Sak 38

A Zã konga tẽeb bɩ?

LISD a Zã sẽn da be bãens-roogẽ zemsa yʋʋmd la woto masã. B wa n togs-a-la Nayin pʋg-kõorã biribl vʋʋgr kɩbare. La a Zã ra ratame n wʋm yel-kãensã võor a Zezi meng noorẽ. Rẽ n so t’a tʋm a karen-biis a yiib tɩ b tɩ sok a Zezi yaa: “Yãmb yaa sẽn tog n wa-a wã bɩ, bɩ tõnd tog n gũu a to?”

Woto tõeeme n yɩ lingr ne neb wʋsgo. Bala a Zezi sẽn da wa n deegd lisgã sẽn kolg yʋʋm a yiib la woto wã, a Zã yãa Wẽnnaam vʋʋsem sõngã sẽn sig a zugu, la a wʋm Wẽnnaam koɛɛg sẽn yeel t’a Zezi taa a yam. A Zã sokrã tõe n kɩtame tɩ neb kẽer tags t’a tẽebã boogame. La ka woto ye. Bala a Zezi pẽga a Zã wʋsg wakat kãngã. Ra ka na yɩẽ woto, sã n da mikẽ lame t’a Zã sɩnga sãmbs ye. Dẽ, bõe yĩng masã t’a Zã sokd woto?

Tõeeme t’a Zã ra ratame t’a Zezi wilg tɩ yẽ n sɩd yaa Mesi wã. A Zã sẽn da be bãens-roogẽ wã, woto ra na n kenga a pɛlga. La ka rẽ bal la a Zã ra rat n bãng ye. Wõnda a ra rat n bãnga sã n yaa ned a to n segd n wa a Zezi poorẽ, n pids bũmb nins fãa b sẽn da reng n togs tɩ Mesi wã na n wa maaname wã n baase.

Biiblã bãngr-goam ra wilgdame tɩ Wẽnnaam sẽn zae a soabã ra segd n yɩɩ rĩm la fãagda. A Zã ra mii rẽ. Baasg zãnga, a Zezi lisgã loogr kiis wʋsg poor mengã a Zã ra ket n bee bãens-roogẽ. Dẽ, yaa wala a Zã ra sokda a Zezi woto: ‘Fo yaa ned ninga sẽn segd n wa lugl Wẽnnaam Rĩungã ne pãng vẽenegã bɩ, bɩ d segd n gũu ned a to t’a wa pʋgl foom n pids bãngr-gom-kãsems nins fãa sẽn tɩ loe ne Mesi wã ziirã?’

A Zezi ka yeel a Zã karen-biisã tɩ, ‘yaa vẽeneg tɩ yaa maam la sẽn tog n wa-a wã’ ye. Wakat kãng bala a Zezi maana yel-soalem wʋsgo, n sãoog neb wʋsg bãas buud toɛ-toɛya, tɩ woto yɩ kaset sẽn yaa vẽeneg n kõ nebã. Rẽ poore, a yeela a karen-biisã: “Kẽng n tɩ togs-y-yã a Zã bũmb nins yãmb sẽn yã la y wʋma. Zõens yãtame, põe kẽndame, wãoob paamda maagre, wʋms wʋmdame, kũum vʋʋgdame la Koe-noog moonda naong rãmb sʋka.”

Sẽn dat n yeele, tɩ tõeeme t’a Zã sokrã wilgdame t’a ra gũudame t’a Zezi maan tɩ yɩɩg a sẽn maandã, n yiis yẽ bãens-roogẽ wã menga. La a Zezi ra yeta a Zã t’a ra gũ t’a maan yɛl a taab n zʋʋg yel-soalmã a sẽn maandã ye.

A Zã karen-biisã loogr poore, a Zezi goma ne kʋʋngã, n wilg-b tɩ ya a Zã la a Zeova “tʋm-tʋmd” ning waoong b sẽn deng n togs Malaki 3:1 pʋgẽ wã. Leb n yaa yẽ me la no-rɛɛs a Eli b sẽn deng n togs a waoong Malaki 3:23, 24 pʋgẽ wã. Woto, a Zezi pẽga a Zã, n wilg t’a Zã ne no-rɛɛsdb nins fãa sẽn deng yẽ wã zema taaba, n yeele: “Mam yeta yãmb sɩda, tɩ pagb sẽn dog b rãmbã fãa sʋka, ned ka be sẽn yɩɩd a Zã ye. La sẽn yaa yao-zʋʋg Wẽnnaam [Rĩungã] pʋgẽ wã yɩɩda yẽnda. A Zãmbatiis wakate hal tɩ ta masã, b maoodame n dat n paam [saasẽ Rĩungã] ne pãnga, la neb nangda pãng n dat n soog-a.”

Ka wã, a Zezi wilgdame t’a Zã ka na n zĩnd Wẽnnaam Rĩungã pʋgẽ ye, tɩ bõe, yao-zʋʋg Wẽnnaam Rĩungã pʋgẽ yɩɩda yẽnda. A Zã segla sor a Zezi yĩnga, la a ra na n kiime t’a Zezi nan ka maan kaoolã ne a karen-biisã sẽn na yɩl tɩ b naag yẽ n dɩ naam Rĩungã pʋgẽ wã ye. Yaa rẽ yĩng la a Zezi sẽn yeel t’a Zã ka na n zĩnd Rĩungã pʋgẽ saasẽ wã. La a Zã na n yɩɩ Wẽnnaam Rĩungã tẽng zug neda. Luk 7:18-30; Matɩe 11:2-15.

▪ Bõe yĩng t’a Zã ra sok n dat n bãng sã n ya a Zezi la sẽn da tog n wa-a wã, bɩ yaa ned a to la b ra segd n gũ?

▪ A Zezi yeelame t’a Zã pidsa bãngr-gom bʋse?

▪ Bõe yĩng tɩ Lisd a Zã ka na n zĩnd saasẽ ne a Zezi?