Sak 46

Pag n sɩɩs a Zezi fuugã

AZEZI sẽn yi Dekapoll n lebg n wa wã kɩbar taa Kapɛrnawom. Dẽ neb kʋʋng n tigim mogrã noor n gũud-a. Sãmbg sẽn ka be, b wʋmame t’a sigsa sebg la a sãoog rap zĩn dãmb sẽn da tara. La a sẽn sig mogrã noorã, neba lagem n gũbg-a lame n yãgdẽ n dat t’a maan bũmbu.

A Zairus sẽn yaa karen-doogã taoor soabã ra bee sẽn dat-b n yã a Zezi ne b sũy fãa wã sʋka. A kolg n wõgemda a Zezi taoor n bõos ne pẽdgr woto: “Mam bipugla rat n kiimi. Bɩ y wa n tik-a ne y nus t’a sãoog n tɩlge.” Bipuglã ra ya a bi-yende, n tar yʋʋm 12 bala. Yaa rẽ yĩng la a Zairus sẽn da nong-a wʋsg woto wã.

A Zezi sakame, n dɩk sor n debd a Zairus yirã, tɩ kʋʋngã yãagd-a. Tags-y n ges sũ-noog ning kʋʋngã sẽn da tara, b sẽn da gũud n na n yã yel-solemd a to wã. La bãmb sʋkã, pag a yembr meng yel-kɛgeng n da pak-a.

Hal sẽn na maan yʋʋm 12, pʋg-kãngã ra namsda ne zɩɩm yiib bãaga. A saa logtoɛɛmb hal t’a ligdã fãa wa sa tɩpg pʋgẽ tɩ ket n pa yãk neng ye, rẽnda bãagã sẽn wɩngd n paasdẽ bala.

Tõe tɩ y miimi tɩ bãagã komsd-a-la wʋsgo, la sẽn paase, leb n yaa yãnd ne-a. Naoor wʋsgo b ka gomd bã-kãngã yell neb sʋk ye. Sẽn paase, a Moiiz Tõogã ra yetame tɩ zɩɩm yiib kɩtdame tɩ pag yaa rẽgdo. Dẽ, ned ning fãa sẽn na n sɩɩs-a, bɩ sẽn na n sɩɩs a futã zɩɩmã sẽn madgã segd n soo koom, la a yɩ rẽgd n tãag zaabre.

Pagã wʋma a Zezi yel-soalmã kɩbar n bao-a n yã masã. A rẽgdã yĩnga, a solga a meng wa a sẽn tõe tɛk n kẽ kʋʋngã, n yet a sũurẽ woto: “Mam sã n tõog n sɩɩs bãmb fuuga bala, mam na n paama laafɩ.” A sẽn maan dẽ, la a sẽn yã t’a zɩɩmã yiib yõkame!

“Ãnda n sɩɩs mam fuugã?” Ad woto sɩd yɩka pagã pɛlenga! A maana wãn n bãnge? Dẽ a Pɩɛɛr yeelame: “Karen-saamba, neb kʋʋng woto na gũbg yãmba n dɩdgd yãmb tɩ yãmb le sokdẽ tɩ yaa ãnda n sɩɩs yãmba?”

A Zezi wẽnemdame n gẽes pagã, n yeele: “Nina n sɩɩs maam, tɩ bõe, pãng n yi mam nengẽ tɩ m bãnge.” Sɩd-sɩda, sɩɩs kãngã ka sɩɩs zaalg ye, bala pãng n yi a Zezi nengẽ n sãoog pagã.

Pagã sẽn yã tɩ b bãngame wã, a wa n wõgemda a Zezi taoore, n digd ne rabeem. A togsa a pʋg neba fãa taoore, n wilg bãagã sẽn yɩ a soaba, la a sẽn da nan paam sãoogrã to-to.

Pagã sẽn togs a pʋg zãng woto, a Zezi zoee a nimbãanega, n yeel woto n keng a pɛlga: “M biiga, fo tẽeb n maag foom. Kẽng ne laafɩ n paam f meng ne bãag ninga sẽn tar foomã.” Ad sɩd yaa sõma tɩ d bãng t’a soab ning Wẽnnaam sẽn yãk t’a na n dɩ naam tẽngã zugã yaa ned manesem sẽn be yamleoog la sẽn zoet neb nimbãanega! Neba yell pak-a lame, la a leb n tõe n sõng-b lame. Matɩe 9:18-22; Mark 5:21-34; Luk 8:40-48; Maankʋʋre 15:25-27.

▪ Ãnda la a Zairus, la bõe yĩng t’a wa a Zezi nengẽ?

▪ Yel-bʋg n da tar pag a yembre, la bõe yĩng tɩ yɩl n kẽng a Zezi nengẽ n paam sõngr ra yaa toog ne-a?

▪ Wãn-wãn la pagã paam sãoogre, la bõe la a Zezi yeel n bels-a?