Sak 32
Bõe la ned tõe n maan vʋʋsg daare?
RA LEB n yaa vʋʋsg daare, t’a Zezi kẽng karen-doog a yembrẽ Galile Mogrã noore. Rao n da be be t’a rɩtg nugã ki. Gʋlsdbã la Fariziẽ rãmbã ra gũusda a Zezi neer n get a sã n na n sãooga rao wã. B wa n kong n sok-a lame: “A zemsame tɩ maag bãad dãmb vʋʋsg raar bɩ?”
Zʋɩf rãmbã tũudum taoor dãmb ra tẽedame tɩ sã n pa yõor yelle, vʋʋsg daare ned sãoogr kisame. Wala makre, b zãmsda nebã tɩ vʋʋsg daare, ka zems tɩ b wob ned bũmb sẽn kao bɩ sẽn dãmb ye. Dẽ Fariziẽ rãmbã la Gʋlsdbã sẽn sok a Zezi woto wã yaa sẽn na yɩl n yã bũmb n ning-a taale.
La a Zezi ra mii b tagsgã. A leb n bãngame tɩ b sẽn tagsd tɩ bũmb ning yaa tʋʋmd sẽn kɩɩsd vʋʋsg daarã tõogã ka tik Gʋlsg Sõamyã zug ye. Dẽ a Zezi maana bũmb sẽn na n wilg tɩ b tagsgã ka zemse, n yeel nug-kɩɩng soabã: “Yik n yaas sʋk ka.”
Masã a Zezi wẽnemd n yeela gʋlsdbã ne Fariziẽ rãmbã woto: “Ãnda n be yãmb sʋka sẽn tar pesg a yembr bala, t’a lʋɩ bokẽ vʋʋsg raare t’a ka tak-a n yiisi?” Pesg yaa ligdi. Woto yĩnga, b ra kõn saag n bas-a bok pʋgẽ tɩ ta vẽk-n-beoog t’a wa bẽ tɩ lebg bõn ne-b ye. Sẽn paase, Gʋlsg Sõamyã yetame: “Nin-sõng geta a rũmsa mens yell neere.”—Sebr Sõngo.
A Zezi wilga mak-kãngã võore, n paas woto: “Ned ka yɩɩd pesg bɩ? Dẽ, a zemsame tɩ maan neer vʋʋsg raare.” Goam sẽn yaa sɩd la sẽn pukd nimbãan-zoeer woto yaa bũmb tũudmã taoor dãmb sẽn ka tõe n kɩɩse. Dẽ n so tɩ b ka tõog n leok tɩ bũmb ye.
A Zezi sũurã puugame, b sẽn tõdg tɩ b kõn bas b yalemdã yĩnga, t’a ges-b ne sũ-sãanga, n yaool n yeel rao wã yaa: “Tẽeg f nugu.” La rao wã sẽn tẽeg a nugã, sãoogame.
Fariziẽ rãmbã ra segd n maana sũ-noog ne rao wã sẽn paam laafɩ wã. La b pa maan woto ye. Tao-tao bala b yiimi n tʋg n sɩɩg noor ne a Herood poorẽ dãmbã n na n kʋ a Zezi. Yaa wala Sadiseẽ rãmb me n da be a Herood poorẽ dãmbã sʋka. Nin-kãensã ne Fariziẽ rãmbã ra minim n yaa neb sẽn ka mokd taab bugum. La b fãa ra lagma taab sõma n zabd ne a Zezi. Matɩe 12:9-14; Mark 3:1-6; Luk 6:6-11; Yelbũna 12:10; Yikri 20:8-10.
▪ Bõe la a Zezi maan n wilg tɩ Zʋɩf rãmbã tũudum taoor dãmb tagsg ka zemse?
▪ Zʋɩf rãmbã tũudum taoor dãmb ra tagsda wãn-wãn ne ned sãoogr vʋʋsg daare?
▪ A Zezi rɩka mak-bʋg n wilg tɩ b tagsgã ka zemse?