A maaname tɩ bur a nu la zĩm a yiib sek neb tusa

Tʋm-tʋmdb 12 wã gilga Galɩle n moon koɛɛgã hal tɩ b sũy noomẽ. B wa n togsa a Zeezi “bũmb nins fãa bãmb sẽn maane, la b zãms nebã.” B yaame, la b bee bʋʋm me. Baa ne rẽ, b pa tar sẽk n dɩtẽ ye. Bala nebã ra yaa wʋsg n watẽ la b loogdẽ. Rẽ n so t’a Zeezi yeel-b yaa: “Wa-y tɩ d yi we-kɛɛnga, neb sẽn ka beẽ tɩ y tɩ vʋʋs bilfu.”—Mark 6:30, 31.

B kẽe koom-koglgo, la tog n yaa Kapɛrnawom sɛɛgẽ, n yõsg Betsayɩda sẽn be Zʋrdẽ kʋɩlgã yaangã, n na n paam zĩig neb sẽn ka beẽ. La neb wʋsg yãa b loogrã. Neb a taab me wʋmame tɩ b teesa beenẽ. B zoeeme n yɛg mogrã noore, n deng a Zeezi rãmb beenẽ.

A Zeezi sẽn sig koglgã pʋgẽ n yã kʋʋngã, b nimbãaneg yõk-a lame. Bala b ra yaa wa piis sẽn ka tar pe-kɩɩma. La a sɩngame n na “n zãms-b bũmb wʋsgo.” (Mark 6:34) A maaga “neb nins sẽn dag n dat maagrã” me. (Luk 9:11) Zĩigã sẽn wa n sobgdẽ, karen-biisã yeela a Zeezi yaa: “Zĩ-kãngã yaa weoogo, la wakatã zoe n yõsgame. Rẽ wã, bɩ y kuils nebã tɩ b kẽng tẽmsẽ wã n tɩ ra rɩɩbo.”—Matye 14:15.

A Zeezi yeel-b-la woto: “Ka tɩlɛ tɩ nebã loog ye, bɩ yãmb mensã kõ-b rɩɩb tɩ b rɩ.” (Matye 14:16) Baa a Zeezi sẽn da zoe n mi yẽ sẽn na n maanã, a sẽn da rat n bãng a Filip tagsgã, a sok-a-la woto: “Tõnd na n daa bur yɛɛnẽ tɩ nin-kãensã paam rɩɩbo?” Sẽn yaa a Filip la a sok-yã zemsame, bala a yita Betsayɩda sẽn pa zãr ne beenẽ wã. La baa b sã n da bur me, pa yellã tɩɩm ye. Bala, rapã yen-yen ra taa neb 5000. B sã n naag pagbã la kambã, nebã sõor taa tus piiga. A Filip leokame tɩ “deniye kobsi bur ka tõe n sek tɩ ned fãa paam bur-gɩrg ye.”a—Zã 6:5-7.

Bũmb la a Ãndere me yeel-yã, la tõe t’a ra rat n wilgame bal tɩ b pa tõe n dɩlg nin-kãensã fãa ye. A yeelame: “Bi-ribl bil n be ka n tar Oorz bur a nu ne zĩm a yiibu. La rẽnda yaa bõe ne neb sõor a woto?”—Zã 6:9.

Ra zemsa tʋʋlg bɩ tʋʋl-nif kiuugã. Yʋʋmd 32 Pakã ra kolgame, tɩ moodã sẽn da be tãensã zutã yaa kẽeg hauu. A Zeezi kɩtame t’a karen-biisã yeel nebã tɩ b zĩnd sul-sula, neb pis-nu-nu, la neb koabg-koabga. A reega bur a nu wã la zĩm a yiibã, n pʋʋs Wẽnnaam t’a ning barka. Rẽ poore, a kaoo burã la a wes zĩmã, n dɩk n kõ a karen-biisã tɩ b kõ nebã. Yɩɩ lingr menga, bala nebã fãa rɩɩme tɩ seke.

Nebã sẽn dɩ n sa, a Zeezi yeela a karen-biisã tɩ b “wʋk rɩ-zersã sẽn kellã, tɩ bũmb baa a yembr da pa n sãam ye.” (Zã 6:12) B sẽn wʋk rɩɩbã sẽn kellã, pida pet 12.