Ãnd n lugl yãmb tũudmã?

A Zeova Kaset rãmbã rũndã-rũndã siglgã sɩnga yʋʋmd 1800 soabã sẽnese. Wakat kãnga, neb a wãn sẽn da be Pitsbɛrg sẽn be Pɛnsilvani Etazĩni soolmẽ wã, n da tigimd taab n zãmsd Biiblã. B ra maagda b yĩng n vaees Biiblã, n bao n bãng egiliiz-rãmbã sẽn zãmsd b nebã bũmb ninsã sã n yaa sɩda. B sɩng n yiisda bũmb nins b sẽn bãngã sɛb la zʋrnall-dãmb pʋsẽ, n paas sebr ning d sẽn boond rũndã-rũndã tɩ Gũusg Gasgã—Moonda a Zeova Rĩungã pʋgẽ.

Biiblã zãmsdbã nin-yend yʋʋr n da yaa a Charles Taze Russell. Baa a sẽn da yaa sullã taoor-lʋɩtã, n leb n da get Gũusg Gasgã yiisg yellã, a pa lugl tũudum paall ye. Nebã ra miime t’a Russell ne a tʋmd-n-taasã raab yaa b sõng nebã tɩ b bãng a Zeezi zãmsgã, la b modg me n dɩk pipi kiris-nebã togs-n-taare. Yaa a Zeezi n lugl kiris-neb tũudmã. Dẽnd yẽ n yaa tõnd siglgã taoor soaba.—Koloos-rãmb 1:18-20.