ba wã sõma n yɩɩd ned buud fãa wã yeelame tɩ d bas d yam tɩ Wẽnnaam mii ‘bũmb nins d sẽn datã,’ nand meng tɩ d kos-a. (Mat. 6:8) A Zeezi leb n miime t’a Zeova na n sak n kõ-d-la bũmb nins d sẽn datã. D sẽn yaa kiris-nebã, d naaga a Zeova zakã rãmba. D tõe n basa d yam t’a Zeova sẽn yaa d zakã soabã yĩnga, a na n tũu goam nins sẽn be 1 Tɩmote 5:8 pʋgẽ wã.

Saam-bi-poak ne a bi-pugl sẽn pɛgd futu. Pag ne a sɩd sẽn wat ne rɩɩb n na n kõ-ba.

A Zeova na n kell n gesame tɩ d paam bũmb nins sẽn yaa tɩlɛ ne-dã. A tõe n tũnuga ne d saam-biisã n sõng-do (Ges-y sull a 8))d

8. a) D sã n yɛɛsda d pa na n tõog n ges d zakã rãmb yelle, bõe n tõe n sõng-d tɩ d tõog d rabeemã? (Matiye 6:31-33) b) Wa fotã sẽn wilgdã, wãn to la d tõe n dɩk raoã ne a pagã sẽn tɩ kõ saam-bi-poakã rɩɩbã togs-n-taare?

8 D sã n kɩs sɩd t’a Zeova nonga tõnd ne d zakã rãmba, d na n basa d yam t’a na n gesame tɩ d paam bũmb nins d sẽn datã. (Karm-y Matiye 6:31-33.) A Zeova ratame n sõng-d tɩ d paam d sẽn datã. A sɩd yaa Ba sẽn yaa nonglem la kõata. A sẽn wa n naan tẽngã, a kõ-d lame tɩ yɩɩg sẽn yaa tɩlɛ ne-dã. A sẽn nong-dã yĩnga, a naana bũmb toor-toor tẽngã zugu, sẽn na yɩl tɩ d paam sũ-noog wʋsgo. (Sɩng. 2:9) Wakat ninga, baa sã n yaa sẽn yaa tɩlɛ ne-dã bal la d tara, d segd n tẽegame tɩ d sẽn tar rẽ wã yaa a Zeova n kõ-do. (Mat. 6:11) D segd n tẽegda wakat fãa tɩ d sẽn mongd d mens bũmb nins rũndã-rũndã wã pa kolg bark nins a Zeova sẽn na n wa kɩt tɩ d paam ka la bilfã ye. Yaa woto la a Nɛstoor ne a Mariya wa n bãnge.—Eza. 65:21, 22.

9. Yam-bʋg la y tõe n dɩk a Nɛstoor ne a pag a Mariya kibarã pʋgẽ?

9 A Nɛstoor ne a pag a Mariya ra tara zag-neere, la tʋʋmd sẽn yaood sõma Kolõmbi tẽngẽ wã. B yeelame: “D ra tagsdame tɩ d segd n booga d teed kẽere, la d modg n tʋm tʋʋm wʋsg a Zeova tũudmã pʋgẽ n paase. La d da yɛɛsdame tɩ d ligdã sã n booge, d pa na n le tar sũ-noog ye.” Bõe n sõng-b tɩ b tõog b rabeemã? B tagsa bũmb toor-toorã a Zeova sẽn maan n wilg t’a nong-b lame wã yelle. B sẽn da kɩs sɩd t’a Zeova na n gesa b yell wakat fãa wã yĩnga, b basa b tʋʋmdã sẽn da yaood sõma wã. B koosa b zakã, la b yik n kẽng tẽngã zĩig koe-moondbã raab sẽn yaẽ kãsenga. B tagsg yɩɩ wãn ne b yam-yãkrã? Ad a Nɛstoor sẽn yeele: “D bãngame tɩ Matiye 6:33 sẽn yetã yaa sɩda. Bũmb zɩ n paoog-d ye. D sũ-noogã pʋd n paasame.”

NINSAAL ZOEESE

10. Bõe yĩng tɩ ninsaalbã sẽn zoet taabã pa lingri?

10 A Ãdem ne a Awa sẽn kɩɩs a Zeova wã tɛka, ninsaalbã maanda taab pãnga. (Koɛ. 8:9) Wala makre, nebã tũnugda ne b naamã n namsd b taabã. Nin-wẽnsã tʋmda nen-kɛglem tʋʋma, lekoll-dãmbẽ wã, karen-biis kẽer tʋʋda b karen-bi-taase, la b bugsd-ba. Neb kẽer pʋd n namsda b zakã rãmb ne wẽnem. Dẽnd ãdem-biisã sẽn zoet taabã pa lingr ye. Wãn to la a Sʋɩtãan tũnugd ne ninsaal zoeesã n na n paam-do?

11-12. Wãn to la a Sʋɩtãan tũnugd ne ninsaal zoeesã n na n paam-do?

11 A Sʋɩtãan tũnugda ne ninsaal zoeesã n na n kɩt tɩ d bas koɛɛgã moonego, bɩ n pa maand bũmb kẽer a Zeova sẽn dat tɩ d maan ye. A kɩtame tɩ goosneemã kẽer gɩdg d tʋʋmdã, la b namsd tõnd d tũudmã yĩnga. (Luk 21:12; Vẽn. 2:10) A Sʋɩtãan dũniyã pʋgẽ, neb wʋsg yelgda kibay sẽn pa sɩd a Zeova Kaset rãmbã zugu, la sẽn sãamd b yʋʋre. Neb nins sẽn tẽed kiba-kãensã wã tõe n yaand-d lame, wall n namsd tõnd vẽeneg-vẽenega. (Mat. 10:36) A Sʋɩtãan sɩlmã linga tõnd bɩ? A bada. Bala a sɩng n maanda woto hal pipi kiris-nebã wakatẽ.—Tʋʋ. 5:27, 28, 40.

Saam-biig sẽn yaa bi-bɩɩg sẽn maneg a meng sõma n dabd tigisga, t’a roagdbã yas b rig-noorẽ wã n tʋʋd-a.

Baa d zakã rãmb sã n namsd tõnd d tũudmã yĩnga, d tõe n kell n basa d yam t’a Zeova nong-d lame (Ges-y sull 12-14)e

12 A Sʋɩtãan tõe n kɩtame tɩ d yɛɛsd goosneema-rãmbã sẽn na n gɩdg d tũudmã, la pa tek rẽ bal ye. Neb kẽer yɛɛsda b zakã neb manesem sẽn na n yɩ to-to ne-ba, b sã n lebg a Zeova Kaset soaba, n yɩɩd neb sẽn na n pãb-ba, b tũudmã yĩnga. B nonga b zakã neb hal wʋsgo, n dat tɩ b wa bãng a Zeova la b nong-a. B sã n wʋm b zakã ned sẽn gomd n paoogd Wẽnnaam sɩd-sɩdã la neb nins sẽn tũud-a wã, sãamda b sũur hal wʋsgo. La wakat kẽere, neb sẽn da namsd b zakã ned sẽn yaa a Zeova Kaset soab wa n saka sɩdã. La d zakã neb sã n daag-d n base, d sẽn lebg a Zeova Kaset soabã yĩnga, d manesem na n yɩɩ wãna?

13. D sã n kɩs sɩd tɩ Wẽnnaam nong-d lame, wãn to la tõe n sõng-do, d zakã neb sã n wa raag-d n base? (Yɩɩn-sõamyã 27:10)

13 Goam nins sẽn be Yɩɩn-sõamyã 27:10 pʋgẽ wã tõe n kenga d raoodo. (Karm-y.) D sã n tẽeg a Zeova sẽn nong tõnd wʋsg to-to wã yelle, d yam gãee bãane, baa d zakã neb sã n namsd tõnd d tũudmã yĩnga. La d tõe n basa d yam t’a Zeova na n keo-d lame, d sẽn tõog toogã yĩnga. A na n kõ-d-la bũmb nins fãa sẽn yaa tɩlɛ ne d vɩɩmã, bũmb nins fãa sẽn na n sõng-d tɩ d tall sũur pʋgẽ bãane, la sõng-d tɩ d kell n tall zood sõma ne-a wã. Ned kae n tõe n maan woto n ta a Zeova ye. Yaa woto la a Biniyam yell d sẽn gom sõsgã sɩngrẽ wã wa n bãnge.

14. A Biniyam kibarã sõnga yãmb tɩ y bãng bõe?

14 A Biniyam lebga a Zeova Kaset soaba, baa ne a sẽn da mi t’a na n paama nams-toaag a tũudmã yĩngã. A sẽn da mi t’a Zeova nong-a lame wã sõng-a lame t’a tõog ninsaal zoeesã. A yeelame: “Namsgã yɩɩ toog n yɩɩd m sẽn da tẽedã. M zakã rãmb sẽn da na n nams maam m tũudmã yĩngã la m da yɛɛsd n yɩɩd goosneemã wã sẽn da na n nams maam. M da yɛɛsdame tɩ m sẽn yãk yam n na n lebg a Zeova Kaset soabã na n sãama m ba wã sẽn pa tũud a Zeova wã sũuri, la kɩt tɩ m zakã rãmb sãbsd-ma.” La a Biniyam ra kɩsa sɩd t’a Zeova na n kell n gesa a nin-nongdsã yell wakat fãa. Ad a sẽn paase: “M lebg n tagsa a Zeova sẽn maan n sõng neb sẽn da namsd ligd zu-loees la bu-welsg yĩnga, la neb sẽn da paamd namsg b tũudmã yĩnga. M bãngame tɩ m sã n kell n teeg a Zeova, a na n ning-m-la barka. B wa n yõka maam naoor wʋsgo, hal n nams-ma. La sasa kãens fãa, m yãame t’a Zeova sõngda neb nins sẽn teeg-a wã, tɩ zemsd a wakate.” A Zeova sɩd lebga a Biniyam Ba sɩd-sɩda. A Zeova nin-buiidã me wilga a Biniyam tɩ b sɩd yaa a saam-biisi.

KŨUMÃ RABEEM

15. Bõe yĩng tɩ kũumã rabeem pa wẽng wakat fãa?

15 Biiblã wilgdame tɩ kũumã yaa d bɛ. (1 Kor. 15:25, 26) D sã n tags kũumã yelle, d tõe n maanda yɩɩre, sẽn yɩɩd fãa tõnd mengã bɩ d nin-nongr sã n bẽeda bã-kɛgenga. Bõe yĩng tɩ d zoet kũumã? Bala a Zeova naan-d lame tɩ d tʋll n vɩɩmd wakat sẽn kõn sa. (Koɛ. 3:11) La kũumã rabeem tõe n sõng-d lame tɩ d maan bũmb toor-toor n na n kogl d menga. Wala makre, tõe n sõng-d lame tɩ d yãk yam n dɩt rɩ-sõma, la d maand yĩn-wɩsgre, tɩ d sã n wa ka laafɩ bɩ d bao tɩɩm, wall n kẽng logto-yiri, la d da ning d vɩɩmã yell pʋgẽ zaalem yĩng ye.

16. Wãn to la a Sʋɩtãan tũnugd ne d sẽn zoet kũumã, n dat tɩ d kɩɩs a Zeova?

16 A Sʋɩtãan miime tɩ d nonga d vɩɩmã. A yeelame tɩ d na n sak n bõna bũmb nins fãa d sẽn tare, baa d zoodã ne a Zeova, sẽn na yɩl n da ki ye. (Zoob 2:4, 5) Ad a Sʋɩtãan yaa ziri yagda! Sẽn mik tɩ yẽ la “soab ning sẽn tar tõog n wat ne kũumã,” a tũnugda ne d sẽn zoet kũumã n na n kɩt tɩ d bas a Zeova tũubu. (Ebre. 2:14, 15) Wakat ninga, a Sʋɩtãan poorẽ dãmbã yeta a Zeova Kaset rãmbã tɩ b sã n pa bas a Zeova tũubu b na n kʋ-b lame. Wakat kẽer me, d sã n ka laafɩ hal tɩ tõe n wa tũ ne d yõore, a Sʋɩtãan tũnugda ne rẽ n dat tɩ d maan bũmb n kɩɩs a Zeova. Logtoɛɛmbã wall d zakã neb nins sẽn pa tũud a Zeova wã tõe n pẽdgd-d lame n dat tɩ d sak tɩ b ning-d zɩɩm, tɩ yaool n yaa bũmb sẽn kɩɩsd a Zeova noyã. Neb a taab me tõe n baoome n na n modg-d tɩ d sak tɩbsg Biiblã sẽn gɩdge.

17. Wa Rom dãmb 8:37-39 sẽn wilgdã, bõe yĩng tɩ d pa segd n zoe kũumã?

17 Baa ne d sẽn pa rat n ki wã, d miime tɩ d sã n ki, a Zeova na n ket n nong-d lame. (Karm-y Rom dãmb 8:37-39.) A Zeova zoa sã n maan kaalem, a ket n tẽra a yelle, tɩ yaa wa nin-kãng ket n vɩɩme. (Luk 20:37, 38) A Zeova yãgdame n dat n vʋʋg a zo-rãmb nins sẽn maan kaalmã. (Zoob 14:15) A kõo yaood-kãsenga, sẽn na yɩl tɩ d tõe n wa “paam vɩɩm sẽn ka sɛtã.” (Zã 3:16) D miime t’a Zeova nong-d-la wʋsgo, la tɩ d yell pak-a lame. Rẽ n so tɩ d pa basd a tũubu, d sã n wa bẽed bã-kɛgenga, wall d vɩɩmã sã n wa be yell pʋgẽ. D pʋd n teegd-a lame, sẽn na yɩl n paam raood kengre, yam la pãnga. Yaa woto bal kɛpɩ la a Valeeri ne a sɩdã maan-yã.—Yɩɩn. 41:4.

18. A Valeeri kibarã sõnga yãmb tɩ y bãng bõe?

18 A Valeeri sẽn wa n tar yʋʋm 35, a bãngame t’a bẽeda kãnsɛɛre. A sẽn da kɩs sɩd t’a Zeova nong-a lame wã sõng-a lame t’a tõog kũumã rabeem. Ad a sẽn yeele: “B sẽn wa n yeel maam tɩ m tara kãnsɛɛrã, maam ne m sɩdã sũy sãama wʋsgo. Ra yaa tɩlɛ tɩ b maan maam wopeere-kãsenga, sẽn na yɩl tɩ m da ki ye. D yãa logtoɛɛmb wʋsgo, la b baa a ye pa sak n na n wopeere maam n pa ning-m zɩɩm ye. M da yɛɛsdame, la m sẽn da rat n sak a Zeova noorã yĩnga, m tõdgame tɩ m kõn deeg zɩɩm ye. M vɩɩmã tõre, a Zeova wilg-m lame t’a nong-m-la wʋsgo. Masã, m da ratame n wilg tɩ m nong-a lame. D sã n da tɩ yã logtor fãa, t’a zãgs t’a kõn wopeere maam n pa ning-m zɩɩm, m manegd n yãka yam n na n noog a Zeova sũuri, la m kɩt t’a Sʋɩtãan ra tõog ye. M wa n paamame tɩ b wopeere maam n pa ning-m zɩɩm ye. M tɩbsgã sasa, wakat fãa a Zeova kell n sõngame tɩ m paam bũmb nins sẽn yaa tɩlɛ ne-mã. Wala makre, semen ning sẽn deng tɩ m bãng tɩ m tara kãnsɛɛrã, tigingã pʋgẽ, d zãmsa sõsg gom-zug sẽn yaa: ‘D sẽn tõe n paam raood n mao ne zu-loeesã to-to.’c Sõs-kãng kenga d raood wʋsgo. D lebg n karm-a lame n yɩlme. Sõss a woto n paas tigissã kẽnd la koɛɛgã moonegã sõngda maam ne m sɩdã tɩ d paamd sũur pʋgẽ bãane, la d bãngd n yãk yam.”

D TÕOGDA D RABEEMÃ

19. Bõe n na n maan ka la bilfu?

19 Ne a Zeova sõngre, a nin-buiidã sẽn be dũniyã gill zugã tõog n maoo ne zu-loees buud toor-toore, la b tõog n kɩɩs a Sʋɩtãana. (1 Pɩy. 5:8, 9) Yãmb me tõeeme. Ka la bilfu, a Zeova na n kõo a Zeezi ne a na-rɩt-n-taasã noor tɩ b “sãam Sʋɩtãanã tʋʋmã.” (1 Zã 3:8) Rẽ poore, Wẽnnaam nin-buiidã sẽn be tẽngã zugã na n kell n tũu Wẽnnaam, tɩ ned bɩ bũmb kae n na n kẽes-b rabeem ye. (Eza. 54:14; Mii. 4:4) La nananda, d segd n modgame n tõog d rabeemã.

20. Bõe n na n sõng-d tɩ d tõog d rabeemã?

20 D segd n kell n kɩsa sɩd t’a Zeova nonga a nin-buiidã, la t’a kogend-b lame. D na n sɩd tõog n maana rẽ, d sã n bʋgsd a Zeova sẽn kogl a nin-buiidã to-to pĩnd wẽndẽ wã zugu, la d gomd rẽ yell ne neb a taabã. D tõeeme me n tẽeg a Zeova sẽn sõng-d to-to tɩ d tõog n mao ne zu-loe-kɛgemse. Ne a Zeova sõngre, d na n tõoga d rabeemã.—Yɩɩn. 34:5.

WÃN TO LA A ZEOVA SẼN NONG-DÃ TÕE N SÕNG-YÃ . . .

  • y sã n yɛɛsd y pa na n tõog n ges y zakã rãmb yelle?

  • tɩ y tõog ninsaal zoeese?

  • tɩ y tõog kũumã rabeem?

YƖƖLL 129 D na n kell n tõoga toogo

a D sã n zoet rabeem, pa wakat fãa la yaa wẽng ye. La wakat ninga, d sã n zoe rabeem pa sõma ye. Bõe yĩnga? Bala a Sʋɩtãan tõe n tũnuga ne rẽ n kɩt tɩ d pa tõog n maan sẽn segdã ye. Dẽnd d segd n maana d sẽn tõe fãa n da lʋɩ a Sʋɩtãan bẽd-kãngã pʋgẽ ye. Bõe n na n sõng-do? Wa d sẽn na n yã sõs-kãngã pʋgẽ wã, d sã n kɩs sɩd t’a Zeova bee ne-do, la t’a nong-d lame, d na n tõoga rabeem buud fãa sẽn pa sõma.

b D toeema yʋy kẽere

c Ges-y yʋʋmd 2012 zĩ-likr kiuug pipi daar Gũusg Gasgã seb-neng 11-15.

d FOT-RÃMBÃ BILGRI: Saam-bi-poak ne a sɩd sẽn tall rɩɩb n na n wa kõ b tigingã pʋgẽ saam-bi-poak ne a biig sẽn modgd wʋsgo.

e FOT-RÃMBÃ BILGRI: Saam-biig sẽn yaa bi-bɩɩg roagdb sẽn namsd-a a tũudmã yĩnga. La a kɩsa sɩd t’a Zeova na n kell n sõng-a lame.

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole