B kʋʋ a Zezi

GES-⁠Y yel-​beed ning sẽn paam a Zezi wã! B ka-⁠a-⁠la raoog zugu. B kaa a nusã ne a naoã ne põent rãmba. A na n kiime. La bõe yĩng tɩ b namsd a Zezi woto?

Bala neb n kis a Zezi. Yãmb mii sẽn yaa neb nins bɩ? A Sʋɩtãan la pipi soabã. Yaa yẽ la malɛg-​wẽng ning sẽn kɩt t’a Ãdem ne a Hawa kɩɩs a Zeova noorã. Leb n yaa yẽ n kɩt t’a Zezi bɛɛbã namsd-⁠a woto wã.

Nand t’a Zezi bɛɛbã ka-⁠a raoogã zugu, b nams-⁠a lame. Yãmb ket n tẽra b sẽn wa Gɛtsemane tɩɩsã zĩigẽ n yõk a Zezi n tall n loogã bɩ? Yɩɩ ãnd dãmba? Ra yaa tũudmã taoor dãmba. Bɩ d ges bũmb ning sẽn maan rẽ poore.

Tũudmã taoor dãmb sẽn yõk a Zezi wã poore, a tʋm-​tʋmdbã yɛɛsame n zoe n bas-⁠a a yembr ne a bɛɛbã. La tʋm-​tʋmd a Pɩɛɛr ne a Zã pa zoe n zãag ye. B ra pʋgda yɩɩg-​yɩɩg n na n ges bũmb ning sẽn na n paam a Zezi.

Maan-​kʋʋdbã talla a Zezi n kẽng pĩnd maan-​kʋʋdb kãsem a Ann nengẽ. La b pa kaoos be ye. B tall-⁠a lame n kẽng a Kayɩf sẽn da yaa maan-​kʋʋdbã kãsem wakat kãngã wã me nengẽ. Tũudmã taoor dãmb wʋsg n da tigim taab be.

B bʋʋ a Zezi a Kayɩf zakẽ wã. B talla neb tɩ b wa rõd-⁠a. Tũudmã taoor dãmb fãa yeelame t’a Zezi segda ne kũum. B tʋbsa a nengã kolkood la b pãb-⁠a ne nug-​gila.

Wakat kãng t’a Pɩɛɛr da bee zakã pʋgẽ. Waooda yĩnga, nebã ra widga bugum n wootẽ. La tʋm-​tʋm-​poak a yembr n yã a Pɩɛɛr n yeel yaa: ‘Ra-​kãngã me ra bee ne a Zezi.’

La a Pɩɛɛr kɩɩsame tɩ yẽ ka mi a Zezi ye.

Yaa naoor a tãab la nebã sẽn yeel t’a Pɩɛɛr da bee ne a Zezi wã. La a Pɩɛɛr kɩɩsa naoor a tãabã fãa tɩ pa sɩd ye. Naoor a tãab-n-soabã, a Zezi wẽnegame n ges-⁠a. Yãndã yõka a Pɩɛɛr a sẽn yag ziri wã yĩnga, t’a na n yi yɩng n yãbe.

Arzũmã yibeoog pĩnda, maan-​kʋʋdbã talla a Zezi n kẽng Zʋɩf rãmbã bʋ-​kaoodba ro-​kãseng pʋgẽ. B sõsa ne taab beenẽ n na n bãng b sẽn na n maan a Zezi bũmb ninga. B tall-⁠a lame n kẽng a Põns Pɩlat sẽn yaa Zide naabã nengẽ.

Maan-​kʋʋdbã yeela a Pɩlat yaa: ‘Ra-​kãngã yaa nin-​wẽnga. A segda ne kũum.’ La a Pɩlat sẽn gom ne a Zezi wã poore, a yeelame t’a pa ne a Zezi sẽn maan wẽng ning ye. Rẽ n so t’a Pɩlat kɩt tɩ b tall a Zezi n kẽng a Herood Ãntipas nengẽ. A Herood ra yaa Galile naaba, la a ra bee Zerizalɛm. Yẽ me yãame t’a Zezi pa nin-​wẽng ye, t’a na n kɩt tɩ b tall-⁠a n leb a Pɩlat nengẽ.

A Pɩlat baoome n na n bas a Zezi, la a Zezi bɛɛbã yeelame tɩ b bas bi-​bɛɛg a Barabase. A yaa wagdre. Wĩnto-​sʋk sẽn wa n ta, a Pɩlat talla a Zezi n yi n yeel nebã yaa: ‘Ad-⁠y y rĩmã!’ La maan-​kʋʋdbã kãsem dãmb kaasame n yeel yaa: ‘Kʋ-⁠y-​yã-a! Kʋ-⁠y-​yã-a!’ A Pɩlat kong n basa a Barabas t’a looge, la a kɩt tɩ b tall a Zezi n na n tɩ kʋ.

Arzũmã wĩnd-​kaoore, b kaa a Zezi raoog zugu. B kaa bi-​bees a yiib me. A ye n be a Zezi goabga, t’a to wã be a rɩtgo. B pa wilg-⁠b fotã zug ye. Nand t’a Zezi ki, bi-​bɛɛg a ye n yeel-⁠a yaa: ‘Fo sã n wa reeg f naamã, bɩ f tẽeg mam yelle.’ A Zezi leoka yẽ yaa: ‘Fo na n zĩnda ne maam arzãnã pʋgẽ.’

A Zezi sẽn kãab raoã bũmb ningã yaa kãab-​noog tɛkẽ! Yãmb mii arzãn ning yell a Zezi sẽn da gomdã sẽn na n yɩ zĩig ningã bɩ? Arzãn ning Wẽnnaam sẽn maan sɩngrẽ wã ra bee yɛ? Pa tẽngã zug sɩda? A Zezi naamã rɩɩb sasã, a na n vʋʋga raoã t’a paam n vɩɩmd arzãnã pʋgẽ tẽngã zugu. Ad d fãa sũy na n yɩɩ noog wakat kãngã!