A Zeova Kaset rãmbã tagsg yaa wãn to ne kʋyã?
D tagsg sẽn yaa to-to kʋyã wɛɛngẽ wã tika Biiblã sẽn sõng-d tɩ d bãng bũmb ningã. Wala makre, bũmb nins sẽn pʋgdã:
D nin-nongr sã n maan kaalem tɩ sãam d sũur wʋsgo, pa wẽng ye. A Zeezi karen-biis n yãb wʋsg b nin-nongr sẽn maan kaalem yĩnga. (Zã 11:33-35, 38; Tʋʋma 8:2; 9:39) Sɩd me, ned sã n maan kaalem tɩ b na n mum-a, pa tog n yɩ segb d sẽn paam n na n maan kibs ye. (Koɛɛg soaba 3:1, 4; 7:1-4) La yaa segb d sẽn paam n na n kʋm d taabã.—Rom dãmbã 12:15.
Sẽn ki-bã pa mi baa fʋɩ ye. Baa d sẽn yaa buud ning fãa ned la d sẽn yitẽ fãa, d lakda d meng ne minund la tʋʋm-tʋmdɩ sẽn wilgd tɩ sẽn ki-bã ket n mii bũmbu, la tɩ b tõe n sõngame wall n nams sẽn vi-bã. Minund-kãens pa zems ne Biiblã sẽn yetã ye. (Koɛɛg soaba 9:5, 6, 10) Wala makre, maan sẽn ki-bã veye, maan kibs-kãseng kiidã yĩnga, kʋ-yiibu, kʋ maand n kõ kiidã, gom ne kiidã wall n kos-a bũmbu, la rog-n-mik yel-maandɩ kẽer pʋg-kõapã sẽn maand kiidã yĩnga. D pa maand minund la tʋʋm-tʋmdɩ a woto, bala d sakda Biiblã noor ning sẽn sagend-d tɩ d ‘lak d mense, la d ra le sɩɩs bõn-dẽgdã’ ye.—2 Korẽnt rãmbã 6:17.
Koe-noog n be sẽn ki-bã yĩnga. Biiblã yetame tɩ sẽn ki-bã na n wa vʋʋgame, la tɩ wakat n wat tɩ kũum pa na n le zĩnd ye. (Tʋʋma 24:15; Vẽnegre 21:4) D sẽn tẽed bũmb ningã sõngd-d lame tɩ d ra sãam d sũur tɩ loog noor tɩ kɩt tɩ d maan bũmb sẽn pa segd ye. Yɩɩ woto me ne pipi kiris-nebã.—1 Tesalonik rãmbã 4:13.
Biiblã sagend-d lame tɩ d maand bũmb fãa tɩ zemse. (Yel-bũnã 11:2) D pa tagsd tɩ ned kũum yaa segb d sẽn paam n na n wilg d “paoong ne wuk-m-meng” ye. (1 Zã 2:16) D pa maand bũmb sẽn yaa hobragi kiidã yĩnga, wala makre, reem buud toor-toore, wall n raad kũum koglg ligd sẽn yaa toog wʋsgo, bɩ n yelgd fu-bɛd sẽn na yɩl n wilg d meng ye.
D pa modgd neb a taabã tɩ b sak d sẽn tẽed bũmb nins kʋyã wɛɛngẽ wã ye. D tũuda Biiblã sagl-kãngã: “Tõnd ned kam fãa na n yalsa Wẽnnaam taoor t’a kao a bʋʋd wa sẽn zems a tʋʋma.” (Rom dãmbã 14:12) La d tũnugda ne segb nins d sẽn paamdã, n sõngd nebã ne “bʋgsem la ne waoogr wʋsgo,” tɩ b bãng bũmb nins d sẽn tẽedã.—1 Pɩyɛɛr 3:15.
Bõe la b maand a Zeova Kaset soab kaalem sasa?
Zĩigã: Zaka rãmb sã n yãk yam n na n maan bũmb kẽer kiidã yĩnga, bãmb n yãkd b sẽn na n maan rẽ zĩig ningã. Tõe n yɩɩ Rĩungã roogẽ, zĩig b sẽn segend kũ-rãmbã b mumbã yĩnga, yaadẽ wã la zĩis a taabẽ.
Sõsg kiidã yĩnga: Sõsg la b wɛgsd sẽn na yɩl n bels neb nins sũy sẽn sãamã, n wilg-b Biiblã sẽn yetã, la sõng-b tɩ b bãng tɩ sẽn ki-bã na n wa vʋʋgame. (Zã 11:25; Rom dãmbã 5:12; 2 Pɩyɛɛr 3:13) Sõsgã sasa b tõe n tẽega kiidã zʋg-sõma wã, la d sẽn tõe n dɩk yam kiidã tẽebã pʋgẽ tɩ keng d raood to-to.—2 Sãmwɛll 1:17-27.
B tõe n yɩɩla yɩɩll sẽn tik Biiblã zugu. (Kolos rãmbã 3:16) B na n baasa sõsgã ne pʋʋsg sẽn kengd raoodo.—Filip rãmbã 4:6, 7.
Ligd lobre: D pa yet nebã tɩ b kõ ligd d tũudmã yɛl yĩnga, wala makre ned kaalem sasa ye. D tigissã sasa me, d pa yet nebã tɩ b lob ligd ye.—Matiye 10:8.
Neb nins sẽn tõe n wa wã: Neb nins sẽn pa a Zeova Kaset rãmbã tõe n wa naag n kelga sõsg kiidã yĩng Rĩungã roogẽ. Ned buud fãa tõe n waa tigiss a woto, wa sẽn yaa to-to ne d tigiss a taabã.
Tũudum a to sã n wa rat n maan bũmb kẽer ned sẽn ki yĩnga, a Zeova Kaset soab tõe n kẽngame bɩ?
Yaa a Zeova Kaset soab fãa n segd n kelg a sũur kasetã, n bãng a sẽn na n maan rẽ wɛɛngẽ. (1 Tɩmote 1:19) La d pa na n naag n maan tũudum yel-maandɩ Biiblã sẽn gɩdg ye.—2 Korẽnt rãmbã 6:14-17.