Sak 44
A sigsa sebg sẽn yɩkd pɛlenga
A ZEZI tʋma baraar wʋsgo. A zãmsa kʋʋngã mogrã noore, la rẽ poore a wilga a karen-biisã makr toɛy-toɛyã võore. Zaabr sẽn ta, a yeel-b lame: “Wa-y tɩ d kẽng mogra rʋʋnde.”
Babg ning b sẽn boond tɩ Dekapollã ra bee Galile Mogrã yaang rʋʋnde. Dekapoll yaa Gɛrk gom-biis sẽn fãoog taabã: yaa deka, sẽn dat n yeel tɩ “piigã,” la polis, sẽn dat n yeel tɩ “tẽngã.” Dekapoll galʋ-tẽnsã yaa Gɛrk rãmbã vɩɩm manesem la b zãmsg nif zĩiga. La sãmbg sẽn ka be, Zʋɩf rãmb wʋsg n da be tẽn-kãens pʋsẽ me. Baasg zãnga a Zezi tʋʋmdã bab-kãngã pa yɩ wʋsg ye. Wa d sẽn na n yã taoorã, ba a kẽn-kãngã pʋgẽ menga, b pa na n bas-a t’a zĩnd be n kaoos ye.
A Zezi yeela a karen-biisã tɩ b kẽng mogrã rʋʋnde, tɩ b rɩk-a ne koom koglgo. La nebã bãnga b loogrã. Pa kaoos la neb a taab me kẽ koom kogend n na n tũ-b ye. Mogrã rʋʋnd ra ka zãr ye. Sɩd-sɩda, Galile mogrã yaa kʋɩl-kãsenga, t’a woglmã yaa kɩlometr 20, t’a yalma yaa kɩlometr 12.
A Zezi yaame masã, la a bee bʋʋm. Dẽ, b sẽn loogã, pa kaoos la a Zezi kẽng koglgã poorẽ n tɩ gãand ye. A kʋgla a zugã zu-kʋk n gõe sõma. Tʋm-tʋmdbã kẽer yaa koom-kogend mitba, bala b ra yẽe zĩm Galile Mogrã pʋgẽ wʋsgo. Rẽ n so tɩ b reeg koomã gaab tʋʋmd n na n kẽng ne koglgã.
La kẽn-kãngã yɩɩ kẽnd sẽn ka yɩ nana ye. Galile mogrã bee zĩig sẽn yaa pãar wʋsg pʋgẽ. Galile mogrã zug pemsem yaa tʋʋlga, tɩ pemsem ning sẽn buiid tãensã sẽn pẽ be wã yaa maasga. Rẽ kɩtdame tɩ seb-kãsems yikd n fugd koomã zugu, n lebgd seb-bɛd zĩig pʋgẽ. Yaa rẽ n maand masã wã. Pa kaoos la ko-pɛmã wat n wẽed koom koglgã, n kẽed a pʋgẽ hal t’a ra rat n bõr ye. La a Zezi ra ket n gõeeme!
Karen-biisã ne b koom gaab minimã fãa, gaa koomã ne b pãngã fãa sẽn na yɩl n togl koglgã tɩ zemse. Yaa vẽeneg tɩ b zoe n sega seb-kãsems ne koom kogend pĩnda. La so-kãngã looga b nugu. B sẽn baood b yõyã yĩng kɩtame tɩ b nek a Zezi. B kaasa woto: ‘Yãmb pa ne tõnd sẽn na n ki wã la, n maand wa y toog ka be? Tõnd bõrdame! Fãag-y-d tɩ koomã rat n dɩ-d lame!’—Sebr Sõngo.
A Zezi yikame n tãs sebgã la mogrã n yeele: “Sĩndi, bas bʋʋre.” La sebgã sẽn da fugd wʋsgã yõkame, tɩ mogrã lebg sɩɩ. A Zezi wẽnemd n soka a karen-biisã woto: “Yaa bõe tɩ yãmb zoet rabeem woto? Yaa wãn tɩ yãmb ka tar tẽebo?”
Woto kẽesa karen-biisã rabeem kãseng tɩ b sok taaba: “Nin-kãnga yaa bõe neda tɩ sobgã ne mogrã sakd bãmba?”
Ad yaa tõog meng la a Zezi sɩd wilg-yã! Ad sɩd kõta tõnd bas-m-yam tɩ d bãng tɩ tõnd Rĩmã tara tõog sebg la saag n paas yɛl sẽn wõnd woto zutu, la t’a sã n wa get tẽngã gill yell a Rĩungã naam wakate, neba fãa na n zĩnda laafɩ tɩ tẽngã sabab-yɛɛsdɩ ra nams-b ye!
A Zezi ne a karen-biisã taa mogrã rʋʋnd ne laafɩ, sebgã yõkr poor bilfu. Tõe tɩ seb-kãsengã ka paam koom kogend a taabã ye, tɩ b tõog n leb yir laafɩ. Mark 4:35–5:1; Matɩe 8:18, 23-27; Luk 8:22-26.
▪ Dekapoll yaa bõe, la yɛ la a be?
▪ Yel-bʋs n wat ne seb-kãsems Galile Mogrã zugu?
▪ B koom gaab minima sẽn ka tõog n fãag-bã, bõe la karen-biisã maan-yã?