A Zeezi moondame la a zãmsd a tʋm-tʋmdbã rẽ

Yʋʋm a yiib la woto a Zeezi sẽn wɩngd ne koɛɛgã moonegã. A na n maaga ne tʋʋmdã masã bɩ? Ayo. A pʋd n wɩnga ne moonegã n yɩɩd pĩndã. A ‘saaga [Galɩle] tẽn-bɛd la tẽn-bãooneg fãa n zãms nebã b karen-dotẽ, la a moon Wẽnnaam soolem koe-noogã, la a maag bãad-dãmba la koms-rãmb buud toay-toay fãa.’ (Matye 9:35) A sẽn yã bũmb ninsã kɩtame t’a bãng t’a segd n modgame tɩ koɛɛgã ta neb wʋsgo. La bõe n da na n sõng-a t’a tõog n maan dẽ?

Gilgrã sasa, a yãame tɩ neb n sɩd rat tɩ b sõng-b tɩ b bãng Wẽnnaam sõma, la b paam belsgo. Nin-kãensã ra yaa wa piis sẽn ka tar pe-kɩɩma, bala b yɛɛme, n pa tar sõangd ye. B nimbãaneg yõka a Zeezi, t’a yeel a karen-biisã yaa: “Koodã sẽn dat tigsgã yaa wʋsgo, la tigsdbã sõor paoodame. Dẽ yĩnga, kos-y tigsgã soab tɩ b tʋm tʋmtʋmdb b pʋʋgẽ wã.”—Matye 9:37, 38.

A Zeezi ra mii yellã tɩɩm. A tigma a tʋm-tʋmdb 12 n tʋm-b yiib-yiibu, tɩ b na n tɩ moon koɛɛgã. La a reng n kõ-b-la noy la saglse. A yeel-b-la woto: “Da kẽng-y bu-zẽmsã nengẽ ye, la y ra kẽ Samaari nebã tẽmsẽ ye. Bas-y be la y kẽng Israyɛll buudã sẽn yaa wa piis sẽn menemã nengẽ. Kẽnd-y la y moondẽ tɩ arzãn [“saasẽ,” MN] soolem kolgame.”—Matye 10:5-7.

Pʋʋsg ning a Zeezi sẽn wilg a karen-biisã pʋgẽ, a ra goma soolem yelle. Soolem kãng la a sẽn yeel tɩ b moon tɩ kolgame wã, bala a Zeezi Kiris sẽn yaa soolmã Rĩm Wẽnnaam sẽn yãkã ra bee tẽngã zugu. La bõe la a karen-biisã na n maan tɩ wilg tɩ b tʋmda soolem kãng yʋʋr yĩnga? A Zeezi kõ-b-la tõog tɩ b na n sãoog bãad-rãmba, la b vʋʋg neb sẽn ki. La b na n maana rẽ fãa n pa reeg bũmb ye. Woto wã, tʋm-tʋmdbã na n maana wãn n paam b noor dɩɩbo, la bũmb a taab sẽn yaa tɩlɛ?

A Zeezi yeela a karen-biisã tɩ b ra bao ligd bɩ teed n zɩ b kẽndã yĩng ye. B ra pa segd n zã sãnem, wanzuri bɩ lagf b sẽbdsẽ ye. B ra pa segd meng n zɩ korg sẽn na n ning rɩɩbo, bɩ fut a taab wall neooda ye. Bõe yĩnga? A Zeezi yeel-b-la bũmbu, n wilg tɩ b segd n basa b yam. A yeelame: “Tʋmtʋmd togd n paama a rɩɩbo.” (Matye 10:10) Neb nins sũy sẽn na n yɩ noog ne koɛɛgã na n gesame tɩ karen-biisã paam sẽn yaa tɩlɛ wã. A Zeezi yeel-b lame yaa: “Yãmb sã n tɩ sig ned zakẽ, pa-y be hal tɩ ta y loogre.”—Mark 6:10.

A Zeezi leb n wilg-b-la b manesem sẽn segd n yɩ to-to, b sã n na n taas nebã Rĩungã koɛɛgã. A yeelame: “Y sã n wa kẽed zakẽ wã, bɩ y yeel tɩ laafɩ zĩnd ne zakã rãmba. La zag-kãng sã n zemsa ne laafɩ, bɩ yãmb laafɩ wã zĩnd ne a nebã. La a sã n ka zems ne laafɩ, bɩ yãmb laafɩ wã leb y nengẽ. La b sã n ka reeg yãmba, la b ka kelg yãmb goamã, bɩ y yi zag-kãnga, walla tẽn-kãng pʋga, la y pĩms-y y naowã tom.”—Matye 10:12-14.

Karen-biisã tõe n taa tẽng ning menga, tɩ b fãa zãgs tɩ b kõn kelg koɛɛgã ye. Bõe n na n paam tẽn-kãng nebã? A Zeezi wilgame tɩ sɩbgr ning b sẽn na n paamã na n yɩɩ toaaga. A yeelame: “Mam yeta yãmb sɩda tɩ bʋʋdã daare, Sodom ne Gomoor sɩbgrã toolem ka na n ta tẽn-kãng rẽndã ye.”—Matye 10:15.