Sak 39

Wuk-m-mens rãmbã, la sik-m-mens rãmbã

AZEZI sẽn gom a Zã zʋg-sõma wã yell n sa wã, a goma wuk-m-mens rãmbã la yam-yuusg rãmbã sẽn da gũbg-a wã yelle. A yeelame: “Zãmaan kãngã . . . wẽnda wa kamb sẽn zĩ raagẽ n gomd ne kamb a taaba n yetẽ: ‘Tõnd peeba wɩɩs yãmb yĩnga, la yãmb ka sao warb ye, tõnd yɩɩla sũ-sãoong yɩɩla, la yãmb ka wiis ye.’ ”

A Zezi rat n yeelame tɩ bõe? A wilga woto: “Tɩ bõe, a Zã sẽn wa, a ka rɩta la a ka yũud me ye, la neba yeelame tɩ zĩn n tar-a. Ninsaal Biiga sẽn wa, a rɩtame la a yũuda, la neba yeelame t’a yaa yão-beed soaba la rã-yũuda, la yõor-yaood dɛɛgdba ne yel-wẽna rãmb zoa.”

Fo ka f sẽn na maaneg tɩ ta neba yam ye. A Zã yɩɩ Nazireyẽ sẽn tall mong-m-meng vɩɩm, sẽn baood t’a kɩɩs a meng raabã. A Zã saka malɛkã goam nins sẽn da yeel ‘t’a ra ka na n yũ rãam bɩ bũmb sẽn yilimd nengã.’ La neba baas n yeelame tɩ zĩn n tar-a. La a Zezi ka maan woto, a ra vɩɩ wa neb a taabã, yẽ ra ka tar rɩɩb kisg wa a Zã ye. Ne rẽ fãa, neba rõd-a lame t’a yaa yão-beed soaba.

Ad yɩl n tõog n maan tɩ ta neba yam yaa toogo! B yaa wala kamb sẽn deemd ne taaba. Bãmb dãmb zãgsame tɩ b kõn sao, b taab sẽn da wa n peebd wɩɩga, tɩ bãmb dãmb me zãgs tɩ b kõn wilg b sũ-sãanga, b taab sẽn da wa n wiisdẽ wã ye. Baasg zãnga, a Zezi yeelame: “Yam soab tʋʋma n wilgd t’a tara yam.” Sɩda, ya a Zã ne a Zezi tʋʋmã n yaa kaset sẽn wilgd tɩ b rõd-b-la zaalem.

A Zezi yãka tẽns a tãabo, sẽn yaa Korazin, Bɛtsayida, la Kapɛrnawom n ning taale. A maana a yel-soalmã wʋsg tẽn-kãense, la a yeel t’a sã n da maanẽ tʋʋm-kãens Tɩɩr la Sɩdõ sẽn yaa Fenisi tẽnsã, b neba ra na n pila bot la b zĩnd tompɛglmẽ n tek yam n kos sugri. A Zezi tʋʋmdã wakate, wõnda Kapɛrnawom n yɩ a sik zĩiga. A Zezi ninga tẽn-kãng me taal n yeele: “Mam yeta yãmb tɩ bʋʋd kaoob daare yãmb na n paama toogo n yɩɩd Sodom.”

Rẽ poore, a Zezi pẽga a saasẽ Ba wã neba taoore. A maana woto, bala Wẽnnaam solga yam dãmbã la bãngdbã sɩdã tẽebã wɛɛngẽ. La bõn-kãsems kãensã, a vẽneg-b-la sik-m-mens rãmbã la sẽn ya-b wala kom-bõonegã.

Sẽn na n baase, a Zezi maana bool-kãngã: “Bɩ y wa mam nengẽ yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo. Tɩ bõe, mam [tʋʋsga bʋgsa], la mam zɩɩb yaa faasga.”

Wãn to la a Zezi kõt yolsgo? Tũudmã taoor dãmb ra zɩsga nebã ne rog-m-migs sẽn kẽesd-b yembd pʋgẽ. Wala makre, vʋʋsg daarã ra tara kisg toɛy-toɛy sẽn weoog neba wʋsgo. A Zezi yolsa neba ne yembd kãngã. A leb n wilga neba sor tɩ b tõe n tũ n paam yolsg ne pãn-soaadbã weoog-kãsenga. Yel-wẽna sẽn kɩt tɩ b rãmb sũur kaset namsd-bã me paama yolsgo. A wilga neb a woto b sẽn tõe n paam b yel-wẽnã sugr to-to, la b sẽn tõe n paam zems-n-taar sẽn tar yõod wʋsg ne Wẽnnaam to-to.

Tʋʋsg sẽn yaa bʋgsg ning a Zezi sẽn da kãabdã yaa rɩk f meng zãng n kõ Wẽnnaam, tɩ woto kɩt tɩ f tõe n yɩ tõnd saasẽ Ba wã sẽn yaa nimbãan-zoɛt la sugr kõatã sõgne. La zɩɩb faasg ning a Zezi sẽn kãabd neb nins sẽn wat yẽ nengẽ wã yaa Wẽnnaam noyã sakre. Yaa noy nins sẽn be Biiblã pʋgẽ tɩ d segd n sak-b sẽn na yɩl n paam vɩɩmã. No-kãens sakr pʋd n ka toog tɩ loog baa bilfu. Matɩe 11:16-30; Luk 1:15; 7:31-35; 1 Zã 5:3.

▪ Wãn to la a Zezi zãmaanã neb sẽn yaa wuk-m-mens rãmb la yam-yuusg rãmbã yaa wala kamba?

▪ Bõe yĩng t’a Zezi pẽgd a Ba wã?

▪ Yel-bʋs n zɩsg nebã, la yols-bʋg la a Zezi kãab-yã?