Neb wʋsg sũy n pa noom ne b mense
“Baa m sã n be roogẽ n yaa m yembre, m maanda yɩɩr wakat fãa bũmb kẽer wɛɛngẽ.”
“Baa m sã n wa getẽ tɩ m tara keelem sõma, m maanda yɩɩre. M gũus n gesame tɩ m sã n wa getẽ tɩ m sũur noomame, wat n baasa ne sũ-sãams wʋsgo.”
“Mam modgdame sẽn na yɩl n tagsd bũmb nins sẽn maand daarã pʋgẽ wã bal yelle. La wakat ninga, m wat n mikame tɩ m maanda yɩɩr bũmb a taab yĩnga.”
Nin-kãensã bẽeda bãag sẽn kɩt tɩ b sũy pa noom ne b meng ye. Yãmb wʋmda b sẽn yetã võor bɩ? Yãmb mengã, wall ned y sẽn nong maooda ne zu-loɛɛg a woto bɩ?
Bãng-y tɩ y pa y yembr ye. Rũndã-rũndã, neb ka tɛk n bẽed bãag sẽn kɩt tɩ b sũy pa noom ne b mens ye. Rẽ namsda neb wʋsgo. Tõe tɩ yaa bãmb mengã n bẽede, wall ned b sẽn nonge.
Sãmbg kae tɩ d vɩɩ wakat ‘yɛlã sẽn yaa kãn-kãe, hal tɩ vɩɩmã lebg toogo.’ (2 Tɩmote 3:1) Neb n maan vaeesg n mik tɩ dũniyã gill zugu, neb a nii sʋka, nin-yend n bẽed bãag sẽn kɩt t’a sũur pa noom ne a meng ye. Koronavirisã bã-loangdgã yĩnga, yʋʋmd 2020 wã, neb nins sẽn maand yɩɩrã, la sẽn bẽed-b bãag sẽn kɩt tɩ b yam ka b mensã sõor paasa sẽn ta milyõ 78.
D sẽn mi tɩ neb wʋsg n maand yɩɩr la b bẽed bãag sẽn kɩt tɩ b sũy pa noom ne b mensã, tara yõodo. La bũmb sẽn tar yõod n yɩɩda, yaa d bao n bãng tõnd mengã, wall d nin-nongdsã laafɩ wã sẽn yaa to-to.
Bõe n wilgd tɩ ned sũur nooma ne a menga?
Ned sũur sẽn noom ne a meng tagsda sõma, t’a yɛlã fãa tũud taaba. A modgdame me n pa maand yɩɩr wʋsgo, t’a tʋʋmã yãkd nenga, t’a sũur me noom ne vɩɩmã.
Ned sũur sã n pa noom ne a meng wakat fãa, . . .
PA a soabã pãn-komsem n wat ne rẽ ye.
YAA bãaga, n tõe n kɩt t’a soabã maand yɩɩr tɩ loog noore, n pa le tagsd sõma, t’a sũurã mi n sãamdẽ, la a tar manesem a taab sẽn pa zemse.
Tõe n kɩtame tɩ yɩ toog ne a soabã t’a paam zo-rãmba, la a tõogd n maand bũmb kẽer sẽn yaa tɩlɛ.
Bãag a woto tõe n yõka ned buud fãa, baa a yʋʋmã sẽn yaa to-to, a sẽn yitẽ, a yĩn-kõbgo, a buudu, a tũudum, a sẽn tar bãngr to-to, la a tarmã sẽn yaa to-to.
Y sẽn tõe n paam sõngr to-to
Y sã n wa mik tɩ yãmb mengã wall y ned manesem toeemame, t’a pa le tõe n gũs sõma, t’a yam ka rɩɩbo, t’a maand yɩɩr la sũ-sãams hal tɩ kaoosd wʋsgo, yɩta sõma tɩ y bao logtor sõngr n bãng bũmb ning sẽn wat ne rẽ wã, n tõog n tɩpe. La yɛ la y tõe n paam sõngre?
A Zeezi Kirist sẽn yaa yam soab sẽn ka to wã sẽn wa n be tẽngã zugã, a yeelame yaa: “Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa.” (Matiye 9:12) Neb nins sẽn tar zu-loe-kãensã sã n paam tɩbsg sõma, tõe n sõng-b lame tɩ b yam gãande, la b paam sũ-noog b vɩɩmã pʋgẽ. Ned sã n maand yɩɩr la sũ-sãams tɩ kaoosd n pa satẽ, a segd n baoo tɩbsg tao-tao.a
Baa Biiblã sẽn pa logtoeemd sebrã, a tara sagls sẽn tõe n sõng-y tɩ y mao ne bãag a woto. D kot-y lame tɩ y karem sõss nins sẽn pʋgdã, n bãng Biiblã sẽn tõe n sõng-y to-to, y sã n wa bẽed bãag sẽn kɩt tɩ y sũur pa noom ne y menga.
a Gũusg Gasgã pa wilgd tɩbsg takɩ y sẽn tõe n bao ye. Yaa ned kam fãa n segd n maag a yĩng n tagse, n yãk a sẽn dat n maaneg rẽ wɛɛngẽ.