Sak 58

Burã la rabɩllã

DEKAPOLL pʋgẽ, neb kʋʋng n kaoog n wa a Zezi nengẽ. Neb wʋsg n yi zĩ-zãrsẽ n wa bab-kãngã sẽn ka-b Zʋɩf rãmb wʋsg sẽn beẽ wã n na n kelg a Zezi la b paam t’a sãoog b bãase. B sã n da pasgd sẽn ka-b Zʋɩf rãmbã tẽnse, b ra nong n zɩta pet ne rɩɩb nins b sẽn datã.

La a Zezi wa n baas n boola a karen-biisã, n yeel-ba: “Kʋʋnga nimbãaneg tara maam: tɩ bõe, yaa rasem a tãab masã la b be ne maam n ka tar dɩɩb n na n dɩ ye. Mam sã n kɩt tɩ b kuil ne kom, bãmb na n lʋɩɩ sorẽ, tɩ bõe, kẽer yii zĩ-zãrgẽ.”

Dẽ karen-biisã sokame: “Ned na n yɩɩ wãn n paam bur weoogẽ ka tɩ sek bãmba fãa?”

T’a Zezi lebs n sok-b tɩ: “Yãmb tara bur a wãna?”

Tɩ b leoke: “A yopoe, la zĩm-bõoneg bilfu.”

A Zezi yeela neba tɩ b zĩnd tẽnga. Rẽ poore, a rɩka burã la zĩma, n pʋʋs Wẽnnaam, n wes-ba, n dɩk n kɩs a karen-biisã tɩ b pʋɩ nebã tɩ b rɩ n tɩge. Baa ne sẽn yaa rap 4 000 n paas pagb ne kamb n dɩ wã, b wʋka rɩ-kɛlã n pids pet a yopoe!

A Zezi kuilsa kʋʋngã, la a kẽ koom koglg ne a karen-biisã n dʋʋg n kẽng Galile Mogrã nen-taoor rʋʋndã. Beenẽ Sadiseẽ rãmbã tũu Fariziẽ rãmbã tɩ b na n wa bẽd a Zezi, n kos-a t’a wilg-b bãnd sẽn yit saasẽ.

A Zezi ra miime tɩ b rat n kʋɩɩb-a lame, t’a leok-ba: “Zaabre yãmb yetame tɩ zĩiga na n yɩɩ vẽenega, tɩ bõe, yĩngr yaa miuugu. La yibeoogo yãmb yetame tɩ saag na n waa rũnda, tɩ bõe, yĩngr yaa miuugu la sablga. Yãmb mii yĩngr yɛla n yaool n ka tõe n bãng bãn sẽn wilgd wakat ye.”

Dẽ, a Zezi yeelame tɩ b yaa zãmaan neb sẽn yaa wẽns la yoaadba, n yeel-b wala a sẽn da pĩnd n yeel Fariziẽ rãmbã, tɩ b kõn paam bãnd n zʋʋg a Zonas bãndã ye. A Zezi ne a karen-biisã kẽe koom koglg n tees Betsayida, sẽn be Galile Mogrã rɩtg rʋʋndã. Sorã zugu, karen-biisã tẽegame tɩ b ka zɩ bur ye, bala bur a yembr bal n da ket b nengẽ.

A Zezi ra ket n tagsda goam nins a sẽn tall sẽn pa kaoosã ne Fariziẽ rãmbã la Sadiseẽ rãmbã sẽn ya a Herood poorẽ dãmbã yelle. Rẽ n so t’a sagl a karen-biisã: “Gũus-y y mens neer ne Fariziẽ dãmba la Herood dabɩlle.” Wõnda a Zezi sẽn yet tɩ rabɩllã, a karen-biisã tagsame t’a Zezi ra gomda bãmb sẽn yĩm n ka zɩ burã yelle, tɩ b sɩng n wẽed no-koeemd yellã zugu. A Zezi sẽn bãng tɩ b ka wʋm a goamã võorã, a yeelame: “Yaa wãn tɩ yãmb yẽsd ne taab tɩ yaa yãmb sẽn ka tar bura yĩnga?”

Yɩ tɩ zaamẽ bɩ rabɩtẽ nanda, bɩ sẽn ka zãr ne rẽ, a Zezi ra kõo neb tusa bur ne yel-solemde. Dẽnd karen-biisã ra segd n bãngame tɩ ka bur meng-meng sẽn ka be wã n pak a Zezi ye. A tẽeg-b lame: “La yãmb ka tol n tar pʋ-tẽer la? Mam sẽn kao bur a nu n kõ daop tus a nu wã, yãmb wʋka bur gɩrsa sẽn kella peoog a wãna?”

Tɩ b leok tɩ “piig la a yiibu.”

“La mam sẽn kao bur a yopoe n kõ raop tus a naasã, yãmb wʋka bur gɩrsa sẽn kella peoog a wãna?”

Tɩ b leb n leok tɩ ya “a yopoe.”

T’a Zezi soke: “Yãmb ket n ka mi la?” la a paase: ‘Yaa bõe tɩ yãmb ka bãng tɩ ka bur yell la mam gom ne yãmba? La gũus-y y mens ne Fariziẽ dãmba ne Sadiseẽ dãmba rabɩlle.’

Karen-biisã wa n baas n wʋma gomdã võore. Rabɩll kɩtdame tɩ rãam kũmi, la a wukd buri. Yaa rẽ yĩng la b sẽn dɩkd rabɩll n makd sãoongã. Dẽ masã la karen-biisã bãng t’a Zezi ra tũnugda ne makr buudu, n dat n keoog-b tɩ b gũus ne ‘Fariziẽ dãmba ne Sadiseẽ rãmba zãmsgo,’ sẽn yaa zãmsg sẽn sãamd nedã. Mark 8:1-21; Matɩe 15:32–16:12.

▪ Bõe yĩng tɩ neba ra zɩt peto?

▪ B sẽn yi Dekapollã poore, yɛ ne yɛ la a Zezi kẽ koom koglg n kẽnge?

▪ A Zezi sẽn gom rabɩllã yellã, bõe võor la karen-biisã ka wʋme?

▪ A Zezi sẽn yeel tɩ ‘Fariziẽ dãmba la Sadiseẽ dãmba rabɩllã’ võor yaa bõe?