Sak 47
Sũ-sãang sẽn toeem n lebg sũ-no-kãsenga
AZAIRUS sẽn yã t’a Zezi sãooga pagã zɩɩm yiib bãagã, sik kae t’a kɩsa sɩd n paas t’a Zezi tõe n sãooga neb ne yel-solemd ye. Baraare, a Zairus da reng n wa kosa a Zezi t’a wa sãoog a yʋʋm 12 bipugl sẽn bẽed n dat n ki. La masã a Zairus sẽn da zoet bũmb ning n yɩɩdã n maane. A Zezi sẽn da ket n gomd ne pagã, neb n wa n walem a Zairus woto: “Yãmb bipugla kiimi. Yaa bõe tɩ yãmb ket n namsd karen-saambã?”
Ad sɩd yaa kɩba-wẽnga! Yãmb wee n tagse: Ra-kãngã neba sẽn waoogd wʋsgã ka mi a sẽn na n maanega, b sẽn wa n togs-a a bipuglã kʋʋrã ye. La a Zezi wʋma goama, n wẽnemd n yeel a Zairus woto n keng a pɛlga: “Da zoe rabeem ye, tẽ bala.”
A Zezi tũu rao wã sũur sẽn da sãam wʋsgã n kuil a yirã. B taame n yã tɩ zakã ra pida ne yãbr la kaasgo. Neba ra tigma wʋsg n wilgd b sũ-sãanga. A Zezi sẽn kẽ zakẽ wã, a sokame: “Yaa bõe tɩ yãmb maand bʋʋr woto n yãbda? Biiga ka ki ye, a gõeeme.”
Neba sẽn wʋm woto wã, b sɩngame n yaand a Zezi, bala b ra miimi tɩ biigã sɩd kiime. La a Zezi yeelame tɩ biigã gõeeme bala. A ra na n dɩka tõog ning Wẽnnaam sẽn kõ-a wã, n wilg t’a tõe n vʋʋga kũum nana-nana wala b sẽn tõe n nek ned sẽn gõe sõma wã.
Dẽ a Zezi yiisa neba fãa yɩnga, n bas a Pɩɛɛre, a Zak, a Zã, ne kiidã ba la a ma. Rẽ poore a kɩtame tɩ bãmb b nu wã tũ-a n kẽ bi-puglã sẽn gãẽ wã. A Zezi gãda bipuglã nug n yeele: ‘Talitha kumi’ sẽn dat n yeel tɩ: “Bipugla, mam yeta foo tɩ f yiki!” La zĩig pʋgẽ wã, bipuglã yikame n sɩng kẽnde! Bipuglã roagdb sẽn yã rẽ wã, b sũur yɩɩ noog wʋsgo.
A Zezi yeelame tɩ b kõ biigã rɩɩb t’a rɩ, la a kõo a Zairus ne a pagã noor tɩ b ra togs ned ba a yembr bũmb ning sẽn maanã ye. Ne rẽ fãa, kɩbarã saaga zĩig fãa bab-kãng pʋgẽ. Yão wã yaa vʋʋgr a yiib-n-soab a Zezi sẽn maane. Matɩe 9:18-26; Mark 5:35-43; Luk 8:41-56.
▪ Kɩba-bʋg la a Zairus paam-yã, la wãn to la a Zezi keng a pɛlga?
▪ Neba sẽn ta a Zairus yirã, bõe la b yã-yã?
▪ Bõe yĩng t’a Zezi yeel tɩ biigã sẽn ki wã ra gõeeme bala?
▪ Neb a nu wã sẽn zĩnd ne a Zezi n maan kaset ne biigã vʋʋgr yaa ãnd rãmba?