A Zeezi goamã sãama neb wʋsg sũyã

A Zeezi bee Kapɛrnawom karen-doogẽ wã n sõsd ne nebã. A wilg-b lame tɩ yaa yẽ la bur sẽn yit saasẽ wã. A ra zoe n sõsa rẽ zug ne neb kʋʋngã sẽn yi Galɩle mogrã rʋʋnd n wa wã. Bãmb la a sẽn da maan yel-solemd n dɩlgã.

Karen-doogẽ wã, a Zeezi yeela nebã woto: “Yãmb yaab-rãmbã rɩɩ mand we-rasempʋɩɩgẽ wã, la b kiime.” La a paasa woto: “Mam yaa bur-vɩɩg sẽn yi arzãn [“saasẽ,” MN] n sigi. Ned sã n dɩ bur-kãngã, a na n vɩɩmda wakat sẽn kõn sa. La bur ning mam sẽn na n kõ dũni wã vɩɩm yĩngã, yaa mam yĩngã.”—Zã 6:48-51.

Yʋʋmd 30 Pakã sasa, a Zeezi ra yeela a Nikodɛm tɩ Wẽnnaam nonga dũniyã hal n kõ a Biigã t’a na n yɩ ãdem-biisã fãagda. Masã wã, a Zeezi yeela nebã tɩ yaa tɩlɛ tɩ b wãb yẽ yĩngã nemdo, rat n yeel tɩ b tẽ a kũumã sẽn na n yɩ maoongã. Yaa rẽ bal n tõe n kɩt tɩ ned paam vɩɩm sẽn kõn sa wã.

A Zeezi gomdã pa yɩ nebã noog ye. B soka woto: “Nin-kãngã na n yɩɩ wãn n kõ tõnd a yĩngã tɩ d wãbe?” (Zã 6:52) A Zeezi ra ratame tɩ nebã bãng tɩ yẽ gomdã yaa makre, pa sɩdem-sɩdem ye. A sẽn paas bũmb ningã sɩd wilgda rẽ.

A Zeezi yeela nebã yaa: “Mam yeta yãmb sɩd-sɩd tɩ yãmb sã n ka wãb Ninsaal Bi-riblã nemdo, la yãmb sã n ka yũ a zɩɩmã, yãmb ka tar vɩɩm y pʋsẽ ye. Ned ning sẽn wãbd mam nemd la a yũud mam zɩɩm tara vɩɩm sẽn kõn sa. . . . Bala, mam nemdã yaa rɩɩb sɩd-sɩda, la mam zɩɩmã yaa bõn-yũudl sɩd-sɩda. Sẽn wãbd-a mam nemd la a yũud mam zɩɩmã paada mam pʋgẽ.”—Zã 6:53-56.

Tags-y n ges-y gom-kãensã sẽn le sãam nebã sũy to-to! B tagsame t’a Zeezi ra ratame tɩ b wãb ninsaal nemdo, la b yũ zɩɩm, n kɩɩs Wẽnnaam sẽn yeel tɩ b ra rɩ zɩɩmã. (Sɩngre 9:4; Maan-kʋʋre 17:10, 11) La a Zeezi pa yeel tɩ b sɩd wãb yẽ nemdã la b yũ a zɩɩmã ye. A ra rat n wilgame bal tɩ ned ning sẽn dat vɩɩm sẽn kõn sa wã tog n talla tẽeb ne yẽ sẽn na n kõ a vɩɩmã tɩ yɩ maoong n fãag ãdem-biisã. Zu-bʋko, a karen-biisã wʋsg pa wʋm a gomdã võor ye. B yeelame: “Zãms-kãngã reegr yaa toogo. Ãnda n tõe n sak-a?”—Zã 6:60.

A Zeezi bãngame t’a karen-biisã kẽer yẽgemdame. A sok-b-la woto: “Yõwã tuka yãmb sũur la? La yãmb sã n yãnd Ninsaal Bi-riblã t’a zẽkd n lebd a sẽn dag n beẽ wã, na n yɩɩ a wãna? . . . Goam nins mam sẽn togs yãmbã wata ne Sɩɩg-sõng la vɩɩm. La neb kẽer n be yãmb sʋkã n ka tẽed ye.” Rẽ tɛka, a karen-biisã wʋsg basame n ka leb n tũud-a ye.—Zã 6:61-64.

Rẽ n so t’a Zeezi sok a tʋm-tʋmdb 12 woto: “La yãmb yẽ, yãmb ka rat n loog la?” A Pɩyɛɛr leokame: “Zu-soaba, tõnd na n kẽnga ãnda soab nengẽ? Yãmb tara vɩɩm sẽn kõn sa wã goamã. La tõnd tẽeme, la tõnd bãngame tɩ yãmb yaa sõmblem soab sẽn yi Wẽnnaam nengẽ.” (Zã 6:67-69) Ad gom-kãensã wilgdame tɩ b kɩsa a Zeezi sɩda. Yaa sɩd t’a Pɩyɛɛr ne tʋm-tʋmdb a taabã me ra pa wʋm a sẽn yeelã võor ye. La b pa loog n bas-a ye.

A Pɩyɛɛr gomdã yɩɩ a Zeezi noogo. La a yeelame: “Ka maam n tũus yãmb piig la a yiibã wɛ? La yãmb ned a ye n yaa zĩnã [“zãmb soaba,”MN].” (Zã 6:70) A Zeezi ra gomda a Zʋdaas Iskaryo yelle. Tõe tɩ wakat kãng t’a Zeezi bãngame t’a Zʋdaas sũurã sɩng n lebgda wẽnga.

Baasgo, yaa vẽeneg t’a Zeezi sũurã ra noomame. Bala, a Pɩyɛɛr ne tʋm-tʋmdb a taabã pa bas a tũub ye. B sakame me n na n kell n sõng-a n moon koɛɛgã sẽn yaa tʋʋmd sẽn fãagd yõyã.