A Zeezi talla yẽesem tũudum hakɩɩkã yĩnga

Kana yi-kãadmã poore, a Zeezi rɩka Kapɛrnawom sore. Yaa yẽ ne a ma, n paas a Zak, a Zozɛf, a Sɩmo la a Zuud sẽn yaa a ma-biisã.

Bõe yĩng t’a Zeezi rabd Kapɛrnawom? Bala tẽn-kãng bedrem yɩɩda Nazarɛt ne Kana, n leb n pẽ Galɩle mogrã, tɩ neb wʋsg tõe n kẽ batayo-rãmb n ta be faag-faaga. Sẽn paase, a karen-biisã a sẽn nan paamã wʋsg vɩɩ be, bɩ sẽn pa zãr ne be. Woto kɩtame t’a Zeezi tõe n paam n zãms-b bũmb wʋsgo.

A Zeezi sẽn zĩnd Kapɛrnawomã, a tʋma tʋʋm-kãsems be me. Dẽnd tẽngã neb wʋsgo, n paas tẽn-yagsã neb wʋma a sẽn maan bũmb ningã. La a Zeezi ne a karen-biisã sẽn yaa zʋɩf-rãmb sẽn sakd tõodã ne b sũy fãa wã segd n dɩka Zeruzalɛm sor ka la bilfu, n paam n tɩ maan Pakã. Yaa yʋʋmd 30 soabã Pakã.

A Zeezi ne a karen-biisã sẽn wa n be Zeruzalɛm wẽnd-doogẽ wã, a maana bũmb sẽn ling-b hal wʋsgo. B ra zɩ n yã a buud ye.

Wẽnnaam sẽn da kõ Israyɛll nebã tõod ninsã pʋgẽ, a ra yeelame tɩ b maand rũms maand Zeruzalɛm wẽnd-doogẽ wã n kõt-a. Neb sãnda yita tẽns a taab n watẽ. B sẽn na n zĩnd be rasem a wãna yĩnga, bũmb kẽer n da yaa tɩlɛ ne-ba. Rẽ n so tɩ tõogã ra wilg tɩ b tõe n zãa ligd n wa, n wa ra “rũm-bɛda, wall rũm-bãoonego,” la bũmb a taab sẽn yaa tɩlɛ. (Tõodo 14:24-26) La kɩtame tɩ Zeruzalɛm neb kẽer ra tolg n be wẽnd-doogã samandẽ n koosd rũms la liuuli, tɩ lɛɛbdb sãnda meng ra wẽgd nin-buiidã, n dogend yõodã hal tɩ loog nugu.

A Zeezi sũurã puugame, t’a sãeeg ligd tɛkdbã ligdã, n leeb b taabl-dãmbã, la a rig-b n yiisi. A yeel-b-la woto: “Yiis-y yõwã kaanẽ. Da rɩk-y mam ba wã roog tɩ yɩ leebg zĩig ye.”—Zã 2:16.

A Zeezi karen-biisã sẽn yã rẽ, tẽeg-b-la no-rɛɛsdbã sẽn da togs Wẽnnaam Biigã zugã. B ra yeelame: “Yamb roogã nonglem na n sooga maam zãnga.” La zʋɩf-rãmbã soka a Zeezi yaa: “Bõe bãnd la yãmb na n wilg tõndo, n wilg tɩ yãmb tara noor tɩ maan bõn-kãnga?” A Zeezi leokame: “Sãam-y wẽnd do-kãngã, la rasem a tãab pʋgẽ, mam na lebs-a n me.”—Zã 2:17-19; Yɩɩn-sõamyã 69:10.

Zʋɩf-rãmbã ra tẽedame t’a Zeezi gomda Zeruzalɛm wẽnd-doogã yelle. Rẽ n so tɩ b sok-a woto: “Yaa yʋʋm pis-naas la a yoob pʋgẽ la b rɩk n tõog n me wẽnd do-kãngã n sa, tɩ fo na n wa n lebs-a n me rasem a tãab pʋgẽ?” (Zã 2:20) Yaool n yaa yẽ mengã yĩngã la a sẽn bool tɩ wẽnd-doogã. Yʋʋm a tãab poore, a Zeezi sẽn ki tɩ Wẽnnaam lebg n vʋʋg-a wã, karen-biisã tẽega a gom-kãensã.