Sak 42

A Zezi zaba Fariziẽ rãmbã

AZEZI wilgame tɩ sã n yaa ne a Sʋɩtãan pãng la a rigd zĩn dãmbã, dẽnd a Sʋɩtãan welga ne a menga. A paasame: “Bɩ y yeele tɩ tɩɩg yaa sõma la a biis yaa sõma, walla tɩ tɩɩg yaa wẽnga la t’a biis yaa wẽnse, tɩ bõe, b bãngda tɩɩg a biisẽ.”

Ned sã n ning a Zezi taal t’a sẽn maand tʋʋm sõmã n digd zĩn dãmbã n yiisdẽ wã a ya a Sʋɩtãan tʋm-tʋmda, yaa yalemdo. Tɩɩg biig sã n yaa sõma, tɩɩgã ka tõe n yaa tɩ-põosr ye. La Fariziẽ rãmbã womda bi-põosa, b yalem dõadgã la b sẽn tugd beem ne a Zezi zaalmã yĩnga, tɩ rẽ wilgdẽ tɩ bãmb mensã yaa neb sẽn ka barka. A Zezi yeelame: “Yãmb wag-toos buudu, yãmb sẽn yaa wẽnsã yãmb na n yɩɩ wãn n gom sõma? Tɩ bõe, sũur sẽn pid ne bũmb ningã, noor gomda bõn-kãense.”

Tõnd noor goamã wilgda sẽn be tõnd sũurẽ wã, dẽ b tõe n tika tõnd sẽn yetã zug n kao tõnd bʋʋdo. Rẽ n so t’a Zezi yeele: “Mam yeta yãmb tɩ gom-vɩɩda fãa nebã sẽn gomdã na n zĩnda b zut bʋʋdã kaoob daare. Tɩ bõe, yaa ne yãmb goama la y na n paam bʋʋm, la yaa ne yãmb goama la y na n kong bʋʋm.”

Ne yel-soalmã fãa a Zezi sẽn maandã, gʋlsdbã la Fariziẽ rãmbã baas n kos-a-la woto: “Karensaamba, tõnd datame tɩ yãmb wilg tõnd bõn-bãnde.” Tõeeme tɩ nin-kãensã sẽn yi Zerizalɛmã mens nif ka maan kaset ne a Zezi yel-soalmã ye, la neb n da be sẽn tõe n wilg vẽeneg t’a sɩd maan-b lame, tɩ b ka tõe n kɩɩs ye. Rẽ n so t’a Zezi yeel Zʋɩf rãmbã taoor dãmb woto: “Zãmaan kãnga neba sũur sẽn yaa wẽnse la yoaadba baooda bõn-bãnde. B ka na n kõ bãmb bõn-bãnd a to n paas Wẽnnaam no-rɛɛs a Zonas bõn-bãnda ye.”

A wilga a goamã võore, n leb n yeele: “A waa a Zonas sẽn da zĩnd zĩm kãsenga pʋgẽ dasem a tãab la yʋnd a tãabã, woto me Ninsaal Biigã na n zĩnda yaoogẽ dasem a tãabo la yʋnd a tãabo.” Zĩifã ra vola a Zonas, la a sẽn wa n wʋk-a wã, yaa wala a sẽn vʋʋge. Woto, a Zezi ra reng n togsdame tɩ yẽ me na n wa kiime, tɩ rasem a tãab poor bɩ b lebs n vʋʋg-a. Baasg zãnga, ba a Zezi sẽn wa n vʋʋg kaoosg zugẽ wã, Zʋɩf rãmbã taoor dãmb ka sak n tẽ “a Zonas bãndã” ye.

Rẽ n so, t’a Zezi yeel tɩ Niniiv neba sẽn tek yam n kos sugr a Zonas moonegã yĩngã na n vʋʋga bʋʋdã raar n ning Zʋɩf rãmbã sẽn pa sak n tẽ a Zezi wã taale. A leb n yeelame tɩ Seba Rĩm-poakã me na n maana woto. Bala yẽ me yii tẽng sẽn zãr n wa n na n kelg a Salomo yam goama, la a sẽn wʋma ling-a-la wʋsgo. “La gese, sẽn yɩɩd a Salomo bee ka,” woto la a Zezi yeel-ba.

Rẽ poore, a Zezi rɩka makre, n gom dao zĩn-dẽgd sẽn yi n bas yelle. La rao wã sẽn ka pids vɩʋʋgã zĩna sẽn basã ne bõn-sõma wã, zĩn dãmb a yopoe wẽnem sẽn yɩɩd pipi zĩna n wa n kẽ rao wã n paase. A yeelame: “A na n yɩɩ woto bal ne zãmaan kãngã nebã sẽn yaa wẽnsã.” Israɛll buudã paama yɩlgr la toeengo, tɩ rẽ yaa wala zĩn-dẽgd sẽn na n yi n bas ned wakat bilf yĩnga. La buudã neb zãgsa Wẽnnaam no-rɛɛsdbã, n wa baas n kɩɩs Kiristã menga. Woto wilgdame tɩ b wẽnemã yɩɩda sɩngrẽ wã menga.

A Zezi sẽn da wa n gomdã wakate, a ma wã ne a ma-biisã waame n yals kʋʋngã poore. Dẽ, ned n yeele: “Gese, y ma ne y ma-biisã bee yɩnga n dat n gom ne yãmba.”

A Zezi sokame: “Mam ma yaa ãnda, la ãnda rãmb la mam ma-biisi?” A teesa a karen-biisã, n yeele: “Ad mam ma ne m ma-biisi. Tɩ bõe, ned ning fãa sẽn maand mam Ba wã sẽn be [saasẽ] raabo, ada soab yaa mam ma-bi-raoogo ne m ma-bi-poaka la m ma.” Woto, a Zezi ra wilgdame t’a nonglmã ne a roagdbã sẽn sõs n yaa to-to me, a sẽn nong a karen-biisã n yɩɩda. Matɩe 12:33-50; Mark 3:31-35; Luk 8:19-21.

▪ Wãn to la Fariziẽ rãmbã ka tõog n maan tɩ ‘tɩɩgã’ la a ‘biisã’ fãa yɩ sõma?

▪ “A Zonas bãndã yaa bõe,” la bõe yĩng tɩ b wa zãgs-a kaoosg zugẽ?

▪ Wãn-wãn la pipi yʋʋm kob-gĩndẽ Israɛll buudã neb yaa wala rao ning zĩn-dẽgd sẽn yi n basã?

▪ Wãn-wãn la a Zezi wilg vẽeneg t’a nonglmã ne a karen-biisã tara pãnga?