A Zeezi yãka tʋm-tʋmdb piig la a yiibu

A Zãmbatiis sẽn da yã a Zeezi n yeel vẽeneg tɩ yẽnda la Wẽnnaam Pebilã kolga yʋʋmd la pʋɩ-sʋka. A Zeezi sẽn wa n sɩng a koe-moonegã, rap sẽn sɩd nong Wẽnnaam n sak n lebg a karen-biisi. D tõe n sõdga a Ãndere, a Sɩmo b sẽn boond me t’a Pɩyɛɛrã, a Zã, a Filip la a Natanayɛll b sẽn boond me t’a Bartelemi wã. Tõeeme t’a Zak sẽn yaa a Zã ba-biigã me ra naagame. Kaoosg zugẽ, neb a taab me n wa n lebg a karen-biisi.—Zã 1:45-47.

Wakat taame masã t’a Zeezi na n yãk a karen-biis kẽer tɩ b lebg a tʋm-tʋmdba. Nin-kãensã na n tũ-a-la wakat fãa, la b paam zãmsg sõma n yɩɩd karen-biis a taabã. La nand t’a Zeezi yãk-ba, a kẽnga tãng a ye zug n na n tɩ pʋʋse. Tog n yaa tãng sẽn pẽ Galɩle mogrã sẽn pa zãr ne Kapɛrnawomã. A tɩ pʋʋsa yʋng tõre. Tõe t’a kosa Wẽnnaam t’a kõ-a yam, la a ning-a bark t’a yãkrã yɩ sõma. Vẽkembeoogã, a boola a karen-biisã, n yãk bãmb 12 tɩ b na n lebg a tʋm-tʋmdba.

A Zeezi yãka neb a yoobã d sẽn sõdg sakã sɩngrẽ wã, n paas a Matye sẽn da yaa yõor yaood dɛɛgdã. Neb a nu wã sẽn ketã yaa a Zʋʋda, (b sẽn boond me t’a Tade bɩ a “Zak biigã”) ne a Sɩmo sẽn yit Kana wã, la a Toma ne a Zak sẽn yaa a Alfe biigã, n paas a Zʋdaas Iskaryo.—Matye 10:2-4; Luk 6:16.

Bãmb 12 fãa ra zoe n tũuda a Zeezi n gilgdẽ, t’a mi-b sõma. A ra kĩi ne kẽer menga. A Zak ne a Zã ra yaa a Zeezi yagen-taase. Neb kẽer me yetame t’a Alfe yaa a Zeezi ba-wubdg a Zozɛf ba-biiga. Sã n yaa woto, dẽnd tʋm-tʋmd a Zak sẽn yaa a Alfe biigã yaa a Zeezi yagen-taaga me.

A Zeezi ra mii a tʋm-tʋmdbã fãa yʋyã. La yãmb yẽ? Y mii b fãa yʋy bɩ? Ad bũmb sẽn tõe n sõng-yã. Tẽeg-y tɩ Sɩmo rãmbã yaa a yiibu, Zak rãmbã yaa a yiibu, tɩ Zʋdaas rãmbã me yaa a yiibu. A Ãndere yaa a Sɩmo b sẽn boond me t’a Pɩyɛɛrã ba-biiga. A Zã yaa a Zak ba-biiga. Bãmb yaa a Zebede kamba. Woto, yaa bãmb b nii yʋy la y zoe n miẽ. Neb a naas n kelle. Yõor yaood dɛɛgd a Matye, ne a Toma sẽn maan sãmbsã, la a Natanayɛll sẽn da zĩ tɩɩg tẽngr b sẽn wa n na n bool-a wã, n paas a zoa a Filip.

Tʋm-tʋmdb 11 wã fãa yita Galɩle soolmẽ wã wa a Zeezi. A Natanayɛll yita Kana, t’a Filip ne a Pɩyɛɛr la a Ãndere yit Betsayɩda. A Pɩyɛɛr ne a Ãndere wa n tɩ vɩɩ Kapɛrnawom. Wõnda a Matye me ra vɩɩ be. A Zak ne a Zã ba-yir tog n da yaa Kapɛrnawom, bɩ tẽng sẽn pẽ be. B ra yaa zĩm-yõgdba. Yaa a Zʋdaas Iskaryo bal n da yit Zʋʋda soolmẽ wã. Yẽ la sẽn wa n zãmb a Zeezi wã.