Bi-ribl yam sã n wa kẽed rapa, bɩ bi-pugl yam sã n wa kẽed pagba, a maanda wãna?
A pa segd n yɩ tao-tao n tags tɩ tɩɩm kae ye.
Naoor wʋsgo, na n wa saame.
A Lisette sẽn tar yʋʋm 16 me yeela woto. Yẽ me yamã ra kẽe pʋg-sada. Ad sẽn yeele: “Karen-saamb ning sẽn zãmsd tõnd siãnsã wilgame tɩ bi-bɩɩlmã sasa, ninsaal yĩngã toeemda wʋsgo. M tagsdame tɩ kom-bɩɩsã sã n bao n bãng rẽ, b na n mikame tɩ bi-ribl yam sã n wa kẽ raoa, bɩ bi-pugl yam sã n wa kẽ paga, yaa bũmb sẽn na n wa sa. Pa rat n yeel t’a yaa homosexuel ye.”
Bi-bɩɩg fãa n tog n yãk a sã n na n tũu dũniyã neb yel-manesem sẽn pa sõma wã, bɩ a sã n na n tũu Wẽnnaam no-tɩrsã sẽn be Biiblã pʋgẽ wã
La sã n mik tɩ kaoosdame? Fo yaa bi-ribla, tɩ f yamã kẽed rapa, bɩ f yaa bi-pugla, tɩ yamã kẽed pagba, f maanda wãna? Wẽnnaam sẽn pa rat tɩ rao ne rao, bɩ pag ne pag zĩnd ne taabã rat n yeelame t’a yaa wẽnem soab bɩ?
Bãng tɩ ned sã n tẽed tɩ zĩ-kãng wɛɛngẽ wã, Wẽnnaam yaa wẽnem soaba, dẽnd a tagsdame tɩ yaa tɩlɛ tɩ ninsaalbã lebg b yĩngã ratem yembse. Biiblã yaool n wilgdame tɩ ninsaal tara tõog n tõe n kɩɩs a yĩngã ratem sẽn pa sõma wã.—Koloos-rãmbã 3:5.
Wẽnnaam sẽn dat tɩ d maanã pa yɩɩd d pãng ye. A sagenda ned buud fãa, baa rap nins yam sẽn kẽed rapã, la pagb nins yam sẽn kẽed pagbã tɩ b ‘zoe yoobo.’ (1 Korẽnt-rãmbã 6:18) Neb milyõ-rãmb sẽn pa homosexuel rãmba, n dat ne b sũy fãa n tũ Biiblã saglsã modgdame n tõogd b mens n pa sakd b yĩngã tʋls-wẽnsã ye. Dẽnd neb nins sẽn tagsd tɩ b yaa homosexuel rãmbã me tõe n tõoga b yĩngã tʋls-wẽnse.—Tõodo 30:19.