Sak 55

Karen-biis wʋsg basa a Zezi tũubu

A ZEZI ra zãmsda neb karen-doog pʋgẽ Kapɛrnawom, n wilgdẽ t’a yaa bur meng-meng sẽn yit yĩngri. Galile Mogrã yaang rʋʋnde, a Zezi rag n kõo neba bur la zĩm ne yel-solemde. Neba sẽn yi be n lebgã b yãa a Zezi, t’a ra sɩng sõasg bur sẽn yit yĩngrã wɛɛngẽ ne-ba. La wõnda yaa sõs-kãng n kẽngd taoor karen-doogẽ wã.

A Zezi kẽnga taoor ne sõasgã woto: “La bur ninga mam sẽn na n kõ wã yaa mam menga mam sẽn na n kõ tɩ yɩ dũniyã vɩɩma.” Yʋʋm a yiib sẽn deng rẽ, yʋʋmd 30 Pakã wakate, a Zezi rag n yeela a Nikodɛm tɩ Wẽnnaam nonga dũniyã wʋsg hal t’a kõ a Biriblã t’a yɩ b Fãagda. Woto, a Zezi ra wilgda masã tɩ makr wɛɛngẽ, ned ning fãa sẽn na n wãb a nemdã, sẽn dat n yeel t’a sẽn na n tẽ maoongã yẽ sẽn da na n maan rẽ poor bilfã, tõe n paama vɩɩm sẽn ka sɛta.

Baasg zãnga, a Zezi goamã sãama neb wʋsg sũyã, tɩ b soke: “Bãmb na n maana wãn n kõ tõnd b yĩnga tɩ d rɩ.” A Zezi ra ratame t’a kɛlgdbã bãng tɩ b sẽn segd n dɩ a yĩngã yaa makr buudu. Sẽn na yɩl n wilg rẽ vẽenega, a Zezi yeela bũmb sakr sẽn yaa toog n yɩɩd menga, b sã n dɩk-a wa bũmb sẽn na n maan sɩd-sɩda.

A Zezi yeelame: “Yãmb sã n ka wãb Ninsaal Biiga nemdo, la y ka yũ a zɩɩm, yãmb ka tar vɩɩm ye. Ned ning sẽn wãbd mam nemd la a yũud mam zɩɩma tara vɩɩm sẽn ka sɛta. La mam na n vʋʋga yẽnda yaoolem daare. Tɩ bõe, mam yĩnga yaa rɩɩb menga, la mam zɩɩma yaa bõn-yũudl menga. Ned ninga sẽn wãbd mam nemd la a yũud mam zɩɩm, a bee ne maam, la mam bee ne yẽnda.”

Sɩda, a Zezi sã n da sagendame tɩ b wãb ninsaal nemd la b yũ a zɩɩm, sɩd-sɩda woto ra yɩtẽ-la wẽng wʋsgo. La yaa vẽeneg t’a Zezi ra ka rat n yeel woto ye. A wilgda vẽeneg bal tɩ neb nins fãa sẽn dat n paam vɩɩm sẽn-kõn-sa wã tog n tẽe maoongã a sẽn da na n kõ wã. A ra na n kõo a ninsaal yĩngã sẽn zems zãngã la a raag a zɩɩmã tɩ yɩ maoongo. Ne rẽ fãa, a karen-biisã meng sʋka, wʋsg ka bao n na n wʋm a goamã võor ye. B yeelame: “Gom-kãngã yaa toogo. Ãnd n tõe n deeg yõ wã.”

A Zezi sẽn bãng t’a karen-biisã wʋsg yẽgemdame wã, a yeelame: “Yõ wã rat n yoo yãmb yam la? Yãmb sã n yã Ninsaal Biiga sẽn dʋʋd n dabd zĩig ninga b sẽn da be wã yãmb na n maana wãna? . . . Goam nins mam sẽn togs yãmba yaa sɩɩga la vɩɩm. La kẽer bee yãmb sʋk n ka tẽed ye.”

A Zezi paasame: “Yaa woto yĩng la mam da yeel yãmb tɩ ned ka tõe n wa mam nengẽ tɩ ka m Ba n bool-a ye.” Rẽ kɩtame t’a karen-biisã wʋsg bas-a n ka le tũud-a ye. Woto a Zezi wẽnemdame n sok a tʋm-tʋmdb 12 wã yaa: “La yãmba yãmb me ka rat n bas maam la?”

T’a Pɩɛɛr leoke: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama. La tõnd tẽeme la d miimi tɩ yãmb yaa Kirist sẽn yaa Wẽnnaam Sõng Soaba.” Ad woto yaa kɩs-sɩd goam tɛkẽ! A Pɩɛɛr yeela woto, baa sẽn tõe tɩ yẽ ne tʋm-tʋmdb a taabã ka wʋm a Zezi zãmsgã võor zãng yel-kãngã zugã.

A Pɩɛɛr leokrã yɩɩ a Zezi noogo, la a baas n yeela woto: “Ka maam n tũus yãmb piig la a yiiba wɛ? La yãmb ned a ye n yaa [tẽn-kãn-neda].” A ra gomda a Zida Iskariot yelle. Tõeeme tɩ wakat kãnga a Zezi yãa manesem wẽng ‘sɩngr’ a Zida nengẽ.

Sẽn pa kaoose, a Zezi sãama neba sũyã, bala b makame n na n kɩt t’a yɩ rĩm t’a zãgse. Dẽ, tõeeme masã tɩ b tagsdẽ: ‘Wãn to la yẽ tõe n yɩ Mesi wã, sẽn mik t’a ka sak naam ning sẽn tog ne Mesi wã?’ Yel-kãngã ra nan ket n bee neba yamẽ. Zã 6:51-71; 3:16.

▪ Ãnd rãmb yĩng la a Zezi kõt a nemdã, la wãn-wãn la nin-kãens ‘wãbd a nemdã’?

▪ Bõe la a Zezi leb n yeel yɛs tɩ sãam neba sũyã, la bõe la a ra rat n wilg vẽenega?

▪ Karen-biis wʋsg sẽn bas a Zezi tũubã, a Pɩɛɛr manesem yɩɩ wãn-wãna?