Sak 49

A Zezi leb n gilg n moona Galile

YƲƲM a yiib la bal woto a Zezi sẽn wɩngd ne koe-noogã moonego. Masã a Zezi na n sɩnga maagr ne tʋʋmdã, n maand zem-zem bal bɩ? Ayo, a wɩnga ne moonega n paas menga, n yi n na n leb n tɩ gilg n moon Galile, a naoor a tãab-n-soaba. A kẽngã galʋ-tẽnsẽ la tẽn-bõonesẽ wã fãa, n zãmsd neba karen-dotẽ wã la a moond Rĩungã koe-noogo. A sẽn gilg n yã bũmb ning so-kãngã wã kɩtame t’a kɩs sɩd n paas t’a segd n wɩnga ne koe-moonegã.

A Zezi sẽn lebẽ fãa, a neeme tɩ kʋʋngã rata sãoogr tẽebã wɛɛngẽ la belsgo. B yaa wa piis sẽn ka tar pe-kɩɩm b sẽn sãeege, tɩ b nimbãanega ra tar a Zezi. A yeela a karen-biisã: “Tigisg yaa wʋsgo la tigisdba yaa bilfu. Dẽ yĩnga, bɩ y kos tigisga soaba tɩ b tʋm tigisdba tɩ b kẽng bãmb tigisgã.”

A Zezi tʋʋmdã ra tara na-kẽndre. A boola a tʋm-tʋmdb 12 wã a sẽn da yãk sẽn zems yʋʋmd la woto wã. A ning-b-la yiib-yiib n maan moondb sul a yoobe, la a kõ-b noy moonegã wɛɛngẽ. A wilgame: “Bɩ y ra kẽng bu-zẽmsa sʋk ye, la y ra kẽ Samari neba tẽnsẽ ye. La sẽn yɩɩda bɩ y kẽng Israɛll neba sẽn wẽnd wa piis sẽn menema nengẽ. Bɩ y kẽng n moone n yeel tɩ [saasẽ Rĩungã] kolgame.”

A Zezi sẽn yeel tɩ b tɩ moon Rĩung ningã, yaa Rĩung kãng la a sẽn zãms-b tɩ b pʋʋs t’a wa wã. Rĩungã kolgame wã rat n yeelame t’a Zezi Kirist sẽn yaa Rĩm ning Wẽnnaam sẽn yãkã ra bee be. Sẽn na yɩl t’a karen-biisã kɩs neba kaset tɩ b tʋmda saasẽ goosneema yĩnga, a Zezi kõ-b-la tõog tɩ b sãoog bãad dãmb la b vʋʋg kũum menga. A yeel-b lame tɩ b maan woto fãa zaalem.

Rẽ poore a togsa karen-biisã tɩ b ra bao laog bɩ ligd n zɩ n kẽng moonegã weoog ye. “Bɩ y ra zɩ sãnem bɩ wanzũri bɩ ligdi yãmb sẽbdsẽ ye. La y ra zɩ korg y kẽnda yĩnga bɩ fut a yiibu bɩ neooda bɩ dasaar ye, tɩ bõe, tʋm-tʋmd zemsa ne a rɩɩbo.” Neb nins sẽn nand koɛɛgã na n sak-a lame, la b sõng-b ne rɩɩb la ro-gãaga. Wa a Zezi sẽn yeelã: “Yãmb sẽn kẽ tẽng ninga fãa, a sã n yaa tẽn-kãsenga bɩ tẽn-bila, bɩ y bao ned sẽn zemse n sig a yir hal tɩ ta y loogre.”

Rẽ poore a Zezi wilga b sẽn segd n taas nebã Rĩungã koɛɛg to-to. A yeelame: “La yãmb sã n kẽ yi-kãnga, bɩ y ning-a barka. La yirã sã n zemse, bɩ y kɩt tɩ yãmb laafɩ wa a pʋgẽ, la a sã n ka zemse, bɩ y le reeg y laafɩ. La ned sã n ka reeg yãmba la a ka kelg yãmb goama, yãmb sã n yi yi-kãnga walla tẽn-kãnga, bɩ y pĩms y nao wã tom.”

A Zezi wilgame tɩ tẽng ning fãa sẽn na n zãgsa bãmb koɛɛgã, bʋ-kaoorã tẽn-kãng zug na n sɩd yɩɩ toaaga. A wilgame: “Mam yeta yãmb sɩda tɩ bʋʋda daare tẽn-kãng na n paama toog n yɩɩd Sodom ne Gomoor.” Matɩe 9:35–10:15; Mark 6:6-12; Luk 9:1-5.

▪ Wakat bʋg la a Zezi gilg Galile n moon a naoor a tãab-n-soaba, la rẽ kɩtame t’a kɩs sɩd ne bõe?

▪ A Zezi sẽn wa n tʋm a tʋm-tʋmdb 12 wã tɩ b tʋg n moonã, no-bʋs la a kõ-ba?

▪ Bõe yĩng tɩ zems t’a karen-biisã zãms neba tɩ Rĩungã kolgame?