Sak 53

B rata naab sẽn tar tõog sẽn yɩɩd ninsaal tõogo

AZEZI sẽn maan yel-soalem n dɩlg neb tusa wã linga nebã. Dẽ b yeelame: “Sɩda, bãmb yaa Wẽnnaam no-rɛɛs ning sẽn tog n wa dũniyã zugã.” B tagsame t’a Zezi tog n yaa no-rɛɛs ning sẽn yɩɩd a Moiizã yembo, la t’a tog n yɩɩ na-sõng me. Dẽ b sɩɩga taab noor n na n yõk-a n modg-a t’a lebg rĩma.

La a Zezi bãnga neba sẽn da segend n na n maanã. Dẽ tao-tao bala a loogame, sẽn na yɩl tɩ b ra tall-a ne pãng n loog ye. A kuilsa kʋʋngã la a pẽdg a karen-biisã tɩ b kẽ b koom koglg n lebg n tees Kapɛrnawom. Rẽ poore, a Zezi mengã kẽnga tãngã zug n na n tɩ pʋʋse. Yʋʋn-kãnga, a Zezi zĩnda a yembr be.

Zĩigã sẽn wa n kolg yẽegrã a Zezi zĩnda tãngã zug n yã tɩ seb-kãseng n gudgd koomã mogrã zugu. Pakã ra kolgame, tɩ kiuugã ra yaa pɛɛlg faga. Kiuugã peelem pʋgẽ, a Zezi yãame t’a karen-biisã maood ne ko-wiisã n dat tɩ koglgã kẽnge. B ra gaada koomã ne b pãngã fãa.

A Zezi sẽn yã rẽ wã, a siga tãngã zug n sɩng n kẽnd koomã zug n babsd koglgã. A Zezi sẽn da wa n ta koglgã zĩigẽ wã tɩ koglgã ra zoe n maana kɩlometr a nu bɩ a yoobe. La a Zezi sẽn ta wã a maana wa a na n yõsga koglgã. Karen-biisã sẽn yã a Zezi wã b kelmame: “Yaa kɩɩma!”

T’a Zezi yeel woto n keng b pelse: “Yaa maam. Da zoe-y rabeem ye.”

La a Pɩɛɛr yeelame: “Zusoaba, sã n yaa yãmba, bɩ y kõ maam noor tɩ m kẽn kooma zug n wa yãmb nengẽ.”

T’a Zezi leoke: “Wa!”

Dẽ a Pɩɛɛr yii koglgã pʋgẽ n kẽnd koomã zug n segd a Zezi. La a Pɩɛɛr sẽn wẽnemd n ges seb-kãsengã, rabeem yõk-a lame, t’a sɩng bõrbo, n kelem: “Zusoaba, fãag-y maam!”

T’a Zezi yɩ tao-tao n tẽeg a nug n gãd-a, n yeele: “Tẽeb bilf soaba, yaa bõe tɩ fo yam yoaada?”

A Pɩɛɛr ne a Zezi sẽn leb koom koglgã pʋgẽ poore, sebgã yõkame, tɩ ling karen-biisã wʋsgo. La ra segd n ling-b lame bɩ? Lɛɛr a wãn sẽn deng rẽ, a Zezi rɩlga neb tusa ne bur a nu la zĩm a yiib bala. A karen-biisã sã n da wʋma ‘bura bõn-bãnd võore,’ n ning yel-solem kãseng kãngã b yamẽ, dẽ, b sẽn yã t’a Zezi tõe n kẽna koom zug la a kɩt tɩ sebg yõkã ra pa na n yɩ lingr ne-b ye. La masã b wõgemda a Zezi taoore, n yeele: “Yãmb sɩd yaa Wẽnnaam Biiga.”

Rẽ poore, pa kaoos la b ta Zenezarɛt ye. Tẽn-kãng ra pẽe Kapɛrnawom, n yaa zĩig sẽn be rasãnd la sẽn sakd koodo. Yaa be la b bas koglgã. A Zezi sẽn sig mogrã noorã neba bãng-a lame, n kẽng tẽn-kɩremsã n na n tɩ gẽes bãad dãmbã n tall n wa. B tʋka bãad dãmbã ne b gãas n wa. La b sã n da sɩɩs a Zezi zugẽ fuugã noor bal la b bãasã sẽn da sãoogd zãng fasɩ.

Wakat kãnga, neb kʋʋngã sẽn maan kaset ne a sẽn maan yel-solemd n dɩlg neb tusa wã yãame t’a loogame. Dẽ, koom kogend bõoneg sẽn yi Tiberiaad n wa wã, b kẽe bãmb n wa Kapɛrnawom n na n gẽes a Zezi be. B yãa a Zezi n sok-a woto: “Karen-saamba, yãmb waa ka rabʋre?” Wa d sẽn na n yã taoorã, a Zezi zab-b lame. Zã 6:14-25; Matɩe 14:22-36; Mark 6:45-56.

▪ A Zezi sẽn maan yel-solemd n dɩlg neb tusa wã poore, bõe la neba ra rat n maan-a?

▪ A Zezi zĩnda tãng ning a sẽn kẽngẽ wã zug n yã bõe, la rẽ poore bõe la a maan-yã?

▪ Bõe yĩng tɩ bõn-kãensã ka segd n ling a karen-biisã wʋsg woto?

▪ B sẽn ta mogrã noorã poore, bõe n maane?