Sak 36

Sodaas naab sẽn tall tẽeb kãsenga

AZEZI Tãng zug Zãmsgã wakat t’a koe-moonegã tʋʋmd taa a pʋɩ-sʋk la bala. Woto rat n yeelame tɩ sẽn zems yʋʋmd la kiis a wɛ bal n ket t’a baas a tʋʋmdã tẽngã zugu.

Masã a Zezi kẽe Kapɛrnawom tẽngã pʋgẽ, sẽn da lebg wala a sik-zĩigã. Beenẽ, Zʋɩf rãmbã kãsem dãmb wa n kos-a-la bũmbu. Rom sodaas naab a yembr sẽn ka Zʋɩf n tʋm-b a Zezi nengẽ.

Sodaas naabã sõgen-nongr n da lʋɩ bã-kɛgeng n dat n ki, tɩ b ra rat t’a Zezi tɩ sãoog-a. Zʋɩf rãmbã wa n yõka a Zezi sɛɛg t’a wa sõng sodaas naabã, n yeele: “Yẽ zemsame tɩ yãmb maan woto n kõ-a, tɩ bõe, a nonga tõnd buudã, la yaa yẽ n me tõnd karen-doogã.”

Zĩig pʋgẽ bala a Zezi tũu rapã n kẽnge. La b sẽn wa n kolg zakã, sodaas naabã tʋma a zo-rãmb tɩ b wa yeele: “Zusoaba, ra nams-y y meng ye, tɩ bõe, mam ka zems tɩ yãmb kẽ mam zakẽ ye. Yaa woto yĩng n kɩt tɩ mam ka tẽed tɩ mam zemsame tɩ wa yãmb nengẽ me ye.”

Sodaas naabã sẽn da minim n kõt neb noy n yaool n gom woto wã, ad yaa sik-m-meng tɛkẽ! La tõeeme me t’a ra wilgda waoogr ne a Zezi, bala a miime tɩ Zʋɩf rãmbã rog-m-mik ra gɩdgame tɩ Zʋɩf ra lagem ne buud a to ned ye. Ba a Pɩɛɛr meng yeelame: “Yãmb mi t’a ka Zʋɩf rãmb tõogo tɩ ned sẽn yaa Zʋɩf buud mag ne ned sẽn ka Zʋɩf buudu walla kẽ a zak pʋgẽ ye.”

Tõeeme tɩ yaa sẽn na yɩl t’a Zezi ra kɩɩs rog-m-mikã n wa paam yell la naabã sẽn tʋm a zo-rãmbã tɩ b wa kos t’a Zezi maan woto wã: “Bɩ y togs bala, la mam tʋm-tʋmda na n paama a menga, tɩ bõe, mam meng yaa rao neb sẽn so. La mam me soo sodaase. Mam sã n yeel a yembre t’a kẽnge, a kẽngdame. La mam sã n yeel a to t’a wa, a watame. La mam sã n yeel m tʋm-tʋmd t’a maan woto, a maandame.”

A Zezi sẽn wʋm woto wã, ling-a-la wʋsg t’a yeele: “Mam yeta yãmba, tɩ baa Israɛll sʋka, mam nan ka yã tẽeb kãseng woto ye.” A Zezi sãooga sodaas naabã sõgna. Rẽ poore, a tũnuga ne yel-kãngã n togs tɩ buud a taab neb sẽn tar tẽeb na n paama bark nins Zʋɩf rãmb sẽn ka tẽeb sẽn zãgsã.

A yeelame: “Neb na n yii yaang la taoore n zĩnd n dɩ ne a Abrahaam la a Izaak la a Zakoob [saasẽ Rĩungã] pʋgẽ. La b na n loba [Rĩungã] kamba lik sẽn be kɛɛng zĩiga, la yãbr ne yẽn wãbr na n zĩnda be.”

B loba Rĩungã kamb lik sẽn be kɛɛng zĩiga. Kom-kãens yaa sẽn dog-b n yaa Zʋɩf rãmba. Bãmb la b sẽn da reng n kãab zu-noog ning sẽn yaa naag Kiristã n dɩ naamã, la b ka sak ye. A Abrahaam, a Izaake, la a Zakoob makda Rĩungã siglgu. Woto, a Zezi togsdame tɩ makr wɛɛngẽ, neb sẽn ka Zʋɩf rãmb la b na n sak tɩ b wa naag n zĩnd saasẽ Rĩungã pʋgẽ. Luk 7:1-10; Matɩe 8:5-13; Tʋʋma 10:28.

▪ Bõe yĩng tɩ Zʋɩf rãmbã wa yõk a Zezi sɛɛg t’a tɩ sõng sodaas naab sẽn ka Zʋɩfe?

▪ Tõe n yaa bõe yĩng la sodaas naabã sẽn ka bool a Zezi t’a wa kẽ a zakẽ wã?

▪ A Zezi baasg goamã võor yaa bõe?