Yʋʋm pis-nu wã sẽn loogã, rũms buud toor-toorã sõor sẽn boogã taa bãmb 73 koabg zugu:Bõe la Biiblã yeta?

Yʋʋmd 2024 zĩ-likr kiuugã rasem a 9 wã, siglg ning sẽn get weoogã la rũmsã yell dũniyã gill zugã maana vaeesg n wilg tɩ ninsaalbã tʋʋmã sãamda weoogã, la kʋʋd rũms buud toor-toor dũniyã gill zugu. B wilgame tɩ yʋʋm pis-nu wã sẽn loogã pʋgẽ, rat n yeel tɩ yʋʋmd 1970 n tãag yʋʋmd 2020 wã, rũms buud toor-toorã sõor sẽn boogã taa bãmb 73 koabg zugu. B paasame tɩ “d tõe n yeelame tɩ bũmb ning sẽn na n maan yʋʋm a nu wã sẽn watã n na n sõng tɩ d bãng bõn-vɩɩsã sẽn be tẽngã zugã sã n na põsame.”

Neb wʋsg sã n wʋm woto, sãamda b sũur wʋsgo. D nonga tẽngã sẽn be rasãndã tɩ rũms buud toor-toorã me sẽn namsdã pa noom-d ye. Yaa woto, bala Wẽnnaam raabã yaa tɩ d ges rũmsã yelle.—Sɩngre 1:27, 28; Yel-bũnã 12:10.

Tõe tɩ y sokda y meng yaa: ‘D na n tõog n kogla weoogã la rũms buud toor-toorã sẽn be dũniyã gill zugã bɩ? Bõe la Biiblã yeta?’

Manegr n wate

Baa d sẽn maand modgrã, d pa tõe n fãag rũmsã ye. Yaa Wẽnnaam bal n tõe n kogl-ba. Biiblã pĩnd n togsa Vẽnegre 11:18 wã pʋgẽ, tɩ Wẽnnaam na n wa ‘sãama neb nins sẽn sãamd tẽngã.’ Vɛrse-kãngã wilgda tõnd bũmb a yiibu:

1. 1. Wẽnnaam na n gɩdga ninsaalbã tɩ b ra sãam tẽngã zãng-zãng ye.

2. 2. Wẽnnaam na n maana bũmb ka la bilfu. Bõe n kɩt tɩ d mi rẽ? Ninsaalbã zɩ n sãam rũmsã wʋsg n ta masã ye.

Bõe la Wẽnnaam na n maan n welg zu-loe-kãngã? A na n kɩtame t’a Rĩungã bɩ a goosneema wã wa soog tẽngã gilli. (Matiye 6:10) Goosneem-kãng na n sõnga neb nins sẽn yaa sakdbã tɩ b paam minim n tõog n ges rũmsã yell la b kogl-ba.—Ezayi 11:9.