Ned n sɩɩs a Zeezi fuug t’a bãag sa

Zʋɩf-rãmb wʋsg sẽn be Kapɛrnawom wʋmame t’a Zeezi yii Dekapoll n lebg n watẽ. Wõnda wʋsg wʋmame tɩ yaa a Zeezi n kɩt tɩ sob-kẽengã sẽn da yik mogrã zugã yõke. Tõe me tɩ kẽer bãngame t’a riga zĩn-dãmb tɩ b yi n bas rap a yiibu. Woto kɩtame tɩ “neb kʋʋng” tigim mogrã noor n gũud-a. (Mark 5:21) A Zeezi sẽn ta n sigã, nebã gũbg-a lame, n yãgd n dat n ges a sẽn na n maane.

Karen-doog kãsem a ye n da be nebã sʋk n dat a Zeezi ne a sũur fãa. A yʋʋr la a Zayiruus. A yĩgimda a Zeezi taoore, n tar kosg bal n yetẽ: “Mam bi-pugl n dat n ki. Wa-y n sɩɩs-y-yã-a ne y nus t’a sãoog n da ki ye.” (Mark 5:23) A Zayiruus sẽn kot woto ne a sũur fãa wã, a Zeezi na n maana wãna? Bi-puglã yaa a Zayiruus bi-yende. A nan zemsa yʋʋm 12 bala, t’a ba wã nong-a wʋsgo.—Luk 8:42.

A Zeezi rɩka sor n na n kẽng a Zayiruus yirã. La yell a to sẽn sidgd yĩng wʋsg n na n maane. Neb wʋsg sẽn da pʋgd a Zeezi wã sũy ra yaa noogo, bala b gũudame t’a le maan yel-solemd tɩ b paam n yã. La pag a ye n da be nebã sʋka, tɩ pa rẽ n pak-a ye. A ra bẽeda bã-kɛgenga.

Na maan yʋʋm 12, pʋg-kãngã sẽn yaa zʋɩfã zɩɩm raagdame n pa yõkdẽ ye. A gilga logtoɛɛmb wʋsg nengẽ, t’a ligdã fãa sɛ tɩbsgã pʋgẽ. La bãagã pa tol n lebd poorẽ baa bilfu. Pʋd n “yãngame.”—Mark 5:26.

Bã-kãngã buud sata ned pãnga. Leb n yaa yãnd bũmbu. Bãag a woto sã n tar neda, a pa wae n dat n gom rẽ yell neb sʋk ye. Sẽn paase, a Moyiiz tõogã pʋgẽ, b wilgame tɩ pag zɩɩm sã n daagdẽ, a yaa rẽgdo, tɩ ned ning sẽn sɩɩs-a, bɩ sẽn sɩɩs a futã zɩɩmã sẽn madã segd n so koom, la tɩ baa ne rẽ, a soab na n kell n yɩɩ rẽgd n ta zaabre.—Maan-kʋʋre 15:25-27.

Pagã “wʋma a Zeezi kibare,” n wa na n bao a zĩiga. La a sẽn yaa rẽgdã yĩnga, a soos n wẽdga kʋʋngã, n yet a yamẽ woto: “Mam sã n tõog n sɩɩs b futã bala, mam na n paama maagre.” Sɩd me, a sẽn paam a Zeezi fuugã noor n sɩɩsã bala, zĩig pʋgẽ, a bãngame t’a zɩɩmã yõkame. A paama a meng ne a bãagã.—Mark 5:27-29.

La a Zeezi wẽnemd n soka woto: “Yaa ãnda n sɩɩs maamã?” Yãmb tẽedame tɩ pagã sẽn wʋm rẽ wã, a maana wãna? A Pɩyɛɛr tagsame t’a Zeezi sokrã pa tar neng ye. Rẽ n so t’a yeel yaa: “Karen-saamba, neb kʋʋngã gũbga yãmb n dɩdgd yãmba.” La bõe yĩng meng t’a Zeezi sokd tɩ ãnd n sɩɩs yẽ? A wilga a võore, n yeel yaa: “Ned n sɩɩs maam. Bala, mam bãngame tɩ pãng n yi mam nengẽ.”—Luk 8:45, 46.

Pagã sẽn yã tɩ yellã pukame wã, rabeem yõk-a lame t’a yĩgimd a Zeezi taoore, n digda. Nebã fãa nifẽ, a vẽneg n togsa a bãagã, la sẽn yɩ to-to t’a paam laafɩ. Ne bʋgsem, a Zeezi yeela bũmb sẽn sɩd keng pagã raoodo. A yeelame: “M biiga, fo tẽeb n maag-fo. Kẽng ne laafɩ n paam f meng ne bãag ning sẽn tar foomã.”—Mark 5:34.

Hakɩɩka, ned ning Wẽnnaam sẽn yãk t’a na n dɩ naam dũniyã zugã yaa nin-bʋgsg la nimbãan-zoɛta. Pa ned sẽn baood ãdem-biisã neer n yaool n ka tar tõog ye.