Sak 34

A Zezi yãka a tʋm-tʋmdbã

YƲƲMD la pʋɩ-sʋk la woto, a Zã sẽn togs t’a Zezi yaa Wẽnnaam pe-bilã. Yɩɩ wakat kãng la a Zezi sɩng a tʋʋmdã zãma sʋka. A Ãndere, a Sɩmo Pɩɛɛre, a Zã la a ba-biig a Zake, a Filip ne a Natanayɛll (b sẽn boond me t’a Bartelemi wã) lebga a Zezi pipi karen-biis wakat kãnga. La pa kaoos la neb wʋsg wa naag-b n tũud a Zezi ye.

Masã a Zezi seglame n na n yãk a tʋm-tʋmdbã. Tʋm-tʋmdbã ra na n yɩɩ a tũud-n-taas a sẽn yãk n na n zãms-b tʋʋmdã wʋsg n yɩɩda. La a Zezi kẽnga tãng zug n tɩ pʋʋs yʋng tõr n yaool n na n yãk-ba. Tõeeme t’a pʋʋsgã pʋgẽ, a kosa Wẽnnaam t’a kõ-a yam la a ning-a bark t’a yãkrã yɩ sõma. Zĩigã sẽn yẽegã, a boola a karen-biisã n yãk neb 12 bãmb sʋka. La b ra ket n boonda tʋm-tʋmdbã t’a Zezi karen-biisi, bala a ra ket n zãmsd-b lame.

Neb a yoobã sẽn deng pipi n yɩ a Zezi karen-biisi, tɩ b togs b yʋy zugẽ wã, zĩnda a Zezi sẽn yãk b rãmbã sʋka. A yãka a Matɩe a sẽn dag n bool lampo wã reesg zĩigẽ wã me. Neb a nu a taabã a sẽn yãkã ra ya a Zida (b sẽn boond me t’a Taade wã), a Zida Iskariote, a Sɩmo sẽn yit Kana wã, a Toma, n paas a Zak sẽn ya a Alfe biigã. B ra boonda Zak kãngã t’a Zak bila. Tõeeme tɩ b sẽn boond-a woto wã yaa tʋm-tʋmd a Zak a to wã sẽn tar yagd n yɩɩd-a, bɩ sẽn kẽem-a wã yĩnga.

Masã a Zezi mii tʋm-tʋmdb 12 wã sõma, bala a zĩnda ne-b n kaoos bilfu. Bãmb kẽer meng kĩi ne a Zezi. Wõnda a Zak ne a ma-biig a Zã ra ya a Zezi yagen-taase. Sẽn paase yaa wala a Alfe ya a Zezi ba-wubdg a Zozɛf ba-biiga. Dẽ tʋm-tʋmd a Zak sẽn ya a Alfe biriblã me segd n ya a Zezi roagda.

Yaa vẽeneg tɩ ne a Zezi, a tʋm-tʋmdbã yʋy tẽegr yaa nana. La yãmb tõe n tẽega b yʋyã bɩ? Be neere, y wee n ning y yamẽ bal tɩ Sɩmo rãmbã ya a yiibu, tɩ Zak rãmbã ya a yiibu, tɩ Zida rãmbã ya a yiibu. A Sɩmo tara ba-biig sẽn boond t’a Ãndere, t’a Zak me tar ba-biig sẽn boond t’a Zã. Woto na n sõng-y lame tɩ y tẽeg tʋm-tʋmdb a nii yʋya. Lampo rɛɛgda (a Matɩe), ned a yembr sẽn maan sãmbs kaoosg zugẽ (a Toma), ned sẽn da zĩ tɩɩg tẽngr t’a Zezi bool-a (a Natanayɛll) ne a zoa a Filip n yaa tʋm-tʋmdb a naasã sẽn ketã.

Tʋm-tʋmdb 11 wã yita Galile, sẽn ya a Zezi ba-yirã babgã. A Natanayɛll yita Kana. A Filipi, a Pɩɛɛre, la a Ãndere da reng n bee Betsayida. La kaoosg zugẽ a Pɩɛɛr ne a Ãnder yikame n tɩ zĩnd Kapɛrnawom. La wõnda yaa be me la a Matɩe ra be. A Zak ne a Zã ra yaa zĩm-yẽedba, la yaa wa bãmb me ra bee Kapɛrnawom bɩ sẽn pẽ be. Wõnda yaa tʋm-tʋmd a Zida Iskariot sẽn wa n zãmb a Zezi kaoosg zugẽ wã bal n da yit Zide. Mark 3:13-19; Luk 6:12-16.

▪ Tõeeme tɩ tʋm-tʋmdb bʋs n kĩ ne a Zezi?

▪ Ãnd rãmb la a Zezi tʋm-tʋmdba, la wãn to la y tõe n tẽeg b yʋyã?

▪ Tʋm-tʋmdbã ra yita tẽn-bʋse?