Sak 40

Nimbãan-zoeer sẽn ya a soaba

TÕEEME t’a Zezi ra ket n bee Nayin, zĩig ning a sẽn vʋʋg pʋg-kõor biribl sẽn pa kaoos pʋgẽ wã. Leb n tõeeme t’a kẽnga tẽng a to sẽn pẽ be. Fariziẽ b sẽn boond t’a Sɩmo n da rat n bãng ned ning sẽn maand yel-soalmã sõma n paase. Rẽ n so t’a bool-a a yirã t’a wa rɩ.

A Zezi gesame t’a tõe n tũnuga ne so-kãngã a sẽn paamã n sõng sẽn na n zĩnd-b be wã. Rẽ n so t’a sak boollã, wala a sẽn da zoe n sak boaal a taab b sẽn da maan-a t’a wa rɩ ne lampo rɛɛgdb la yel-wẽn maandbã. La a Zezi sẽn kẽ a Sɩmo zakẽ wã, a ka reeg-a wa neba sẽn da minim n deegd sãamb to-to wã ye.

Ned sã n wid naooda n kẽn sor sẽn yaa tom zugu, a nao wã wɩngdame n puk ne wubsgu. Rẽ kɩtame tɩ ra yaa rog-n-mik buud tɩ f waas sãan nao ne ko-maasg n wilg-a sãando. La a Zezi sẽn ta a Sɩmo zakẽ wã, a nao wã ka paam waasg ye. B leb n ka pʋʋs-a ne mokr me wa b sẽn minim n maand bãmb tẽngẽ wã me ye. Sẽn paase, b ra nong n kõta sãan kaam a zoobd yĩnga, rẽ me a Zezi ka paam ye.

Neba sẽn da rɩtã wakate, pag n wa n kẽ roogẽ wã bãanem-bãanem tɩ b ka bool-a ye. Tẽngã neb ra miimi tɩ pagã yaa pʋg-yoodre. Wõnda pagã ra kelga a Zezi zãmsgã, wala a sẽn yeel tɩ ‘neb nins fãa sẽn tar zɩɩbã bɩ b wa yẽ nengẽ t’a kõ-b yolsgã.’ La a sẽn yã la a wʋm bũmb ningã kẽe a sũurã sõma, tɩ rẽ kɩt t’a bao a Zezi n yã.

Pagã waa taablẽ wã a Zezi poorẽ, n yĩgimd a naowẽ wã. A ra yãbdame t’a nintãmã madgd a Zezi nao wã, t’a yẽesd a Zezi nao wã ne a zoobdã. A leb n yiisa kaam sẽn tar yũ-noog a tʋkẽ wã, n mogsd a Zezi nao wã la a sõod-b ne kaamã. A Sɩmo sẽn yã yellã pa yɩ-a noog ye. A tagsa a sũurẽ woto: “Dao kãnga sã n yaa Wẽnnaam no-rɛɛsa, a na n bãnga pag ninga sẽn tikd yẽ wã yelle, tɩ yẽ yaa yel-wẽn soaba.”

A Zezi bãnga a tagsgã n yeele: “Sɩmo, mam dat n togsa foo bũmbu.”

T’a Sɩmo yeele: “Karensaamba, togs-y-yã.”

T’a Zezi sɩng goam n yeele: “Ned a yembre n da be, la neb a yiib n tar a samde. Yembrã tara samd denie kobs-nu, t’a yembrã tar pis-nu. La bãmb sẽn ka tar n na n yao wã, yẽ basa bãmb b yiibã fãa taale. Ãnda bãmb sʋka n na n nong yẽnda n yɩɩda?”

T’a Sɩmo leok tɩ: “Mam tẽedame tɩ yaa sẽn da tar-a samd wʋsgã.” Tõeeme tɩ yaa ne pa-nandem la a Sɩmo yeel woto, a sẽn get tɩ sok-kãngã wõnda sokr sẽn pa tar yõodã yĩnga.

T’a Zezi yeele: “Fo togsa sɩda.” La a wẽnemd n gesa pagã n yeel a Sɩmo: “Yãmb yãa pʋg-kãngã bɩ? Mam kẽe yãmb zakẽ la yãmb ka kõ maam koom tɩ m waas m nao ye, la yẽ madga mam nao wã ne a nintãm n yẽes ne a zoobdo. Yãmb ka mok maam ye. La mam sẽn kẽ zaka pʋgẽ tɩ ta masã, pʋg-kãnga mokda mam nao wã n ka basdẽ ye. Yãmb ka sõog mam zug kaam ye. La pʋg-kãnga sõoga mam nao wã tɩdar kaam.”

Pagã manesem yɩɩ kaset sẽn wilgd t’a teka yam n kos sugr ne a sũur fãa, a pĩnd vɩ-yookã yĩnga. Rẽ n so t’a Zezi yeele: “Dẽ yĩnga, mam yeta foo tɩ yẽ yel-wẽna [ne b] sẽn yaa wʋsgã, a tara sugri, a nonglmã sẽn yaa wʋsgã yĩnga. La ned sã n paam sugri bũmb bilf yĩnga, yẽ nonglem yaa bilfu.”

Woto ka rat n yeel t’a Zezi ka get tɩ yoob yaa wẽng ye. Ayo, yel-kãngã wilgdame tɩ neb nins sẽn maan kongr b vɩɩmã pʋgẽ, tɩ rẽ poor tɩ b wilg b sũ-sãang ne b vɩɩmã, n wa Kirist nengẽ n na n paam yolsgã, a zoeta b nimbãanega. A Zezi kõo pagã yolsg hakɩka, n yeel-a: “Fo paama f yel-wẽna sugri. . . . Fo tẽeb n fãag foom, kẽng ne laafɩ.” Luk 7:36-50; Matɩe 11:28-30.

▪ Wãn-wãn la a Sɩmo reeg a Zezi?

▪ Ãnda n bao a Zezi n yã, la bõe yĩnga?

▪ Mak-bʋg la a Zezi rɩk-yã, la wãn-wãn la a wilg a võore?