Sak 52
A Zezi rɩlga neb tusa ne yel-solemde
TƲM-TƲMDB 12 wã sũy yɩɩ noog wʋsg ne b sẽn gilg n moon Galile pʋgẽ wã. A Zã kʋʋbã poor bilfu, b lebg n tɩ togsa a Zezi bõn-kãsems nins b sẽn maanã. A Zezi yãame tɩ b yaame, la tɩ neba wʋsg sẽn da wat la b lebdẽ wã, kɩtame tɩ b ka tar weer n na n dɩ meng ye. Rẽ n so t’a Zezi yeel woto: ‘Bɩ d kẽng we-kɛɛng ned sẽn ka beẽ tɩ y tɩ vʋʋs bilfu.’
B kẽe b koom koglgã Kapɛrnawom sɛɛgẽ n tees zĩig neb sẽn ka beẽ, Zʋrdẽ kʋɩlgã yaang rʋʋnde, Bɛtsayida poorẽ. La neb wʋsg yãa b loogrã, tɩ kẽer me wʋme. B fãa zoeeme n yɛg mogrã noor n deng-ba. La koglgã ta n mikame tɩ neba ra bee be n gũud-ba.
A Zezi sẽn yi koglgẽ wã n yã kʋʋngã, neba nimbãaneg yõk-a lame, bala b ra yaa wa piis sẽn ka tar pe-kɩɩma. Woto, a sãooga b bãad dãmbã la a sɩng n zãmsd-b yɛl wʋsgo.
Wakatã looga tao-tao, t’a karen-biisã wa a nengẽ n yeel-a: “Zĩ-kãngã yaa weoogo, la wakat loogdame. Bɩ y kɩt tɩ neba looge n kẽng zĩis sẽn pẽneg la tẽn-kɩremse n tɩ ra rɩɩb n dɩ.”
La a Zezi leokame: “Bɩ yãmb mens kõ bãmb dɩɩb tɩ b rɩ.” Dẽ, a Zezi sẽn zoe n mi a sẽn na n maanã yĩngã, a soka a Filip woto n na n gese: ‘Tõnd na n daa rɩɩb yɛɛnẽ tɩ sek nin-kãensã fãa rɩɩbo?’
Sã n yaa ne a Filipi, rẽ yaa bũmb sẽn ka tõe. Bãng-y tɩ rapa sõor da zemsa 5 000, la tõeeme tɩ b sã n sõd pagbã la kambã n naag bɩ yɩɩd neb 10 000 menga! A Filip leokame tɩ “baa tõnd sã n da bur denie kobs-yi [denie ra yaa raar a ye tʋʋmd yaood wakat kãnga] kõn sek tɩ ned kam fãa paam bilf ye.”
Tõeeme tɩ yaa sẽn na yɩl n wilg tɩ neb wʋsg woto rɩlgr yaa toogã la a Ãnder sẽn yeel tɩ: “Biig a yembr n be ka n tar bur a nu sẽn maan ne orz zom, la zĩm bõoneg a yiibu,” la a paase, “la bãmb yaa bõe ne neb wʋsg woto?”
Sẽn yaa tʋʋlg bɩ tʋʋl-nif kiuugã, sẽn deng yʋʋmd 32 Pakã bilf balã, moodã ra yii wʋsgo. Dẽ a Zezi yeela neba tɩ b zĩnd ball-balle, pis-nu-nu la koabg-koabg moodã zugu. A rɩka bur a nu wã la zĩm a yiibã, n nak n ges yĩngri, n pʋʋs n ning barka. Rẽ poore a sɩngame n wesd burã la a yãkd zĩma n pʋɩta. A rɩkame n kɩs a karen-biisã, tɩ bãmb me rɩk n pʋɩ nebã. Yɩɩ lingr menga, bala neba fãa rɩɩme hal tɩ sek-ba!
Rẽ poore, a Zezi yeela a karen-biisã: “Bɩ y wʋk bur gɩrsa sẽn kellã tɩ ba a ye ra menem ye.” B sẽn wʋk rɩ-kɛlã neba sẽn basã, pida pet 12! Matɩe 14:13-21; Mark 6:30-44; Luk 9:10-17; Zã 6:1-13.
▪ Bõe yĩng t’a Zezi ra baood zĩig neb sẽn ka beẽ a karen-biisã yĩnga?
▪ Yɛ la a Zezi ra talld a karen-biisã n debda, la bõe yĩng tɩ b ka tõog n paam n vʋʋse?
▪ Zĩigã sẽn wa n zʋʋgã, bõe la karen-biisã yeel a Zezi t’a maane, la wãn to la a Zezi ges neba yelle?