A Zezi riga koaasdbã

YÃMB sẽn get a Zezi foto kãngã zugã a sũurã ka puug sɩda? Yãmb mii bũmb ning sẽn kɩt t’a sũurã puugã bɩ? Rap nins sẽn be wẽnd-​doogã pʋgẽ wã yaa neb sẽn nong ligd wʋsgo. B rat n wẽga neb nins sẽn wat n na n pʋʋs Wẽnnaamã n paam ligd wʋsgo.

Yãmb nee lolsã ne piisã la marwalã bɩ? Rapã koosda rũm-​kãensã wẽnd-​doogẽ wã. Yaa bõe yĩnga? Bala Israɛll nebã rata wal la rũms n maan maoong n kõ Wẽnnaam.

Wẽnnaam noor a ye n wilgd tɩ Israɛll ned sã n maan yel-​wẽnde, a segd n maana maoong n kõ Wẽnnaam n kos sugri. Israɛll nebã ra tara wakat a taab me n segd n maand maando. La yɛ la nebã ra tõe n paam rũms n maan maoong n kõ Wẽnnaam?

Israɛll neb kẽer n da gʋʋnd wal la rũmsi. Dẽnd bãmb ra tõe n yãka rẽ n maan maand n kõ Wẽnnaam. La neb wʋsg ra pa tar rũms ye. Kẽer me sẽn da vɩ zĩig ningã zãra wʋsg ne Zerizalɛm, tɩ b ka tõe n tall b rũmsã hal be n wa Zerizalɛm ye. Yaa rẽ yĩng la nebã sẽn da wat wẽnd-​doogẽ wã n daad rũmsã. La rapã ra koosda b rũmsã toogo. B ra wẽgda nebã. Sẽn paas menga, b ra pa segd n koosd wẽnd-​doogẽ wã ye.

Yaa rẽ n puug a Zezi sũurã. Rẽ n so t’a tus rapã taabl dãmb n lubi, n sãeeg b ligdã tẽnga. A rɩka wĩ n maan kalwaas n dig rũmsã fãa n yiis wẽnd-​doogẽ wã. A yeela neb nins sẽn da koosd marwalã yaa: ‘Yiis-⁠y bõn-​kãensã ka. Da maan-⁠y mam Ba wã roog tɩ lebg teed koosg zĩig ye.’

A Zezi karen-​biis kẽer n da tũud-⁠a. B sẽn yã a sẽn maan bũmb ningã ling-⁠b lame. La b tẽega Biiblã sẽn gomd Wẽnnaam bi-​riblã yell n yet tɩ ‘Wẽnnaam doogã nonglem na n soog-⁠a-⁠la zãngã.’

A Zezi sẽn wa Zerizalɛm n na n maan Pakã, a maana yel-​soalem wʋsg me. Rẽ poore, a yii Zide n na n leb Galile. La a tek n yalsa Samari. Bɩ d ges bũmb ning sẽn maan be.